يسلمو على القصة اللي مبين عليها حلوة

وننتظر التكملة :)

تسلمين فديتج الحنانة عشانج بحط الجزئين
تحياتي لج

الجزء الثالث

ناصر كان توه ناش .. شل فودته ودخل الحمام يسبح ..

شذى كانت يالسه فالصاله ويا ابوها وامها ..

شذى:ابويه عقب يوم بشتغل قولي هالكلام انزين
بو ناصر:ما ادري .. اللي يقول بتستوين دكتوره
شذى: ههههه
ام ناصر: شعنه تظحكين ؟؟
شذى:والله تفكيركم مال اول
ام ناصر: كفايه انتي مال الحين
شذى:هيه والله مال الحين .. لان هالدكتوره وطب وقلب وما ادري شوه .. هذا كله مال اول ..
بو ناصر: يعني الحين اللي يدرسون طب مال اول
شذى: لا انا ما قلت جذه ..
ام ناصر:توج قلتي
شذى: امايه خليني انزين اكمل
بو ناصر:كملي ..
شذى: انا اقصد ان يوم الاهل مال اول كل ما شافوا واحد من عيالهم تخرج من الثانويه .. استلموه يالله ادرس طب .. يبغون يخلون كل عيالهم اطبا ههههههه
ام ناصر:بسج ظحك هالكثر .. وسيري المطبخ شوفي هاي شوه تسوي
شذى:ان شاء الله

حامد كان يالس فالصاله ويرمس ربيعه فالمبايل .. دخلت نوف اللي كانت معصبه .. فرت شنطتها صوب .. وطلعت جوتي المدرسه وفرته .. وفرده وحده يت في حضن حامد .. وما عبرته ولا عبرت نظراته اللي تدل على انه يقولها بتيلسين والا انش لج الحين ؟؟!!
و سارت فوق ..

نوف : ما ابغييييييييييييييييييييييييييي
حامد: اقول علي ببند عنك الحين وبرد اتصل بك ..

بند حامد .. ونش من مكانه بيسير يشوف شوه سالفة اخته اللي معصبه .. وهو توه يصعد الدري الأول .. شافها طالعه من حجرة ناعمه وهي تصيح .. وناعمه ظاهره وراها ..

نوف: ما ابغي انزين ما ابغي
ناعمه:انزين انا ما قلت لج تبغين والا لا .. انتي سألتي وانا جاوبت
نوف: الحين اتصلي فيه خله يرد
ناعمه:شوه فالدوام هو الحينه
نوف ( وهي تصيح) : والله بخبر عليج ابويه
ناعمه: خبري ..
حامد:بلاها هاي
ناعمه: اونه اتصلي في حارب خل يرجع الحين
حامد:شوه تبغين من حارب؟؟

ونوف ما ترد على حامد ومب معبرتنه ..

حامد: نوف .. ارمسج انا
نوف:ابغيه هو .. ابغي ارمسه هو ..
حامد: انزين هو الحين فالدوام
نوف:اتصلوا فيه خل يرجع ..
حامد:سيري زين .. واقولج مره ثانيه يوم بتدخلين البيت .. تسلمين .. وعقب تصعدين حجرتج وتحطين شنطتج وتفصخين جوتيج بأدب وتحطينه فمكانه .. مب تفرفرين
نوف: ما ابغي
حامد ( وهو يصرخ): نوف نشي بسرعه سيري حجرتج

وصاحت نوف زياده .. ونشت سارت حجرتها .. وتمت ناعمه تطالع حامد ..

ناعمه: الحين زين جذه تصيحها زياده؟
حامد:خليها انزين وايد دلوعه .. كل شي تبغي تسوون لها .. مب زين
ناعمه: توها راده من العين .. ما صدقنا ترد
حامد:والله ابويه متفيج اللي رضى يخليها هناك .. وعندها دوام فالمدرسه
ناعمه: هي بغت
حامد: خليها عنج زين .. ياهل قاصه عليكم
ناعمه: روحك قلت ياهل
حامد:ناعمه .. الحين بتجلبينها مشكله عسبت ياهل
ناعمه: لا .. خلاص بسير حجرتيه .. تبغي شي
حامد: لا مشكوره

سارت ناعمه حجرتها ونزل حامد تحت .. يكمل رمسته ويا ربيعه .. ونوف اللي سارت الحجره من بعد صرخة حامد .. ولا ظهرت ..

كان واقف جدام التسريحه مسك المشط وتم يسحي شعره ..
من امس وانا افكر فيها .. ما ياني الرقاد الا يوم أذن الفير .. صليت ورقدت .. شوه سوت بي هالبنت ؟؟ ليش صورتها فبالي مب طايعه تروح ؟؟ للحين اذكر ظحكتها شعرها الطويل اللي قاصتنه ما ادري كيف ؟؟ والله قصه عجيبه .. نصه قصير ونصه طويل !!! ويلستها ريل على ريل .. وجسمها كانت طويله ما شاء الله .. وصوتها آآآآآآآآه على صوتها .. بلبل يغرد .. والله ناعم صدق .. يدل على شفافيتها ونعومتها ورقتها ..
انا بلاني افكر فالبنت ؟؟ ومنوه البنت ؟؟ اخت ربيعي اخت اعز انسان عندي .. لا انا تخبلت .. بلى تخبلت .. مب من حقي افكر فيها .. ابدا مب من حقي .. غلطان في حقها وبعد افكر فيها .. بس لو اقدر أقول لها آسف.. والله جان قلتها .. اففففففففف بعد رديت ارمس عنها .. بنت الناس يا ريال مالك خص فيها .. ترضى حد يشوف اختك بالغلط .. والله لأجتله .. هيه خلني ساكت .. عن ايي خلفان يجتلني الحين ..
بس .. ههههههههههههه .. في شي تذكرته وظحكت .. شكلها يوم شافتني .. وشردت ..
بس بعد الله يسامحني دنيا وآخره .. ما نبهتها .. والله آآآآآآآسف .. آسف

ناصر: آآآآآآآآآآآآآآآآآآآآآآسف

في نفس الوقت دخل شهاب .. تم يدور بعيونه فالحجره .. وناصر يطالعه .. بس ما يدري شوه يبغي ..

