كلى براءة

يسلمووووووووو

مشكورة ماقصرتى

يلا ننتظر التكملة لاتطولين علينا

حياك الله أنجيلا ومشكورة عالمتابعة وهذي التكملة

(الجزء السابع)






العنود افتحت عيونها بتثاقل وبكسل, حاسه انه فيه شي ثقيل عليهم, بس تغلبت على التعب وفتحتهم وهي تتسائل بينها وبين نفسها اذا كان اللي صار امس لها كابوس مزعج او خيال, ولكنها اصطدمت بالواقع لما شافت بنتها نايمه بحضنها وهي نايمه بثياب البيت من غير ماتلبس ملابس النوم, واللي اكد عليها الامر عدم وجود متعب معها بالغرفه, ناظرت الساعه وكانت الساعه ثلاث بعد نصف الليل, في هاالاثناء قررت العنود انها تحمل بنتها, وتحمل معها آلامها واحزانها وجروحها, وتروح لغرفة بنتها رند وتكمل نومها هناك وتحتفظ بما تبقى لها من كرامه, وفي غرفة رند كانت العنود تتقلب في السرير وكلام متعب يتردد في اذنها
العنود:- ياترى كيف راح تكون حياتي معك يامتعب , وبعد ماغلب عليها النعاس ومتعب ماجاء قررت انها تاجل مواجهته الى ان يجي تكون ارتاحت قليل واستسلمت لنوم عميق بجوار بنتها











ام عبدالله:- يابو عبدالله ودي اليوم اروح بيت اختي ام نايف
بوعبدالله:- ليه خير؟
ام عبدالله:- لا بس ماشفتها لي اسبوع وودي اروح لها
بوعبدالله:- براحتك متى مابغيتي تروحين قولي لي وانا اوديك
ام عبدالله:- لا مشكور السواق موجود بس حبيت اعطيك خبر
بوعبدالله:- لاوش دعوى وانا بروح الشركه اوصلك والسايق يرجعك
مشاعل:- يمه ودي اروح السوق اول
ام عبدالله:- روحي مع خواتك
مشاعل:- لابروح مع نوره بنت عمي بس هم ودي اروح بيت خالتي
ام عبدالله:- خلاص نروح الحين بيت خالتك وبعدين السوق , كلمي نوره قولي لها
مشاعل:- انشالله بروح البس
نوف:- وانا
بوعبدالله بتعجب:- وانت ايش؟
نوف ببرود:- بروح بيت خالتي
بوعبدالله:- يابنتي الله يهديك انت الان بثالث ثانوي جدي بالمذاكره ولاحقه على الطلعه
نوف:- اولا انا انتهيت من المذاكره , وثانيا انا مااعرف اذاكر وفي ناس طالعين برى , والاهم اني احتاج ارتاح شوي وهالوقت بروح بيت خالتي ولما ارجع اكمل مذاكره , تكفى يبه
بوعبدالله بابتسامه:- براحتك , وانت ياجود بتروحين
جود:- اذا انتهيت من الواجب بروح
ام عبدالله:- يالله بسرعه قوموا البسوا مانبي نتاخر
الكل:- انشالله
بوعبدالله بعد ماتاكد ان كل البنات راحوا يلبسون:- الا اقول ام عبدالله وش رايك بما ان مشاعل بتروح السوق والبنات بيرجعون يذاكرون نروح انا وانت بعد صلاة العشا مطعم
ام عبدالله باستغراب بس ماحبيت تبينه:- نروح مع البنات كلنا مره وحده
بوعبدالله بارتباك:- مم لا ودي نرجع ايامنا القديمه مع بعض وهم فيه موضوع بكلمك فيه( في هالاثناء زاد ارتباكه)
ام عبدالله بخجل وخدودها محمره:- انشالله بعد صلاة العشا بتجهز













