ان شكيت من الهوى قالوا فضيحه من احلى الرويات اللي قريتها

السلام عليكم
حبيت اليوم انقل لكم احلى روايه قريتها وصدقوني راح تعجبكم
وانشاء الله ماتبخلون علي بردودكم واذا كان احد قبلي نقلها لكم ياليت
تعطوني خبر

ان شكيت من الهوى قالوا فضيحه .
. وان سكت استنقظوا جرحي عليه


الكاتبة : النشميه
سنة : 2003-2004


الجزء الاول



خليفه : تعال حمود شوف هالايميل .. تعرف منو راعيه ؟؟!!!
محمد : اشوف !! .. لا والله ما اعرفه .. بس شكله ايميل بنت ..
خليفه : ظنك ايميل وحده ..
محمد : انت شو خسران سولها ادد .. وبعدين بنشوف ..
خليفه : انزين .. ( وسوالها خليفه ادد )
محمد : هاااااااه دخلت .. !!!
خليفه : لحظه .. تدري النك نيم مالها قوي .. ( ان ذكرتك اليوم .. حثي في وجهي تراب .. ) ظنك ليش حاطه هالنك نيم ..
محمد : انت شو عليك من النك نيم مالها .. ترى رزه الفيس من طبايع ..... وانت اتعرف التكمله ..
خليفه : كيفيه انا ملقوف انت شولك خص ..
وشوي ان راعيت الايميل داخله .. وخليفه ما صدق عمره على طول كلمها ..
خليفه : مرحبا ملاين ولا يكفن ..
......: مرحبا
خليفه : شحالج ..
......: بخير الحمد الله .. شحالج انت ..
خليفه : حمود .. الحق تتحراني وحده ..
محمد : انزين قولها انها مغلطه .. وسولها دليت و بلوك ..
خليفه : مينون انا مثلك .. اريد ايب راسها .. با ستهبل عليها ..
ويرد خليفه على الب توب ماله ..
خليفه : بخير الحمد الله ..
......: يالسباله .. انتي وين .. من متى وانا استناج اتسويلي ادد عندج .. شو مذله هيه .. وسويتلج انا ادد .. والله تدرين كنت خايفه اكون مغلطه .. واطيح بواحد .. بس ربج ستر ..
خليفه : اسمحيلي .. نسيت الايميل مالج ..
.....: ما علينا الحين .. انت ليش فاتحه هالايميل .. اللي يشوفه يقول مال ولد مش بنت .. مع انه ايميلج الجديم .. حلو ..
خليفه : وله لا عت جبدي من هذاك الايميل .. كل شوي ان حد داخل علي وانا ما عرف منو هذه .. قلت اغيره عشان اذا دخل علي ريال على هالايميل يتحراني ريال و ما يتحرش فيه ..
ومحمد يشوف اللي خليفه يكتبه ..
محمد: والله انك عجيب .. عرفت كيف اتمشي معاها في السالفه .. لا وهي مصدقه .. الله يعينها عليك ..
......: انزين اخبارج انت .. واخبار الكليه معاج ..
خليفه : والله يسرج الحال ..
......: انزين .. ما كلمتي .. شيخوه .. من زمان اعديبها .. والله الها وحشه هالدبه ..
وخليفه ومحمد يقرون ويضحكون على رمستها ..
محمد: شكلها لسانها طويل ومب هينه ..
خليفه: ما عليك باروضها ..
خليفه وهو يرد على كلامها ..
خليفه : لا والله ما كلمتها .. هذي مقاطعه الكل .. شكلها رافعه خشمها علينا ...
........: هيه والله من دخلت جامعه زايد وهي ما اتكلم حد .. ما جنه أنا بعد في جامعة وايد
