~¤ô§ô¤~ ارحم حبيبي قلب في هواك مطعون ~¤ô§ô¤~,

AsHLeY · 24-08-2005, 01:26 PM

السلام عليكم ورحمة الله وبركاته

اليوم نقلت الكم قصه وانشاء الله تعجبكم ......

[align=center]الشخصيات

" عايلة بو عبدالله – الشارجه "

بو عبدالله: ريال كبير في السن و يحب عياله له و كان مدلع عياله من يوم هم صغار فاتعودو انه ما يرفض لهم طلب و خصوصا الصغار منهم.

ام عبدالله: من دبي و ريلها من الشارجه طبعا مثل ما ذكرت، حرمه عوده تحب عيالها بس كانت عكس بو عبدالله ما تحب ادلع عيالها وايد و دوم تحن على بو عبدالله يخف الدلع على عياله.

العيال:

عبدالله (25 سنه) : دارس في امريكا هندسة شبكات مخلص و حاليا يشتغل في الاتصالات.

خالد (23 سنه): مخلص ثانويه عامه و على طول اشتغل في الجيش، يداوم في بوظبي.

مريم (22 سنه): معرسة، ماخذه واحد يقربلهم من صوب امها اسمه "خليفه" و عمره 27 و عندهم من العيال ولد عمره 3 سنين اسمه محمد و بنت عمرها 3 شهور و اسمها عليا.

نوره (20 سنه) و ميره (19 سنه): هن الثنتين يدرسن في جامعة الشارجه، نوره سنه ثانيه تخصص ادارة اعمال و ميره سنه اولى من نفس .

لميا (17 سنه): آخر العنقود، تدرس في المدرسة صف ثاني ثانوي أدبي.

" عايلة بو راشد – الشارجه "

ساكنين في نفس المنطقه ويا قوم بو عبدالله و عيالهم متعودين من يوم هم صغار يلعبون ويا بعض، يعني ربع.

بو راشد: ربيع بو عبدالله، شخصيته قويه و وايد حازم ويا عياله.

أم راشد: شخصيتها مثل ريلها بس شويه اهون عنه بطريقة تعاملها ويا عيالها.

العيال:

راشد (28 سنه): معرس و ماخذ بنت عمه ليلى عمرها 24 و عندهم ولدين منصور عمره 5 سنين و أحمد عمره 3 سنين و بنت اسمها حمده و عمرها سنه و نص.

سعيد (25 سنه): ربيع عبدالله الروح بالروح، دارس وياه في امريكا نفس التخصص و يشتغل وياه في الاتصالات.

محمد (23 سنه): ربيع خالد، مخلص دراسه من جامعة الامارات و يشتغل في دايره حكوميه.

العنود (20 سنه) و خولة (19): ربيعات نوره و ميره و وياهم في نفس التخصص، طبعا العنود اكثر شي ويا نوره و خوله ويا ميره بما انهن من نفس الاعمار بس اكثر الوقت هن الاربع ييلسن ويا بعض.

" عايلة بو سيف – دبي "

بو سيف: اخو ام عبدالله، ريال عود شديد ويا عياله و عنيد بشكل فضيع.

ام سيف: حرمه كبيره في السن و هي عكس ريلها و دوم تتناقر وياه عشان يخف الشده على عياله شوي لكن لا حياة لمن تنادي.

العيال:

سيف (28 سنه): يشتغل في دايره حكوميه، معرس ماخذ اخت ربيعه الروح بالروح منصور، حرمته اسمها أسما عمرها 24 و عندهم ولد اسمه حمد و عمره 4 سنين، و بنت اسمها روضه و عمرها سنتين.

هدى (26 سنه): معرسه، ماخذه واحد من هل بوظبي اسمه حمدان و عمره 32 عندهم ولدين و بنتين، هزاع 7 سنين، 5 سنين، ريم 4 سنين، و غايه سنتين.

عمر (23 سنه): مخلص ثانويه عامه و يشتغل ويا ولد عمته خالد في الجيش و يداوم في بوظبي.

مهره (21 سنه): تدرس في التقنيه سنه ثالثه و تدرس It.

العنود (18 سنه): تدرس في المدرسه ثانويه عامه علمي.

