السلام وعليكم ورحمة الله وبركاته

الصداقة بين الجنسين وهم ام حقيقه

هل الصداقه بين الجنسين وهم وخيال لانراة الا في القصص أم هو واقع نعيشه في عالمنا العربي خاصة مع التطور التكنولولوجي والعلمي .............. وهل ساهم هذا التطور التكنولوجي في فتح الآفاق الفكرية للشاب والشابة
بان يكون هناك صداقة بحته لا تحكمها اي علاقات شائبة اخرى ؟؟؟
كثيرا منا نحن الشباب نتسائل عن هذا الموضوع الشائك هل نستطيع أن نكون علاقه اجتماعيه مع الجنس الآخر ؟
مع وضع في الاعتبار قول الرسول عليه الصلاة والسلام (لا يخلو رجل وامراة الا وكان ثالثهما الشيطان )).......و مع وضع الاعتبار انه في السنة النبوية و والتاريخ الاسلامي لم يكن للصديقة الناصحة وجود وكانت الصديقة هي الزوجة ...... هل هناك ما يسمى الصديقه المخلصه اوالصديق المخلص التي تتمنى لصديقها الخير دائما التي تكون بينهما علاقه اجتماعيه صالحه , نظيفه غير مشبوها ؟؟ وان وجدت كيف يتم النظر اليهما من خلال وجه نظر المجتمع ؟؟؟
وانا في مجمل حديثي طبعا افرق بين الصديقه و الحبيبه او الصديق او الحبيب ..
بحيث يكون هذا موضوع آخر .....
هذه التساؤلات فرضتها علي احدى صديقاتي ...
كنا نتناقش بهذ الموضوع ... واردت ان اشارككم هذا الموضوع
مع تحياتي
اختكم
ريم الفلا

بصراحة ومن منطلق رأي شخصي احب ارد واذا سمحتي اختي ريم الفلا

في زمننا هذا يجوز ليش لآ كل شي ممكن ولكن انتي عارفة حكم الاسلام في الشي هذا ويعني راح تكون التجاوزات كبيرة

نتوقف لحظه ونقول رأينا من ناحية اجتماعية

ممكن ليش لآ لكن صدقيني مهما كانت العلاقة وخصوصا اذا كانت فيها نظر يعني علاقه حسيه مو علاقه كمبيوتر وانترنت مثلا صداقه بالجامعه او بالدوام لابد مع الايام مخك وتفكيرك ياخذك لي بعيد وتنزع من تفكيرك ثوب الصداقه وتفكر ولو للحظه بالعلاقه الغير شرعيه واذا الريال قدر يمسك نفسه ممكن البنت ما تمسك نفسها والشيطان شاطر ولكن اذا قصدتي إنها مو جوده ولا لآ اي نعم موجوده ومتبادلة وقائمه على الاحترام مع انها قليله والنسبه الي حدثت فيها تجاوزات للخط الاحمر كبيرة
بالسعوديه مثلا مستحيل تكون علاقات صداقه بالواقع لانه ماكو اختلاط بالكويت عندنا شي عادي ولكن مو بكل وقت وبكل زمان ولكن ان حصلت تعتبر شي عادي نورمل حده خصوصا ان البنات والشباب يجتمعون في المحاضرات والكافيتيريات والدوام وبكل مكان وهالشي يخلي الاحتكاك بينهم اسرع وتقبل الامور افضل والانسياق وراها يعني تختلف من دوله لي دوله ولكن هم اشدد البنت الي تبي تصون عمرها وتبتعد عن الذنوب والخوف من الانحراف عن الطريق الصحيح تشيل من مخها شي اسمه صداقه للجنس الاخر

تحياتي
اسف ما عطيت الموضوع حقه ولكن توني قاعد من النوم
كويتي فوق تحت

[ALIGN=CENTER]اهلا اخوي كويتي فوق تحت
اسعدني ردك ...... وهذا وانت مو معطي الموضوع حقه
واشكر لك صراحتك بالموضوع ......
انا برايي ان المجتعات مهما اختلفت فهي ترجع في باطنها
الى عاداتها ةتقاليدها .... يعني كمجتمع مهما انفتحنا
من الصعب انه يتقبل انه تكون هناك صداقة بين الجنسين
لو تلاحظ معاي انه بالجامعات عندنا ان الصداقة او الزمالة
بين الجنسين تكون سطحية ولا تتعدا الامور العلمية واحيانا كثيرة لاتوجد ....
واذا رحنا لوظايف الحكومية اللي فيها اختلاط تلقى هم العلاقة بين الموظفين بين الجنسين
مهما تعززت وتوطدت ماراح تكون مثل الصداقة بين الشخص من جنس واحد (( شاب وشاب ))
بــــــــس هم الحجي هذا يظل خبرة شخصية لك ولي
وانا ما نزلت هالموضوع الا عشان اشوف هالامر من منظور اوسع واكبر .....
ولكن تظل هناك تساؤلات ...........
اذا الصداقة بالانترنت ممكن تكون بريئة وخالية من الشوائب ؟؟
وممكن يكون الشخص او الصديق ناصح امين مع الفتاة مثل الصديقة ؟؟؟

مع خالص تحياتي واحترامي
اختك
ريم الفلا[/ALIGN]

