| | | |
| |||||||
 |
 |  |  |  |
| القصص والروايات المنقولة قصص عربية , قصص أطفال , قصص غراميه , قصه قصيره , قصه طويله , روايات , قصص الانبياء , قصص واقعية , قصص من نسج الخيال , قصص موروثة , حكايات عربيه , قصص طريفه , قصص السيرة , قصص الأغبياء , والكثير |
 |
| | LinkBack | أدوات الموضوع | انواع عرض الموضوع |
24-06-2004, 08:43 PM
| #1 (permalink) |
| [قلب جديد]  تاريخ التسجيل: Jun 2004 الدولة: دبـــ دار الحي ــي
المشاركات: 40
 |  يا بلاوي الدنياقصه محزنه السلام عليكم و الرحمه.. أشحالكم و شخباركم؟؟عساكم بخير حبيت احط لكم اول قصه من كتاباتي و اريد رايكم إذا عيبكم بكمله و إذا لا سوو طاااف المهم تبدء أحداث هذي القصه من:- الشخصيات: ((عويش و عمرها19 تدرس في الجامعه-عبدالله اخوها و عمره 20 في كلية التقنيه-الوالده-راشد الأخو الأكبر و عمره 25)) (في ايام الإجازات) ((في بيت بو راشد)) ردوا عاشه و عبوود من الدوام و كانوا فرحانين.. عائشه:يمه يمه شوفي عبووود يظربني أنا ما سويت له شي أم راشد:يا عبوود يا يبه خل أختك بحالها لا تلعوزها عبدالله:خلاص خلاص يا يمه (و يبوس راسها) آسف ما راح ألعوزها أم راشد:هيه هذا هو ولدي الغالي عائشه:هيه يمه شوفي عبوود جدامج ويه و وراج ويه عبدالله:أسكتي تراج اتغارين مني عائشه: لا و الله أغار من وااحد بو ويهين (و تطنز عليه) أم راشد:خلاص خلاص اسكتوا لا تسوون لي ضرابه تراكم كبار مب يهال عائشه و عبدالله (في صوت واحد):آسفين يمه أم راشد:انزين انزين ما عليه الحينه , عبوود و عويش انا بروح عند اخوكم الكبير و بخلي الدريول يوصلني. عبدالله:لا يا يمه خليني أنا اوصلج الله يخليج أم راشد: مشكور الغالي بس انا اباك اتم ويا عويشوه أخاف يصير لها شي عبدالله:عشان خاطرج بيلس ويا عويشوه ((في السياره)) الدريول:وين اوديج مادام؟ ام راشد:وصلني بيت راشد من زمان ما صرت أشوفه و لا قام يسأل عني الدريول:إن شاء الله مادام ((في بيت راشد)) راشد:يا مريم أقولج خذي الياهل روحي بدلي بمبرزه يا ريحت البمبرز قويه مريم:ما تشوفني انا مشغوله ارتب البيت راشد: انتي من الصبح ع البيت متى بتكونين ويا الياهل مريم:تراني قلت لك ييب لنا بشكاره اتعدل البيت بدالي بس انته ما في فايده ما ادري متى بتييب البشكاره راشد:إن شاء الله راح اييب لج بشكاره بس بشرط ..... مريم:شوه؟؟ راشد: أبا الياهل يكون وياج انتي بس ما اباه يكون عند البشكاره مريم:صار صار إن شاء الله و فجأه يرن جرس بيت راشد!!! راشد: منو ايينا هالحزه؟؟ مريم: و الله ما ادري!! راشد:انا بروح افتح الباب و انتي بدلي بمبرز بطي (الياهل) مريم:إن شاء الله راشد راح يفتح الباب و فجأه شاف أمه و حس بندم لانه من زمان ما يا لها و لا سأل عنها و هو يصيح .. أم راشد: لا تصيح شرات اليهال اسكت راشد يبي يتكلم ما يروم يرمس من الصدمه أم راشد:بتوقفني جدام الباب ولا بتدخلني؟؟ راشد و هو يبتسم: لا أكيد بدخلج انتي غاليه علينا ما لنا حد غيرج.. و يدخلها الميلس..(في الميلس) راشد:مريم..مريم..مريم مريم:بلاك؟؟ راشد:تعالي سلمي على امي الغاليه مريم:لحظه ((و بعد خمس دقايق من سوالف الوالده مع راشد يت مريم وياها بطي(الياهل)) مريم:مرحبا و الله بالغاليه أم راشد: هلا فيج ما شاء الله صرتي أم من متى ما شاء الله؟؟ مريم: جيه راشد ما خبرج؟؟ أم راشد: لا و الله راشد أصلا ما سأل عني كيف بيخبرني انه صار ابو؟؟ مريم لراشد:صج اللي تقوله أمك يا راشد؟؟ليش ما خبرتها؟؟ راشد:....... أم راشد:ما عليه هذي أول وآخر مره راح يسويها ((تمت الأم تسولف ويا مريم و راشد و تضحك ويا بطي و مرت ساعات )) ((في بيت بو راشد)) عبدالله:عويشوه مب الظاهر ان امنا اتأخرت واايد؟؟شوفي الساعه كم الحينه عويش: خيبه الحينه الساعه وحده ونص أخاف صار لها شي.. عبدالله:احس اني اشتقت لها مع انها مرت ساعات بس عويش:و الله انا شراتك عبدالله:انتي ما بترقدين؟؟ عويش: لا ما برقد بتريا أمي عبدالله:انا بعد لان امي وصتني عليج عويش:....... ((في بيت راشد)) راشد:يمه ليش عبود و عويشوه ما يو وياج؟؟ ام راشد:ما اروم أخلي البيت خالي راشد:....... أم راشد:الحينه الساعه كم؟؟ راشد:وحده ونص أم راشد متعجبه: و الله!! راشد و مريم: هيه أم راشد:انزين أنا بروح البيت الحينه أخاف إني تأخرت على عبود و عويش راشد:انزين ما عليه أم راشد:بس لا تنسانا و اتصل ع البيت و اسأل عنا..إلخ راشد:إن شاء الله يا يمه كله و لا زعلج (و يبوس راسها) أم راشد:يلا عيل فمان الله راشد:الله يحفظج و يرعاج يمه *((في السياره)) الدريول كان يشرب خمر و الوالده ما تدري .. الوالده داشه السياره اتشم ريحه وصخه و تسأل الدريول شو هالريحه؟؟ و الدريول يرد شرات المينون:ما أعرف يمكن هذا عطر مال رفيج مال أنا..ترا أنا توه سير سينما ويا رفيج مالي..الوالده:خلاص انزين يلا وصلني البيت..الدريول:إن شاء الله مادام....... و فجأة و على الجسر طلعت السياره من الجسر و غرقت في البحر ...و للأسف الوالدة غرقت مع الدريول و السياره.. ((و عقب ساعتين من الحادث)) يو الشراطي و فرق الإنقاذ بس ما في فايده تبين إن اللي كانوا في السياره ماتوا ... ((في بيت بو راشد)) عويش:عبدالله صرت أخاف على امي اكثر من قبل أحس إن صار لها شي عبدالله:بتصل حق رشود بشوف شو السالفه.. ((في التيلفون)) عبدالله:........ عبدالله:ليش ما يردون يمكن راقدين و يسكر التلفون عويش:طمني شو صاير؟؟ عبدالله:اتصل بيتهم محد يرد و مبايله مغلق يمكن الحبيب راقد ويا مرته عويش:شو انسوي احس ان خوفي على أمي بيذبحني اتصل حق الدريول عبدالله:ما اعرف رقمه من وين اييب رقمه؟؟ عويش:أنا مسجله رقمه في الدليل بتحصل رقمه أتصل عليه عبدالله:صار بنشوووف عبدالله يدور رقمه في الدليل...... و أخيرا حصله..قام واتصل عليه بس ظهر إن المبايل عند ربيعه... ((في التلفون)) عبدالله:السلام عليكم جعفر(ربيع الدريول):وعليكم السلام عبدالله:وين أحمد؟؟ جعفر:بابا أنا ما في عرف وين سير أحمد عبدالله:و ليش مبايله وياك؟؟ جعفر:هذا أحمد في نسي هذا موبايل ماله عندي ، هو يجي عشان يشرب خمر عبدالله:خمر؟؟!!!! جعفر:هيه أنا قلت له لا يشرب خمر ما يسمع الكلام,,بعد هو قال حقي تعال وياي الفندق بنشتري أنا و أنته بس أنا ما رحت... عبدالله:انزين هو وين الحينه؟؟ جعفر:و الله بابا أنا ما في اعرف وين هو الحينه؟! عبدالله:خلاص عيل فمان الله جعفر:مع السلامه ((في الصاله و في بيت بو راشد)) عبدالله:حسبي الله وحده و نعم الوكيل..حسبي الله و نعم الوكيل..و يصيح عويش:خير أخويه شو صاير؟؟ عبدالله:أحمد...أحمد..الدريول........ عويش مستغربه:بلااااه! عبدالله:طلع يشرب خمر و يصيييييح عويش:لا و الله؟! عبدالله:توني متصل ع مبايله و يرد ع مبايله ربيعه عويش:بدت تدمع حسبي الله وحده و نعم الوكيل أخاف صار شي لأمي عبدالله:بتم سهران لين ما يصير الصبح و بتصل ع رشود يمكن الوالده ما صار لها شي إن شاء الله.. عويش:انا بعد بسهر وياك ((صار الصبح الساعه 10 و عبدالله و عاشه ما رقدوا)) على طول راح عبود و اتصل لأخوه رشوود ... ((ع التيلفون)) عبدالله:السلام عليك رشود راشد:هلا و الله بأخويه الصغير هلا عبدالله:اشحالك؟؟ راشد:بخير و اسهاله و انته أشحالك و اشحال عويشوه فديتها من زمان ما صار لي اشوفها فتانه ؟؟ عبدالله:نحن بخير و يدمع راشد:بس عندي احساس انك مب بخير صوتك متغير عبدالله:هيه الصراحه بغيت اقول لك امي وياك؟؟ راشد:لا!هيه طلعت البارحه!ليش ما وصلت البيت؟؟ عبدالله:لا ما وصلت راشد:الحين بييكم عبدالله:نترياك و سكروا التيلفون ((في سيارة راشد ويا مرته و بطي)) في الطريج شافوا حادث و هني راشد بدا يخاف لانه يخاف ان امه اللي صار لها حادث فنزل و قال للشراطي ممكن اعرف متى صاير هالحادث؟؟فرد عليه شرطي:هذا الحادث صار البارحه بالليل الساعه وحده ونص تقريبا..راشد:ممكن اشوف السياره؟؟..الشرطي:هيه ممكن ووداه الشرطي عند السياره و المفاجأه ما توقعه راشد شوتتوقعونالمفاجأه...تابعوافيالجزءالليعقبه أختكم: المنسيه |
|      |
|
25-06-2004, 08:10 PM
| #5 (permalink) |
| [قلب جديد] تاريخ التسجيل: Jun 2004 الدولة: دبـــ دار الحي ــي
المشاركات: 40
|  [ALIGN=CENTER]مشكورين كلكم ع المرور...وهذي التكمله عشان خاطركم.. كانت سيارة الدريول و قال الشرطي : إن كان في ريال يشرب خمر و بسبة الخمر صار هالحادث ..راشد:ما اصدق اللي اشوفه ..فتح باب السياره و حصل شنطه أمه و تم يصييح فقال الشرطي:انته تعرف من صاحب هالسياره؟؟راشد:هيه هذي سيارة الدريول و هذي شنطه امي ... المهم راشد ركب السياره و هو يصيح و استغربت مريم شو صاير؟؟راشد:هذي الحادث موتت امي و يصيح..مريم:تحاول تهدي راشد..راشد:انا ندمان كله من سبتي..مريم لا تقول جذي انته اسكت و روح بيت ابوك و لازم تخبرك عبدالله و عويش..راشد:خلاص الحينه برووح.. ((في بيت بو راشد)) عويش:يا عبود اتأخر رشوود عبدالله:تراه ياي في الطريج (و مرت 10 دقايق) رن جرس البيت عبدالله:أكيد وصلوا راح عبدالله يفتح الباب و سلم على اخوه العود و ع بطي و ع مريم و دخلهم الصاله و قعدهم و سلمت عويش عليهم .. عائشه:تبون اسوي لكم شاي و لا عصير و لا اييب لكم ماي مريم:ما تقصرين الغاليه لا تعبين عمرج اقعدي ويانا عبدالله لاحظ في ويه راشد الحزن و قال له : رشود عرفت شي عن امي؟؟ راشد و هو زعلان و عيونه تدمع:و نحنه ع الجسر شفنا حادث نزلت عشان اشوف السياره إلا و المفاجأه..... عويش و عبدالله:لا تقووول راشد:للأسف ماتت امي و هي ويا الدريول و صاحوا كلهم و هدء الضجيج اللي كان في البيت و ما صاروا يسمعوون سوى تغريد العصافر.. و تمت الجنازه و كانت حياة عبدالله و عائشه صعبه و مرت سنه على وفاة الوالده ((في بيت بو راشد)) عبدالله:عويش شو رايج انغير الجو وننسى الهم كله عويش:كيف؟ عبدالله:بنسافر تايلند يمدحونها عويش:خلاص عيل عادي ما عندي مانع عبدالله:انزين تعالي وياي بنروح نشتري البطاقات للسفر عويش:لحظه بروح أتلبس و البس العباا و الشيله وبييك عبدالله:اترياج في السياره عويش:انزين ((و بعد شويه يت عويش و ركبت السيارة ويا اخوها)) ((في السياره)) عويش:عبوود خبرت رشوود إن نحنه بنسير عبدالله يبتسم:ترا رشود صاحب الفكره و هو بي ويانا عويش:صج؟ عبدالله:هيه لو ما تصدقين اتصلي له و بيخبرج عويش:لا ما عليه اصدقك ((في بيت راشد)) راشد:مريوم ..مريم ..يلا خلنا انروح مريم:يايه لحظه راشد:اترياج في السياره مريم:إن شاء الله ((و راحوعايله راشد و اشتروا بطاقه سفر و اشترى عبدالله بطاقتين سفر له و لاخته)) ((في يوم الجمعه و اللي هو قبل يوم اللي بيسافرون فيها سوو عزيمه في بيت بوراشد )) ((في يوم الثاني و هو يوم االسفر)) ((في بيت بو راشد)) عبدالله:عويش يلا جهزي اغراظج ترا بنسافر في الليل عويش:جهزته من اسبوع اللي طاف عبدالله:زين و الله عويش:وانته؟؟ عبدالله:انا من يوم عرفت انج موافقه اتسافرين جهزته عويش تضحك:ههههه و الله زين عندي اخو يفكر عدل و نشيط الحمدالله عبدالله:احم احم عندي اخت تمدح اخوها عويش:هههههههه عبدالله:هههههههه ((مر الوقت بسرعه و عايله راشد يجهزون و عبدالله و عويش تعدلوا و طلعوا )) ((وصلوا عبدالله و عويش المطار و عقب نص ساعه وصلو قوم رشوود و سلموا على بعض و يلسو يسولفون لين ما يا دورهم يركبون الطياره)) ((في الطياره)) عبدالله و عويش ما مصدقين راكبين طياره و الياهل بطي كبر صار عمره 3 سنوات صار يقول حق عبود عمي و حق عويش عموه ..كان احلى ايام حياتهم بعد وفاة الوالده و كانوا يتمنون لو امهم كانت وياهم ..بس مستحيل دام انها رحلت عن الدنيا.. و عقب ساعات تعبوا كلهم و رقدوا ............ ((في الفير)) وصلوا تايلند و نزلوا من الطياره و حصلوا شقه يسكنون فيها اسبوعين .. و حجزوا لهم غرفتين..(غرفه لعايلة راشد)و الغرفه الثانيه لعبدالله و اخته... المهم ارتاحوا واايد في تايلند و كانت اول رحلاتهم في تايلند هو تحت الشلال كان المنظر حلو و عويش نست كل الهم و اسبحت تحت الشلال و كان الكل يسبح مريم و عبدالله و راشد و بطي كان المنظر خلاب ... ((تحت الشلال و هم يسبحون رش عبود الماي على عويش )) عويش:لا ترش علي الماي ترا برش عليك ماي عبدالله:عادي عويش:عادي ولا ملون؟؟ عبدالله:لا اوتوماتيك عويش رشت الماي على عبوود و هم يضحكون و همست لعبود و قالت له خطه تدرون شو الخطه؟؟ قالت له:يلا انرش الماي على رشود و مرته و بطي؟؟ عبدالله:زين يلا 1....2........3...يلاااا و رشو الماي على مريم و ع راشد و ولده بطي ههههه كان الموقف حلوو و عصب راشد و رش على عبدالله الماي و مريم رشت الماي على عويش و بطي يالس ينفجر ضحك شو سوى بطي الذكي؟؟ راح و خذا تراب لين و فراه ع راس عبدالله جان ينقعون ضحك هههههههههه و تموا يلعبون لين ما تعبوا و ردوا الشقه اللي صوب البحر.. ((أما كانت رحلتهم الثانيه انهم يزورون حديقة حيوانات غريبه في (بتايا) كانت الحديقه مثل الغابه و كان بطي يمشي و حب سبال تم يلعب ويا السبال و ابوه و امه مستغربين لان ولدهم ما كان يحب الحيوانات فكيف حب السبال و كان السبال يحج راسه و باطه و ياكل مووز و كانو ام بطي و ابوه و عويش و عبدالله ينقعون ضحك...و شافوا حيوانات.. ((و بدت الرحلات اللي ما تخلص....و عقب اسبوعين اشتاقوا لبلادهم و كان باجر هو اليوم اللي بيسافرون فيه )) ((قاموا قوم رشوود و اخته و اخوه يجمعون اغراضهم لانهم باجر بيردون بلادهم )) ((في اليوم الثاني)) طلعوا كلهم و راحو المطار و ركبوا الطياره...و اول ما وصلوا بلادهم من كثر شوقهم لبلادهم ودهم يبوسون الارض...(شفتوا يا كثر الشوق ع بلاده شو اتسوي؟) ردوا كل واحد بيته ..... ((في بيت بو راشد)) عبدالله:شو رايج في تايلند؟؟ عويش: جنانه بس بلادي أحلى منه عبدالله:صدقج و الله..انزين باجر عدلي البيت عويش:ليش؟ عبدالله:لان باجر رشود بي عويش:صار إن شاء الله و لا يهمك بس عبدالله ممكن طلب صغير؟؟ عبدالله:آمري تدللي شو؟ عويش:ما يامر عليك العدوو بس بغيت اقول لك إني اباك اتوديني الجمعيه بروح اشتري اكل الثلاجه خاليه ما فيها شي عبدالله:إن شاء الله بوديج باجر إنتي تامرين امر عويش:مشكور ((في اليوم الثاني)) عويش:عبود يلا قوم قوم شوف الساعه كم الحينه .. عبدالله:الساعه كم؟ عويش:الساعه 12 الظهر قوم قوم لا صلاه و لا عباده و لا حتا وديتني الجمعيه عبدالله:إن شاء الله الحينه بقوم بسير بسبح و بصلي و بعدين بوديج عويش:يلا اترياك مب اتكمل رقادك عبدالله:إن شاء الله قام عبود و راح اسبح و سار يصلي .... عبدالله:عويشوه عويشوه يلا تعالي بوديج.. عويش:إن شاء الله بييك روح السياره انا بروح اسكر البيبان .. عبدالله:إنزين لا تتأخرين راح عبدالله و ركب السياره و وصلت عويش و ركبت ((في السياره)) عبدالله:عويش اي جمعيه اوديج؟ عويش:على كيفك بس انا اقول الجريب احسن عشان ما اتعبك عبدالله:كيفج ((في الجمعيه )) اشتروا الأكلات و الخضروات و فواكه و إلخ و ردوا البيت.. وصلوا قوم عبود البيت.. ((في بيت بو راشد)) عبود:عويش اقول لج ...... عويش:هلاا قوول عبدالله:انا بروح شوي ويا الربع.. عويش:برايك روح بس مو تتأخر.. عبدالله:لا عويشو اخاف عليج بوديج بيت راشد.. عويش:ما عليه ....بس مب قبل ما اسبح..خلني اسبح اول.. عبدالله:انزين بترياج..في الصاله.. عويش:انزين.. ((دشت عويشوه و اسبحت و بعد 20 دقيقه طلعت من الحمام ..المهم خلصت و طلعت الصاله)) ((في الصاله)) عويش:عبود يلا انا جاهزه قوم وصلني بيت رشود.. عبدالله:يلا عيل بسير بيب سويش السياره اترييني برع شوي.. عويش:انزين يلا بسرعه.. ((و بعد دقيقتين)) ركبوا قوم عبود السياره و تموا يسولفون لين ما وصلوا بيت قوم رشود..و دقوا الجرس و فتحت بشكارة قوم راشد الباب.... عبود و عويش:السلام عليكم البشكاره:و عليكم السلام عبود:بابا راشد هني؟؟ البشكاره:بابا لا هو راح الدوام..