يسلمــــــــــــــــــــــــــــــو على الجزء الروعة وبليـــــــــــــــــــــــــــز لاطول علينا بالتكملة

وقصة اكثر من روعة

واتوقع :
ان حمده بتوافق على محمد بس الله يستر والله يعينها
وبليييييييييييييييييز لاطولين عليننا بالتكملة

هذي وردة للهوى هذي جروحك عطني روحي سيدي او خذها روحك (3(
حمدة وكلامه يهزها ويرعبها : ليش ابي افهم ليش
محمد بغضب: تبين تعرفين ليش. لانه مب محمد خليفة اللي ينقاله لا
دخل محمد الى المنزل تاركا حمدة في حالة صدمة وهي تشعر ان ما حصل هو كابوس غير حقيقي . لكن محمد خليفة كلمها فعلا وهددها اذا لم توافق على الزواج منه سيدخل شقيقها السجن.
حمدة.......ما كنت اعرف ان في انسان في الدنيا بهذي القسوة والشر
ركبت مع السائق وهي لا تعرف ما تفعل انها تشعر بان تفكيرها مشلول . انها مصدومه ودموعها ليست قادرة على ان تعبر عن ما تحس به .اذا وافقت فهي تحكم على نفسها بالموت . والتعاسة عند زواجها من رجل مثله يخلو من أي رحمة او شفقة . واذا رفضت فهي تحكم على شقيقها بالسجن وضياع مستقبله. ولكن هل حقا سرق سعود المال من محمد هذا مالا تعرفه ولكنه لن يغير من حقيقة ما يحصل .
وصلت الى المنزل ودخلت الى غرفتها وهي تشعر بنار في قلبها لم تعرف ما تفعل وكل ما كانت تتمناه ان ياتي اليوم التالي لترى منى وتكلمها بالموضوع

اما محمد فكان يشعر بانه تعدى حدوده ولكن رفضها له اغضبه كما لم يغضب من قبل . لم يعتقد ان هناك فتاة قد ترفضه . وخاصة فتاة مثلها تعيش بوضع مادي سيء . كيف ترفض شخص غني مثله سيجعلها تعيش بنعيم .
محمد.....منو تحسب عمرها عسب ترفضني والله لخليها تعرف منو هو محمد خليفة

اليوم التالي
في الجامعة
حمدة في كافتيريا الجامعة مع منى
منى: هددج
حمدة: هيه يا حمدة هددني
منى: سعود سرق فلوسه
حمدة: ما اعرف
منى: انتي قلتيلي ان سعود بالفترة الاخيرة جان يصرف وايد ويطلعكم تاكلون برع بمطاعم غالية وييب وايد اغراض على البيت من وين كل هذا
حمدة: حوافز
منى: كل هذي حوافز
حمدة: قصدج ان سعود سرق فلوسه مثل ما يقول
منى: الحل الوحيد انج تسالين سعود
حمدة: بس انا مظطرة اوافق يا حمدة بكل الاحوال لازم اوافق
منى: لا يا حمدة لا تدفنين عمرج مع واحد مثله ما عنده اخلاق او ضمير واذا كان سعود بريء لا تخافين بيقدر يثبت برائته البلد مب سايبة وهو ما يقدر يسوي اللي يبيه بدون ما حد يحاسبه
حمدة: واذا كان سعود فعلا سرق فلوسه
منى: بهذي الحالة
حمدة: بهذي الحالة لازم اوافق
منى: لا يا حمدة بهذي الحالة سعود بيكون غلط ولازم يدفع ثمن غلطته
حمدة ودموعها تنهمر: لا يا منى ما اقدر اخلي مستقبل اخوي يظيع . سعود اذا كان سرق فهو ما سوى جي الا بسببنا احنا عسب الوضع الصعب اللي احنا فيه . وبعدين ابوي يا منى اذا درى ان سعود سرق يمكن يروح فيها . الشي الوحيد اللي مصبر ابوي هو السمعة الزينة اللي عندنا . وعياله اللي يقول انه يرفع فيهم راسه لانهم عزوته الوحيدة بعد ما خسر فلوسه . الحين تبيني اهدم كل شيء
منى: يعني بتوافقين
حمدة: ما عندي حل ثاني
منى: حمدة حرام عليج تسوين جي بعمرج شلون بتاخذين واحد تكرهينه لا مب جي تحتقرينه بعد.
حمدة: منى الله يخليج ما بي حد يعرف بالسالفة . ما بي احمل اهلي اكثر من اللي هم فيه
منى: حمدة لا تتسرعين سالي سعود . يمكن ما سرق فلوسه بهذي الحالة بيوقف معاج سعود طيب و يحبج وما ظنتي يخليج تاخذينه

