[align=center]أحس بـشئ يمنعني عن الكتابة وتكميل القصة رغم اني اعشق الكتابة
يمكن الوفاء والاخلاص هما السبب
لاني أخاف اظلم أحد بكتابتي..
لكن بـاحاول وساعدوني ..

يقولوا الدنيا تعلم الانسان الصبر ..
أنا تعلمته من أنا صغيره ..ما اشتكيت ولا مره.. من وضعي ..
لكن الناس لما كانوا يعرفوا ينصدموا أو تبان على وجههم علامات ما فهمتها الا قريب..
التعاطف.. كنت اكره هالتعبير ومازلت ..لاني احس بنوع من الضعف لما اشوفه..
وانا اللي تعلمت اني اداري واخبي مافي عشان لا يشمت فيـا أحد..
من يوم كنـا صغار تعلمنا نخبي المنا أو حزننا ..
الناس حولينا علمونا.. ناه لازم مانبكي ولا نزعل قدام الناس بعدين يقولوا علينا
(عيشة البكاية) علمونا نهتم برأي الناس.. اكتر من اللازم..
عشان كده ما اقدر ابين للناس احاسيسي حتى لأقرب الناس..
أخاف انجرح..


فيــوم من الأيام بعد سفر بابا لـ لبنان..
اتصل وطلب يكلم أخواني الأتنين وما كلمني..
حز في خاطري ..خصوصا انه علاقتي كانت متأزمه معاه..
- عزو ..ليه بابا ماكلمني؟
ارتبك اخوي .. وبان عليه انه مخبي شي .. بعد دقايق قال
-بابا..يقول انه تزوج..وهو ماكلمك عشان لا تزعلي..و..
-ايش؟
-وتبكي.
قاومت في هديك اللحظة خاصة لما عرفت انهم متوقعين اني ابكي ..
حبست دموعي وكابرت
-لا ..ليه ازعل؟؟ وابكي؟؟
عرفت بعدها ان الأمل انطفا باعلانه الاخير ..
ماعاد فيه حياة اسريــه ماعاد فيه ماما في البيت , ويمكن ماعاد فيه دلوعة بابا ..وحبيبة قلبــه
ماقدرت أنام كأن الدموع اللي غرقت عيوني انتظرت الكل ينام ..
والدنيا تصير ظلام عشان تنهار الشلالات..
حاولت اكتم شهقاتي ..عشان محد يدري اني ابكي.. ويواسيني..
كنت مو محتاجه احد غير ماما وحضنها الدافي..
وبكاي زاد لما عرفت ان ماما مستحيل ترجع البيت..
والشي اللي ماكنت اعرفه ان حتى أنا ما رح ارجع للبيت ..
بابا قرر يبني حياة جديده للعروسة ..


اتذكر..لما شفته لأول مرة مع عروسته يوم ما جا من السفر ..
وهو بالاحرام ..نسيت كل الزعل و القهر الي بداخلي ..
وجريت عليه احضنه وابوسه.. ولما شفتها حسيت بشي غريب تجاهها.. غير الخجل
ماهو كره ..ولا حب.. يمكن اتفاجأت ..لأنها كانت مختلفه عن اي شخص شفته بـ حياتي..
مرت الأيام ..ونحن ساكنين عند تيته وعلى وشك ننقل بيتنا الجديد..
وبابا فرحــان وكل اللي حواليه.. اما انا كنت ما احس بشي..
غير الحيرة..
كيف هم فرحانين بعد ما اتشتت شمل اسرتنا
ورجع بابا يكون اسرة جديدة..
كان احساس الطفلة الصغيرة الرفض.. الوحدة..
خصوصا بعد ما تعودت ماتاكل الا من يد أبوها..
والحين..ولأول مرة تقعد بعيد عنه..ليه تركني؟؟
ماعاد يحبني؟؟
كل من حولي اتعودوا هدوئي من يوم الطلاق ..
رغم اني ماكنت كده قبل..كنت انا وبنت عمي أصحاب ..
- يا حظك عنك مرة أبو ..
-كيف ياحظي؟؟


لكن تدروا بطرق كثيرة محظوظه.. لأن الوحده والحزن اللي كنت
احس بيهم كانوا طبيعين في حالتي لكني بالغت فيهم..
لأني مع الأيام.. تعودت وجود الغريبه معانا والفتها..
ولقيت انها مو بالسوء اللي تصورته وسمعته ..
من زميلاتي في المدرسة..
وحده قالت ما ادري هيا صادقة ولا لاء..
تقول ان مرة ابوها كانت تضربهم..
ولما كانت تقول لأبوها كان مايصدقها..
ما ادري .. كيف تصورت ان بابا الحنون الطيب ..
ممكن تكون تصرفاته زي الأب الظالم..
اعترف اني ظلمته .. وظلمتها..

بعد ما تعرفت عليـها ..
اقصد مرة بابا لقيت انها انسانة عادية
مو مصاصة دماء زي ما تصور القصص والروايات اللي يألفوها الناس
عن مرة الأب ..
كانت علاقتي بها تتقدم حتى ولدت اخوي (علوش)
فأحرجني مرة بابا بـ سؤال قدامها
- تحبي مرة أبوكي؟
ارتبكت لأني حت اللحظه ما كنت اعرف شعوري تجاهها..
- ايوه احبها .. مو هي ام علي.؟؟تعلمت بعدها اني مـا اتسرع واحكم على الناس بدون ما اعرفهم..


ارجوا اني ما اكون طولت ولا نكدت على احد ..
واتمنى يعجبكم الجزء..
واقول لكم شي اكيد ..ان الجاي احلى..[/align]

مشكـــــــــــــــــــــورة حبيبتي


فوفو

ننتظرك بفارغ الصبر

[align=center] اهليـن..
دلــوعة..
بس ما انتقدتي ..ما مدحتي ..
ما اديتيني رايك..
ولكن مشكور على المرور..[/align]

فـــوفــــو

مشكلتنا نحكم على الناس ونحن ما نعرفهم ... !!

وخاصه مرة الاب .. دوم بنظرنا بتكون قاسيه ..

بس هذا من المواقع الاغليه جي .. بس الحمد الله انج تأقلمتي معاها :)

.
.

تابعي عزيزتي .. ننتظرج


ونين

[align=center]
.. ..

ما شاء الله عليك ..

على الرغم من صغر سنك .. الا ان اسلوبك بالكتابه رائع وجذاب ..

يخلي الواحد يندمج بالقراءه ..

تسجيل اعجاب على الاسلوب والجرأه في طرح القصـــــه ..

بإنتظارك رهوفه .. ولا تطولي علينا ..
.. ..
[/align]