في بيت ام نايف



ام نايف:- هلا والله باختي وش اخبارك
ام عبدالله:- الحمد لله وش اخبارك انت والعيال
ام نايف :- الحمد لله
مشاعل +جود +نوف:- وش اخبارك خالتي
ام نايف:- بخير جعلكم الخير
ساره:- حيالله خالتي تو مانور البيت
ام عبدالله:- بوجودك ياعمري
ساره:- وش اخباركم بنات
مشاعل +جود:- الحمد لله
نوف:- شفناك ماسالتي عنا قلنا نمر ونسال لولا غلاك ماجيت وانا وراي هم ثالث ثانوي
الكل:- ههههههه
ساره:- ههه الله يوفقك القلوب عند بعضها
جود:- الا قولي قلبك ياكلك لو احد طلع وانت بالبيت
نوف:- ياشين اللقافه
جوري تركض لمشاعل وتضمها:- احبك مرره ليه ماتجين عندنا
نوف:- وانا وهالمقروده ( تاشر على جود ) نطلع ياجوري
جوري:- احبكم كلكم
صعدت جوري فوق تاخذ اللعبه اللي شرتها توريها بنات خالتها وصادفها نايف
نايف بعد ماسمع اصوات تحت
نايف:- مين تحت عندنا؟
جوري:- خالتي وبناتها
نايف:- ومشاعل موجوده
جوري ببراءه:- ايه تبي اناديها لك
نايف وحس بفرحه كبيره بقلبه مشاعل معه بنفس البيت
نايف:- انت كبيره ياجوري صح
جوري:- ايه حتى شوف ( وتاشر بيدها على طول جسمها)
نايف:- ماشاالله , اسمعي ابيك حبيبتي تروحين لمشاعل وتهمسين لها باذنها من غير مااحد يسمع اوكي
جوري:- طيب وش اقول لها
نايف:- يسلم عليك نايف بس من غير مااحد يحس
جوري:- انا كبيره حتى اسالها اذا انا قلت لها احد سمع او لا
نايف:- طيب بس بسرعه
نزلت جوري تحت ومن حسن حظها ان مشاعل كانت بزاويه فهذا الشي ساعد جوري
جوري جلست بطرف الزاويه قريبه من مشاعل وابتسمت لها وبعدين نزلت راس مشاعل وقالت لها
جوري بهمس :- يسلم عليك نايف
مشاعل حست بالاحراج ووجها صار احمر وخدودها توردت وتنقلت عيونها في الغرفه تتاكد ان مااحد سمع جوري
مشاعل استغلت الوضع وقررت انها تشكره على الهديه اللي جابها بطريقتها الخاصه
مشاعل بصوت واطي:- وينه هو
جوري:- فوق
مشاعل عطرت جوري بالعطر اللي جابه لها نايف وقالت لها
مشاعل:- قولي له من غير مااحد يسمعك
جوري:- وش اقول
مشاعل:- الله يسلمك
صعدت جوري فوق وقالت لنايف وطار قلبه من الفرحه وقرر انه ينزل يسلم على خالته ويكحل عيونه بشوفة مشاعل ولفة نظره ريحة العطر اللي تعطرت فيه اخته وخاصه انه العطر هو مسوي الخلطه من لبنان بذوقه وعرفه انه شكر من مشاعل له وباس جوري وهو يبتسم
نايف:- انزلي تحت قولي لبنات خالتي يتغطون بنزل اسلم على خالتي
جوري:- انشالله
نزلت جوري تحت وبلغتهم
مشاعل:- ساره خلينا نطلع غرفة ثانيه
ام نايف:- ليه تستحين منه , تراه انشالله زوجك في المستقبل
ام عبدالله :- اجلسوا , تغطوا وروحي ياجوري قولي له حياك الله تعال
نايف:- السلام عليكم
نايف يبوس راس خالته:- كيف الحال باحلى خاله في الدنيا
ام مشاعل:- الحمد لله وش اخبارك انت؟
نايف:- بخير , وش اخبار عمي بوعبدالله
ام عبدالله:- الحمد لله مايسال الا عنك
نايف يلتفت جهة البنات وعيونه تدور على حبيبة قلبه والتقت عينه بعيون مشاعل وظلوا العيون ملتقين وكانهم يعلنون عن شوقهم لبعض وعن حبهم لبعض لقاء لم يتوقف الا لما نزلت مشاعل عيونها
نايف:- وش اخباركم بنات
الكل:- الحمد لله
ساره:- نايف عندك رسايل بلوتوث جديده
نايف:- ايه , ليه
ساره:- لا مشاعل تبي رسايل وماحصلت عندنا جديد , انا قلت يمكن عندك
نايف يناظر مشاعل بنص عين:- افتحي بلوتوثك مشاعل
مشاعل حست باحراج كبير وتمنت انها تكون مع ساره لوحدها بالغرفه وتطلع حرتها فيها
مشاعل:- لا,.... , انشالله
نايف غير اسمه في البلوتوث من (سفير الرومانسيه) الى ( محبوبتي مشاعل) وكان قصده يحرجها من جهه ويعبر لها عن مشاعره و عمل بحث للاسماء الموجوده وماحصل الا اسم واحد بس شك انها كاتبه الاسم غلط
نايف:- وش اسمك , دلولة اهلها او دلوعة اهلها
ساره:- هه لا دلولة اهلها لانها دايم تقول انا مدلـله مو مدلعه
نايف:- اوكي , استقبلي
مشاعل باحراج وبصوت واطي :- انشاالله
وقرت مشاعل اسمه
مشاعل بينها وبين حالها باحراج واحمر وجها:- والله انه جريء , عسا مو جد يشوفونه كل الناس , بس عمر ساره ماقالت لي
التقت نظرات مشاعل ونايف ومشاعل قمه في الاحراج وجهها احمر ومو قادره تحط عينها بعيونه اما هو عطا مشاعل ابتسامه تدل على النصر
نوف:- ولا عليك امر نايف اذا عندك صور ومقاطع مضحكه ارسلها لمشاعل وانا باخذها منها وبالمره بعد مقاطع ناس تحب تذاكر لجود
الكل:- ههههههههههههه
جود:- ياسخفك
نايف ياشر على عيونه:- من عيوني
نوف:- تسلم عيونك
جوري:- نايف اسالها اسالها اذا حد سمعني وانا اقول لها
نايف حس بالاحراج واخذ اخته وقام يشغلها باللعب
مشاعل احمر وجهه وحست ان الكل عرف وتمنت ان الارض تنشق وتبلعها من الاحراج
ساره +نوف+جود:- تنقلت عيونهم بين نايف ومشاعل واكتفوا بابتسامه للكل وغمزه لمشاعل
اما ام نايف وام عبدالله ماانتبهوا للكلام
ام عبدالله:- والله قلبي مو مطمن على امي وهي بهالحاله , انشالله اليوم يجينا خبر لندن ننقلها هناك اولا
ام نايف:- ايه انشالله اليوم بيوصل الرد,مسكينه فجاه حست بالوجع اول مااطلعوا منها العيال يوم الاربعاء كانت ورده مفتحه والان منظرها لايسر عدو ولا حبيب
ام عبدالله والدموع نزلت منها فجاه:- الله يشافيها, اذا جا الرد انا بروح معها لندن
ام نايف:- وانا بعد تعرفين مالها الا حنا اذا ماوقفنا معها هذا الوقت من يوقف معها
ام عبدالله:- أي صح يااوخيتي , انا قلت لبوعبدالله يوديني اسبوع وهو يرجع بالسلامه بس هو رفض قال انا ولدها اليلي ماجابته
ام نايف:- وانا بو نايف قالي مو هذي هذي امي بروح معكم من البدايه
وطوال فترة الجلسه كانت دايم تلتقي عيون نايف ومشاعل وتعبر العيون عن شوقهم وولهم لبعض
















