[ALIGN=CENTER]السلام عليكم ورحمه الله وبركااته :) [/ALIGN]

[ALIGN=CENTER]عــاش من شاافــــني :p

زي ماقلتلكم قبل انا انسان ماحب الف ودور احب اخلص شغلي ونزل الي براسي :o

المرور هالكلمه تجيب الحموضه لنا :D وتجيب الضغط للي رخصته او استمارته منتهيه { 1}

والمرور كلمة جايه من المر والمر هو الشئ اللي طعمه ماله داعي بقوة يعني المرور بكبره ماله داعي

وطبعا المرور مر بروتينه ومر باجراءته اللي ما تنتهي ومر بكثرة مراجعاته ومر بحجم التثقيف اللي موجود

بعساكرنا ومر بحجم التعامل اللي تلقاه من هالعساكر ومر من جميع النواحي مر وعلى ما قال المثل

مرمر زماني يا زماني مرمر :rolleyes:


مواقف مع المرور :) حدث ولا حرج :cool:


كنت في نوبتا من النوبات طالع من الرياض وهالسالفه ماهي قديمه وقلت يا ولد صر نظامي مره وحده بعمرك واتركك من الطفاقه والسرعه اللي مالها داعي وتوكلت على الله وربطت حزام السلامه وثبت السرعه على ال120

وشغلت ام كلثوم اللي تقول انت عمري وطبعا مع ام كلثوم انواع الخيال تتخيل انك ماسك يد حبيبتك وتتمشون بالقناطر الخيريه ;) ولا لامنك غيرت الشريط وطلعت لك احلام تقول خلك بجنبي قريب

-----> وش دخل هالسالفه بالمرور {4 }

<----- من النوع الي يجر في السوالف :D

ومعهالتخيلات اللي كنت اشعر فيها صحيت على ضربه قوية في القزاز الامامي لقيت جراده من النوع المستصح

هي اللي ضاربه على القزاز قمت وشغلت المساحات علشان انظف القزاز وبعد ما نظفته قلت يا ولد ارجع

للخيالات والاحلام عاد ماهو دائم اتخيل اني احب ساعات اتخيل نفسي لاعب كوره مشهور ومطارد من المعجبين

والمعجبات :D وما امداني اكمل الا اللوحات تعلن ان فيه تفتيش بعد كيلوين ويوم جيت التفتيش شفتهم موقفين بشر كثير وعرفت ان هالعالم الواقفه قاعدين يوزعون عليه مخالفات

وانا اضحك باعماقي واقول لو هالعالم ملتزمه بالنظام ما كان وقفوها وودي اصفق لنفسي علشاني ملتزم بالنظام :)

ويوم جاء دوري وانا متاكد ان العسكري بيقولي تسهل حتى الدريشه ما فتحتها الا الرجال يياشر ويقولي افتح

الدريشه فتحتها وتوقعته يقول يا سلام على الالتزام بالنظام الا المفاجاة يقولي الرخصه والاستماره

هااااااااااااااااااااااه ليه ياعسكري ليه الرخصه والاستماره قالي اسفط على جنب وتعرف ليه يا ولد بدل غير قال اقول

اسفط على جنب وسفطت على جنب وجيته وقلت له وش القصه قال انت مخالف قلت له وش نوع المخالفه قال

انت مسرع قلت نعنبوك السرعه مثبته على ال120 قال لا تهك علينا انت مسرع وسرعتك فوق ال145 يا رجل

خاف الله قل غير هالكلام ابد الرجال مصمم قلت يعني السياره عندي فيها خلل قال لا ما فيها خلل لكن انت يوم

قربت من الرادار فتحت مساحات السياره علشان تظلل على الرادر يا رجل قل غير هالكلام قال ابد ما عندي غيره

بتاخذ المخالفه وانت تضحك قلت له نعنبوك جراده كبر جبهتك صابخه بالقزاز وشغلت المساحات علشان انظف

مكانها قل لا تهك علينا قلت تعال وشف بعيونك مكان الجراده قال لا يكثر بس ووكلت امري لله وقلت الله لا يحللكم

ولا يبيحكم يا ضلاليه يا ظلمه يا متخلفين انا وش دراني اصلن ان فيه رادر ومتخبي تحت الكوبري الا اذا ستيف