بس في مادام هني.. عويش:انزين هي مشغوله؟؟ البشكاره:لا مو مشغوله هي يالسه تلعب ويا بطي.. عبود:زين زين مريم:ماريا((البشكاره)) ماريا ماريا....منو ع الباب؟؟ البشكاره:ما اعرف انا اول مره في شوف هم.. مريم:انزين دخليهم.. البشكاره:إن شاء الله..يلا تعالوا داخل هياكم هياكم.. عويش و عبود:الله يحيج.. ((و دخلوا البيت و سلموا ع مريم و بطي و قعدوا في الميلس)) مريم:حيا الله من يانا و الله.. عبود:الله يحييج عويش:الله يحيج الغاليه..اشحال بطي و راشد؟؟ مريم:بخير و اسهاله و الله.. عويش:عساا دووم.. عبود:انزين اقوول الحينه بروح عند الربع في البر.. عويش:الله يحفظك.. مريم:الله يحفظك.. ((و طلع عبود عشان يروح عند الربع..و تمت عويشوه و يا مريم(مرت اخوها راشد))) ((و عقب ساعات وصل عبدالله عند الربع في البر..و يلسوا داخل الخيمه يسولفون)) ((وصل راشد البيت و شاف عويش وسلم عليها ... و يلسوا يسولفون لين الساعه 12 في الليل)) مر الوقت و عبود ما حس بالوقت إلا من راحوا كل الربع البيت بس تموا 2 من ربعه..الأول(سعيد)و اكبر عن عبدالله بشهور و الثاني(خالد)و هو اكبر واحد بين ربعه..و عمره26.. سعيد يهمس في اذن خالد :يلاا انحط المخدر داخل قهوة عبدالله.. خالد يبتسم:ولا يهمك عبدالله مستغرب شو سالفتهم؟؟المهم هو سكت.. سعيد:عبود تبا قهوه؟؟ عبدالله:تسلم مشكور ما اريد ما اشتهي.. خالد:لا يا بوي اشرب عشان خاطرنا..يلا خلنا كلنا نشرب انا و انته و سعيد.. عبدالله:و الله ما اشتهي يالغالي.. سعيد:افا ما لنا خاطر؟؟؟ عبدالله حليله وافق:إن شاء الله بس عشان خاطركم.. سعيد:يلا خلود روح صب لنا قهوه.. خالد:أكيد بروح.. مرت دقايق و ياب خالد القهوه ... سعيد و خالد كانوا يتريون مفعول المخدر على عبدالله إلا و بعد دقايق حس عبدالله بالدوخه كان يقول سعييد خالد اي واحد انته ما اشوفكم عدل و بعد ثواني طاح عبدالله متخدر.. سعيد:خلود خلود الحينه وين بنحط هذا الأهبل؟؟ خالد:حطه في بيتك.. سعيد:ما ابا احطه في بيتنا.. خالد:انزين شو رايك انعقه في الزباله العود اللي في الفريج؟؟ سعيد:لا حرام عليك يا بوي ارحمه.. خالد:جانك بترحمه عيل خله في بيتك.. سعيد:اوكيه بس منو بياخذ سيارته؟؟لازم نستفيد منه.. خالد:انا باخذ السياره سعيد:انزين خلاص عيل انا الحين بودي هذا الخبل بيتنا.. خالد:يلا عيل فمان الله.. سعيد:فمان الكريم.. شو راح يصير لراشد ؟؟؟؟؟؟تابعوا في الجزء الثالث[/ALIGN] |
|
| |
|
26-06-2004, 12:05 PM
| #6 (permalink) |
| [قلب مبتدئ] تاريخ التسجيل: Jun 2004 الدولة: مملكه الحب في العالم الثاني
المشاركات: 65
| يسلموووووووو المنسيه ويحفظج ربي <===== يستنى على أحر من الجمر ولو أنه شاك أن في النهايه بيطلع مقلب <<<< يحسبه فلم هندي في النهايه تدخل الام تقول صباح الليل {34} :D {34} :D {34} :D {34} :D {34} :D {34} :D {34} :D {34} :D ثا1111111نكس أختي المنسيه ولا تنسينا سلامووووووو لمن يطيب للقلب ذكــــــــــــــــــــراهم |
|
| |
|
| مواقع النشر (المفضلة) |
 جديد منتدى القصص والروايات المنقولة |
| |
| أدوات الموضوع | |
| انواع عرض الموضوع | |
|
|
العرض العادي