ناصر: شوه تبغي ؟؟
شهاب: عندك حد هني ؟؟
ناصر: لا
شهاب:عيل بسم الله ترمس منوه ؟؟ لا تقول حجرتك مسكونه ..
ناصر:اصلا البيت هذا بكبره مسكون
شهاب:اعوذ بالله من رمستك .. قول رمسة عدله
ناصر:هههههههه ليش مب مصدق
شهاب:ايه لا تشككني في بيتنا
ناصر:اخ عليك ريال شكبرك تخاف ..
شهاب:انزين انا ريال .. هم جنون
ناصر:هههههههههه احلف .. احلف انته بس انك تخاف .. شهاب صدق ههههههه
شهاب:اسكت انزين .. اسكت
ناصر:هههههههههه الله يا شذى انج اليوم بتظحكين ظحك على شهاب
شهاب: لو خبرتها
ناصر( وهو يقاطع اخوه) : جب جب .. يعني شوه بتسوي .. استح على ويهك ريال طول وعرض .. يخاف اونه .. انته مسلم ؟؟
شهاب:لا مسيحي
ناصر:ما استبعد
شهاب:هههههههه يوم بعرس بعرس فالكنيسه
ناصر: انته الحين اللي اعوذ بالله من رمستك ..
شهاب:هههه في بريطانيا احلى شي .. عقب تفر العروس الباقه .. واللي تاخذها هي اللي بتعرس عقب .. بخليها تفر الباقه على وحده مزيونه .. عقب انته سر اخطبها .. اونه بيستوي واقع
ناصر: بسم الله عليه .. لا احضر عرسك فالكنيسه اذا كان .. ولا آخذ وحده داخله كنيسه ..
شهاب:اصلا من دون ما تاخذها .. هي بتيي تقولك تعال خذني يالمزيون تعال .. الله يخليك .. صدق انك غرشوب
ناصر:ههههههههه شهابو فكني الحين بسير عند امايه بسلم عليها
شهاب: توك تذكر ان عندك ام .. امس لين نص الليل تترياك
ناصر: فديتها .. والله شسوي رحنا ويا الشباب .. وانا قايل لها لا تترياني .. قااااايل
شهاب:بس تبغي الصراحه امس انته تأخرت وايد ..
ناصر:انزين قم عني بسير اشوفها ..
شهاب: سر سر
ناصر ( وهو برع الحجره ) : سلم على ربعك انزين ( وغمز له )
شهاب:اي ربع ؟؟
ناصر:اللي فالحجره

شهاب من سمع ربع وفالحجره عرف قصد ناصر .. وطلع وراه .. وناصر تم يظحك .. صدق انه جبااااااااااااان . والحين تاكد انه جبان ..

اليازيا واليازي كانن يالسات فالحجره .. كانن زايغات من شوفة خلفان .. يمكن درى بالسالفه بس كان خوف اليازيا اكبر بوايد من خوف اليازي لان ربيع خلفان شافها هي ما شاف اليازي .. (انزين شوه الفرق اصلا؟؟ ) بس هالشي ما طرى على بالها .. كل اللي شاغل بالها الحين ان شافها هي بس وما شاف اختها .. وحريز متلوم يتحسب ان خواته ما نزلن اليوم يتغدن بسبته .. وفهيد ملان اليازي مب موجوده اليوم عسب يلعوزها .. ولا اليازيا عسب يقهر بها ..

اليازيا: ليش ما نزلتي ؟؟
اليازي: انتي ليش ما نزلتي ؟؟
اليازيا: انا اسألج الحين
اليازي:انا بعد اسألج
اليازيا: اليازي لا اطلعيني من طوري
اليازي:انتي مكبره السالفه زياده .. ما استوى شي
اليازيا:كل هذا وما استوى .. اقولج شافني شافني بالبجامه .. وشعري برع .. ووووووو لا تخليني ارمس زياده
اليازي: اليازيا الريال شافج بالغلط
اليازيا: انزين .. وهاللي قاهرني بالغلط .. لازم كنت انتبه ان في حد يالس ..
اليازي:لا تعقين اللوم على عمرج الحين
اليازيا: لانج مب حاسه فيه ولا بتحسين لانج مب انتي اللي استوى بج الموقف
اليازي (وهي فاتحه عينها): اليازيا .. انا ما احس فيج ؟؟
اليازيا:اليازي انتي مب فاهمتني
اليازي:بعد فوق اني ما احس فيج ما افهمج .. انزين .. مشكوره يا اليازيا .. مشكوره يا بنت اميه وابويه.. مشكوره يا اختيه .. مشكوره يا توأمي

وهني يلست اليازي على شبريتها بس لافه ويها الصوب الثاني .. وما اطالعت فويه اختها .. واليازيا كانت لافه الصوب الثاني بعد عن اختها .. وندمانه على اللي قالته .. ندمانه بس ما تقدر تقول حق اليازي آسفه .. لان الموقف للحين في بالها ..

ام خلفان: يافهيد يوز عني
فهيد:الله يخليج امايه .. الله يخليج
ام خلفان:ما شي .. تبغي تسير وتتكسر
فهيد:كلهم بيسيرون انزين
ام خلفان:قلت لك لا
فهيد: انزين بقول حق ابويه .. اذا قال هيه انتي بتوافقين
ام خلفان:ابوك بيقول لا
فهيد:انزين اذا قال هيه
ام خلفان:بعد انا بقول لا
فهيد:اففففففففف
ام خلفان: تتأفف .. هذا و انته ماخذ فالمدرسه
فهيد (قطع على امه): ولا تقل لهما اف ولا تنهرهما
ام خلفان:ماشاء الله زين طلعت حافظنها بعد !!
فهيد:شوه يعني تطنزين عليه
ام خلفان: دامك تعرف الآيه بعد تقول اف
فهيد:انزين انا مب ياهل ما تخليني اسير .. كلهم بيسيرون اقولج انا الوحيد اللي ما بسير .. يوم يسالوني ليش .. اقولهم امايه ما خلتني والله فضيحه يظحكون عليه الشباب
ام خلفان: سويتوا رواحكم شباب بعد
فهيد: انزين خلاص .. خلاص ما بسير ما بسير .. بس يوم بظهر لا تسأليني وين بتسير انزين ..
ام خلفان: يعني تهدد ..
فهيد: والله كيفج .. بسير انا انزين عقب دوريني بعد ..
ام خلفان :فهيد .. رد هني يا فهيد
فهيد :مب راد ..