متعب صحى من النوم على غير عادته نشيط ويبتسم صحى على نغمة الجوال
متعب:- صباح الخير على ريم قلبي
ريم:- صباح النور والجوري والياسمين وصباح كل شي جميل بحياتي
متعب:- انشالله نمتي زين بعد امس
ريم بفرخ:- جلست ساعه اتقلب على السرير مو مصدقه واخيرا يامتعب ايديني مسكت ايدينك
متعب:- لاصدقي ياعيون متعب , من اليوم ورايح متعب ملك لك وحدك
ريم :- تامرني على شي حبيبي ’ صوت امي تناديني
متعب:- ابي سلامتك , وحرصي على صحتك تراك غاليه علي
ريم بدلع:- ههههه اوكي حياتي باي
متعب:- باي
حس متعب ان السرير فاضي وان العنود مو معه بالغرفه
متعب:- يمكن انها راحت تنوم بنتها امس ونامت معها
متعب اتجه لغرفة رند
متعب بلامبالاه :- العنود ,العنود
العنود اللي كانت صاحيه ولكنها قررت تعمل نفسها نايمه خوفا من مواجهته
العنود:- نعم
متعب:- قومي سوي لي عشا
العنود بضيق بال:- انشالله
واتجة العنود للمطبخ واعدت عشا سريع مع انها ماكانت ناويه تسوي له ولكن قالت مهما كان هذا زوجي واثناء العشا
العنود :- متعب من هذي ريم
متعب ترك الاكل من يدينه وناظر ريم بنظرا جاده:- أي ريم
العنود والدموع تسبح داخل عيونها:- يامتعب انا سمعت مكالمتك معها امس لاتكذب علي , حرام عليك
متعب بلهجة حزم:- الحمد لله انك سمعتيها ووفرتي علي مشوار كبير , أيه ريم هذي حبيبتي وبتزوجها قريب
العنود بعصبيه:- متى تعرفت عليها وهي كيف تسمح لحالها تكلم واحد متزوج ’ والله من قل تربية اهلها لها
في هالاثناء امتدت يد متعب على العنود وضربها بقوه
متعب:- الزمي حدك يالعنود ’ كل شي الا ريم
متعب وهو بيطلع برى:- على فكره ماابي احد من اخواني او بنتي يعرف بالسالفه ’ فاهمه
ريم بقلة حيله والبكاء كان سيد الموقف :- انشالله















بعد ماراحت مشاعل بيت عمها لان عمها منصور بيوصلها هي ونوره السوق والبنات رجعوا البيت يذاكرون راحوا بوعبدالله وام عبدالله مطعم

بوعبدالله:- تعرفين كم لنا ماجلسنا لوحدنا كذا مع بعض بدون دوشة البنات الله يحفظهم
ام عبدالله بحياء:- هذا حال الدنيا , بس هذا انا وانت مع بعض وكل مابغيت قلي ونطلع
بوعبدالله:- انشالله , تفضلي يامنيره هذا هديه مني لك اول اشفت هالعقد الالماس قلت مايليق الا بحبيتي منيره
وهذا وصل بنك اودعت في حسابك مبلغ مالي
ام عبدالله:- مشكور وماقصرت شوفتك عندي اغلى من هدايا الكون كلها
بوعبدالله بارتباك:- ياام عبدالله ودي اقولك شي ومو عارف من وين ابتدي
ام عبدالله بخوف :- تفضل
بوعبدالله بارتباك:- تعرفين يامنيره انت وش غلاتك بقلبي , انت حبي الاول , انت ام بناتي , وبناتي هم نور عيني هم شمعة البيت ومستحيل ارخصكم او ابيعكم برخيص , وتعرفين ان ربي معطيني خير والحمد لله وانا عمري كله مابخلت عليكم بشي
ام عبدالله:- أي والله ماقصرت وربي شاهد
بوعبدالله :- مشكوره , بس انا مممممممم ودي بولد يشيل اسمي ويورثني من بعد عيني مو معناة هذا اني اكره اخواني لا بالعكس هم الحمد لله ربي منعم عليهم بس ودي بالولد سندي في الحياه
ام عبدالله:- بسم الله عليك ياسلطان انشالله يومي قبل يومك , بس انت اعرف بالحال تعالجت كثير بس ربي ماكتب ولا والله ودي افرح قلبك , واذا ودك اني ارجع اتعالج ماعندي مانع لجل خاطر عين تكرم مدينه
بوعبدالله شبك ايدينه مع بعض ونزل عيونه تحت:- لا يالغاليه ’ بس كان ودي , ... , اقول ك يعني ,....., اني قررت اتزوج
ويقوم بوعبدالله ويبوس جبين زوجته:- اعذريني يالغاليه ماودي اجرحك بس غصب عني وعنك
ام عبدالله:-..................
طلبت ام عبدالله من زوجها انه يرجعها البيت من غير مايفهم اثر كلامه عليها لانها ساكته
