ولف خليفه على محمد ..
خليفه : طالعوا طلعت البنت اللي راعيت الايميل تتكلم عنها .. تدرس في جامعه زايد ..
محمد : انزين شو يعني .. انا اختي في جامعه زايد ( وملامح العزه والكرامه على ويهه )
خليف : على شو هالنفخه اللي انت فيه .. يوم انت نسبتك كانت 75%
محمد : انزين من زين نسبتك انت عاده .. يوم انت يايب 65% .. لا ترمس .. انا احسن عنك ..
ونسى خليفه البنت على المسنجر .. ويلس يتواقع مع محمد ..
.....: شكلج مشغوله .. خلاص انا باطلع .. وان شاء الله بنتلاقا .. بس هاه لا تغدين مثل هذيج العنز اللي ما تسال ..
خليفه : حمود انجب خلني ارمس البنت ..
خليفه: لا الغاليه انا مش مشغوله .. بس كنت اكلم وحده .. وخلصت منها ..
وراعيت الايميل ما ردت .. وخليفه يتحرقص يباها ترد ..
خليفه : حوووووووووووووووووووو ... انقوووووووووووح ..
...... : اش عندج .. وبعدين شو انقوح بقره شايفتنيه ..
خليفه : لا عنز ..
.....: والله وطلعلج السان يا مريوم ..
خليفه : حمود طلعت مريوم وانا ما ادري ..
محمد : مبروك عليك الاسم .. ( وهو يضحك عليه )
خليفه : ( نظره الاحتقار على ويهه حق محمد ) ... تاج راسج مريوم .. شو نسيتي انا منو ؟؟
.....: لا ما نسيت .. الا مريوم .. منوتتحرين عمرج .. العنود ..
خليفه : منو العنود ..؟!! (بسلوب الاستهزاء ) .. لا تصدقين عمرج وااااااايد ..
....: والله انا مش امصدقه عمري على الفاضي .. والكل يشهد .. واولهم الجواز ..
خليفه : ( وهو متشقق ) حمود طلع اسمها العنود ..
محمد : وانت شو دراك ..
خليفه : تعال اقرى وشوف ..
محمد وهو يقرى اللي مكتوب : طالعوا صدقك والله ... نطقتها اسمها وهي ما تدري ..
خليف : ولا يهمك .. با يبلك رقم الجواز لو تبى بعد
محمد : لا ادريبك انك تقدر .. امطيح نص بنات ابوظبي .. محد قدك شو عليك ..
خليفه : ههههههههههههه .. وليش اتقولها جي .. وبحسره ..
محمد : لا ماشي عادي .. انا وحده ومب راضيه تعطيني ويه ..
خليفه : خلاص يا حمود .. انسى .. واللي ما يباك لا تباه .. واللي خلقها خلق عشره غيرها .. انت اشر وبتلاقيهن تحت ريولك ..
محمد : والله يا خالوف .. اني احبها .. بس ما ادري احس انها في يوم .. بتي اتقولي ( احبك )
والبنت ناقعه على المسنجر .. وخليفه قاعد يواسي في محمد ..
.......: ( امطرشه ويه امعصب ) وانتي بعدين معاج .. كل ساعه منقعتني .. قولي فولي منو اتكلمين هاااااه !!!!
خليفه : ما اكلم حد بس قاعده افكر فيج ..
.....: يا ويلي انا .. من متى ؟؟ ..
خليفه : من اول ما كلمتج ..
.....: بسج عن الخراطه .. ويله انا باطلع .. تامريني بشي ..
خليفه : لا فديتج .. الله يحفظج .. باي
.....: باي
ويسكر خليفه الاب توب .. ومحمد بعد .. ويقومون .. بيروحون بيت محمد ..

