ألآ يآطفل لآتكبر كذآ أجمل كذا أطهر=كذآ احلى ليا صارت براءة طفل بشعوره
كذآ يمكن اقولك انك تنام الليل ما تسهر=كذآ تزهر لك الدنيا تعيش بنفس مسروره
كذآ همّك ليا طآلك يجيك الدمع يتعذر=وتمسح دمعتك لعبه .. ولوح اسود وطبشوره
كذآ شفتك وانا احاول احد الدمع لايظهر=اشيلك بين يدّيني واشوفك داخل الصوره
كذآشفتك وفي عينك سؤال ٍ صعب يتفسّر=سؤال ٍ شآل من عيني دموع القهر مكسوره
كذآ صرخه بدت منك ( أبي اكبر أبي أكبر)=الا يآليت هالصرخه بقت داخلْك مثبوره
كبرت وجآك مطلوبك طموح ٍ غرّه المظهر=كبرت وضآقت الدنيا وضآق الحرف وبحوره
كبرت وشمعة آمآلك بدت تصغر بدت تصغر=وتصغر دآخلك حتى تلاشت عنك مجبوره
كبرت وماتت افراحك وصارت بالشعر تذكر=تردّد مامضى قصّه لطفل ٍ ينتظر دوره
كبرت واكرمك ربي وصرت الشاعر الأمهر=او إنك شاعر ٍ عادي خذآك الكبر في نوره
كبرت واوّل ابيآتك وربي للأسف تقهر=روايه للزمن لكن رواية كذب مبتوره
كبرت وداخلك قلبٍ على مافات يتحسّر=وضاقت دنيتك حتى بدت في شبه بلوره
بقيت اناظر الصوره وانا راضي بما قدّر=إلهي وارتجي عطفه مدام إنا بمقدوره
ألا يآطفل مليته كبيرك للزمن سطـّر=حروف ٍ نآجت الغيمه بكت واقول ممطوره
ألآ يآطفل وش حدّك تسير بدربك الأقشر=من اللي سيّر الخطوه وهي بالدرب معثوره
ألآ يآطفل لو نآسي ابيك اليوم تتذكـّر=براءة ماضي ٍ عشته طموحك لعب بالكوره
آلآ يآطفل ذا ليلك يصيح (ارجوك لآتسهر)=واشوفك تسهره دمع ٍ بكآه الشعر بسطوره
ألآ يآطفل دآم إنك كبرت وخالقك أكبر=دخيلك طالبك تكفى تعيش الطفل وشعوره
ابيك الطيش والفرحه ابيك الأجمل الأطهر=ابيك إحساسك المآضي حيآة ٍ دوم مسروره
وربي مآنزل دمعي وجآني الشعر يتعذر=سوى من صرخة ٍ بآتت بوسط الحرف مقهوره
لقيت إني أنا طفل ٍ ابيه اليوم مآيكبر=لقيت إني انا (التآيه) صغير ٍ داخل الصوره