في اليومين التالين كانت حمدة تموت الف مرة في اليوم وهي لا تعرف ما تفعل هل تسال سعود عن الموضوع . ولكن اذا كان حقا قد سرق النقود هل سيعترف ولكن هل حقا تريد ان تعرف . انها لا تريد ان تفقد احترامها لشقيقها فربما من الافضل ان لا تساله على الاقل ستظل دوما تعتقد انه لم يسرق . وهي ستوافق حتى توفر على اسرتها العذاب .كانت حمدة في غرفتها وتفكر بما يحصل عندما دخلت امل الغرفة
امل: تعالي سعود يبي يقول لنا خبر حلو بس مب راضي يتكلم لين نكون كلنا موجودين
خرجت حمدة مع امل الى المجلس حيث كان الكل هناك
يوسف: يلا شو الخبر
سعود : في واحد من فاعلي الخير دفع القرض مالنا
ام سعود: انت متاكد
سعود: هيه يمى واذا مب مصدقتني اتصلي بالبنك بيقولون لج ان ما علينا شي
ابو مسعود:الحمدلله لك يا رب
ام سعود: انزين هو مين
سعود: لا يمى هو ما يبي حد يعرف منو هو
ام سعود: نبي نشكره
ابو سعود: انزين هو مين وين يعرفنا
سعود: ما ادري يمكن حد قاله عنا
ابو سعود: بس يا ولدي احنا لازم نرجعله فلوسه
سعود: يبى الريال ما يبي شي .
الكل سعيد الا حمدة التي ادركت ان سعود هو الذي دفع القرض ومن الاموال التي سرقها من محمد خليفة . لم تعرف ما تقول هل تكلم سعود ولكن ما الفائدة لم يعد بمقدوره ان يعيد الاموال الان وحتى اذا اعادها هل سيكتفي محمد باخذها طبعا لا . لقد ادركت انه بما حصل الان . لم يعد امامها حل سوى قبول الزواج بمحمد خليفة .
ولكن ما راته من فرحة على وجوه والديها واخوتها خفف عنها . لن تقتل فرحتهم لن تكون انانية . ولكن سعود يجب ان يعلم بما حصل حتى لا يعتقد ان السرقة هي الحل .

في منزل ابو سعيد
ام سعيد: دريت ان ربيعك محمد خليفة بيعرس
سامية: محمد بيعرس ما صدق
سعيد: لا صدقي و بياخذ وحدة عندكم بالجامعة
سامية: شو اسمها
ام سعيد: حمدة عبدالله
سامية: مين
ام سعيد: حمدة عبدالله هي اصغر عنج بسنة
سامية : ما صدق الحين محمد ما لقى غير هذي البنت
سعيد: ليش شفيها البنية
فهد: اكيد مب خقاقة عسب جي ما عيبتها
سامية: وعلى شو بتشوف عمرها على الفلوس ولا العيلة
ام سعيد: بهذي معاج حق البنت مب من عايلة غنية
سامية: وشلون خالتي ام محمد وافقت
سعيد: ما فيها شي البنية زينة و مؤدبة
سامية: ما صدق انا لازم اكلم هدى
قامت سامية عن المائدة لتكلم هدى
فهد: انا ما اعرف هذي البنت شتبي بالظبط
ام سعود: مالك شغل فيها . اقول يمى سعيد وانت ما تبي تعرس مثل ربيعك
امنة: سعيد شرايك انا اخطبلك دام اني هني
ام سعيد: هيه يمى اختك ذوقها ما في مثله
سعيد: يمى انا ما ابي اعرس الحين بعدين
ام سعيد: يمى 32 سنه انت
سعيد: ادري بس اقولج لين يملج محمد بعدين
ام سعيد: وانت شلك بمحمد
سعيد: يمى مب الحين خلاص قلتلج مب الحين
امنة: انزين خلاص يمى لين يملج محمد
فهد: بناتج وينهم
امنة: داخل
ام سعيد: اقول يمى بناتج ليمتى بيتمون جي ما يتكلمون عربي
امنة: والله يمى انا احاول وياهم . اخليهم يسيرون تحفيظ قران بس الظاهر اني غلطت يوم ما وديتهم مدارس عربية من يوم كانو اصغر
سعيد: اكيد الموضوع صعب عليهم البنات مب صغار سارة 8 سنين ولولوة 6 كان لازم يدشون مدارس عربية من زمان . بس مب مشكلة هذي فرصة وهم هني يتعلمون انتو لا تكلمونهم بالانجليزي بيطرون يتكلمون عربي
امنة: انا افكر ادخلهم معهد هني
حصة: تبين نصيحتي ييبيلهم مدرسين في البيت على الاقل بيتمون تحت عينج وبتعرفين شلي قاعدين ياخذونه
امنة: اتني تعرفين حد يدرس بالبيت
حصة: سمعت شما بنت ام خليفة تقول ان في بنت عندهم بالجامعة تدرس انجليزي وكمبيوتر بالبيت والبنية وضعها صعب شوي. ومحتاية شغل.
امنة: يعني شما تعرفها
حصة: هيه ربيعتها يعني انتي جي بتكسبين اجر بالبنت يوم تييبنها تعلم بناتج.
امنة: عيل خلاص كلمي شما خليها تكلم ربيعتها.