في بيت محمد ..
محمد : هووووووود .. هوووووووود ..
بو محمد : هدى هدى .. اقرب ..
محمد وخليفه : السلام عليكم ..
وكان في ميلس الريايل .. بو محمد .. وعم محمد .... ووايهوا اللي في الميلس .. ويلسوا ..
محمد :اقول خليفه .. انا بادخل اتسبح وبرجع ..
خليفه : ( وهو يتفلسف ) تيك يور تايم ..
بو محمد : محمد .. ترى حرمه عمك وبنات عمك داخل .. لا تنسى تنحنح .. قبل ما تدخل ..
محمد : ( وهو طاير من الفرح بيشوف بنت عمه اللي من اجازه الصيف ما شافها من بعد ما انتقل عمه دبي.. وفي نفس الوقت .. مرتفع ضغطه على رمسه ابوه ) .. ان شاء الله .. ادري اني صرت ريال ..
وهو في الممر .. يقول في خاطره .. ياله فديتها .. والله اني متوله عليها .. بس متى ترحمني .. وتنطق ..

محمد : احم احم .. هوووووووود
وبسرعه البنات لبسن شيلهن ..
ام محمد : وايه فديتك .. تعال .. محد غريب .. الا بنات عمك ( خلود .. الوسط .. وندى .. اخر العنقود .. البجر .. سلطان .. )وعمتك .. وخواتك
محمد : السلام عليكم ..
وقفن البنات وردن السلام .. وعليكم السلام ..
محمد : شحالكن .. ربكن بخير ..
خلود : بخير الحمد الله شحالك انت
ومحمد متشقق .. ويقول في خاطره .. يالله فديت هالصوت .. : بخير الله يسلمج
ندى : شحالك حمود ..
ام خلود : واااااااابويه .. ندوي ما تستحين .. ريال بلحيته .. تقوليله حمود ( وهي تنحزها )
محمد : لا عادي عمتيه .. خاليها على راحتها .. ندى هذي .. مش أي حد ..
وندى متشققه من الوناسه ..
مزنه ووضحى ( خوات محمد .. مزنه اصغر من محمد بسنتين .. ووضحى اصغر من مزنه بثلاث سنين .. واللي وايد قريبه من محمد هي مزنه .. ) : القوم .. هيه عادي بس نحنا يوم انقولك حمود .. تغسل شراعنا ..
محمد : جب انتن مالكن خص .. انا وبنت عميه ونتفاهم ..
وخلود ساكته .. ما علقت على أي شي ..
ومحمد خطر عليه يموت من القهر .. والسبب برود خلود .. يباها تعلق على أي شي .. بس هي من النوع الهادي ..

متى تفهم التلميح وتبادل المجروح .... مشاعر خفوقٍ ما شعر يوم بالراحه
يجي لين حدك والحيا يمنعه ويروح .... حزينٍ يخفي جاير الشوق واجراحه
ويصبر عسى شمس الهنا في سماه ولوح .... طيور الفرح تملي لياليه سواحه
تمادى بك الغفله وهو مشفيٍ مشفوح .... تنام بهنا ويساهر الليل واشباحه
ويلعب به الهاجوس لعب البحر باللوح .... ولو حاول النسيان ذكراك تجتاحه
ويرسم عنا دنياه في دمعه المسفوح .... ولوعه جفاك تبان في كثره اواجه
ويجحد عن العال خبر شوقه المذبوح .... دروب الدموع اللي على الخد فضاحه
ويعيش بلظى نارين نار الصبر والبوح .... وطيفك يوقف له بغدوه ومرواحه

الجزء الثاني ..

وبعد ما سلم محمد على بنات عمه .. دخل يتسبح .. وبعدين رد على الريايل .. وقعدوا يتعشون ...

محمد : الا عميه وين سلطان .. ما شوفه يه معاكم ..
عم محمد : والله يا بويه انه قلناله تعال معانا .. بس هو كان مواعد ربعه يروحون تل مرعب .. واحد من ربعه مشارك ..
محمد : والله ومنو من ربعه مشارك ؟؟!!!
عم محمد : اضني غانم المزروعي ..
محمد : عيل باجر انا وخليفه بنروحلهم ليوا .. هااه خليفه .. بتروح معاي ..
خليفه : اكيد .. وهوانا اقدر استغنى عنك ( يطنز ) ..
محمد : لا ادري انك ما تقدر على فرقاي .. بس اختبرك ..
بو محمد : باتباتون .. وله بتضون ..؟؟
محمد : والله يالغالي حسب الجو ..
بو محمد : انزين اتصل خبرني .. ويوم بتوصلون طمنوني عليكم ..
محمد : ان شاء الله ( وهو ضاربتنه غصه .. ) .. الا عمي انتوا بتباتون عندنا ,,؟؟
عم محمد : بنبات .. انا وبوك عندنا شغل باجر ..