ظهر فهيد من البيت .. الحين الساعه 3 الظهر .. وين ساير ؟؟ الله اعلم

خلفان وحريز نزلوا من فوق على صوت امهم ..

خلفان:امايه بلاج ؟؟
ام خلفان:سر شوف هالخبل وين سار
خلفان:منوه؟
ام خلفان: فهيييييييييد

ظهر خلفان فالحوش وسار برع ما شاف حد ورجع ...

ام خلفان :ها شفته ؟؟
خلفان:محد
ام خلفان: يا حسرتيه عليييييييييييييه
خلفان: امايه يعني وين بيسير
حريز:تلقينه سار عند سالم
ام خلفان: كله مني .. انا ما رمسته بالزين
خلفان:عاد امايه روحه فهيد لسانه طويل .. واكيد قهر بج ورمستيه بهالطريقه
ام خلفان :حتى ولو .. هذا ياهل
حريز: ما عليج والله الحين بيرجع
خلفان:انزين ليش زعل اصلا
ام خلفان:قال لي انه يبغي يسير ويا الصبيان يلعبون دراجات .. قلت له لا .. ما فيه يا بويه يرد لي مكسر .. والا صايبنه شي
حريز: لا دام السالفه جذه عيل خلاص بيرد الحين
ام خلفان: سر شوفه اميه الله يخليك
خلفان:والله امايه ما شفته برع .. وين اسير بعد ؟

خلفان تم يالس ويا امه .. يتريا اخوه يرجع .. اما حريز صعد فوق .. لا اكيد خواته صابهن شي .. لا تغدن ولا نزلن عقب الغدا بعد ييلسن ويا امهم !! غريبه !!

وصل للباب .. وهو مستعد لأي صرخه من الثنتين .. لانه يدري بيصرخن شويه بس وبيعلن صوتهن وهو لازم يتمالك اعصابه عسب هن يستحن ويعرفن انهن غلطانات .. دق الباب ودخل ..

شاف وحده منهن لافه ويها هالصوب .. والثانيه الصوب الثاني .. شوه السالفه ؟؟!! وولا وحده فيهن تظحك ؟؟!! معجزه هاي ..

حريز: بلاكن ؟؟

ولا وحده ردت .. بس انتبه ان هاي شبرية اليازيا واكيد اليازيا اللي يالسه عليها .. كانت تمسح دموعها .. والثانيه ولا معبره ولافه ويها وتطالع فوق .. وما ادري شوه تخربط ..
حريز قرب من اليازيا ..

حريز:اليازيا .. شوه فيج ؟؟
اليازيا: ما فيني شي

من رمست اليازيا .. واليازي انتبهت وسمعت ان صوتها يدل على انها تصيح ..
لا مستحيل .. زعلتها .. تصيح ؟؟ شوه سويت .. ما كان قصدي .. والله مب قصدي اني اصيحها او احط بخاطرها .. وركظت صوبها ..

اليازي:يزوي آسفه والله آسفه .. الله يخليج لا تصيحين
حريز:شوه فيكن ؟؟ شوه مستوي ؟؟
اليازي:اليازيا .. اقولج آسفه بس لا تصيحين ..
حريز:اليازيا .. شوه سوت بج هاي
اليازي: اليازيا ردي عليه .. والله دخيلج .. ردي بس لا تصيحين ( وهني نزلت دموع اليازي)
حريز:بلاج انتي بعد
اليازيا: اليازي لا تصيحين ما فيني شي
اليازي: والله آسفه .. يعل الله ياخذ روحي جاني كنت السبب في ان دموعج تنزل
اليازيا: الله لا قال ... لا تقولين جذه ..
اليازي: آسفه
اليازيا: ما سويتي شي ..
حريز:خلصتن ؟؟
اليازيا ( ابتسمت): هيه خلصنا .. عندك شي
حريز:الحين يا دوري اعتذر .. آسف عن اللي استوى امس
اليازيا: لا عادي .. نحن كنا غلطانات .. مب جذه اليازي
اليازي: هيه
حريز: عيل ليش ما نزلتن تتغدن
اليازيا( ارتبكت): ما كنا يواعه
حريز: انزين وعقب ليش ما نزلتن تيلسن ويا امايه
اليازي:الحين بننزل ..
حريز:زين تسون سيرن عندها .. يالسه تحاتي فهيد ..
اليازيا:ليش ؟؟ وينه ؟؟
حريز: ما ادريبه وين طلع ويا هالظهر ..
اليازي: ما عليكم الحين بيرد .. يدلع
حريز:ادري به .. يالله نشن نزلن تحت ..

الساعه 5 العصر .. حارب توه كان راجع من الدوام ..

حارب: السلام عليكم
ناعمه:وعليكم السلام والرحمه .. زين يوم ييت ..
حارب: ليش؟؟ ما احيد ان اليوم اول يوم اداوم فيه .. ولا اذكر انكم افتقدتوني وايد قبل هالمره
ناعمه: لا والله حيد الحين ..
حارب:ههههه حلوه هاي حيد الحين
ناعمه: يعني ما تدري ان نوف امس رجعت من العين.. وانها ذلت عمرها عسب بس ترمسها وانته اونك زعلان
حارب: هههههههه ذكرتيني .. والله تعبان وما فيه حيل اظحك بس انتي ما ادري بلاج اليوم تنكتين
ناعمه:ما يظحك
حارب: انا يظحكني
ناعمه:سر انزين شوفها .. من اول ما رجعت من المدرسه وهي في حجرتها قافله الباب على عمرها .. ولا تغدت ولا شي .. ومب طايعه تفج الباب ..
حارب: يا سلام عليكم .. هالياهل تغلبكم .. عصبوا عليها وخلاص .. صدق انكم
ناعمه: ثرها عسب جذه زعلانه زياده .. حامد حرج عليها .. وصيحها .. وسارت حجرتها ولا ظهرت بعد
حارب: عاد ما لقيتي الا حامد .. حامد هذا وحش كاسر .. جيه خليتيه هو يصرخ عليها .. جان انتي صرختي بتسمع رمستج
ناعمه:بقولك انا ما يايبتنها وناستنها .. والله امك هي اللي يايبتنها وانته اللي مدلعنها تتحملونها عاد ما يخصني
حارب: لاااااااااا .. حلفي ؟؟ قولي والله ؟؟ ظهر لج لسان .. ما عليه مب منج من الأنترتيقر اللي خطبج .. وهداج عندنا لين ما تخبلتي وطول لسانج