اوستن مسلفني عيونه علشان اشوف هل فيه رادر تحت الكوبري ولا لا الحاصل اخذت المخالفه وانا اضحك

وعطيتها لواحد ذيب الغاها على طول لكن اللي ما يقدر يلغي مثل هالمخالفه وش ذنبه اذا فيه مثل هالبشر متخلفين :(

فيه واحد يقولي انه قبل فتره يتمشى بالهاف مون بلحاله وهو يتمشى الا السياره اللي تناقز قدامه يقول وتقلبت ولا

خمس قلبات وطاح منها اثنين يقول يوم قربت منهم الا رجال امريكي وزوجته يقولي واسفط سيارتي وانزل والقى

الرجال يون واقرب للمره والمس نبضه والقى لا نبض ولا حركه عرفت انها ودعت يقول وجت الدوريه الا اثنين

من ربعنا اللي بكراتينهم يتلمسون الرجال والمره برجلينهم ويقولون هذا حي لا ماهو حي الا حي شفه ابرجفه

وبيتكلم الله من زين الدبره بعد يقول قلت لهم المره متوفيه والرجال حي بس يبي له اسعاف يقول وشوي الا الرجال

يقوم ويوقف على رجول ويقول مااااي وايف مااااي وايف قال لي واحد منهم وش يقول هالافرنجي يقول قلت له يقول زوجتي زوجتي يقول وهو يلتفت عليه ابو الشباب ويقوله يور وايف ديد ديد ديد موت موت { 1}

يقول وهو ينصرع الرجال الظاهر انه مات بازمه قلبيه ماهو بالحادث يقول شغلت موتري ومشيت وانا اترحم على حال مرورنا ودورياتنا :(

وهذا واحد ثاني يقولي ايام اول كنا من هواة الدبابات وكنت انا على دباب وخويي صديق عمري على دباب ثاني

نمشي يقول وفجاة اختل توازن خويي وطاح وصار هو بجهه والدباب بجهه يقول واسفط دبابي واركض على

جيت وحده من هالدوريات يقول يوم قربت من خويي الا ما يتحرك يقول وقربوا منه راعين الدوريه يتلمسونه

برجولهم ويرجفونه وما شافوه يتحرك قالوا انت وش تقرب له قلت انا صديقه قالوا عظم الله اجرك خويك مات

يقول واقعد اصيح واولول يقول وينقز واحد من حقين الدوريه ويجيب بطانيه ويغطي خويي يقول وانا اللي ابكي

وابكي والعالم تحاول تهجدني وخويي مغطى بالبطانيه يقول واروح واقضب يدين خويي وانا ابكي اتلمسه يقولي

وشوي الا خويي قام وقال وش السالفه ووش في العالم متجمعه يقول وانا اللي احظنه واقعد اصيح من الفرحه يقول

بغيت اقوم اجلد راعين الدوريه نعنبوهم موتوا الرجال وهو ما مات :)

نوبتا من النوبات كنت طالع من الورشه بسيارتي متجه للبيت وانا داخل للحي اللي بيتنا فيه الا تفتيش وكالعاده

التفاتيش بالمنطقه الشرقيه ما تصير الا ايام استلام موظفين الشركات سواء ارامكوا او سابك او سكيكو او غيرها

من الشركات لرواتبهم يعني المرور يوقت مضبوط ;)


يوم وقفت عند التفتيش قالي الرخصه والاستماره وكانت الرخصه بجيبي بس الاستماره بما اني مدخل السياره

للورشه فما اقدر اخليها بالسياره قلت له هذه الرخصه وهذه ورقه من الورشه تثبت ان السياره كانت بالورشه وكل

الاغراض اللي فيها منزلها قال اسفط على جنب قلت خاف الله يا الاخو ترى هذا حرام حاول تتفهم وضعي انا جاااي

من الصناعيه قال ابد اسفط على جنب ولا تكثر دندره قلت الشكوى لله مخالفه مخالفه ويوم وقفت عند اللي يكتب

المخالفات الا احد عشر هندي مافيهم سعودي الا انا ويجيك الخبل اللي وقفني يكلم خويه بصوت عالي وهو يقول

