دخلت شمه ( 13 سنه ) على عمها سلطان وهو في الميلس ويا أبوها وأخوها عبدالله( 25 سنه يشتغل و متزوج بنت عمه ناصر )، وعمها هذا أغلى انسان عندها من عقب أمها وأبوها ، سلمت عليه ويلست عداله.. العم سلطان: هلا والله بغناتي شميمه..
شمه وهي هب عايبنها اللي نقال: اووهوو .. ماعرف من وين اطلعولي هالاسامي العجيبه المبتكرة ..عمي عاد كم مرة قتلك هالاسامي مالك مادانيهن .. يعني شو بيستوي لو دلعتوني بشوشو مثلا ..
عبدالله :: جيه لايكون أختي رقاصه وأنا مادري..
أبوها :: انتي ناقصه دلع أصلا ..
شمه:: اللي يسمع عاد الله يخليك يابويه مقطعين عماركم من كثر ما تدلعوني .. وبعدين يا اخ عبدالله اذا تكلمت الملائكه انجبت الشياطين..
عبدالله :: والله محد شيطان غيرج انتي في هالبيت
شمه: عمي طالعه .حاط دوبه من دوبي ..
العم سلطان :: انزين انتي خليهم هم وقوليلي شو تبيني ادلعج
شمه وهي مبتسمه بكل فخر: شوشو مثلا
ابوها +عبدالله: ههههههههههههههه .. عمها: شووو ه؟؟!! شو هالمنكر بعد عنبوه قلت الاسامي شو ها بعد شوشو مادري شوشي
عبدالله : هههههههه عمي لا تسويلها سالفه ، انته الحين خبرني شو رايك بالبكره تنفع ندخلها في الركض اللي بيستوي يوم الجمعه الفير عقب الصلاه..
شمه : ايه انته .. شو لا تسويلها سالفه .. اصلا هو مايي البيت الا عشاني ولا عمي
العم : لااا اكيد طبعا ايي عشانج .. اصلا هم اشوفهم في العزبه
ابوها:: افاا يا شمومتي انا ما تبيني .. الا تسولفين ويا عمج ويالستله في حضنه تعالي انا متوله عليج..
العم :: ايلسي ما عليج منه .. حشا حاسدني على هالخميس اللي ايلسه وياكم
عبدالله:: شموم لا تصدقين عمرج وايد .. بس حركات جدامج
شمه :: أقول أبويه تفدى ناس تراهم شوي وبيموتون من القهر والغيره عشان محد عاطنهم سالفه..
.. ويدخل عليهم هذيج الساعه محمد ولد عمهم سلطان0 وهو اكبر عن شموه بست شهور بس ..
محمد: السلام عليكم.. شو السالفه ليش تضحكون ؟؟
شمه+عبدالله+عمها وابوها:وعليكم السلام
العم سلطان : من انته من الصبح ،
شمه :: يالله كان ناقصني هالرزه انا
محمد : أول شي أنا كنت يالس ويا رشود ( أخو شمه اكبر عنها و عمره 18 سنه) وثاني شي لا تخلون هاي ام لسان ترمسني انا ماسك لساني عنها
العم: استح على ويهك هاي بنت عمك وتسولف وياك
ابوها: لا حليله ماقال شي غلط .. هي اللي استلمته من اول ما دخل
شمه : هاااه ابويه توك متوله عليه .. والحين مستوي ضدي شياك
عبدالله: ما قتلج لا تاخذين مقلب بعمرج وايد .. ( وهنه الكل يضحك على شموم وهي منتفخه على عبدالله ومحمد )
محمد : اقول شمه تعالي اباج خاري انا ورشود بنقولج شي خطير
شمه: انتو ويه اخبار خطيره .. يالله بنقوم وياكم.. بردلكم عقب شوي عمي لا تخلي عبدالله يحش فيه
عمها : انشالله بس لا تبطون
شمه عقب ماطلعوا: هاه شعندك .. شو الاخبار الخطيره اللي عندكم
محمد :هههههههه ..حليلج صدقتي انتي.. لا ماشي بس تعالي بنلعب بته ونبغيج تلعبين ويانا
طالعته بنص عين ..بس بعدين عيبتها السالفه وسارت وياه
شمه على الرغم من لسانها الطويل شوي الا انها طيبه وحبوبه .. صحيح ولاديه شوي بس غصبا عنها لانه المحيط اللي عايشه فيه كله شباب.. حتى بنات عمها ما تشوفهم الا في المناسبات لانه ما يخلونهم يطلعون في أي وقت يبونه على عكس الشباب ..
شمه عندها عمين ناصر وسلطان .. ناصر من بعيد لبعيد وياهم وعكسه تماما سلطان اللي مستحيل يمر أسبوع ماييهم يتغدى عندهم .. هذا من غير الييه كل يوم حق العزبه اللي مسوينها في الذيد مع بعض (ابوها وعمها ) .. معنه عايش في دبي وهم في ام القيوين .. من غير هاي العزبه واللي هي خاصة بالبوش بس ، أمها بعد بدويه ومسويتلها عزبه في مهذب خاصه بالدبش والبقر والمعز والدياي وغيره..
طبعا ايي عمها عزبة الدبش اول على أساس يخلي محمد ولده مع عيال اخوه ويشل اخوه وعياله الكبار عبدالله و خليفه( أخو شمه بعد وعمره 23 سنه وهذا اعقد اخوانها فكرا أخفهم دما.. انتو تخيلوها عاد )
شمه طبعا ربيعة امها .. يعني مستحيل تسير العزبه بلاها على قولتها هذي بترولي ما اسير بلياها..