وعوده من جديد حبوبه

لا انتي ماخذه ومعممه الامور صدقيني في واقع الحياه العامه تصير صداقات بين الجنسين واعطيج مثال
ماكو بنت بالكافتيريا مالت الدراسه ما تغشمر معاها عادي الا كم وحده من هذيلا الي !!
يعني عادي وتحصل بيننا سوالف ما تتعلق بالدراسه وقليل منها بالدراسه مثلهم مثل الشباب لما اكلمهم يعني مثل واحد من الربع بس حلو :)
وهم في الدوام عادي يطلبون لك اكل وياهم وتطلب لهم عادي ويطلبون مساعده بالكمبيوتر وتحصل سوالف وغشمره ولاخظي شغله من زود الميانه محد ينادي الثاني باسمه كل واحد له اسم يضحك:)
وصدقيني في صداقات توصل لابعد الحدود واهيا شنو كانت بدايتها زماله عمل ولكن هم ما اجذب عليج واكون صريح مرات الشيطان يوسوس بالعقل وخصوصا اذا كانت البنت حلوه او لبسها مغري حبتين
على الانترنت ليش لآ ممكن توجد هالاشياء وبصراحه بتصوري افضل تكون العلاقه تيكست مو محادثه بالصوره او رؤيه الصور او تشغيل الكاميرات مثلج عارف شباب بعد وكل شاب يصور في باله تصوير لبنت من خلال الجسم واشياء كثيره ما احب اتطرق لها يمكن اخدش الحياء وتصدف تكون المواصفات هذي بالبنت الي يكلمها هني يتولد عنده شعور اعجاب والاعجاب بدايه لشيء الله يستر منه وما اتعامل فيه
تكون العلاقه كتابه فقط ويصير فيها نصح وغشمره وضحك سوالف ربع عادي ما تميز الي قدامك واحد ولا وحده تدرين ليش لان الغريزه الجنسيه مالها مكان بتفكيرك وللحين ما اشتغلت واذا ابتدت الله يستر واغلب الشباب ما يقدرون يسيطرون على نفسهم في الحاله هذي
وفي شي احب انوه عليه واشدد
مثال اختي العزيزه واسمحي لي بالمثال(مجرد مثال)
انا كلمتج بالماسنجر او شي من هالسوالف انا احب الضحك انتي ناقصج الفرفشه تعانين من الروتين لقيتي فيني نعم الصديق انا اعاني من الوحده الي عزلت نفسي فيها بنفسي نجتمع ونسولف نضحك ونتغشمر تعطيني من مشاعرج وتشرحين نفسي اعطيج من مشاعري واترك أثر بنفسج مع مرور الايام ولا شعوريا تتطور العلاقه تاخذ منحنى اخر يصير في انجذاب فرح عند اللقاء على الماسنجر الحياه ناقصه لاحدنا من دون الاخر نصير مدمنين على بعضنا ولما تتطور هني نحط علامه حمره ونوقف ونسلم بالامر الواقع احنا فشلنا بتحقيق صداقه بريئه تجاوزنا الحد الفاصل مابين الصداقه والحب ولو اني ما اعترف بشي اسمه حب ولكن انا اتكلم عموما وكل هذا مثال لواقع يحصل كل يوم واذا كنا من نفس البلد وحتى لو ماكنا من نفس البلد اسافر والقاج ويصير الي يصير وانتي تخسرين وانا اتعب نفسيا والمقابل شنو والسبب شنو ؟؟ القصد من تكوين صداقه نافعه لقينا عمرنا بشي ضار
يمكن الواحد يقول شلون نتجنب الشي الي يصير شلون نقدر نمسك عمرنا وما نتجرأ ونغوص ونعطي مجال لمشاعرنا تحركنا
الحل بسيط وسهل يكون احد الطرفين ولو اني افضل الرجل راعي خرابيط ويعرف بنات كثر شعر راسه وانسان متمرد على الحياه ينظر للبنت شهوه فقط وتسهيل امور ووصل لمرحله الاكتفاء حاليا من الجنس واشباع الغرائز اقول حاليا لان غريزه الجنس ما تنتهي فينا يمكن تخمد ولكن بمجرد ما انها تصحى من سباتها تهيج وتتطور وتصبح اكثر من المعقول ومن بدايتها وخصوصا لما تتزوج البنت او يتزوج الولد ويجرب هالشي
طبعا يمكن ليش انا اشدد ان الواحد يكون سربوتي راعي خرابيط لان في الحاله هذي ماراح تلفت نظره البنت ولا يتطور بتفكيره راح يقول في باله من جي انا يبا ادور على الانترنت انا عندي مليون بنت هذا الناقص اتعب واضبط وحده يمكن اقدر القاها ولا لآ صح انه حل بشع ولكن ما اشوف حل غيره يمكن للامور تمشي معاه بالطريقه هذي اما هالحل او الغاء فكره الصداقه ن اساسها لانها ماراح تنفع اصلا
وطبعا لو كان واحد من الطرفين عارف نفسه ومكتفي من هالسوالف الشخص الثاني شنو ذنبه يتعلق ويذوب ويسهر الليالي يحلم ويخطط لازم من الطرف الاول تنبيه الطرف الثاني ولو بجمل تحمل معاني بين السطور تقول له لاتتعلق يا فلان ولا يا فلانه ترى انا ما انفع خلك جذي احسن ويمكن يقدر يصد الي يفكر فيه خصوصا لو مالقى تجاوب من الطرف الثاني


والله ما ادري شنو كتبت ولكن خذتني السوالف بالموضوع وانشالله ما اكون طولت عليج وعطيت الموضوع جزء من حقه
انا اسف اكتب باللهجه الكويتيه العاميه صج اني اقدر اكتب بالفصحى لكن ما احس اني اعبر عن الي ابي اقوله جذي

تحياتي اخوج كويتي فوق تحت

حيالله اخوي كويتي
اخوي اسعدني اسهابك .......
وانشالله لي عودة لمناقشة الموضوع معك
اختك
ريم الفلا