[color=black]هذي قصه منقوله من احد المنتديات
انشاء الله تنال على اعجابكم والقى اقبال عليــــــه كثيـــــــــــــــــــــــــــــــــر
واتوقع ماراح احد يفهمه الا القصمان......
عندما تبتسم خشة الحياة
مازال الامل موجود
قلت هالكلمه وانا اناظر خشتي بالمرايا ..مازال الامل موجود .. يعني لو لو تنعم ذاالشوشه والخشم يقصر شوي والبراطم ياليت من يدخل ابره وينسمهن والعيون تاسع وتكبر والخدود يوردن كان اصير ملكه جمال بسم الله علي >>>وش بقى مير
وبينما انا اهوجس بخشتي تدخل علي امي وتقول: قومي اكنسي الحوش
قلت: هاااااااااه
قالت: اللي سمعتيه
وطلعت وتركتني احارب هم كنس الحوووووووش ..حاولت اقنع نفسي واشجعها للفكره وقلت كوود يشوفن ولد الجيران وانا اكنس الحوش ويعشقن ويخطبن >> احلام عانس...
نزلت الحووووووش وكنسته وانا رافعتن قميصي ومطلعتن العصاقيل مير لمحت ولد الجيران فتح الطاقه وقال استخخخخخخخخخفر الله وصك الطاقه
قلت بقلبي : يااااي ياربي يستحي
وبعد ماقضيت من كنس الحوش طلعت حجرتي اخذت شاور ثمن نزلت الحوش مرة ثانيه>>>>ناويه تجيب اجل ولد الجيران
واقعد على المرجيحه وعيوني على طاقتهم .. شوي والمحه ياربي طلع يشوفني>>>ايه هين ........ وكان ماسك الجوال ويتكلم عاد مين يكلم مدري !! بس شكله يكلم احد>>>لاياشيخه..
المهم وابدا اتمرجح وبينما انا في هذه الحاله المقرفه فاذا بـــ أمي تطب علي !! وهذا اللي ماعملت حسابه
اول مالمحتها طيرت عيوني وقلت: يماااه شوفي ابن الكلب النذل الحقير ولد الجيران قاعد يوايدز علي
وامي تناظرني وتهوجس: وش يناظر فيتس ياحسره وانا جايبتن عاهه مهب بنت ....قومي بس ادخلي بلا فضايح
.
.
بعد هالموقف .. اقصد بعد ماصدت ولد الجيران وهو يوايدز علي =يبصبص للعرابجه .. وانا ماااااااش مدري شجاني ..اول مرة احس اني انثى وفتنه مثلي مثل كل البنات ..
ووو جتني قحشة حنان ورقه وانوثه صرت حنونه على اخواني الصغار قبل كنت اهوشهم واكفخهم واسطرهم الحين صرت احن عليهم واشوف طلاباتهم واجيبلهم مويه وهم يتغدون ..
لكنهم مايشربوها قالوا وش الطاري تقوم من غداها تجيب لنا مويه اكيد حاطتن فيها سم ﴿ اهب عاد سم مرة وحدة طيب قولوا ملح قولوا سكر قولوا عسل>>>ماقلت لكم صرت رقيقه
ومرة من المراريت كنت منسدحه على بطني افكر وش البس لا جوا الجيران يخطبونن لولدهم؟ يووه اخاف ابوي يردهم ويقول بنيتي توها صغيره >>> مير مب مصدق يفتك منتس ..
وبعد وش اسوي لا اعرست؟ اكمل دراستي والا افضي نفسي لزرجي وعيالي؟ طيب لا اعرست وعشت بعيد عن اهلي وعزموني جيراننا على عرس بنتهم وش البس؟>>>>>> يبيلها تكفيخ على ذا السؤال..
وبينما انا اهوجس بمستقبلي ومستقبل عيالي اللي بيجيبهم .. فإذا بي اسمع صوت امي: ملوووووووسنه ملووووووسنه وضربه ...
انا: سمي يمااااااااه ........ ورحت لها صارووووووووخ خبركم عاد اللي يبر بوالدينه عياله يبورن بوه وانا لاخطبن ولد الجيران واعرست عليه ابي عيالي يبورني>>>>> مصرررررة انه بيخطبها
قلت: سمي يمه ناديتين؟؟
قالت: ايه اخوانتس يلعبون بالحوش.. طلعي راستس من الطاقه وناديهم يجون يتعشون
قلت: يمه انا تبيني اطلع راسي من الطاقه؟ بعدين شلون اناديهم عيب يمه مايصير نسيتي اني بنت وصوتي فتنه
قالت: اهااابس ناديهم ولايكثر هرجتس.. مير اللي يسمع صوتس فتنه عليه مهب صوتس اللي فتنه>>>>ياشين التحطيم
وناديتهم طبعا تتوقعون وش صار يوم ناديتهم.... كل الهنود اللي بالبقالات تجمعوا قدام بيتنا يحسبونن شغاله والله مب مني وش ذنبي اني اشبه التكارنه
.