في غرفة سامية
سامية: وانتي شلون توافقين
هدى: وليش ما وافق
سامية: هذا اخوج شلون تخلينه ياخذ وحدة مب من عايلة معروفة
هدى: سامية انتي ما تحبين البنية صح
سامية: وليش ما حبها
هدى: عسب الموقف اللي صار لج معاها هي وربيعتها
سامية: انا ما انكر اني اتضايج منهم بس مب هذا السبب بس اخوج يوم بيعرس لازم ياخذ وحدة من مستواه
هدى: مثل منو يعني
سامية: ما اعرف
هدى: تصدقين لولا اني متاكدة ان احمد , هو اللي يهمج جان قلت انج غيرانة على محمد وزعلانة لانه بيعرس
سامية: دام انج تعرفين ماله داعي هذا الكلام بعدين انتي ناسية ان هذي اللي بتاخذ محمد بتكون سلفتي يعني لازم انا اختارها
هدى: ههههههه والله انج غريبة يماما احنا قاعدين نتكلم عن محمد
سامية: ادري
هدى: وانتي تدرين ان محمد ما يسمح لحد يدخل فيه و بقراراته تبين اتيين انتي تختارين له العروس اذا ابوي اللي هو ابوي ما تدخل ووافق على السالفة و بيسيرون يخطبون البنية على اخر الاسبوع .
سامية: واحمد شرايه
هدى: هاذوه الحين يى شرايج تكلمينه
سامية: تمزحين حظرتج تدرين انا الغلطانة اللي اكلمج مع السلامة
هدى: بامان الله
احمد: منو هذي
هدى: خطيبتك
احمد باستغراب: خطيبتي
هدى: سامية
احمد: الحين سامية صارت خطيبتي
هدى: يعني هي بحسبة خطيبتك
احمد: هدى هذا كلام جديم واحنا الحين كبرنا
هدى: وشلي تغير
احمد: اللي اتغير اني ما بي اخذ سامية
هدى: ليش . سامية ما شالله عليها حلوة و مؤدبة و من عايلة معروفة و يكفي انها بنت عمي بو سعيد
احمد: انا ما قلت ان سامية فيها شي. بس انا مب مظطر اتزوج وحدة اهلي واهلها قرروا ان احنا تنزوج يوم احنا كنا يهال . والحين احنا كبرنا ونبي نقرر و نختار بروحنا
هدى: وانا اقول من وين يابت شما هذا الكلام اللي تقوله اكيد منك انت
احمد: أي كلام
هدى: شما ما تبي تاخذ مبارك ولد عمها
احمد : ليش
هدى: لنفس اسبابك
احمد: هذا مينونة اكيد شلون ترفظ مبارك
هدى: سبحان الله الحين انت عادي ترفظ سامية بس شما ما يصير ترفظ مبارك
احمد: لان مبارك يبيها وكلنا نعرف
هدى........وسامية بعد تحبك بس ما اقدر اقولك
هدى: صحيح نسيت اقولك ان خليفة وولد عمه هزاع بيوون عقب يومين
احمد: هيه ادري كلمني خليفة البارحة وقالي
هدى: انزين انا بسير غرفتي عندي امتحان باجر
احمد: سالم شخباره
هدى: انت ادرى
احمد: انتي ما تكلمينه
هدى: ولد عمك زعلان مني لاني اجلت العرس
احمد: جنه مب هامج زعله
هدى: لاني اعرف ان قاعد يسوي عمره زعلان عسب احن عليه وارظى نسوي العرس عقب اسبوعين
احمد: هههههه والله انج رهيبة
هدى: انا بخليه يعرف منو هي هدى خليفة .
احمد: هههه الله يعينك يا سالم على ما ابتلاك
هدى وهي تقف و تضرب احمد بالوسادة على راسه: الحين انا بلوى
احمد وهو يهرب منها : هيه والله بلوى
دخل محمد الى المجلس
محمد: شفيكم
احمد وهو يختبيء خلف محمد: بتظربني
محمد: لا والله وانت ما تستحي خايف منها
احمد: يعني عادي اظربها
محمد: انت بس المسها و شوف شو بيستوي فيك
احمد: لا والله
هدى: الله يخليلي اخوي و ما يحرمني منه
احمد: وانا
هدى: وانت بعد
محمد: يوم الخميس لا تطلع من البيت
احمد: ليش
محمد: بتسير وياي انا وابوي عند العرب
هدى: خلاص بتسيرون
محمد: هيه الحين ابوي كلمهم وبنسير الخميس
احمد: مبروك .
محمد: الله يبارك فيك
احمد: ومنو بيسير ويانا بعد
محمد: عمي بو سالم وعمي بو سعيد وبو خليفة و بو مبارك و سعيد
هدى: وخليفة ما بيسير
محمد: ليش هو متى بيرد
احمد: عقب باجر هو وهزاع بيوون
محمد: عيل خلاص هو و مبارك وهزاع وعلي بعد بيسيرون