ناعمه كانت ادور شي حذالها عسب تفر به حارب .. بس جد حارب شرد وراح فوق ..
واول ما صعد فوق سار حجرة نوف .. ما تهون عليه .. ما متغديه للحين وهي راجعه من المدرسه تعبانه ..

دق الباب ..

حارب: نووووووووف بطلي الباب ..

بس محد رد عليه ..

حارب: نوف بطلي .. انا حارب .. حروبج .. بطلييه ..

وبعد محد رد عليه ..
حارب خاف حط اذنه عالباب .. ما يسمع ولااااا شي ..

حارب: نوف بطلي الباب اقولج .. بطليه .. انا حاااااااااااارب

حارب هني ما قدر ... نوف ما تبطل الباب ومنوه اللي يدقه حارب ؟؟!! ناعمه سمعت صريخه يت تركظ من تحت ..

ناعمه: شوه فيك ؟؟
حارب: هاي ما تبطل الباب .. ولا في صوت فحجرتها ..
ناعمه:دقه بالقو ..
حارب:يعني شوه ادقه بالقو .. اكسره ؟؟ والله بكسره جانها ما ردت الحين ..
ناعمه: نوف حبيبتيه فتحي الباب ..
حارب: نووووووووووووف
ناعمه:حارب حشرتني
حارب:قومي عن ويهي .. والله لاحشرج زياده انتي واخوج

وظهر حامد من حجرته ..

حامد: شوه فيكم ؟؟
ناعمه: نوف مب طايعه تبطل الباب ..
حامد: هي من ذيج الصرخه ولا ظهرت ؟؟
ناعمه:هيه
حارب: الله يهديك بس .. ياهل جيه تصرخ عليها
حامد: وايد مكبر راسها علينا انته
حارب:حامد نوف يااااااااااهل تفهم شوه يعني ياهل
ناعمه:مب وقته الحين .. افتحوا الباب ..

في نفس الوقت ظهرت نوف .. وهي ببجامتها .. وكشتها .. كانت راقده .. حارب شافها وظحك .. وحامد يقول فخاطره صدق انها نوف .. ونااعمه حمدت ربها ما صابها شي ..

حارب: يالسخيفه جيه تقفلين الباب
نوف: انته متى ييت
حارب: ههههه توني ياي
نوف: انزين انته السخيف مب انا ..
حارب ( والله ولا تنسى ولا كلمه غلط في حقها ): ههههههه انزين سخيف .. سيري غسلي ويهج وتعالي بنتغدا
حامد: والله لو انا منك جان عطيتها على ثمها
نوف:انته مجرم انزين
حامد:شوه قلتي
نوف:ما قلت شي ..
حارب: اخبره الحين شوه قلتي
نوف ( والدمعه في عينها): والله اذا خبرته ما احبك .. والله ما برمسك والله بخبر عليك ابويه
حارب:هههههه انزين ما بخبره بس لا تصيحين
حامد: انا مستغرب .. كل ما قلتوا لها شي انتوا الاثنين قالت لكم بخبر عليكم ابويه .. اما انا ما تقولي ..
حارب:لانك على قولتها مجرم
نوف:حااااااااارب ( وصاحت)
حارب: ما قلت شي

سارت نوف حجرتها تكمل صياحها .. تموا يظحكون عليها .. وحارب سار يتغسل ويبدل .. عقب بيي يراضيها مره ثانيه بأي شي يقص عليها .. وعقب يغديها وياه ..

ناصر كان يالس فالصاله يرمس فالمبايل.. وشهاب وياه يطالع التلفزيون ..
نزلت شذى من فوق ..

شذى ( تصرخ): شهااااااااااااااب .. شهابووووووووووو

بس ما حست الا وفي شي قوي ظرب على ويها ..
كانت هاي مخده .. بسم الله من وين يت ؟؟ وعلى ويهي بعد ؟؟
شهاب هو اللي فرها بالمخده ..

شذى (وهي مكمله صريخها): مالت عليك انزين
شهاب:اسكتي
شذى:ما بسكت .. تسكتني بكيفك انته
شهاب: شذو مب متفيج لج الحين
شذى:عاد انا اللي متفيجه والله ..
شهاب:شوه بغيتي ؟؟
شذى:ما بقول لك .. خلاص غيرت رايي .. نصووووووووووووووور

ناصر شاف شذى بنظره .. تقول لها اسكتي عني الحين ..
بس شذى ما فهمت شوه يبغي .. ولا شافته انه يرمس فالتيلفون ..

شذى:ناصر حبيبي انته ودني .. هذا شهاب السخيف ما ابغيه يوديني..

خلفان: علينااااااااااا .. جكيناك .. وين انته ؟؟ وتقولي فالبيت ..
ناصر: والله فالبيت
خلفان: فالبيت .. وناصر حبيبي اسمعهم يزقرونك .. روح روح زييييييييين..
ناصر:والله اني فالبيت ..
خلفان:ههههههههه ياخي انفضحت ..
ناصر:خلفان يعني شوه اقص عليك .. ثرها اميه يايبه وحوش شوه نسوي
خلفان:هههههههه حلوه هاي
ناصر:عندنا وحشين جان تبغون تروضونهم خذوهم
خلفان:لا مشكووووووووور .. نحن عندنا 4 اقصد لا حريز حليله مب من ضمنهم عندنا 3 انته الا جان تبغي تروضهم خذهم
ناصر (تذكر اخت خلفان اللي شافها فالميلس .. وابتسم): بس انتوا يمكن وحوشكم مب شرات وحوشنا .. اعتقد انهم ارقى شوي
خلفان:ههههههه خل عنك
ناصر (انتبه لنفسه): انزين عيل خلاص .. ان شاء الله عقب برمسك
خلفان:يالله فمان الله

ناصر بند من خلفان وعلى طول على شذى ..