.
ومررررررررت الايااااام وحبي لولد الجيران يكبر ويكبر ويكبر وانا كل مرة اطلع الحوش ويشوفن من الطاقه يسكر الطاقه بوجهي وهو يتحمد ربه وانا اقول ياحليله يستحي>>>> هو الولد ويستحي وانتي مير ماينشره عليتس
مرة تشجعت وارسلت له هالرساله:
وربطت الرساله بحصاة وجدعتها على طاقتهم شوي والا ترجعلي الرساله مشققه ومكتوب على وصله منها ﴿استخخخخخخخفر الله﴾ بيني وبينكم تحطمت مشاعري وانجرحت وقلبي عورني ودميعاتي تقاطرت على وجنتي بس قلت احسن وش ابي بواحد ماعنده نظر وراسب بالعربي وبالدين بعد اجل ﴿ استخخخخخخخخخفر الله ﴾
ودخلت البيت وانا محطمه نفسيا ومعنويا وطلعت الدرج وانا اطامر واتنطنط عشان اسوي تمويه لاهلي كني ماسويت شي ولانيب مجروحه بالوريد جرح﴿ن﴾ عيا يطيب...
والمح امي تهوجس : متى بتعقل هالبنت..... وقالت: شوي شوي لا تطيحين
قلت: لاتخافين عالدرج>>> ياحليلي ذهينه
وصلت لحجرتي ودخلت وصكيت الباب>>>يقالي بسوي احداث.. والقى اخوي قاعد﴿ن﴾ يحوس باغراضي
قلت: خير وش عندك بغرفتي
قال: كنت اسلي نفسي الين تجين
قلت: قالولك غرفة الانتظار في عيادة الدكتور مدحت .. اقول بس اخلص وش عندك وش تبي؟
قال: اقول اسمعي عاد لا تجلسين تنافخين.. انا جايتس ابي منتس خدمه وش قلتي؟
قلت: اخلص وش عندك
وطلع من جيبه صورة بنت مزيونه وقال: شفتي هالبنت
قلت: الله يلعنك منهي ذي؟
قال: وحدة
قلت: احلف على بالي واحد>>>>>ياشين استخفاف الدم
قال: اسمعي بسسسس هذي بنت ناس اغنيا بس ياحرام توفت قبل شهرين بحادث
قلت: توفت الله يرحمها ... انا وش دخلن؟
قال: اصبري خليني اكمل كلامي لا اعطيتس كف .. هالحين اهل البنت مرررة متاثرين ياحرام ويبون وحدة تشبهلها يربونها وتعيش عندهم
قلت: طيب انا وش دخلن؟
قال: انتي هالبنت
قلت: اقول بس وخخخخخر .. هالحين انتم اللي هو انتم اهلي متفشلين مني وذاك اليوم طحت بالسوق اختي بعدت عني وقالت مااعرفاها .. تبي الناس يخلونن بنتهم..
قال: صدقيني... فيه شبه كبير بينهم
قلت: اقول بس اذلف الله يسهل عليك.. مالقيت احد تلعب عليه جاي﴿ن﴾ تلعب على اختك الضعيفه
قال: وراتس منتيب مصدقتن .. قسم بالله فيه شبه كبير بينكم
قلت: لا عاد احلففففففف .. يعني انا بمستوى جمالها>>> ودخلت بمرحلة الهواجيس ..