في بيت بو فيصل
منصور:- السلام عليكم
الكل :- وعليكم السلام
منصور:- يالله نوره ومشاعل جاهزين
نوره:- ايه يالله بتنزل معنا انت
منصور:- لا , الا وينه فهد كان وصكلكم ونزل هو احب مالى قلبه الاسواق
نوره:- هو طلع من اول المغرب الى الان مارجع
مشاعل:- ههه وش بلاك ياعمي انت جاي تودينا بعدين تحسفت
منصور:- لا بس مااقدر انزل معكم , اوكي مو مشكله خذوا معكم جوري واول ماتنتهون من السوق دقوا علي
مشاعل+نوره:- انشالله
في المجمع نوره ومشاعل لفوا تقريبا كل محلاته
في الجانب الثاني من المجمع وتقريبا في وسط جلسات المطاعم كان فهد وخويه تركي جالسين يتعشون
تركي رفع عيونه على وناظر بنتين يمشون ومعهم طفله وكانوا ماشالله طول وجسم مع انهم كانوا متسترين الا ان الذئاب البشريه مااترك احد في حاله
تركي:- ناظر ناظر وش حلاة هالبنات يجننون والله انهم ماينتفوتون
فهد مندمج مع الاكل ومارفع راسه:- انا ايدي وسخه وريحتي اكل قم انت عطهم رقمي ورقمك
تركي شد الكرسي وقام من مكانه في هالاثناء رفع فهد عيونه على البنات حرام مايشوفهم يتعبه قلبه يلاحظ البنتين معهم اخته الصغيره جوري فعرف انها نوره مع احد من خوياتها اوبنات عمه
فهد يده بسرعه وسحب تركي
فهد:- يالغبي هذول اهلي
تركي بحيا:- اسف ماكنت اعرف
فهد:- يالله يالله نرجع
واختفوا نوره ومشاعل عن عيونه فرسل لنوره رساله طلب منها انهم يرجعون للبيت















ام عبدالله جات من المطعم واتجهة لغرفتها ودخلت في نوبة بكاء قويه تبكي حبها لبوعبدالله تبكي حظها ان ماعندها ولد تبكي جرحها اللي استقبلته وتبكي مرض امها اللي هي محتاجه لها اليوم اكثر من أي وقت ثاني
قدرت ام عبدالله تستجمع قوتها بعد ماسكتت من البكاء ونزلت تحت للصاله وطلبت من بناتها ينزلون تحت
ام عبدالله بهدوء:- بنات ودي اكلمكم في سالفه ودي تعفون بها مني قبل لاتعرفون بها من الناس وابيكم مثل ماخبرتك دايم اقوياء
مشاعل بخوف:- تكلمي يمه والله انك خوفتينا ليه جدتي فيها شي
ام عبدالله:- امي الله يلطف بحالها بس تقاريرها الا الان ماوصلت
نوف بخوف :- اجل يمه تكلمي
ام عبدالله تضم بناتها وتمسح على راسهم وتبوسهم
ام عبدالله:- انت تعرفون ان ربي ماقدري اجيب ولد وياما تعالجت وسافرت بس ربي ماكتب لي ورضينا انا وابوكم باللي بيكتبه لنا بس ابوكم بعد ماكبر والشركه ماشالله في توسع صارت حاجته للولد اكثر من اول
نوف+جود+مشاعل:-.......................................
ام عبدالله:- عشان كذا ابوكم حب يسوي الحلال وانه
نوف:- انه ايش تكلمي يمه
ام عبدالله وسبحت دمعه داخل عينها:- انه مممممممممممم , يتزوج ويجيب الولد
مشاعل مصدومه من الخبر:- لااااااااااااااااااااااااااااااااا مستحيل ليه يمه ليه واافقتي
نوف:- لااااااااااااااااااااااااااااااااااااااااااااااااا مااصدق ابوي مايسويها
جود:- يمه تكفين قولي انك تمزحين
ام عبدالله:- لا هذي الحقيقه
مشاعل:-اجل وين كلامه عنا ان حنا نور عينه وان اولاد عمي هم اولاده وين اللي يقولك انت الغاليه كان كلام يعني لااااااااااااااا مستحيل
ودخلوا البنات في نوبة بكاء
مشاعل حست ان الدنيا ضاقت فيها تبي أي احد تفضفض له واتصلت على ساره بنت خالتها
مشاعل:- الوه
ساره:- هلا مشاعل وش فيه صوتك ليه تبكين
مشاعل بصوت باكي:- ابوي تزوج ياساره ابوي جاب لامي مره ثانيه
ساره مصدومه من الخبر:- لا مستحيل كيف عرفتوا يمكنها اشاعات
مشاعل :- لا هو بلغ امي وهي قالت لنا
ساره:- حنا نسمع من اول بس نقول اشاعات عمي لايمكن يسويها
مشاعل ببكاء شديد:- تسمعون ولا تقولون كان قدرن نمنعه
ساره:- اهدي يامشاعل وانا بكلم امي ونايف وبنجيكم , باي
مشاعل :- باي
نوف كلمت نوره وبلغتها انها تبلغ عمها بوفيصل ومتعب ومنصور يمكن يقدرون يسوون شي ومر اليوم على البنات مابين بكاء ودموع وآلام وكل واحديتصور حالهم ومعاملة ابوهم لهم بعد الزواج في هاليوم فضل بوعبدالله انه مايجي الا بوقت متاخر عشان يتجنب مواجهة بناته اللي يعتبرها نص همه بعد ماارتاح من نص همه الثاني لما بلغ زوجته