ناصر:والله انج ما تستحين
شهاب:ايوا ايوا .. زين تسوي فيها عندك اياها
شذى:والله ما كنت اعرف انزين
ناصر:شوه تبغين ؟
شذى:ابغي اسير السوق ..
ناصر:ليش؟
شذى:ابغي اشتري لي كم بدله .. ولا تقولي سيري ويا شهاب ثرني مب سايره .. ولا ويا السايق وامايه لان امايه شلت السايق وسارت وما بترجع الا عقب المغررب وعقب المغرب انا بعد مب سايره وابويه محد عسب يوديني واصلا لو كان هني ما بيوديني
ناصر: اقول شهاب ممكن تقصر على صوت المسجل ثره عور راسي
شهاب:هههههههههههه حلوه حلوه
شذى:يعني شوه تقصد
ناصر:شدراني بج انتي .. الحين انا قلت ما بوديج .. والا قلت شي خذتيني بشراع وميداف
شهاب:جان لبستيه سباحات ثره يخاف من البحر
ناصر:فعيييييييييييييينك .. الحين اقول .. اقول لا تخليني ارمس
شهاب:خلاص لا تقول .. خلاااااااااص
ناصر:هههه زين عيل اسكت عني
شذى:والحين ؟
ناصر:سيري تلبسي وبنسير بس عاد بسرعه لاني برجع عقب المغرب
شذى:انزيييييييييييييين

فالسياره ..
حريز ( يرمس فالمبايل): قلت لكم بيرجع انزين
اليازي:فهيد السخيف
اليازيا:الحين بيجلب الدنياا فوق تحت .. ما وديناه
حريز:انزين يالله مع السلامه ... والله ان فهيد قاص على امايه وهي مصدقتنه
اليازي:هههههههه توك تدري هالخبر من زمان
حريز:توه راجع البيت .. وهي من الصبح حاشرة الدنيا فوق روسنا نحن
اليازيا: دومها جذه بسبة فهيد
حريز:وين تبغن الحين ؟
اليازي: ميركاتو
اليازيا:شوه ميركاتو .. صحارى
اليازي:لا ميركاتو
اليازيا:اقوولك سر صحارى
حريز:اقول .. ثرني دريول ابوكن
اليازي:انزين ندري
حريز:ما علييييييييييه ما علييييييييه
اليازي:ههههههه والله اتغشمر
اليازيا:سر صحارى
حريز:انتن شوه تبغن ؟؟ بالضبط
اليازيا:نبغي نشتري بدل .. وصحارى احسن .. ميركاتو ما فيه شي
حريز:بدل سيرن السيتي
اليازي: لااااااااا كله ولا السيتي عيل ودنا صحارى خلاص ما ابغي لا سيتي ولا ميركاتو
اليازيا:ههههههه احسن ..

شذى: انته الحين ابغي اعرف ليش راز بفيسك
شهاب:لاني راز بفيسي على قولتج
ناصر:بس خلاص وصلنا .. فضيحه انتوا محد يوديكم مكان
شذى:ليش قلت له تعال ليييييييش
شهاب:اخويه ويبغيني ايي وياه عسب نصيد الغزلان ويا بعض
شذى:مالت عليك ..
شهاب:وعليج .. تغارين الحين البنات احلى منج
شذى: فعينك ..
ناصر:شهاب وشذى لو ما يزتوا الحين وتأدبتوا على طول عالبيت
شهاب:سكت اختك
ناصر:انته ياهل
شهاب:هي بعد ياهل ؟
ناصر:افففففففففف لا حول ولا قوة الا بالله

خلفان كان نازل من فوق بسرعه ..
بسير بلحق .. بسرعه بسرعه .. بتأخر بتأخر .. ناوي عليه المدير اليوم .. الله يغربل ابليسك يا نصور شرد منها .. انا الحين بتأخر وبيسوي لي سالفه روحي مب طايق عمريه اليوم بعد ايي ويكملها عليه المدير ..

شوه هالحشره اللي تحت ؟؟!! ليكون فهيد اشترى له قطوه ؟؟!! لا والله هاي نوف اظن .. وناعمه .. لااااااااااااا ناعمه هني ؟؟ مب وقته .. بسير الدوام الحين .. بس صدق متوله عليها خاطريه ايلس وياها .. اييني شور ايلس 5 دقايق وعقب اسير .. والدوام ؟؟!! لاحق عليه .. شوه يعني عسب ناعمه كل شي يهون ..

فهيد كان يالس فالصاله ويلعوز بنت عمه نوف اللي ما شايفنها من اسبوع واكثر .. وناعمه كانت يالسه وتظحك ..

فهيد: مستويه حلوه حلوه واااااااااايد
نوف:انته ايه .. وايد ترمس
فهيد: ادري انزين .. انتي توج تدرين
نوف: اسير العين احسن .. انته هني وايد تلعوزني .. والله بخبر عليك ابويه
فهيد:فكه كنا مرتاحين ما تيين بيتنا .. ههه خبري ابوج
ناعمه:هههههههه فهيد اسكت عنها
فهيد:وين حروبج اليوم
نوف:سار الريال سار وراه شغل
فهيد:هههههههههه والله تظحكين .. مصدقه عمرج
ناعمه:فهيد عشان خاطريه ما اقدر اظحك زياده
فهيد:اختج خربوطه .. كشخه احب العوزها
نوف:خربوط محد غيرك