قال:لاعاد مهب لهالدرجه .. صحيح انكم تشبهون بعض .. بس هي على احلى وانتي على اشين
قلت: والله من زين الشرح .. دام ماعندك اسلوب وماتعرف تجامل لا تسولف مع الناس وتجرح مشاعرهم
قال: انتي اللي سالتيني
قلت: حتى لو انا اللي سالتك .. ماتعرف تكذب؟؟
قال: طيب انتي حلوة وتهبلين الحين اهل البنت متأثرين ويبون وحدة تشبه بنتهم يربونها وتعيش معهم وش قلتي؟
قلت: وش يربونها ؟؟شايفني كلب والا بسه يربوني واعيش معهم
قال: يعني خلاص ماتبين؟
قلت: شف من ناحية اني اسوي عمل خير ليش لا ؟؟ بس وش المقابل يعني كم بيدفعون >>>وين عمل الخير اللي تتكلمين عنه
قال : نتفاهم بهالموضوع بكره مع الجماعه
قلت: بكره بكره
قال: ايه بكره بكره وش عندتس
وجلست افكر وشلون اروح وانا محطمه نفسيا ومعنويا اثر الصدمه العاطفيه اللي تعرضت لها .. بعدين استطردت بقولي: يابنت روحي فرصه العمر وجت لين عندتس لا تضيعينها
صوت اخوي قطع حبل افكاري: هيييييييييييييييييييييه انتي وين وصلتي خلاص بكره؟
قلت: طيب وش رايك وش البس اقول بس اطلع خلن افكر على رواقه وش البس !!
وطلعته وصكيت الباب وبلللللللللطت قدام دولابي .. ناظرت دولابي وخنقتني العبره تصدقون ينفع اصورة وانزل الصورة بالجريده واكتب تحتها ﴿نستقبل تبرعاتكم على العنوان التالي﴾
مير كل خرقه تقول للثانيه وخخخخخخخري انا اشين منتس.. والا الجزم بس!! احلى صندل ورثته من اختي قبل تتزوج..
بعدين اروح انا وشوشتي وبنت الجيران مستلفتن السشوار مني وشابكته على 220 ومنحرق لكن هييييييين ابطلع قيمته من عيونها
وطلعت من غرفتي باتجاه الصاله حيث تقبع عائلتي الكريمه ووقفت بالنص بحيت اقطع الارسال بينهم ..ناظرت ابوي وقلت: يبه ابي فلوس ؟
قال: ياشين المزح هالحزه
قلت: يبااااااااه من جد اتكلم مسأله حياة او موت
قال: روحي غرفتس ولايكثر هرجتس
ناظرت امي وقلت: يمااااااااه قولي شي
قالت: روحي غسلي الكراث وجيبيه
قلت: الشرهه مب عليكم الشرهه عاللي تصير بنتكم >>>> عسى ماتكلفتي بس
ورجعت لحجرتي وانا اجر حبال الخيبه والخيبه تجر حبالي .. وقلت مالي الا اعتمد على نفسي اببتل وانا تحت رحمة اللي اسمه ﴿ابوي﴾ واللي اسمها ﴿امي﴾>>>>>جحدتهم .......
وبجيب الفلوس بجيبها لو حتى اسرق!! اسسسسسسسسرق!! ايه وراه مااسرق وابوي الفلوس على قلبه مثل الرز .... بعدين السالفه لافيها تانيب ضمير ولاشي لانها بالنهايه بعد عمر طويل الله يطول بعمرك يايبه الفلوس يتصير لي يعني لايوجد فرق بين الان وبين بعد عمر﴿ن﴾ طويل >>>>>>يخرب بيتك ياشوشو خربت اخلاق البنت>>>>>والا يعني كانت الاخلاق تمام نسيتي ولد الجيران والعصاقيل
جبت قلم ورسمت الخطه بدفتر الرياضيات حق اخوي من ورى>>>>تسمع بالتوفير... خطه انما ايييييه متخرش الميه >>> اخاف انها تخر دلاخه مش ميه
الخطه اني انتظر لمين يجي الليل وينام البيت كله وابدا بالتنفيذ وادخال اليد في جيب ثوب ابوي واخراج المحفظه وفتحها ومن ثم اخراج مبلغ وقدره ومن ثم اعادة المحفظه في جيب الثوب ولا انسى اخراج يدي من الجيب>>>>>اخاف من الربشه انساها او يجوز لها الوضع وتبتل بوه
وجاء الليل ونام كل من فالبيت بما فيهم انا >>>>خربت الخطه .... لكن شوشو صحاني من النوم وقال يالله يالملوسنه حان وقت نتفيذ الخطه.. بيني وبينكم كنت خايفه وضميري يدغدغن لكن شوشو شجعني >>> حتى الشيطان بيتدلع.. بيلبئلوه يؤبر ألبي
ودخلت حجرة ابوي وكان يشاخر وانا قلبي يدق ... وشخير ابوي مع دقات قلبي سووا جو سامري ومع الظلام صار ديجيه سامري>>>>>تسمع بالديجيه
نفذت الخطه بحذافيرها ولطشت لي كم خمس ميه وانحشت لغرفتي ونمت وانا ضميري مستريّح>>>الله يخلي شوشو يهون عليك بهالمواقف ويخليك تقدر تنام
من بكره وانا رازتن نفسي بالسوق وشريت لي احلى بدله واحلى صندل طبعا كلووووو ماركه حتى البكله شريتها ماركه وصرت كلي من فوق لتحت ماركاااااااااات..