في منزل ابو سعود
ابو سعود مازال مذهولا من اتصال ابو محمد به . فهو لا يصدق ان محمد خليفة يريد الزواج بابنته
دخلت ام سعود الى المجلس
ام سعود: شفيك
ابو سعود: تعرفين منو كان يكلمني قبل شوي
ام سعود: مين
ابو سعود: خليفة سلطان
ام سعود: خليفة سلطان ابو محمد خليفة
ابو سعود: هيه هو
ام سعود: وشيبي منك
ابو سعود: بيوون الخميس عندنا عسب يطلبون حمدة
ام سعود مذهولة تماما وهي تعتقد انها تتخيل: انت اكيد غلطان
ابو سعود: انا كنت مثلج جي بس بعدين يوم قالي انه خليفة سلطان اللي سعود يشتغل فشركته تاكدت اني مب غلطان
لم تعرف ام سعود ما تفعل هل تضحك ام تبكي . فهي تشعر بسعادة لا توصف . لا تصدق ان محمد خليفة يريد الزواج بابنتها حمدة
ام سعود وهي تكاد تبكي: وهم وين شافو حمدة
ابو سعود: حمدة ربيعة بنته وبنت بنته بالجامعة
ام سعود: هيه صحيح قبل يومين حمدة قالتلي انها بتسير بيت ربيعتها بنت حميد مبارك اللي يكون زوج بنته لخليفة سلطان
ابو سعود: عيل اكيد شافوها هناك
ام سعود: انا مب مصدقة الحين محمد خليفة يبي ياخذ بنتي .
ابو سعود: يعني انتي موافقة
ام سعود : وليش ما وافق. في وحدة يتقدم لبنتها محمد خليفة و ترفظ
ابو سعود: مب جنه عود
ام سعود: انا ما اعرف عمره بس مب مشكلة بعدين هو مب لهذي الدرجة عود
ابو سعود: بعدين يام سعود هذيل ناس غير عنى . هذيل اغنيا و ....
ام سعود: يابو سعود الغنى مب عيب . الناس سمعتهم زينه بين الناس وبعدين احنا شنبي لبنتنا غير انها تتزوج واحد زين و يقدر يعيشها حياة زينة
ابو سعود: انا ما اعرف بس الراي راي البنية هذي حياتها وهي اللي تقرر
توجهت ام سعود الى غرفة حمدة
ام سعود: ها شقلتي
حمدة......وانا اقدر اقول شي غير اني موافقة. ااااااااه يمى لو تدرين بالنار اللي فيني
ام سعود: ليش ساكتة
حمدة: انتي شرايج
ام سعود: اكيد موافقة
حمدة باستغراب: وليش اكيد
ام سعود: يمى الريال زين و مهيوب ومن عايلة غنية ومعروفة . شلون تبيني ارفظ
حمدة والالم يعتصر قلبها: يعني يمى انتي تشوفين ان الفلوس شي مهم
ام سعود: اكيد يمى شي مهم . يمى ابوج ما قصر علي بشي بس انا يمى ابيج تاخذين واحد يريحج ويخليج تعيشين بدون ما تفكرين من وين بتدفعين مصاريف هذا وذاك . ابيج تعيشين من دون ديون .
حمدة وكلام امها يقنعها ان لا حل امامها الا ان توافق:وابوي شرايه
ام سعود: ابوج قالي ان الراي رايج انتي
حمدة.......لا يمى الراي راي محمد خليفة هو اللي قرر وانا بنفذ بس
حمدة: سعود شرايه يعني هذا مديره
ام سعود: لا سعود بعده ما درى
حمدة: انزين يمى مثل ما تبون
ام سعود والفرحة لا تسعها : يعني انتي موافقة
حمدة: هيه يمى انا موافقة
قامت ام سعود وقبلت حمدة: مبروك يا بنيتي مبروك
حمدة........لا يمى الله على شو تباركين على موت بنتج
خرجت ام سعود من الغرفة
اما حمدة بقيت مكانها ودموعها تنزل رغما عنها . لقد كانت تامل بالايام الاخيرة ان يتراجع محمد عن قراره ولكنها كانت مخطئه انه ماضي بقراره ولقد ادركت انها الان اصبحت خطيبة لمحمد و بعد ايام ستصبح زوجته ولكن هل ستسطيع ان تتقبل فكرة ان تكون زوجة محمد خليفة.