خلفان:السلام عليكم ورحمة الله وبركاته
الكل : وعليكم السلام ورحمة الله وبركاته
نوف:اقولك انته شل اخوك من هني
فهيد:هههههههه شوه شوه عيدي والله رمستج تظحك
ناعمه: نوف عيب
نوف: حشره هالبيت .. عمي يايب وحوووووووووش مب اوادم
فهيد:عمج هذا يستوي اخو ابوج .. وابوج بعد ما قصر ياب وحوش غير
نوف (ترمس خلفان): ايه انته اقولك شل اخوك ما تسمع
ناعمه (وهي فاتحه عيونها على نوف):نوف عيييييييييييييب
خلفان:انا ايه ؟؟ انا عندي اسم
نوف:نسيت شوه اسمك
خلفان:وين كنتي طول هالأسبوع ما شفناج
نوف:اصلا انا ما شايفتنك اكثر من اسبوع مب اسبوع واحد بس .. عفانا الله ما يعرف يحسب
فهيد:هههههههههه خلفان لا ترمسها هاي لسانها طويل ما بتتحملها
خلفان (ابتسم) : خلها ياهل هاي.. جيه تلعوزها
فهيد:والله شوف شوف .. نوف
نوف (وهي حاطه ريل على ريل ورافعه خشمها):نعم
فهيد:محلوه اليوم شوه السالفه ..
نوف:إف يا ربييي اسكت عني ذبحتني لعوزتني .. والله بخبر عليك ابويه
فهيد:شوف ويها ههههههههه حلو والله كشخه
خلفان:ههههه انزين بسك هالكثر .. البنيه بتشرد وبتحرم تيي هني مره ثانيه
نوف:هيه والله سكته سكته
خلفان:وين امايه ؟؟
فهيد:امايه سارت المطبخ الحين بتيي
خلفان:اقول ناعمه تعالي شويه ..
ناعمه:انا ؟؟
فهيد:هيه انتي .. في وحده ثانيه اسمها ناعمه غيرج ؟؟
خلفان:فهيييييييييييد
فهيد:انزين والله افهمها بس ..

ظهر خلفان برع فالحوش .. وناعمه لحقته وهي ميته من الزياغ .. اول مره خلفان يزقرها ويرمسها .. شوه يبغي ؟؟ شوه السالفه ؟؟ ليكون سامع شي .. بسم الله عليه بلاني زايغه انزين انا ما مسويه شي اصلا ..

وقف خلفان وصد وراه .. بس ناعمه مب منتبهه بس تمشي ورى خلفان وهي زايغه وتفكر .. فدعمته ..
يوم انتبهت ( تو الناس) انه دعمته وانه واقف جدامها .. وقفت وقفطت ومنزله راسها مالها ويه ترفع راسها ..

خلفان (ابتسم): شحالج
ناعمه:بخير
خلفان: الحمدلله
ناعمه: شوه تبغي ؟؟
خلفان:بسم الله جيه من دون اي مقدمات شوه تبغي
ناعمه:آسفه ما اقصد .. بس يعني
خلفان:زايغه حد يشوفنا ؟؟
ناعمه:لا مب جذه .. بس حارب
خلفان: عادي .. انا بقوله .. وبعدين محد يقدر يمنعني اشوفج .. والا ارمس وياج على انفراد
ناعمه: خلفان الله يخليك قول بسرعه .. حارب لو يا وشافنا بيسوي لي سالفه
خلفان:ما يقدر .. ما يقدر .. تدرين ليش
ناعمه:خلفان مب وقت عناد
خلفان:انزين .. بروحج طلبتي تبغين بسرعه ارمس .. متى تبغينه العرس؟؟

رفعت ناعمه راسها وهي مبطله عيونها على خلفان ..
شوه انا في حلم والا في علم ؟؟ خلفان بنفسه واقف جدامي ويسألني متى ابغيه العرس ؟؟ لا في شي اليوم .. مريض يمكن .. واي فديته والله خلفان مريض .. لا بلاني انا .. امرض ولد الناس .. لا صاحي .. لانه توه كان بيعاند حارب .. لا هذا هو خلفان .. بس شوه ياينه؟؟

خلفان:انا اسأل
ناعمه:نعم؟
خلفان: ناعمه .. بنملج ان شاء الله عقب كم يوم .. والحفله مره وحده بنسويها .. فأبغي اعرف الحين متى تبغينه العرس ؟؟
ناعمه (وهي مستحيه ): انا ما يخصني انته كيفك
خلفان: ليكون انا باخذ بنت اليران .. ثرني باخذج انتي .. انتي العروس قولي متى تبغينه .. لاني اليوم يوم برد فالليل ان شاء الله بقول حق امايه اني عزمت نملج ونسوي حفله مره وحده ..
ناعمه: كيفك
خلفان:بعد قالت كيفك .. قولي متى تبغينه .. قولي
ناعمه: انا ما اعرف
خلفان:انا لله وانا اليه راجعون
ناعمه (وهي جريب تصيح ):لا تعصب والله .. بس كيفك متى تبغيه .. انته كيفك

خلفان حس انه قام اسلوبه يستوي جاف ..
والله مب مني .. هي ما تقول متى تبغيه العرس .. ما ترمس .. ما تسولف .. وايد هاديه وتستحي .. ما عليه .. عقب العرس بنشوفج ان شاء الله .. خلني اخف عليها الحين .. زاغت البنيه حليلها

خلفان (ابتسم): انزين مثل ما تبغين كيفي .. وعقب مب تقولين اليوم والوقت مب زين ..
ناعمه (ردت له الابتسامه ): لا ما بقول
خلفان: يالله عيل سيري عن ايي حارب
ناعمه:ان شاء الله ..

فالسوق ..