وقام خليفه ..بيرد بيتهوم .. : يالله .. خالفتنا العافيه .. شي في خاطركم من صوبنا
الكل : لا سلامتك .. بس ابو محمد قال : خل بالك من الطريق وعن السرعه ..
خليفه : ان شاء الله .
وقام محمد معاه بيوصله ..
خليفه : حمود ابوك هذا متى بيستوعب انه خلاص صرنا ريايل ..
محمد : يا بن الحلال انت طنش .. والله انه مسكين .. واايد يخاف علينا ..

خليفه : ياله انا باروح بسرعه يمكن العنود داخله المسنجر ..
محمد : منو العنود بعد ؟؟
خليفه : ما سرع نسيت اللي مسوتليه ادد اليوم ..
محمد : هيييييييييه اتذكرت .. الله يعينك ..
خليفه : نسيت .. ما وصيك اليوم .. استغل الوقت .. الحبايب موجودين .. جحل عيونك .. وسلملي عليها ..
قولها خلوف راعي السيكل يسلم عليج ..
محمد : ان شاء الله هذا اذا ردت عليه .. ولا تنسى باجر موعدنا .. مش تسهر على النت وتنام ..
خليفه : لا ما عليك ان شاء الله .. يالله مع السلامه .

ورد محمد صوب البيت .. وراح الصاله مالت الحريم .. عشان يقعد مع امه وخواته و ( القلب )

محمد : درب درب .. تغطن يا بنات .. محمد .. ايز كمينغ ..

وبسرعه البنات لبسن شيلهن .. وهن يضحكن ..

مزنه : ادخل محد غريب .. الا انا .. (تطنز)
ودخل محمد .. وقعد مع خواته وبنات عمه ..

محمد : عيل وين العيايز .. ؟؟
ندى : راحن يرقدن ..
محمد : تو الناس .. الا هي الساعه 11
وضحى : وانت بعد ما تعرف عيوزك .. من يعديها الساعه 9 وهي تنود .. تبى ترقد ..
مزنه : انت ما تحترمين نفسج .. ما جنها امج ..
وضحى : خلاص اسفه .. نسحبها ..
خلود : انا اترخص .. باروح انام ..
محمد وهو يتحرقص ما يباها تروح .. ويدور بسرعه سالفه يفتحها عشان ما تروح ..
محمد : وين تو الناس .. ما قعدنا معاكم .. وعرفنا اخباركم
خلود : لا والله بس تعبانه من كم يوم ما نام .. كان علي امتحانات ..
محمد : انزين قعدي شوي ..
خلود : ان شاء الله ..
محمد : اقوووووول .. راعي السيكل يسلم عليج ..
خلود مره وحده يلست تضحك : الله يسلمه .. وشحاله .. ربه بخير ..
محمد وهو ذايب من سمع خلود تضحك ( ياله يازين هالضحكه .) : بخير الله يسلمج ..
ندى ووضحى بيموتن يبن يعرفن شو سالفه راعي السيكل .. : شو السالفه ؟؟!!!!
محمد : خلن خلود تخبركن ...
خلود : لا خبرهن انت ..
ندى : طالعوا هذيله .. شو مطولين تتعازمون ..!!!
محمد : لا خلاص انا باقول .. الله يسلمكن .. راعي السيكل هذا .. خليفه ربيعي .. يوم كنا يهال .. كان توه مشتريله سيكل .. وكانت خلود ومزون يمشن في الشارع .. وهو عاده كان يبه يلفت انتباهن .. ويتخرط ويستمدح عليهن .. المهم .. وهو كان يسوق السيكل .. كانت عينه صوبهن .. وما يشوف جدامه .. لين ما طاح في البالوعه .. ( ويلسوا يضحكون )

وبعد ساعه قامن البنات .. وراحن يرقدن .. وقام محمد وهو طاير من الفرح .. ويلس على النت .. واول ما دخل لقى خليفه .. اون لاين ..