في منزل ابو محمد
محمد وسعيد وسالم في المجلس
سالم: ياخي انا يوم قالي ابوي ان ولد عمك بيعرس ما صدقت . قلته مين اكيد تقصد احمد
محمد: ههههههه حليلك لهذي الدرجة فاقد الامل فيني
سالم: ياخي عمرك ما قلت انك بتعرس
محمد: يعني بتي ويانا
سالم: اكيد . بس صحيح اللي سمعته
محمد: وشلي سمعته
سالم: ان البنية اخوها يشتغل عندكم
محمد: فيها شي
سالم: ما فيها شي بس توقعت انك يوم بتقرر تعرس بتاخذ وحدة ابوها معروف
محمد: ليش انا باخذ ابوها او باخذها هي
سالم: انزين شفيك عصبت
محمد: ما عصبت بس يعني البنية ابوها محترم وسمعته زينه
سالم: خلاص مبروك والله يتمم على خير انشالله
محمد: الله يبارك فيك
سالم: سعيد شفيك ما سمعنا صوتك
سعيد: ما شي
نظر محمد الى سعيد الذي يدرك محمد انه غير موافق على موضوع الزواج فهو الوحيد الذي يعرف السبب الحقيقي لرغبة محمد بالزواج من حمدة . وهو الوحيد الذي يعرف ان سعود شقيق حمدة هو الذي سرق اموال الشركة
سالم: اقول محمد عمي قال ان عرسنا انا و هدى بيكون عقب اسبوعين من هي تخلص امتحانات
محمد: انزين
سالم :شو انزين يعني عقب ثلاث اسابيع من الحين
محمد: سالم هدى هي اللي تبي العرس يتاجل . بعدين البنية عندها حق يعني تبي تزهب عمرها وياخي اللي خلاك تنطر اسبوعين يخليك تنطر اربع
سالم: اقول هي وينها
محمد: ليش
سالم: حرمتي وابي اكلمها
محمد: البنية مب فاظية تدرس
سالم: تدري شلون انا كنت اتمنى لو عندي اخت مب معرسة جان يوزتك اياها
سعيد: هالكثر تحبه
سالم: الا قول اكرهه وابي اعلوزه شرات ما يلعوزني كل ما قلتله ابي اشوف حرمتي
محمد: الحمدلله ما عندك اخت مب معرسة
سالم: انزين ابي اسلم على خالتي ام محمد
محمد: تحجج حظرتك, تدري شلون انا بخليك تشوفهم تعال وياي عسب افتك من حشرتك بس
دخل محمد وسالم الى الداخل . ثم عاد محمد الى المجلس حيث سعيد
محمد: يعني انت ليمتى بتم زعلان اللي يشوفك يقول اني كنت واعدنك بالزواج بعدين خليت فيك
لم يستطع سعيد ان يمنع نفسه من الضحك
سعيد:ههههههههه الله يغربل ابليسك
محمد: هيه جي يا خي ذبحتني
سعيد: محمد انت متاكد انه هذا اللي تبيه
محمد: اقولك رفظتني انا محمد خليفة ترفظني وحدة مثلها اخوها حرامي
سعيد: وطبعا غرورك ما سمحلك
محمد: اللي يسمعك يقول الريال ما تهمه هذي الامور . عينك بعيني لو اللي صار وياي صار وياك ما كنت بتسوي نفس الشي
سعيد:
محمد: ليش ساكت تكلم
سعيد: ما اعرف
محمد: لا كنت بتسوي نفس الشي . كرامتك ما بتسمحلك تنرفظ بدون ما تسوي شي ربيعي واعرفك
سعيد: يا خي انا سالفة العرس هذي كلها ما فكر فيها
محمد: ليمتى يعني. ما تبي تتزوج وتييب عيال
سعيد: ابي بس مب الحين
محمد: متى يوم عمرك يصير 60 سنه
سعيد: يعني انت بتعرس عسب تييب عيال
محمد: هذا سبب من الاسباب
سعيد: وخال عيالك بيكون حرامي
محمد: ومنو قالك اني بييب عيال من هذي اللي باخذها الحين
سعيد: يعني بطلقها
محمد: بعدني ما فكرت يمكن اتزوج عليها
سعيد: انت من صدجك تتكلم
محمد: سعيد ياخي ممكن نتكلم بسالفة ثانية
سعيد: انزين مثل ما تبي