ورحت للكوافير وسنعت لي خشتي وشوشتي وصرت احلى من مذيعة صادوه 2 بعد عمليات التجميل>>>يعني مااستفدنا شي
وبعد المغرب وانا واخوي مرتزين بمجلس اهل البنت والا وشو المجلس شي يهبببببل حسيت نفسي بمسلسل مدبلج ..
والا كاس العصير مابغيت اشرب منه واخرب شكله .. وشوي وتدخل جدة البنت وتجلس تسولف معنا وانا ودي اقولها ممكن اخذ معي كاس العصير ذكرى بس مااااااااااش استحيت
الجدة: هلا بالملوسنه طبعا انتي فاهمه اللي نبيه منك
قلت: ايه فاهمه ... وموافقه بعد
الجدة: طبعا فيه اشياء لازم تعرفينها .. مثل وش تحب وش تكره وعن اهتماماتها وميولها.. نبغاكي نسخه طبق الاصل عن المرحومه لان بنتي اللي هي امها مرة متاثرة ياحبة عيني ويمكن لمن نشوفك تهدأ تفسيتها شوي
وصارت تشرحلي وانا اكتب كل اللي تقوله .. مير يوم رجعت البيت ماعرفت اقرا خطي ... وش ذنبي ان الجامعه ماقبلتني >>>>>تروح وترجع على نفس السالفه والله لو يدرون عنتس كان فتحولتس جامعه باسمتس ....
المهم .. وجلست احاول اتهجا واتعرف عالحروف بس ماش قلت يالله بس خل اعتمد على نفسي وارتجل>>>> هذي اللي والله المصيبه.
ترررررررررن ترررررررن .. الو .. مين ..اهلين .. ازيك؟ عامله ايه؟ دلوقتي؟ او كي مافيش مشكله مشوار السكه واكون عندك...>>>>هذي جدة البنت تقولي تعالي بتقولون طب وراه قالبتن اللهجه وتهرجين مصري وباقولكم موضوعي وحرة فيه اتكلم مصري قصيمي والا ان شالله سوداني اخليه مقلم والا كاروهات وش حارق رزكم انتم>>>>>>ماهجدت الا بعد ماجاها تهديد بتفجير براطمها
لبست ورحت لجدتهم وهالمره دخلتني صالتهم ههبببببببب عليهم عندهم حديقه بالصاله والا الدرج لحاله تحفه فنيه البيت كله تقل انه الاهرامات>>>>لاتشرهون على التشبيه ماتعرف متحف غيره
وجلست على تحفه فنيه صراحتن مدري اذا هو كنب والا لا!! لانه مرررره مايشبه كنبنا فشكيت بالوضع وقلت حتى كراسيهم تحف >>>قرويتن بالحيل
طبعا حطيت رجل على رجل وش حيثها هي تحط ؟؟ والا عشان كنبهم تحفه وحنا كنبنا تقل مرتبه بسيارة جيزاني..
ناظرتني جدتهم وهي تبتسم بنت اللذينا تقل داريه وش انا افكر فيه .. وقالت: وش تشربين ..؟؟
قلت: اي شي من ايد الكريمه شغالتكم حلو
قالت: ههههههههههه دمك خفيف>>>>>تحسبني انكت وانا من جد على بالي كلامي ذوق
وبعد ماجابوا العصير وتفرجت عليه وشربته شوي والا يدخل علينا رجال انا استحيت ودنقت وقلت: واخزياه منهو ذا جيبوا عباتي تكفون
قالت الجدة: ملوسنه هذا الدكتور مايكل متخصص جراحه وتجميل نبيه يصلح خشمتس وبراطمتس وكم حته كذا
قلت: واللهي؟ منزمان وانا ودي اغير خشمي
ودخلوني غرفه وخدروني وبعد كم ساعه قمت ومدري وش جاني ...... كيذا يوم قمت حسيت نفسي بنت>>>العادة تقوم وتحس نفسها عنز.. حسيت اني ناعمه شكلهم بعد غيروا الجلد ..