اخلص بسرعه وحاول تمشي المواطنين بسرعه التفت عليه وقلت يا الاخو نعنبوك ما تعرف الفرق بين كلمة

مواطن وبين كلمة مقيم ترى المواطن هو ابن البلد والمقيم هو الاجنبي ويلتفت علي وهو معصب ويطالع لخويه وقال

عطه مخالفه عطه مخالفه تبسمت له وقلت خلاص ابناخذ مخالفه بس حاول تعرف الفرق بين كلمة مواطن ومقيم

وما خلاها خويه بقلبه اللي يكتب المخالفات يوم جاء يكتب المخالفه وطبعا الرخصه قدامه فيها

الاسم الثلاثي قال وش اسم جدك قلت ماهو شغلك اكتب المخالفه على نفس الاسم الموجود بالرخصه وياخذ المساله

عناد قال بتعلمني باسم جدك يعني بتعلمني قلت والله لو تحب نجم سهيل ما اعلمك قال والله ان تعلمني غصبن عليك

قلت والله لو انت مدير الامن العام بكبره ما علمتك واخلص عطني المخالفه علشان اروح لربعي كبار الضباط <--- { 1}

ابقهره بس علشان اشيل المخالفه وهو اللي ينقهر زود ويقول ابحجز السياره قلت ما تقدر قال قسم لا احجزها قلت

قسم ان حجزتها الا احجزك وراها وكلمة مني وكلمه منه وقال لا يغرك هالبدله اللي انا لابسها ابفصخها واتفاهم

معك قلت اويلالالالاه بس لو تسويها هذا هو المطلوب اذا انت عربجي فانا عربجي اكثر منك واذا انت نور فانا

الكهرب <---- وش القصه :confused:هدوه ربعه ودروا ان ما عنده ما عند جدتي وهم دارين اني لو ابتولجه ابخليه يردد ياليل يا عين

وطبعا لو ابكتب المواقف ابتعب من سردها لكن اللي دعاني لكتابة هالموضوع وهالمواقف هو مسالة التثقيف وحسن

التعامل اللي يفتقدها اغلب رجال الدوريات في وطنا انا ما عممت لان فيه ناس طيبه تتفهم وان ما تفهمت تاخذ

المخالفه منه بصدر رحب ومن دون ما تقول شئ وتدري انك مخطي لكن انا اتكلم عن اغلبيه ما يفهمون ويبي لهم تثقيف في الاتي : :(

- تكون صدورهم وسيعه مع الناس ويحاولون يكسبون البشر بحسن تعاملهم

- اعطائهم دورات في الاسعافات الاوليه وحسن التصرف من خلال حوادث السير

مشكلة العسكر لامن جاهم ضابط ولعن سلسفيل جدودهم حطوا حرتهم في هالمواطنين الضعوف اللي لا حول لهم

ولا قوة ويجب ان يتم القضاء على مثل هالظواهر الغير عادله ابدن ابدن تلقون رجال الدوريات مثل مندوبين

المبيعات رؤساه موصينه ما يرجع الا ودفتر المخالفات قاضي على نصه :confused:


- تعليمهم ولو جزء بسيط من اللغه الانجليزيه لان الاجانب عندنا كثار ويا كثر حوادثهم وربعك ما عندك احد حتى

فيه كبار الضباط ايضا ما عندك احد وتصير لغة الاشاره هي اللغه السائده:D وغير المفهومه وزين ان لقوا لهم واحد

طرقي مارن من صوبهم يترجم لهم


ولو ابكتب واسترسل ما كفاني عشر مواضيع بس ابكتفي باللي كتبته يمكن نلقى نتيجه في المستقبل القريب ويمكن يتطور هالقطاع المهم في حياتنا {4 }



ولــي داخل يدور على البلايستيشن فــيحمله من هناا almu7eb@hotmail.com

:rolleyes:[/ALIGN]

يسلمووووووووووووووووووووووووووووووووووو
وحلوه منك

مشكوووووووور

[ALIGN=CENTER]

يسلموو تركي على مرورك ولا شكر على واجـب ;)

يسلموو احلى رايق على مرورك و الله لايحرمني منك :)[/ALIGN]

مشكور على القصه

اللي تجيب النوم

ويعطيك العافيه