في المجلس الداخلي في منزل ابو محمد
ام محمد: وشخبار هلك
سالم: بخير خالتي. اقول خالتي. هدى وينها
ام محمد: الحين بزقرها
دخلت ام محمد الى حجرة هدى
ام محمد: خطيبج هني
هدى: ادري
ام محمد: وليش ما ييتي تسلمين عليه
هدى: مب فاظية
ام محمد: هدى اخاف الريال يتعب من تصرفاتج
هدى: لا تخافين .
ام محمد: انزين قومي سلمي عليه
هدى: خلاص خلاص بقوم

ذهبت الى المجلس حيث كان سالم هناك بمفرده
هدى: شحالك
سال: بخير مشتاق والله
هدى: ليش واقف تفظل
سالم: مب حرام عليج اللي تسوينه فيني ليش تبين تاجلين الملجة
هدى: الحين انا اجلتها اسبوعين بس
سالم: انا ما روم اتحمل يومين
هدى: انا ابي وقت لين زهب عمري
سالم: هدى انتي تحبيني
هدى: انت تحبني
سالم: انتي تعرفين شكثر احبك
هدى: وانت تعرف شكثر احبك
سالم وهو يقترب منها : شكثر تحبيني
هدى: ما اعرف
سالم: انزين انزين بس خلينى نعرس وانا بوريج
هدى: شو بتذبحني
سالم: ما اعرف يمكن

في منزل ابو سعود
سعود مذهول وهو لا يصدق ان محمد خليفة طلب حمدة وانا حمدة وافقت
توجه الى غرفتها
سعود: وافقتي
حمدة: وليش ما وافق
سعود: لانج تعرفين عنه . ولانج قلتيلي ان واحد مثله ما عنده ظمير ما يعجبج
حمدة: وانت قلت انه يمكن هو مب مثل ما ينقال عنه
سعود: حمدة انت وافقتي عسب ما يطردني من الشغل
حمدة .....وافقت عسب ما يظيع مستقبلك
حمدة: لا سعود لانه اذا طردك بتلاقي شغل بمكان ثاني
سعود: عيل ليش وافقتي
حمدة: لانه ريال زين من عايلة معروفة وغنية
سعود: حمدة هو اكبر عنج بوايد
حمدة: مب مهم
سعود: حمدة فكري عدل هذا زواج مب لعب
حمدة........اه يا سعود ليش انا شسويت بالايام الماظية غير التفكير. حتى دراسة مب قادرة ادرس. الله يسامحك يا سعود الله يسامحك
اما سعود فراى ان زواج اخته من محمد خليفة هو ضمان له اذا علم محمد خليفة بانه من سرق المال فلن يسجن سعود او يورطه. وايضا زواج محمد من اخته معناه مركز افضل له بالشركة كونه سيصبح شقيق زوجة المدير وصاحب الشركة.