الجزء الثامن



في غرفه رند المظلمه والهدوء يعم المكان الا من انين وبكاء العنود تفكر في حالها... ( ياترى جاد في كلامه وبيطلقني ... واذا طلقني وين اروح... لامي اللي باعتني من سنين... ولو تقبلتني هل بتتقبل بنتي معي...آه يارند حاولت اكون لك حياه مثاليه بس الظروف كانت ضدي...يمكنه كان يمزح وماراح يطلقني... انا مالي احد في الدنيا غيره عشت بيت عمي الله يرحمه وتزوجت ولده وانا صغيره...ليه يامتعب وش قصرت معك فيه ...لا لا انشالله مايطلقني حتى لو يعرس عليها ... المهم اني انا وبنتي نلقى لنا مكان ياوينا
واخذت الافكار تروح وتجي بعقل العنود وتفكر بحالها بعد الطلاق وصار الطلاق شبح يهدد حياتها ويحرمها من النوم وعلى هالحال كل يوم تفكر وتفكر ولما تتعب تنام وتحاول دائما تتجنب مواجهة متعب
.
.
.
.
.
.
.
.
.
.
.
.
.
.
.
.
.
.
.
ريحة السجاره ماليه الغرفه اللي ادمن عليها متعب بعد مارجع علاقته مع ريم ويفكر كيف بيفاتح اهله بالموضوع وهو عارف ردة فعلهم انهم بيعارضون وخاصه لوحده مثل ظروف العنود كان زواجهم تقليدي مثل كثير من العوايل اللي تسمي ولد العم لبنت العم ولكن متعب كان قلبه مشغول بحبيبه ثانيه كان متيم في هواها بس هي باعته بالاول واخذت اعز اصدقائه ومع هذا كان يلتمس لها الاعذار الواهيه اللي قالتها له ومنها ان اهلها جبروها على الزواج من صديقه وماكان قدامه الا انه يلبي لرغبة ابوه في تزويجه من العنود بنت عمه اليتيمه وداس على قلبه وقال يمكن مع الوقت انساها بس ريم رجعت ورجعت الامل له بعلاقه جديده ولكن مواجهة اهله صعبه وقرر انه ياجل مواجهتهم واخبارهم برغبته من الزواج بحبيبته ريم وفضل انه يستمر في لقاءاتهم مع بعض في المطاعم الى ان تتسهل الظروف وكل يوم يمر يزيد حب ريم بقلبه ويزيد معه كرهه للعنود اللي يعتبرها اهم عائق في زواجه من حبيبته ريم














دخل البيت وهو الشرار تتطاير من عيونه وده يتهاوش مع أي احد
فهد:- هلا يمه وين نوره
ام فيصل:- فوق ليه وش فيك
فهد:- متى رجعت
ام فيصل:- من ساعتين ليه
فهد بعد ماتطمن انها رجعت اول ماكلمها:- ومن اللي كان معها بالسوق
ام فيصل:- مشاعل بنت عمك
فهد حس بالارتياح قليل وماحب انه يقول لامه القصه ويتهاوش مع اخته وينسى الموضوع اللي جاي عشانه وتعصب امه عليه:- الا يمه ودي بكره اعزم خويي تركي الكويتي جا من الكويت وبيسافر بريطانيا بعد يومين
ام فيصل :- حياه الله هذا اللي كان معك ايام دراستك
فهد:- ايه , هو, وانا ودي اسافر معه
ام فيصل:- وش تسافر , لا حرام عليك انت كل فتره مسافر اثبت وانا امك ’ ثانيا مالك غرض هناك
فهد:- الا اخوياي هناك اخر سنه لهم هناك هذي السنه وكلمونا نجتمع بلندن ونستانس لان بعدين الكل بينشغل عن الثاني
ام فيصل:- والله الكلام لابوك هو صاحب الشان
فهد:- ماعليك يمه ابوي انا اقدر عليه, بس الله الله بالاكل الزين
ام فيصل:- ابشر , انت تامر امر
فهد يبوس راس امه:- تسلمين يالغاليه






