شذى: شهاب تعال
شهاب: شوه ؟
شذى:شوف هاللون حلو
شهاب: انتي ولا لون يليق عليج
شذى:بسكت عنك بس لان نحن فالسوق الحين .. ما ابغي افضح عمريه .. عقب يقولون يمكن هذا ريلها تظارب وياه فالسوق
شهاب:بسم الله عليه آخذ وحده شراتج
شذى:انزين اسكت .. وينه ناصر؟
شهاب:مينونه انتي ناصر يدخل محلات بدل حريم
شذى:عيل انته جيه داخل اظهر برع .. واستح على ويهك
شهاب:والله ودي .. لو كان ما في ولا ريال فالمحل بظهر .. بس شوفي كل وحده وما ادري منوه وياها .. ما بخليج روحج.. مع انهم ما بيصدون صوبج بس بعد
شذى:والله سخيف
شهاب:مب اسخف عنج

ناصر كان واقف ويلعب في مبايله ..
هههههههههههه والله حليله خلفان .. رايح الدوام .. زين شردت دبرت روحي .. بتصل فيه اسأله .. شحال الدوام وياه ..

انا احلم .. لا اكيد شبح .. شبح متجول في صحارى .. هههههههه حلوه هاي .. بس لا جنه هذا حريز .. هيه والله حريز .. هاي هي .. والله هي .. واخيرا شفتها .. جيه كنت اتريا اشوفها ؟؟ هيه افكر فيها من اول مره شفتها وكل مره تمر صورتها فخيالي .. بعد اسأل ابغي اشوفها .. بسني استعباط واقص على عمريه .. اوني ما ابغي اشوفها ..

حريز: اقول اليازي .. سيري داخل بسلم على واحد وبرجع
اليازي:استحي ادخل روحي
حريز:اليازي جيه شوه .. قايل لج دخلي على رياييل انا .. والا في حد داخل بيخطبج .. بتختارين بدله .. وانا قلت بسير اسلم وبرد
اليازي:وين اليازيا
حريز:ما ادريبها .. بعدها جنه فالمحل هناك
اليازي: انا سحبتك ويايه وما خليتك اتم وياها لاني استحي
حريز: هيه حليلها خليتينا نودرها ما فيج صبر
اليازي:هي مب ياهل ما بتضيع
حريز:انتي حتى مب ياهل ما بيخطفونج داخل .. دخلييييييييي
اليازي:انزين ههههههه بس لا تتأخر
حريز:بس بسلم وبرجع هني هذو الريال واقف .. ربيع خلفان
اليازي:ويه ربيع خلفان عيل اكيد مثله سر سر
حريز:ههه الله ياخذ عدوج

سار حريز صوب ناصر يسلم عليه .. وناصر يسوي عمره الحبيب ما شاف حريز .. يتريا حريز ايي يسلم ... ولانه كان يطالع البنيه اللي ويا حريز مب حريز نفسه .. استحى يروح يسلم ..

حريز:السلام عليك
ناصر:هلاااااااا حريز .. وعليك السلام .. شحالك
حريز:بخير الحمدلله .. انته شحالك
ناصر:تمام .. علومك يا ريال
حريز:طيبه
ناصر:وينك ؟؟ ما شايفينك من زمان
حريز:موجود انته اللي وينك
ناصر:انا امسات في بيتكم ( وسكت .. مينون اقول فبيتهم عن يزلق لساني واقول شفت اختك).. كنت ظاهر ويا خلفان
حريز: زين شفناك هني
ناصر (وهو يستعبط): شوه تسوي ياي صحارى اليوم
حريز:يايب الاهل .. انته اللي شوه تسوي
ناصر:حالي من حالك
حريز: هههههههه يالله عيل بخليك ..
ناصر:سلم على خلفان .. والوالد
حريز:الله يسلمك .. يبلغ وانته بعد سلم

ناصر من لف حريز بيرد المحل وهو عينه فالمحل على طول .. يدورها وينها ؟؟ وين سارت ؟؟ وين اندست هاي ؟؟ والا اخته شذى واخوه شهاب ظاهرين من المحل ..

شذى:افففف اسكت عني
شهاب:بسكت بسكت .. يالله ناصر
ناصر:ها؟خلصتوا
شذى:هيه خلصنا
ناصر:ما تبغين شي ثاني
شذى:لااا
ناصر:كم بدله اشتريتي ؟؟
شذى:ثنتين ..
ناصر:بس ؟؟ خذي اكثر .. في وايد اشيا حلوه في هالمحل
شذى:ما عيبني .. ؟؟
شهاب:مستوي كريم الاخ ..
ناصر: ما تبغون شي ثاني ؟
شهاب:والله انا يوعان
ناصر (ظهر بوكه): خذ هذا .. وسير كل انته وشذى .. ويوم بتخلصون اتصلوا بي انزين .. مع السلامه ..
شهاب:فضحتني الله يفضحك .. قالوا لك شحات ياي صوبك .. تظهر بوكك وتعطيني بيزات
شذى:هههههههههههه حلوه الحركه
شهاب:مالت عليج انتي الثانيه
ناصر:سيروا سيروا عني الحين ..

مشى شهاب ويا شذى .. وشهاب حاس ان ناصر فيه شي ..

شهاب:تصدقين .. ناصر فيه شي
شذى:شدراك
شهاب:انا متأكد .. تصرفاته مب طبيعيه اليوم
شذى:خل الريال فحاله ..
شهاب:انزين اسكتي .. خلاص
شذى:يرمس وعقب يسكت
شهاب:كيفي

ناصر.. سااااااااااارت سااااااااااارت .. الله ياخذ ابليسك يا شهاب .. من متى اتريا بس اشوفها مره ثانيه ..وتخرب عليه .. ليكون ساروا البيت .. عادي حريز يسويها .. ديايه الساعه 5 عالفراش يرقد .. لا وين وايد بالغت الساعه 6.30 الحين .. اليوم مستوي شاطر للحين سهران ... وينها وينها وينها ابغي اشووووووووووفها بس مره وحده بس ..

وصعد الدري المتحرك .. وهو صاعد شاف وحده كانت نازله من الدري الثاني ..

ناصر.. هذي والله هي .. بروحها بعد .. وين حريز ؟؟ اكيد سار يشتري شي وبيرد لها ....

اليازيا.. وينه حريز وين سار .. اتصل بهم احسن .. اتصلت انزين ما يردون لا حريز ولا اليازي .. ادور الحين جذه فالمحلات مثل الخبله .. بدخل هالمحل ..