هذي لمحه عن الشخصيات الرئيسيه في القصه و مع تطورات القصه طبعا بتظهر شخصيات ثانيه.

******** الجزء الأول ********
%% الفصل الأول %%

يوم السبت الساعه 6:30 الصبح

ام عبدالله كالعاده اتوعي عيالها عشان يسيرون دواماتهم، و كالعاده مب شبعانين رقاد يبالهم سنه الين ينشون. ميره و لميا يرقدن في نفس الحجره و الباقي كل واحد له غرفته الخاصه.

ام عبدالله: ميروه يالله بسج رقاد باتأخرين على دوامج قومي نشي عاد.
ميره: انزين امي لحظه بس خمس دقايق والله ما شبعت رقاد.
ام عبدالله: دواج حد قاللج سهري الين نصاص الليالي، هذي اختج اللي اصغر عنج نشت و انتي صايرتلي فخارة رقاد.
ميره: انزين انزين الحين ناشه.
ام عبدالله: يالله اشوف جدامي.
ميره: اففففففففففففففف انزيييييييييييين.

عقب ما نشت ميره روحت عنها امها عشان اتشوف الباقين، لانها تدري ان ميره هي الوحيده اللي ما تنش الا بحشره، يت حجرة نوره كانت توها مخلصه من الصلاه.

ام عبدالله: بارك الله فيج يا بنتي مب شرات ميروه فخارة الرقاد.
نوره: هههههههههه متعودين عليها.
ام عبدالله: خلاص عيل برايج اتلبسي و سيري اتريقي قبل ما تروحين.
نوره: انشالله امايه.

و روحت عنها ام عبدالله و يت الصاله و شافت الشباب يتريقون ويا بوهم.

ام عبدالله: صباح الخير.
الكل: صباح النور و السرور.
بو عبدالله: وينهن البنات عيل.
ام عبدالله: ميروه كالعاده ما طاعت تنش و نوره و لميا بيتلبسن و بيين.
عبدالله: هالبنت يبالها حد يأدبها، وايد مدلعينها انتو..
ام عبدالله: هب مني يا ولدي، قول حق ابوك هو اللي مدلعنكم.
بو عبدالله: أي دلع الله يهديج، ميروه الا ياهل حاطه دوبج و بوبها.
ام عبدالله: ايها، البنت وصلت العشرين و انت بعدك تقول عنها ياهل زاده بتدلع علينا زياده.
بو عبدالله: يا حرمه اذكري الله خلي هاليوم يعدي على خير.
ام عبدالله: لا الله الا الله محمدا رسول الله، الله يهديكم انشالله.
عبدالله: يالله انا ساير عنكم تاروني بحايه.
ام عبدالله + بوعبدالله: سلامتك الغالي.
ام عبدالله: دير بالك ع الدرب فديتك.
عبدالله: انشالله الغاليه يالله مع السلامه.
ام عبدالله + بو عبدالله: الله يحفظك.

و طلع عنهم عبدالله ساير دوامه و عقب نزلن البنات يتريقن، و كالعاده ميره حصلت هزبه محترمه من الوالده.

ام عبدالله: عنبوج انتي ما تشبعين رقاد؟؟
ميره: انزين ما يسوى علينا هالرقاد.
ام عبدالله: جب يا طويلة اللسان لسانج هذا يباله قص.
نوره + لميا: هههههههههههههههههههه
ميره: هيه اضحكن انتن محد امخرب الوالده عليه الا انتن الثنتين.
نوره: انتي اللي يبتي هالشي لنفسج تسهرين الين الصبح ع الاغاني و يوم بيون ايوعونج قلتي ما رقدت.
ميره: الله يعيني عليكم.
ام عبدالله: الله يعينا نحن عليج، يلله اتريقن بسرعه و اطلعن عن تتأخرن ع دواماتكن.
البنات: انشالله.