فيصل ينزل تحت مع مها
فيصل+مها:- السلام عليكم
الكل :- وعليكم السلام
فيصل:- الا وش سويت يبه مع عمي
بو فيصل:- ماهو صغير نمنعه واللي براسه بينفذه
ام فيصل:- والله شكلها مسكينه يكسر الخاطر من العز والدلال اللي هم فيه بتجيها حرمه ثانيه تاخذها منها
نوره:- والله اكثر وحده متاثره مشاعل شكلها يكسر الخاطر
فهد:- طيب يبه انت كلمت عمي؟
بوفيصل:- كلمته وقال ابي الولد , مانقدر نمنعه والله قلوبنا مع منيره وبناتها بس ماباليد حيله
ام فيصل:- الله يساعدها ويصبرها
مها :- آمين
فهد:- يبه عارف ان الوقت مو مناسب بس ودي افاتحك بموضوع
بو فيصل:- آمر
فهد:- مايامر عليك عدو , بس تعرف ان خويي تركي الكويتي جا من الكويت وده اني اخاويه لبريطانيا
فيصل بتعجب:- وبريطانيا هي ثمامه خطفت رجل الا جاي
بوفيصل:- وانت صادق وراك شغل , اترك عنك حياة اللعب
فهد:- لا يبه كل اخوياي اللي كانوا يدرسون معي ببريطانيا هذي اخر سنه لهم عاد قلنا نروح لهم ونسلم عليهم ونرجع ايامنا القديمه لان بعدين كل واحد بيروح بلده
بوفيصل :- والله ماادري شقولك بس مو ضروري تروح لهم كلمهم وانتهينا
فهد:- يبه تكفى اسبوعين ماحنا مطولين
بوفيصل :- ومتى ناوي تروح
فهد:- بعد بكره الفجر
فيصل:- يمكن ماتحصل حجز
فهد:- لاحصلنا
بوفيصل:- وحجزت بعد!
فهد:- لا بس سالنا وقالوا فيه
بوفيصل:- براحتك بس اسبوعين مو اكثر
فهد يبوس راس ابوه:- انشالله


























اول ماسمعت ام نايف خبر زواج زوج اختها من ثانيه حست الدنيا تلف فيها وصارت الدنيا سوداء بعيونها معقوله اللي يحب يبيع بسهوله معقوله هانوا عليه بناته وكلمت نايف يوديها هي وساره لبيت اختها تتطمن عليها وتحاول تهديها وبعد مادخلوا بيت ام عبدالله كانت اختها ام عبدالله جالسه على الارض وعيونها مطر من الدمع ومشاعل ونوف وجود حاطين راسهم على امهم ويبكون بقوه
ام نايف:- تعوذي من ابليس يااختي هذا بدل ماتهدين بناتك تزيدينهم , صدقيني تراها نزوه ويعرف غلاك ويرجع
ام عبدالله:- مااقدر يااختي لاتلوميني النار اللي في قلبي مو سهله
نوف:- حسبي الله على الناس حسدونا على دلال ابوي لنا
جود:- وين اللي يقول نظر عينه واغلى شي بحياته ارخصنا بسهوله
ام نايف:- تعوذوا من ابليس يابنات
ساره:-من حق ابوكم يجي له ولد
مشاعل:- يعالج امي ويجيب منها الولد مو يتزوج , عذر اقبح من ذنب
ام نايف:- استغفر الله يابنتي هذا مهما كان ابوك
مشاعل :- وليه ماعالج امي
ساره:- عالجها يامشاعل وكلنا نعرف بس ربي ماكتب لها تحمل
مشاعل:- الطب تطور لو عارضها الان على اطباء كان يمكن تجيب ولد بس هو ميت على العرس
نوف:- جعلها مااتتوفق اللي خذته
كانت مشاعل واقفه ومنفعله مع الكلام:- النار ماتحرق الا رجل واطيها النار حرقتنا حنا حراااااااام عليه حرااااام عليه
وسقطت مشاعل على الارض مغمى عليها
ساره :- مشااااااااااااااااعل
الكل منصدم وحاول يحرك مشاعل اللي ماتحرك منها أي شي لا يد ولا رجل
على صرخة ساره دخل نايف اللي كان بالمجلس ينتظر امه :- وش صااار وش فيها مشاعل( وهذي المره الثانيه اللي يشوف فيها مشاعل بدون غطا واتمنى انه يشوفها بوضع احسن من كذا
نايف:- بسرررعه ساره جيبي مويه
وابتدوا يرشون مشاعل بالمويه وابتدت تحس شوي شوي وطلع نايف من الغرفه وحضنت ام عبدالله بنتها وهي تسمي عليها وتقرى عليها ايات من القرآن
ام نايف:- يالله يابنات قوموا معي البيت لين تهدون
جود+نوف:- لا مانقدر نترك امي لوحدها
ام نايف:- انت قومي يامشاعل قلبي مو مطاوعني اروح وانتي بهالحاله
مشاعل بتعب وتحاول انهاماتواجه ابوها في هالاثناء:- انشالله
وراحت ساره تجيب عباية مشاعل وركبت مع نايف لبيت خالتها , وبالجهه الثانيه كان نايف متالم لحالة مشاعل وعيونها ماطاحت منها وهي في السياره وتمنى انه يملك الجراه انه يكلمها ويهون عليها ويكون اول واحد يساعدها بس مايقدر واكتفى بكلمه قالها لها
نايف:- تحملي يامشاعل وانشالله ازمه وتعدي وانت اكبر من انك تضعفين بمثل هذي المواقف وحنا اهلك وسندك
مشاعل:- جزاك الله خير
وصلوا الكل للبيت ونزلوا ونزلت مشاعل وعيون نايف ترقبها تمنى انه يكون خطيبها رسمي ويكلمها ويهون عليها تمنى انه يكون اول من تلجا له وقرر نايف انه يفاتح امه في موضوع خطبته من مشاعل ويعلنونها رسمي اول ماتهدء الامور ويسافر معها أي بلد تختاره ويعيشون فوق السحاب والطياره مافيها الا هو وهي ويضمها ويخفف الامها عنها
نايف انتبه من احلامه على اخته جوري وهي تناديه تبيه يدخل يتعشى وقرر انه بعد العشى يكلم خويه الكابتن بندر ويخبره باللي صار له مع مشاعل لانه يعتبر بندر هو الشاهد على قصة حبه فما يخبي عليه شي




