من يوصلون تيلس شمه ويا اخوها رشود ومحمد ولد عمها سلطان و حمد ( هذا بعد اخوها اكبر عنها بس اصغر عن رشود يعني عمره 16 سنه تقريبا) .. كانوا رشود ومحمد دووم مع بعض بس احيانا ينقع رشود خيانه ويسير ويا حمد يدورون أعشاش الحمام الراعبي في الغاف ويطلعون منهن العيال اذا فيهن ..فما يخلون غافه عدال العزبه ما ينبشونها .. طبعا في هالوقت شموه ومحمد ييلسون مع بعض يتناقرون شوي ويلعبون شوي .. بس محمد كان يحاول يخفف عليها يعني ما يبغي يزعلها .. هيه لاحظت هالشي فزاد احترامها اله .. بس بعد المشادات احيانا ما توقف على شكل سوالف طبعا..
العم واخوه وعياله ياخذون راحتهم هناك في العزبه الثانيه .. وينسى العم انه وراه درب دبي .. والعيال مستانسين هنه .. ما يخلون عظام الثرى .. ولا يخلون عمبر . وكرة قدم هذا كله يلعبونه وشو الوناسه لاتخبرون .. وشمه جنها واحد من الشباب وياهم .. طبعا هيه ما تكيف وايد الا اذا ولد عمها وياهم وهو نفس الشي بس لا تفهمون غلط .. لانهم من نفس الطينه عشان جذه ..
بس الدراسه اللي معروف أن شمه ماشالله عليها شاطره وحمد بعد بس رشود هاه يعني ومحمد عاد اخس عنه .. كان متقدم على شمه بصف هي اول اعدادي وهو ثاني اعدادي .. بس طبعا عقب سنه الكل (شمه ومحمد ) ثاني اعدادي ..وحمد ثاني ثانوي ورشود بالقوه والدز طلع منها بنسبه اكيد ما ترفع الراس بس الحمدلله يوم نجح..
هذيج الايام كان العم سلطان وده ياخذ محمد ورشود وياهم العزبه الثانيه على اساس يعلمهم على البوش شوي .. بس محمد كان يتعلث انه مب فاهم بعض المسائل وبيخلي شموه تشرحله .. وطبعا رشود ما بيسير عنه
كانت شموه تستانس يوم يتمون لانها تضيق بروحها .. فيوم عقب ما ساروا الرياييل عزبتهم.. شمه تقول حق محمد:: شو من المواد يبت وياك اليوم
محمد :: اظني علوم
حمد :: ظنك .. حلوه هاي تراك تقول تباها تشرحلك
محمد :: ليش شموم انشالله صدقتي؟؟!!! ههههههه.. هاي يسمونها علثه
شموه:: شموم فعينك .. اصغر عيالك قالولك ( ويايه بتكمل بس حمد قاطعها)
حمد وهو معصب : لحظه انتي .. يعني حضرتك قصيت عليهم .. وتعلثت بالكتاب؟؟
محمد: هههههه .. تروم انته عليه؟؟ (ويقولها بفخر بعد)
حمد : لا طبعا .. بسم الله عليه .. الحين شياب السبال ( ويشر على محمد)عند الغزال (ويشر على نفسه)
شمه:: ههههههههه .. حلوة بس ولد عمي مب سبال لو سمحت يعني
رشود شكله ما عيبه الكلام وبالذات دفاع شموم عن محمد .. خاصه أن محمد موضح حق رشود انه يرتاح حق شمه (مثل ما قلت قبل انه رشود ومحمد اكثر من عيال عم في علاقتهم)
رشود : حمود تعال وخل حمد ويا شمه رواحهم لا تعطيهم ويه
محمد : ليش معصب انته .. تعال بنلعب كوره الحين
حمد : شموووم شتبينه تدافعين عنه .. وبعدين انا بخبر عمي يوم بيي
محمد : خلها تدافع عني .. وهذي يزاتي اني تميت عشان أونسكم
شمه (عقب ما احرجها حمد): انا دافعت عشان اذا هو سبال فبنت عمه اكيد سباله.. وبعدين ما فيها شي اذا تم ويانا .. يالله قوموا نلعب
نشوا محمد وشمه ورشود يلعبون وحمد سار ييلس ويا امه (اللي ما وضحته قبل انه حمد ما يرتاح وايد حق محمد يمكن يستتفهه أو بالأصح حمد اللي رزين زيادة عن اللزوم بعكس رشود والخرشه العود محمد وعلى راسه شمه)
.. على المسا عقب المغرب وصلوا الرياييل فسار حمد عند عمه وقاله عن سالفة محمد .. سكت عمه عنه وبعدين زقر محمد وقاله يالله استعيل ورانا درب دبي
.. يا ترى ممكن بومحمد يكون عصب من حركة ولده مع انه هو وايد متفهم ويعرف انه الاولاد يستانسون على اللعب اكثر ؟؟
المهم .. مابحرق الأحداث اللي ممكن تستوي بعدين .. ترقبوا الجزء الثاني

اترياااااااااااااااااا ردودكم
وينكم
؟؟؟؟؟؟؟

القصة كشخة خيوووووووو



يسلمووووووووووو و يعطيج الف عافية .. و ننتظر البقية عاجلا



أميرة الليل

[ALIGN=CENTER]

مشكووره عنوني على القصه ..

وشكلها حلوووه ..

وننتظر الباقي منك ..

والله يعطيك العافيه دوووم ..

:)

*.. سهووودة ..*

[/ALIGN]