محمد : هاه خلوف .. اخبارك .. واخبار العنود ..
خليفه : والله قاعد اترياها .. ما دخلت ..
محمد : خليفه .. احبك ..
خليفه : ( امطرش ويه فاتح عيونه ) حمود انا مش خلود .. ركز معاي ..
محمد : ادري .. شو قالولك شارب ..
خليفه : هيه شارب .. لا وشكلك مزود الشرب بعد ..
محمد : (مطرش ويه معصب ) تخسي ..
خليفه : يالهرم .. وين راح تفكيرك .. انا قصدي انك شارب من هوى بنت العم ..
محمد : ههههههههههههههههه .. الحين فهمت
خليفه : والله انك هب صاحي
محمد : هيه والله .. المهم .. هيه تسلم عليك .. ومن قلتلها راعي السيكل .. يلست تضحك .. فديت ضحكتها يا ربي
خليفه : الحمد لله والشكر .. ياربي لا تبلانا ..
محمد : لا والله ياربي يبليك .. مثل ما بلانا ..

وشوي ان العنود داخله ..

خليفه : مساكم الله بالخير
العنود: : مساج الله بالخير
خليفه : كيفوااااااا
العنود : بنحمود الله
خليفه : وشحال الجامعه معاج ..
العنود والله اوكي
خليفه : ان شاء الله دوم
العنود : الا اقولج من ايام الثانويه ما تلاقينا .. انريد ان شوف يوم نجمع الشله ..
خليفه وهو مرتبك ما يعرف شو يقول . : ان شاء الله .. بس وين ؟؟
العنود : اممممممممممممم .. شو رايج تعطيني تيلفونج .. ويوم باي ابوظبي بكلمج ..
تم خليفه ساكت مش عارف كيف يمشي السالفه ..
العنود : وينج ؟؟
خليفه : معاج
العنود : انزين عطيني رقمج ..
خليفه : بعدني ما طلعت رقم ..
العنود : انزين البيت
خليفه : ما قلتلج .. نحنا حلنا بيت يديد ..
العنود : انزين انا بعد ما طلعت رقم .. بس بعطيج رقم البيت .. كلميني عليه ..
خليفه (وهو متشقق ) : اوكي
العنود : 000000/04
خليفه : خلاص .. متى قدرت بدقلج ..
ورد خليفه كتب حق محمد :.. خذت رقمها
محمد : مسرع .. درت انك ريال
خليفه : لا ..
محمد انزين كيف خذته ..
خليفه : لحظه بسوي لك كوبي وبست على اللي كاتبتنه ..
محمد : هذي من دبي شكلها
خليفه : اكيد

ورد خليفه على العنود ..

خليفه : انزين واخبارج بعد ..
العنود : والله يسرج الحال .. وانت اخبار الكليه معاج ..
خليفه : والله الحمد الله ..
العنود : الا سالج اخبار ..مزون بنت سعيد .. شو معاج هيه ..
خليفه (منصدم وشاك في الاسم ) :.. منو مزون بنت سعيد ؟؟!!!!!
العنود : مزون بنت سعيد الهاملي .. شو نسيتيها ..
خليفه ( وكان شكله كانه مضروب على ويهه .. )

وبسرعه رد على محمد : حمود الحق طلعت تعرف مزنه ختك ..
محمد : وكيف تعرفها ؟؟؟؟؟؟
خليفه ( سوى كوبي وبست ) ما ادري .. بس شكلها توها منتقله دبي .. وكانت تدرس معاهن في مدرسه وحده ..

ورد على العنود : والله يسرج حالها .. دخلت جامعه زايد اللي عندنا ..
العنود : والله زين .. عندج ايميلها ..
خليفه : لا بس اذا تبين بيبلج اياه ..
العنود : هيه فديتج .. اريده ..
خليفه ( يريد يتقرب منها اكثر ) : انزين ليش حاطه هالنك نيم .. ترى وااايد قوي ( ان ذكرتك اليوم حثي في وجهي تراب )
العنود : لاني متواقعه مع وحده ..
خليفه : خير .. شو صاير ..
العنود : لا هالسالفه ما يبالها كتابه .. لازم بالتيلفون ..
خليفه ( في خاطره فرصه بسمع صوتها) : انزين شغلي المايك ..


cut

نزلت لكم جزئين اليوم وانشاء الله راح انزلكم 3 اجزاء في الاسبوع راح تزيد على حسب تفاعلكم مع القصه

xmss....


قصة في قمة الرووعة


تسلمين يا قلبووووووو

وننتظرك بس لا تطولين علينا

@ NONA@