فــي ظــلام اللـيـل والسـاعـة عـشـر=والهـدوء خيّـم عـلـى أطــراف المديـنـه
والنـجـوم تشـكّـل قـلــوب وصـــور=تنتـظـر معـشـوق هالـبـنـت الحـزيـنـه
بأوسـط الـشـارع وأنــا أنـطـر للفـجـر=وكــل عـيـن تطـالـع بنـظـره مهيـنـه
والدقايـق والثوانـي كنهـا صــارت دهــر=وامتلـت دقاتهـا خـوف مخـلـوط بغبيـنـه
قمت أسرع بالخطـاوي علّنـي ألقـى الصبـر=يمكن أخطى بالمكان .. بس هو الحين وينـه ؟!
إضربت موجه قويـه ورحـت أمشـي للبحـر=وصرت أشكي له ولا أدري ويش أسوي يا سنينه
صرت أنادي بالبحر وأقـول مثلـك هـو غـدر=صرت أصيح ودمعتي تنـزف جـروح ٍ دفينـه
مد لي يـده وقـال المعـذره يـا أغلـى بشـر=بس ضروفي أخرتني وحـط يـدي فـي يمينـه
لي ربع ساعه وأنا اسمع وانتي تشكيـن البحـر=هالكثـر قـدري بقلبـك كـل زلّـه تغفريـنـه
والتقت عيني بعينـه .. شفـت واحـد منكسـر=الحزن غطى ملامـح وجهـه وغطـى جبينـه
قلـت: لاتزعـل حبيبـي جيّتـك أحلـى خبـر=قال: عندي لك كلام واختنقـت الدمعـه بعينـه
ما سألتي عـن ظـروفٍ أخرتنـي مـا حَضِـر=ما سألتي عن دمـوع ٍ كنتـي انتـي تمسحينـه
ما سألتي عـن حبيبـك فارسـك مـات بقهـر=ما سألتي ويـش سـوّوا فـي حياتـه والدينـه
اخطبولي وحده غيرك .. ضيعوا أحلـى قمـر=اخطبولي بنت عمي .. بذمتـك ماهيـب شينـه
ضيعـوا أحلـى سنيـن ٍ كلهـا أحـلام وفكـر=ضيعوا حلم ٍ رسمته .. نعيش فـي بيـتٍ تبينـه
كنت أرسـم بيتنـا وسيارتـي وأنسـى الكفـر=ودوم ضحكاتك تدوي .. كيف هذي تمشي فينـه
كيف عقب هالعمر كله أعيش مع غيـرك عمـر=كيف ترضيـن بدخيلـه فـي حياتـي وتقبلينـه
انطقي .. قولي .. حرام .. الصمت يذبحني قهر=قولي بس جملـه وحيـده لـو قلبـي تعشقينـه
"كـن جسمـي مقبـره وحبـك بداخـل قبـر"=روح يالغالـي فـمـان الله والقـلـب بيعيـنـه
ولو وصلك إن المنيه عقب مـا رحـت بشهـر=جت تعزيني وخذتنـي للـدروب اللـي مشينـه
لا تصـدق حكيهـم والصبـح يالغالـي ظَهَـر=لازم نودِّع بعضنا .. وطاحـت دموعـه بيدينـه