في فندق الأنتركنتنتال الساعة الثانية بعد منتصف الليل دخلت غرفتي انا والمعزبة ( << والله الذرب في الحتسي ) .. المهم قلت أدخلي برجلكي ( يعني برجلتس بالسديراوي ... بس اختي تقول لا تساتسي واجد ) المهم قلت أدخلي برجلكي اليمين وأقري المعوذات .. وأدخلي الحمام شوفيه قبالكي ( أي قبالتس ) اذا كنتي حسرانة ( أي محصورة ) .. .. وبعد ساعتين من دخولنا للغرفة وتعب حفل الزواج وما صاحبه من سلامات وقبلات .. أنسدحت على الأريكة أتبطح وأمدد رجيلاتي .. ومعي الريموت أزلب في هالقنوات و احتري المعزبة .. وشوي وتجي لمي بس رجعت مسرعة وتغطت وقالت : من عندك ؟ قلت ماعندي أحد .. قالت هذا وشو أجل ؟ قلت هذي رجلي لابس شراب العائلة وانشق طرف الشراب وطلع أصبعي الكبير وطلع كنه عجوز متلفلفة ... المهم ما نطول السالفة عليكم ... جلسنا وسولفنا وشربنا عصير أبو مكاك واتمقل في حلالي .. وأتغزل فيها ... (((( الله يرحم الزين .. تذكرت سر أبوي اذا أرتفعت فنيلته وبان السر هالي تسنة قليب من القلبان المهجورة .. وإذا شفنا سره بمكبر نلقى عمال بنقادليين متخلفين ومتوزين فيه .. ))) وبعد ما دخلت الحمام .. جلست ساعة في المسبح ( البانيو) وأدور الصابون اللي اذا حطيته في الموية يطيش .. علشان يطلع الجو رومنسي .. ويوم خلصت من السباحة طلعت من الحمام ذيك الطلعة ولا أسمع إلا صراخ وزعاق المعزبة الله يصلحها .. وقالت : هااااو يالغيور لا تطلع الا ومعك الروب ... قلت والله انا ما أحب الروب يجيب لي حموضة .. أنا أحب الزبادي قليل الدسم .... قالت : هااو شف الفوطة عندك في الدالوب .. قلت : أهاا قصدتس البالطو الفوطة .. قالت : هو أسمه روب .. قلت : والله أنا عقدتي صراحة الانقلينزي من يوم اني بزر .. قالت : لاعمرك عاد تطلع كذاااااا ... قلت : وراه خن نصير ايزي ..بعد شهرين ... كل مادخلت البيت أسمعها تقول وع أكيد وصلتا يالغيور .. بالرغم أني أدخل وأنا أدقس ... قلت وش هالحظ يا سفاب المهر راح على البنت ما تحبني ... وجلست أهاوشها وقلت وش هالحتسي ؟ وراتس ماتحبيني ؟ قالت من قال ما أحبك ؟ بس تراي أنا ..... قلت وشو ؟ قالت : أنا يالغيور ... أفهمها عااااد ... قلت والله فاهمها وانتي ماتحبيني أصلا أنتي وأخوانتس اللي كلهم حبوب خال ( << هذالونا اذا عصبنا قمنا نعير ) ... قالت : هاااااوو ,,, انا حامل وأتوحم .. ومن حظك ماتوحمت إلافيك .. قلت حااااامل ؟ وشلون تحملين وانتي ما مسكتي راستس وقلتي أأه يا راسي أنا حدوخ يالغيور .. ( متأثرين بالمسلسلات المصرية ) .. ومن زين الطبايع توحمت بجح وجرو في عز المربعانية ... بعد تسعة شهور .. يالغيور ودني لأهلي ... ودني للمستشفى عندي موعد ... ودني لأختي عندها الدايرة اليوم ... وكل ماطلعت دق الجوال .. وينك فيه ؟ لا تبعد عن البيت أخاف يجيني شي والا شي وانت بعيد .... أصبروا دق الجوال الظاهر ولدت .. مع السلامة تكملة للموضوع .. المهم ما يستفاد من الموضوع : 1 - لا يجي بكرة واحد توه متزوج وماله إلا شهر ويقول : ماش مافيه تفاهم بيننا ولا أحس أنها فاهمتني ... ونقول له : أمش يالأقشر .. صفقني إذا لك هدف في الحياة علشان تفهمك بنت الناس ... والله لو أنك مثل هالدوافير أول ما يخلصون من المتوسطة تحصل الواحد طاق له وتد في الجامعة .. اصبر وحاول أنك تفهمها أول علشان تفهمك ولازم تتنازل شوي وهي تتنازل شوي علشان تقربون من بعض << خبرة سنة زواج 2 - لا نجلس نتبطح بالفنيلة والصروال في كل مكان وأحيانا طاقية صفراء تكمل الديكور وتلبد الشعر .. لازم نتزين للزوجات ونشخص لهن ولا أدري ليه ما نتطيب للزوجة إذا دخلنا للبيت .. ( والله ما ألومهن إذا توحمن في ريحتنا ) ,,, 3 - أمسك الريموت وأزلب في هالقنوات اللبنانية .... ولا أحترم مشاعرها وهي عندي ويقالك إذا بغيت أرضيها حطيت اريتريا والا السودان .... ويوم جا الصدز وشفنا ستار أكاديمي وميس لبانون وشفنا الحريم على طبيعتهن في هالشقة عرفنا والله أنهم خادعينا وكل بنت تقل حاطة في برطمها وسادة ( أي مخدة قطن ) وطالعاتن شيف بدون الصبغات ... والله يابناتنا أنهن أزين أخلاق 4 - بعد كم شهر يجي الزوج ويقول : ماش ما حبيتها ... لعنبوا بليسك الزواج شركة بينك وبينها فيه ود وتراحم وتبادل مشاعر ما يجي على الحب بس .. (( وعسى أن تكرهوا شيئا ويجعل الله فيه خيراً كثيرا )) يعني يمكن تصير لك مصدر رزق والا تنجب لك عيال سنعين ورجال يعتمد عليهم .. والمرأة لازم تبحث أنت عن جمالها وخصوصا جمال الروح ولا تجرحها إذا تزينت لك .. ( واحد يوم صبغت زوجته شعرها قال لها : وراتس غاديتن شهباء اليوم .. وثاني يوم صلحت شعرها مفلفل ( يعني بيرم ) قال لها زوجها : ورى راستس طالع كنه نخلة خضرية مالقحت ) .5 - ترى البنت بحاجة للكلام الزين والذرب والدلال والتدليع وينلعب عليها بكم كلمة زينة وطيبة .. قالت لي : تراي عاد أبولد في مستشفى المملكة وبراجع عندهم .. قلت أبشري من عيوني .. والله لو تبين تولدين في المريخ لأشيلتس فوق راسي .. وبالأخير ما ردتنا إلا بوابة مستشفى الشميسي نراجع فيه .6 - ترى مهوب عيب إذا مشيتا مع زوجتك في السوق أنك تحط يدك بيدها لا تستحي بالعكس والله لو تجربونها مرة ... صدقوني بدل ما تشتري زوجتك فستان بخمسمية بتتنازل وتشري بمية وخمسين .. بس أهم شي خلك حاط يدك بيدها ( العملية أقتصادية وجربوها وبتدعون لي ) . وفيه الكثير والكثير من الأمور السنعة بين الزوجين بس أخلي الباقي لكم تكملونه تحيااااااتي