و اتريقن البنات و ظهرن، نوره كانت تسوق، نزلن لميا مدرستها و عقب راحن نوره و ميره الجامعه.[/align]

AsHLeY · 24-08-2005, 01:28 PM

يالله عاااااد انا انتظر الردود والتوقعات
واذا في تفاعل راح انزل لكم كل يوم حزئين لأن الأجزاء قصار

همــ الغلا ــس · 24-08-2005, 09:00 PM

بصراحة القصة بدايتها حلوة
والظاهر الباقي احلى
تسلمين حبيبتي وننتظر التكملة

AL7NANA · 25-08-2005, 10:58 AM

يسلموووووووووووووووو على الجزء الاول من القصة اللي باين عليها حلوة مرة

وبليييييييييييييييييييييز لاطولييييييين علينا بالجزء الثاني واتمنى يكووووووووووووووووووووووون
طويييييييل يعين يبرد القلب مو قصيرة

ننتظرج حبوبه

AsHLeY · 25-08-2005, 01:56 PM

مشكورة اختي همس الغلا و Al7anana على الردود وعلشان خاطركم لكم هالالجزء وراح انزل بعد جزء لأنهم واااايد قصيرين

AsHLeY · 25-08-2005, 02:03 PM

[align=center]و هذا هو الجزء الجديد

******** الجزء الأول ********
%% الفصل الثاني %%

((( في سيارة نوره )))

ميره: نواري حبيبتي اشرايج تعزميني ع الريوق اليوم.
نوره: اتنكتين حضرتج ... و قبل شوي منو متريق ويايه.
ميره: بالله عليج هذا اتسمينه ريوق ... انا بس اقول لو تعزميني على ريوق راقي شويه مب احسن.
نوره: شو الشيخه نوره ناويه اطنشين كلاساتج عشان ريوق.
ميره: يالله الا هو يوم واحد ما بيضير ... و الدكاتره قصي عليهم بكلمتين و بيمسحون الغياب.
نوره: بعد اتحفيني بأفكارج ... شو عندج غير الريوق ... ما تبين شي ثاني الشيخه.
ميره: اففف منج ... ولا مره قلتلج سوي شي و طعتيني.
نوره: بعدني ما اتخبلت اطاوعج في خبالج ... خللي أفكارج الوسواسيه لج.
ميره: انتي اخت انتي؟ انت عدوه عوذ بالله من ابليس.
نوره: هههههههههههههه ... موتي حره هب مودتنج مكان ... تبين غدا حاضرين ريوق ماشي.
ميره: نواري قولي والله ... ماصدق.
نوره: لا صدقي ... تعالي لي الكافتيريا في البريك و انا اغديج ذاك الغدا اللي ما ذقتيه في عمرج.
ميره: وععع ... و انا مصدقه روحي اونه بتعزمني ع الغدا ... حبيبتي دام هذا غداج اقوللج جلبي ويهج.
نوره: ههههههههههههههه احسن تستاهلين حد يخسس فيج.

و تمت ميره متغايضه من نوره الين وصلن الجامعه و كل وحده راحت على كلاسها.

%% الساعه 10:00 الصبح %%

((( في الاتصالات )))

سعيد كان راد الدوام عقب ما خلص كم شغله امكلفينه ايسويه برع الاتصالات ... و هو راد مكتبه في طريجه مر على عبدالله يسلم عليه في المكتب ... دق الباب و دخل.

سعيد: السلام عليكم و الرحمه.
عبدالله: و عليكم السلام و الرحمه ... توه نور المكتب
سعيد: بوجودك الغالي ... شحالك و شحال اهلك؟؟
عبدالله: الحمدلله يسرك الحال ... و انت شحالك وين غاط كل هالفتره؟؟
سعيد: انا بخير و يسرك حالي ... بس الاشغال ما تخلص ... نخلص من شغله تطلعلنا شغله ثانيه.
عبدالله: هيه والله صدقت... العمر يخلص و الشغل ما يخلص.
سعيد: هذا حال الدنيا الله يعين.
عبدالله: دامك مريت عليه المكتب ... ترى اقوللك من الحين غداك عندنا.
سعيد: يا ريال خلها في وقت ثاني ... مافينا نعبل عليكم.
عبدالله: لا عباله ولا شي ... عنبوه تقطعنا كل هالفتره و بعد ما تبانا نشوفك ماشي غداك عندنا يعني عندنا.
سعيد: شو نقول بعد دام هذي اوامر السلطات العليا ماقدر اقول شي بعد.
عبدالله: هههههههههههه خلاص عيل بنطلع رباعه عقب الدوام.
سعيد: على خير انشالله ... مع السلامه.
عبدالله: حافظنك الله.