بعد يومين
بعد وصول هزاع وخليفة من لندن
في منزل ابو خليفة
بو خليفة: ها تبي ترد لندن او اتم هني
خليفة: والله الود ودي ما سير بس لازم
منال(ام خليفة): ما تعرف يمى شكثر تولهت عليك
خليفة: وانا يمى بعد .
دانة: ها خليفة شخبار لندن وهلها
خليفة: يسلمون عليج
شما: كم شهر بتقعد هني
خليفة: ما اعرف يمكن شهرين والله ان ما اعرف شلون برد هناك بدون هزاع
شما: وليش هزاع ما بيرد
خليفة: لانه خلص
ام خليفة: ما شالله الحين هو مهندس كمبيوتر
خليفة: هيه يمى عقبالي
ام خليفة: انشالله يمى هانت كلها ثلاث سنوات . عيل لازم نسير انسلم علة هزاع ونباركله
ابو خليفة: لا هم بيوون باجر انا عزمتهم على الغدا باجر
ام خليفة: زين ما سويت. اقول يمى خليفة شرايج نسير نسلم على يدك و يدتك
خليفة: يدي وخالي محمد واحمد يو المطار
ام خليفة: ويدتك بعد كانت تبي تيي بس يدك ما رظى
خليفة: ليش
شما: لانها اذا شافتك بتقعد تصيح و تسوي فظيحة بالمطار
خليفة: حليلها والله اني اشتقت لها من الخاطر يلا يمى قومي نسير
دانة: خليفة انت ما دريت ان خالي محمد بيملج
خليفة: قولي والله
شما:والله بياخذ ربيعتي
ابو خليفة: عقب باجر بنسير عند العرب عسب نطلبها
خليفة: واخيرا بيعرس . يلا يمى بعدج قاعدة
ام خليفة: يلا قوم
دانة: وانا بسير بعد
ام خليفة: يلسي درسي مب جنج ثانوية
دانة: الحمدلله باقيلي اسبوعين وافتك

اليوم التالي
في منزل ابو سعود
حمدة و منى في غرفة منى
منى: يعني خلاص
حمدة وهي تبكي: هيه يا منى خلاص باجر بيوون وبيسالني ابوي و بقله اني موافقة
منى: ليش ما قلتي لسعود انج تعرفين انه سرق فلوس
حمدة: وشل فايدة يا منى . سعود دفع الفلوس للقرظ يعني خلاص ما بيقدر يرد الفلوس. وحتى اذا قدر تعتقدين ان محمد بياخذ منه الفلوس ويقله خلاص سير مسموح مابي منك شي. هو يبي ينتقم مني لاني رفظته.
منى: سعود لازم يعرف انج بتاخذين محمد خليفة علشان لا تظيعين مستقبله
حمدة: اخاف سعود اذا درى يعترف انه اللي سرق , و يمسكونه و يحبسونه ويظيع مستقبله
منى: انزين هو غلط واخوج لازم يعرف ان السرقة مب حل
حمدة: قلتلج يا منى انا مب خايفة على اخوي. ابوي يا منى لو درى ان ولده اللي يشوفه احسن ولد بالعالم ورافع الراس فيه حرامي والله بيروح فيها . وانا ما اقدر اسوي جي فيه. لو تشوفين شكثر امي مستانسة ان محمد خليفة طلبني .
منى: تصدقين انا نفسي اشوفه هذا محمد خليفة
حمدة: ليش
منى: عسب اقله شكثر هو ريال حقير و نذل
حمدة: سعود غلطان يا منى . ما يحقله ياخذ فلوس غيره حتى لو كانو اغنيا
منى: انا ما قلت ان سعود صح. بس محمد خليفة نذل لانه استغل مشكلتج بطريقة حقيرة مثل ما سوى.
حمدة: خليه لربه هو بيحاسبه
منى: بس هذا بيكون ريلج يا حمدة . تدرين شو يعني ريلج
حمدة ودموعها تنهمر : والله يا منى كل ما فكر اني بصير حرمته وبعيش انا وياه فبيت واحد اتمنى من الله ياخذني .
منى: انشالله هو