في الشركه


منصور:- والله ماادري يابو فيصل وش اسوي مع بوعبدالله مااقدر امنعه وبناته شادين الظهر فيني هذي مشاعل من امس بيت خالتها مو راضيه تواجهه
متعب وحس انه طريق سهل للتمهيد من زواجه:- والله انا اشوف مافي عيب ان الواحد يعرس على مرته ومثل حالة بوعبدالله الشرع حلل له اربع مو وحده
بوفيصل:- والله مدري شقول كلكم صح من حقه يتزوج بس هم انا راحم بنات اخوي وامهم وخاصه ان ام امهم تعبانه وبتسافر تتعالج برى
منصور:- الله يكون في العون , مانقدر نسوي شي . بحاول اليوم امر مشاعل وافهمها يمكن اذا هدت تهدى امها وخواتها
بوفيصل:- ايه والله زين تسوي جزاك الله خير يااخوي
متعب:- الا وين فهد ماشفته
بوفيصل:- رحلته الفجر بيسافر وجالس يجهز اغراضه
منصور:- خير وين بيسافر
بوفيصل:- بريطانيا
متعب:- ليه؟!
بوفيصل :- يقول انه ربعه من ايام الدراسه هذي اخر سنه لهم وده يروح يسلم عليهم ويستانس معهم اسبوعين ويجي
منصور بضيق:- والله انك مدلل هالولد اكثر من اللازم
بوفيصل بقلة حيله:- الله يهديه


























نايف :- امي ودي اكلمك بموضوع
ام نايف :- آمر ياوليدي
نايف:- مايامر عليك عدو , بس انت عارفه اني الحمد لله موظف وماينقصني شي ومشاعل بالجامعه ودي تكلمين خالتي وتكون خطبتنا رسمي قدام الكل
ام نايف والدموع الفرح في عيونها:- والله هذا اسعد يوم في حياتي ياوليدي يوم اللي اشوفك معرس ومشاعل بنتي انشالله ان جا ابوك رحنا وخطبناها رسمي
.
.
.
.
.
.
.
.
.
.
.
.
.
.
.
.
.
.
.
.
.
.
.
.
في بيت بوعبدالله
بوعبدالله:- حيا الله من جانا
بونايف:- الله يحييك يابوعبدالله , الا وش اخبارك وش اخبار الاخوان
بوعبدالله:- كلنا بخير الحمد لله , وانت يانايف وش اخبارك مع الطيران
نايف:- الحمد لله عمي , وش اخبار خالتي والبنات
بونايف:- انا جايلك يابو نايف في موضوع واتمنى انك ماتردني فيه
بوعبدالله:- ماعاش من يردك يابونايف , اذا الموضوع اقدر عليه ابشر بسعدك
بونايف:- انا اليوم جاي اطلب يد بنتك مشاعل لولدي نايف , هاه وش قلت
بوعبدالله:- نايف ولدك ومشاعل بنتك ولو هي ذبيحه ماعشتكم يابو نايف
بو نايف:- يعني نقول مبروك
بوعبدالله:- انا من جهتي موافق بس بسال الاهل ويردون لك خبر
وتكلموا عن كثير من الامور وفي نهاية الكلاك كان السلام مودعين بعض
نايف كان ينتظر الرد على احر من الجمر نبضات قلبه تتزايد وحاس انه مو قادر يثبت على بعضه من الفرحه حاس انه يطير فوق السحاب ومشاعل هي القمر والنجوم هم عيالهم واخيرا طلب يد محبوبته مشاعل وبتكون حبيبته رسمي قدام الكل
اما في الجهه الثانيه من بيت بو عبدالله كانوا الحريم مجتمعين
ام نايف:- حيالله مشاعل حيالله زوجة ولدي وش اخبارك
مشاعل بحياء:- الحمد لله وش اخبارك انت خالتي
ام نايف:- بخير دامك بخير وش اخباركم جود ونوف
جود+نوف:- الحمد لله
حست ام عبدالله من جية اختها وسلامها ان فيه شي بيصير بس قررت تسكت الين تفاتحها اختها في الموضوع
ام نايف:- انت تعرفين يااختي من مشاعل صغيره وهي مسماه لنايف ولدي
ام عبدالله:- ايه وانت الصادقه
ام نايف:- وانا جايه اليوم اخطبها رسمي لولدي هاه وش قلتي يااختي
ام عبدالله:- والله مدري وش اقول نايف ولدك ومشاعل بنتك بس الراي الاول والاخير لمشاعل لو علي انا موافقه ( وهي تناظر مشاعل)
مشاعل حست بحياء شديد من الكلام كانه ماتوقعت انه يكون في مثل هالوقت وبنفس الوقت فرحااانه لان حلم عمرها تحقق وبتصير خطيبة نايف رسمي بتقول للكل نايف حبيبي وماتستحي من احد بتتزوج نايف وبتعيش معه تحت سقف واحد وبتجيب منه عيال فرحه كبيره في داخلها مو عارفه تعبر عنها خايفه لتفضحها فرحتها وتصرخ بعالي صوتها احبببببببببببك ياانايف احبك
انتبهت مشاعل على خالتها وهي تسالها عن نايف
مشاعل احمر وجهها من الحيا وصعدت بسررعه فوق وهي تقول بصوت اقرب للهمس ايه موافقه مع تحريك راسه باشارة الموافقه
ام عبدالله:- ياحليلها مشاعل مستحيه, مبروك ياام نايف
ام نايف :- الله يبارك فيك عقبال مانفرح بنوف وجود وساره
نوف:- آآآآآآآآآآآآآآآآمين
الكل:- هههههههههههههههههههههههه
ام نايف:- خليني اكلم نايف وابشر اكيدياعمري جالس ينتظر جواب العروس
ام عبدالله- الله يوفقهم ويسعدهم
وبلغت ام نايف نايف بالوافقه وقام يرقص من الفرحه ويبوس الجهاز وامه من الفرحه وهو يغني والله وتحقق منايا مشاعل حبيبتي وياي .........
قرر انه يكلم زميله بندر ويخبره باللي صار عن اعلانه لخطوبته بندر فرح كثير لصديقه وتمنا له حياه سعيده مع مشاعل
والكل عرف بالخطبه وجاوا العمام وزوجاتهم ونوره يباركون لمشاعل وماعملوا حفله كبيره عشان مرض الجده



