ناظرت حولي وبديت اتحكك ياربي اثره شعري لا تحركت يتحرك معي>>والا العاده تنكسر الرقبه والشعر توه بمكانه...
صرخت باعلى صوتي: هاااااتوا مرايا تكفون مافيني صبر>>>> ياربي حتى صوتي وش هالنعمومه معقوله حتى الاحبال الصوتيه غيروها
وجابولي مرايا وناظرت فيها وقلت: انا قلت عطوني مرايا مهب صورة عارضه ازياءءءءء
قالوا: هذي مرايا
قلت: لا عاد ..... وبديت احرك حواجبي واعفط خشتي باشوف هي صدق مرايا والا يلعبون علي
وبعد مااقتنعت ان هذي انا حسيت بنشوه عارمه والفرحه سيطرت على كياني والبسمه احتلت خشتي.
وقلت عرس سوير بنت جيراننا نهاية الاسبوع... قسسسسسم لو احضره كان كل اللي بالعرس يخطبوني وانا عاد اتدلل واتنقى بلا ولدالجيران بلا بطيخ ...
تذكرت ولد الجيران والتفت على الدكتور وقلت له: دختور مايكل انتم سويتوا شي بظهري؟
قال: مير غيرنا العمود الفقري كله
قلت: اشوى لان ظهري انكسر من كثر مااكنس الحوش عشان اشوف ولد الجيران اشوى انكم غيرتوه لان مابي اي شي يذكرني بالماضي المرير>>>> شكلهم حتى غيروا المصطلحات اللي بقاموسي اجل مرير اجل
وصرت اعيش عندهم وعطوني جناح كامل وانواع الدلال اول مرة بحياتي اقول كلمة﴿ مــامــي ﴾ العاده اقوله يمه والا يماااااااع.. بس تدرون وانا هالكلام اقوله عن تجربه ..كلمة مامي غير شكل تحس انك شي وانت تقولها.. اول مرة احس اني انتمي لفصيلة البشر .. وان لاصارلي شي لاسمح الله بياقفون معي حقوق الانسان صراحتن مليت وانا احتري جماعة الرفق بالحيوان ينظرون في امري ..والا يوم سمعت ان رجل اعمال تبرع بثروته للكلاب الضاله جلست احتري عند باب بيتنا احتري ياصلني شي من المساعدات..
طبعا مانسيت اهلي الصدزيين وبيتي الاولي عاد منيب قليلة خاتمه لهالدرجه.. بس كنت اتعيجز ازورهم والا اكلمهم ...
لكن مرتن من المراريت مسكت علبة كبريت ولقيت مكتوب عليها﴿قديمك نديمك﴾ والله ثم والله اني مدري وش معنى هالجمله والا هل هي مثل والا بيت شعر لكن يوم قريتها خنقتني العبره ورحت ازور اهلي واخذت لهم هدايا وطبعا مانسيت اميمتي جبت لها كم حزمة كراث معتبر مستورد من ايطاليا وجبت لها كبتشينو كراث وكراث سنبون و كراثييز >>﴿على وزن كوكيز﴾..
ورجعت لابوي المبلغ اللي لطشته منه وفوقها بوسه.. وسددت لاخوي اقساط السيارة وعبيت له بنزين ونويت اعشيهم وقلت كل واحد يقول وش مشتهي والا اميمتي تقول: ابي سمك محشي بكريريث>>>>> مير ياشين القراوى لاتطوروا
وبعد فتره هدت نفسيه ام البنت ورجعت لطبيعتها وقالت خلاص ياملوسنه ارجعي لاهلتس ومشكورة على اللحظات السعيده اللي عيشتيني فيها وهذا حسابك..
عطتني شيك وصرفته وبنيت لي عمارة اترزق منها
وعشت حياتي طبيعيه حياة بنوته حلوة وامورة بنوته سعيده والعرسان على باب بيتنا طوابير طوابير لدرجه ان مليت من كلمة: ملوسنه جاتس خطاطيب
ومرة كنت طالعه اعمل شوبنق ووقفت بالحوش احتري السواق يجيب السياره والمح ولد الجيران يواديز علي.. ناظرته وقلت ﴿ استخخخخخخخفر الله﴾ .. وطلعت وصكيت الباب
.
.
مايستفاد من السالفه:
ترا البنت مب انا لاتحسبونه انا
وش رايكم بالقصه
11-05-2004, 03:01 مساءً
للقصمان فقط 
جديد منتدى الفرح والمرح والفرفشه 
العرض العادي