في منزل ابو خليفة
في مجلس الرجال
بو مبارك: يعني لين الحين ما رديتو علينا شو السالفة
بو خليفة: البنية عندها امتحانات لين تخلص انشالله بنكلمها ما نبيها تنشغل
بو مبارك: انزين خلاص لين تخلص
بو خليفة: ها هزاع شو احساسك عقب ما خلصت
هزاع: الحمدلله مب مصدق
دخل خليفة الى المجلس
خليفة: تعال امي تبي تسلم عليك
بو خليفة: قوم يا وليدي
دخل هزاع وخليفة الى المجلس الداخلي
شما و دانة في غرفة التلفاز العلوية
شما: من زمان ما شفنا هزاع
دانة: هو ما كان يي بيتنا وايد واحنا ما نسير عسب ما عندهم بنات
شما: يمكن لي اكثر من سنة من شفته
دانة: انا اذكر انه وايد شايف عمره وكان يحب يعلوزنا وايد
شما: انتي اللي كنتي تتظاربين وياه جنه من عمرج مب جنه اكبر عنج بخمس سنين
دانة: والله حبيبتي اللي يدق الباب يسمع الجواب
شما: الله يعينه اذا اخذج
دانة: تعالي هني . ذاك اليوم مبارك يقلي نفس الكلام شو السالفة
شما: ما شي
دانة: انتي عارفة شي و تخبين علي
شما: بصراحة انا سمعت انهم بيخطبونج له
دانة بصدمة: وع وع ما خذه والله ماخذه
شما: لا والله وليش زعلتي يوم قلت اني ماباخذ مبارك
دانة: الحين تقارنين مبارك بهزاع
شما: وليش ما قارنه فيه . اصلا هم يتشابهون
دانة بصوت اشبه بالصراخ: حرام عليج مبارك احلى عنه مليون مرة. بعدين مبارك مب مثله خقاق جنه ما حد درس هندسة بالعالم غيره . وشايف عمره جنه الله ما خلق غيره
شما: دانة حرام عليج.
دانة: شموو مبارك مب ريال ينعاب او ينرفظ بس هذا هزاع ما طيقه
شما: عيب عليج هذا ولد عمج
دانة: وانا اقولج ما بيه ما بيه لو تنطبق السمى على الارظ ما خذه
ودون مقدمات فتح باب غرفة التلفاز ودخل هزاع الغرفة
وبينما دانة في صدمة وقد ادركت انه سمع كل كلمة قالتها عنه
هزاع وهو ينظر اليها وابتسامة سخرية على وجهه : شحالج بنت عمي بس حبيت اقولج ان يوم ابي اخذج باخذج برظاج او غصب عنج . عن اذنج
خرج من الغرفة تارك دانة في حالة من الصدمة والذهول



دمعةالاحزان


ابي ردود وتوقعات
ان شاءاللة مابطووووول

يسلمــــــــــــــــــــــو على الجزء اللي اكثر من روعة
وبلييييييييييييييييييييز لاطولين علينا بالتكملة
والله يعين حمده على ماابتلاها

واتوقع:
ان محمد بس يشوف حمد يوم الملجة بينسطل بجمالها
ومع الوقت بيبدا يحب بس الله يستر مايسوي غلطه ويتزوج عليها

وبليـــــــــــــــــز لاطولين علينا بالتكملة

محمد يقهر معقول بسوي كلامه :eek:

واتوقع هزاع ياخذ دانه عناد بس ..

وشما بتاخذ مبارك ..

وسعيد اكيد يتظهر وحده حلوه وبياخذها


دمعه الاحزان

اسمحيلي كبرت الخط عسب تنقرى القصه ..

ويعطيج العافيه عالبارت

ولا تطولين علينا ..

هااااااااااااااااااااااااي

سكر خاص لكل من قرى القصة ورد عليها

ابي ثلاث ردود بعد وبكمل القصة

يعني بنزل بااااااارت جديد

وماراح اكبر الخط مرة ثانية

دمعةالاحزان