مر يومين ثقيلين على عايلة بوعبدالله بس الحمد لله اقدروا يتجاوزون الوضع بعد خطبة مشاعل ولما عرفوا ان زواجه امر منتهي قررو يكسبون ابوهم لصفهم بدل مايخسرونه وتظفر فيه بنت الناس
مشاعل:- يبه ودي اروح السوق مع جود وساره بنت خالتي
بوعبدالله بحنان:- انشالله حبيبتي بس لاتتاخرين وخلي السايق ينتظركم
مشاعل :- انشالله
مشاعل:- جود , جود يالله
وطلعوا مشاعل وجود ومروا بنت خالتهم ساره
ساره:- السلام عليكم
مشاعل+جود:- وعليكم السلام
ساره:- وين بنروح أي مجمع
مشاعل:- مدري بس ودي بصحارى اكبر واحلى
ساره:- ياويلي نايف مع خويه هناك اخاف يهاوشني لاني جيت بدون لايعرف
مشاعل:- حست بفرحه كبيره من وجود نايف معها بنفس المجمع وتمنت انها تقابله مشتاقه له من زمان ماشافته
جود :- لا اساسا ماراح يعرفنا وحنا مانسوي غلط عشان يعصب عليك
ساره:- يالله الله يستر
ووصلوا ساره وجود ومشاعل المجمع ونزلوا وطلبوا من السواق انه مايمشي وينتظر في المواقف الخارجيه
ساره:- ناظروا ياحلاته هالتيشيرت يجنن
مشاعل:- ايه ولو تركبين عليه بنطلون جيشي يكون روووعه
جود:- وانت مشاعل وش اخذتي
مشاعل:- 3جزم وشنطتين و5 بلايز وبنطلون برمودا
جود:- ماشالله احسن مني اللي ماشريت لي ولا شي
مشاعل:- ليه؟
جود:- بذمتكم عرفتوا تشترون وهذا ورانا ازعجنا وهو يرقم ماعرفت اشتري شي
مشاعل:- ماعليك منه اشتري اللي تبين
ساره:- اعتبريه مو موجود
وطلعوا جود وساره ومشاعل من المحل بيروحون المحل اللي مقابله وهذا الشخص يلحق فيهم يبيهم ياخذون رقمه
في هالاثناء نايف مر من البنات وماعرفهم بس شاف ان في شابيعاكسهم وكانت المصيبه اكبر لما سمع اخته تنطق اسمه وهي تخبر مشاعل
ساره:- مشاعل ناظري نايف ياويلي منه
نايف :- استاذن من زميله وسحب اخته وبنات خالته على جنب
نايف بعصبيه :- اطلعوا برى بسرررررررررعه ياقليلات الحيا
طلعت مشاعل من المجمع معصبه على كلمة نايف وتبعتها جود وساره
في السياره
مشاعل بعصبيه والدمع في عينها:- ماله حق يطردنا ويهزئنا حنا ماغلطنا
جود:- ايه وربي امي وابوي مافشلونا بسوق يجي هو يهزئنا ليه مسوين كبيره
ساره حاسه بالاحراج من اللي سواه اخوه وتبي تبرر موقفه مع ان اللي سواه مايتبرر:-هو اكيد عصب لما شاف هالغبي يلاحق فينا
مشاعل:- يعصب لما يشوفنا نكلمه مو مااهتمينا منه
وصلوا الكل بيت بو عبدالله مشاعل وساره دخلوا على طول غرفت مشاعل فوق وجود جلست مع امها بس مابينت لها شي
بعد ربع ساعه دخل نايف بيت خالته ام عبدالله وهو يقول في باله اكيد الان مشاعل بتنزل بتعتذر على الموقف اللي صار وتقول ان مالها ذنب
ومن جهه ثانيه مشاعل اللي كانت جالسه فوق مع بنت خالتها بجسمها فقط اما عقلها يفكر ويقول اكيد ان نايف جاي يعتذر عن الموقف اللي سواه لي اعرفه حنون وطيب مع انه يعصب بسرعه بس يحبني وبيعتذر مني اكيد اكيد الان بيناديني ويعتذر مني












وش تتوقعون يصير من احداث في الجزء الجاي

يسلموووووووووو بدايه كتييييييير حلووه

كلى براءة

يسلمو على الجزئين الحلوين

مشكورررررررررة ماقصرتى

ننتظر التكملة ياقمر