ناصر لين صعد فوق ومره ثانيه نزل .. ضاعت عنه اليازيا ..
وينها بعد ضاعت .. تقولين ادور ابره في كومة قش .. وينهاااااااا يا ناس خاطريه اشوفها عدل والله من جرييييييب ..

اليازيا.. برد من وين ما ييت .. احين جذه ادور بضيع .. الله ياخذ عدوج يا اليازي ردييييي ..

ووقفت جذه مصدومه .. انته من وين ظهرت ؟؟ لا مستحيل .. ما اقدر .. ما صدقت انسى الكابوس لمدة ساعه من دخلت صحارى .. الحين يظهر جدامي

ناصر..هذي لقيتها .. والله لقيتها .. هههههههه والله واقفه وتطالع .. زاغت البنيه .. شايفه الشبح اللي شافها في الميلس مالهم ..

اليازيا.. بشرد بشرد .. وينه حريييييييييييز رد عالمبايل .. وتمت ادور بروحها وصعدت فوق مره ثانيه ونزلت ..

ناصر.. هاي تلعب .. توها صعدت والحين نزلت .. وخلتني اصعد وراها .. انزين هي ما ظربتني على ايدي وقالت تعال ورايه .. بعد بضيع عني .. يا ربييييييي خبلت بيييييييي

اليازيا.. الحمد لله ضيعته .. ما ادري وين سار .. ان شاء الله يسير ولا يرجع يا رب ولا اشوف رقعة ويهه طول حياتي ..

حريز: شوفي اليازيا ما اتصلت بج
اليازي: متصله فوق العشر مرات
حريز:وانا بعد متصله فيني كم مره .. وين نحن ما نسمع ؟
اليازي:ههههه شدراني ..
حريز: اتصلي فيها قولي لها تيي السياره نحن سايرين ..
اليازي: انزين

اليازيا كانت فالمحل .. وما عندها شي بس تتريا اليازي او حريز يتصلون .. وما تبغي تظهر عن تشوف ناصر.. ورن مبايلها ..

اليازيا: تو الناس ويا ويهج
اليازي:ههههههه شسوي انزين ما سمعته يوم رن
اليازيا: وينكم انتوا الحين ؟؟
اليازي: سايرين السياره تعالي
اليازيا: انزين يالله باي
اليازي:لا تزعلين فديتج والله
اليازيا:ههههههه ما بزعل جيه شوه ..
اليازي:هههههههه انزين باي

حريز: بعد يعني لازم زعل وما ادري شوه
اليازي:هيه لازم
حريز:انتن
اليازي:بلانا ما فينا شي
حريز:انزين يالله امشي ..

ناصر يدور فالسنتر مثل المينون يدور يدور .. ورن مبايله ..

شهاب:ناصر وينك ؟؟
ناصر:هني انا تحت
شهاب:نحن خلصنا
ناصر: انزين يالله نزلوا
شهاب:الحين شذى بتشتري من باسكن وبننزل
ناصر : انزين

وشاف حريز ماشي جدامه ووياه بنيه .. ومن دون احساس بند في ويه شهاب ..

ناصر.. بعد ردت ويا حريز .. سخيفه جان كملتي حواطتج بروحج .. بلاني عالبنيه ما اعرفها واقول عنها جذه .. بيسيرون البيت اكيد ..

شهاب: تصدقين صكر فويهي
شذى:ههههههه عادي تيكت ايزي
شهاب: لا ناصر اليوم متخبل صدق ..
شذى:الريال يمكن مشغول يمكن عنده شي ..
شهاب:يا غبيه .. اعرفي اذا شفتي ولد وتصرفاته جيه مثل الخبايل ومب على عوايده .. اعرفي انه عسب بنيه وانه يحب ..
شذى: عيل انته خبله من زمان .. يعني عسب بنيه وتحب .. لا ما اظن متى ترضى بك انته
شهاب:ماااااااااالت عليييييييييييج شذو .. والله مالت عليج .. جب انزين
شذى:هههههههههههه
شهاب:بسرعه بسرعه خلصينا

اليازيا كانت توها ظاهره من المحل وشاله خريطه من المحل نفسه .. اشترت قميصين عيبوها حقها وحق اليازي ..

ناصر .. كان يالس تحت .. يتريا اخوانه .. يالله الحمدلله عالأقل شفتها .. بس ليش متخبل عليها جذه .. بلااني .. هذا وانا شايفنها مره وحده بس .. واستوى بي جذه الله يعيني .. اليوم بالصدفه شفتها مره ثانيه وين بشوفها بعد .. الله أعلم .. الله يصبرني ..

ومرت اليازيا من جدامه ..

ناصر .. والله بتخبل بي هاي .. من وين ظهرت ؟؟ يا عالم يا ناس فهموني .. انا في حلم والا في علم .. كل ما رمست عنها ظهرت جدامي .. لا وبعد هالمره مب ويا حريز .. صدق انها قاصه عليه .. مره تزقره وياها ومره تسير بروحها ..

نش ناصر من مكانه وتم يلحق اليازيا .. وهي انتبهت ..

اليازيا.. هذا شوه يبغي .. الحين ايمع خلق الله عليه زين .. عسب يتأدب .. مساعه كان يطالع .. والحين لاحقني .. اكيد عرف اني انا اخت خلفان .. واني انا هي اللي شافها فالميلس .. مالت على شيفته ..

ظهرت اليازيا برع وحريز كان يترياها فالسياره مع اليازي .. ركبت وساروا ..

ناصر: اف حريز الدب الثاني .. بتريا شويه .. ما صدق يت ركبت وعلى طول داس وسار .. انزين بعد يعني شوه يسوي ؟؟ صدق اني غبي .. هههههههههههه مب مني من اللي خلت الغباء يسيطر عليه .. وخبلت بي .. آآآآآآآآآآآه .. خلني اتصل في شهاب احسن ..

ناصر اتصل في شهاب يقوله ان هو فالسياره يترياهم .. وبيسيرون البيت ..

يسلمووووووووووو على الجزء الروعة
ويحليله ناصر قام يفكر باليازيا
واتوقع
مع الايام يازيا بتبادله نفس الشعور وبتبدا تحبه:)


وننتظر التكملة