و اتصل عبدالله البيت و خبر امه انه سعيد ربيعه بيتغدا وياهم اليوم ... و سعيد اتصل البيت و خبرهم انه بيتغدى عند عبدالله ربيعه ...

((( في دبي )))

مهره كانت توها طالعه من حجرتها و حصلت امها يالسه مجابله التلفزيون.

مهره: صباح الخير يا احلى ام في الدنيا.
ام سيف: صباح النور و السرور هلا مهاري.
مهره: كيف اصبحتي الغاليه.
ام سيف: الحمدلله يا بنتي ... ليش ما داومتي اليوم فديتج.
مهره: ماعندي دوام الصبح اليوم ... اول كلاس عندي الساعه 12.
ام سيف: هييه ... الله يوفقج يا بنتي.
مهره: آمين ... امايه.
ام سيف: امري فديتج.
مهره: ابا اسير السوق خلال هالاسبوع ابا اشتريلي فستان حق ملجة ربيعتي الريم يوم الخميس.
ام سيف: يا بنيتي انا لو بايدي ما بقول شي ... بس ابوج الله يهداه انتي اتعرفين زين انه ما يحب هالسوالف.
مهره: و انا شو بسوي ... ملجة ربيعتي الروح بالروح اقول لها ماقدر ايي ملجتج بتزعل والله.
ام سيف: والله يا بنتي انا ماعندي مانع بس شاوري بوج احسن.
مهره: انشالله اليوم عقب مارد من الكليه برمسه.
ام سيف: انزين الغاليه سيري اتزهبي عن تتأخرين على دوامج و يصير خير لين بعدين.
مهره: انشالله امايه.

و سارت مهره تزهب عشان تروح الكليه و اتصلت بالدريول عشان ايشغل السياره و زقرت خدامتهم ميري و سارت الكليه.
%% الساعه 11:50 الضحى %%

((( جامعة الشارجه )))

في هالوقت كان ال common break و تقريبا كل الطالبات في الجامعه عندهن بريك ... نوره و ميره و العنود و خوله يالسات في الكافتيريا.

نوره: ترى ميروه اليوم عازمتنكن عالغدا .
ميره: حشى عليه ... تتبلى عليه الاخت ... انا ما قلت ولا نطقت بحرف.
خوله (( الملسونه الثانيه )) : ههههههههههههه انزين عدال يا الزطيه ما طلبنا منج شي.
ميره: سكتو عني بليز ... روحي اليوم مضايجه محب ايضايجبي اكثر.
العنود: ما يسوى علينا هالغدا دامج اضايجتي جي.
نوره: ههههههههههه السالفه مب سالفة العزيمه ... الله يسلمج الشيخه ميره تبا اطنش كلاساتها و تسير تتغدى في مكان راقي على قولتها.
خوله: يا الله ما نروم ... شو هالمكان الراقي اللي تبينه ميروه.
ميره: قلت لحد ايرمسني ... شو انتو سيلانيات ما تفهمن الرمسه؟؟
خوله: ني ماما ... انا امس يجي من سريلانكا مافي مألوم.
نوره + العنود: هههههههههههههههههههههههههه.

و تمن نوره و العنود و خوله يغلسن على ميره اللي صدق خلاص شويه و تكسر المبنى من غيضها ... و عقب ما خلصن سارو يطلبولهن اكل قبل ما يخلص البريك الا ميره اللي تمت مغيضه و ما طلبت شي ... فخلوها ع راحتها.

%% الساعه 12:50 الظهر %%

في نفس المكان في جامعة الشارجه ...

نوره: يالله نشي عنوده ... ما بقا شي على الكلاس ... يبالنا وقت الين نوصل.
العنود: انشالله يالله سرينا.
ميره: وييييو عندهم كلاس العيايز.
نوره: عيز حيلج انشالله قولي آمين.
ميره: بل بل شو قلت انا عشان تعصبين جي.
نوره: سلامتج الشيخه ما قلتي شي ... انا روحي مخرفه.
ميره: هههههههههههههه مشكله ... عيوز و مخرفه بعد.
خوله و العنود يضحكن على حركات نوره و ميره اللي هدت شويه و نقلت الغيض على نوره لووول.
نوره و هي معصبه: هيه اضحكي انتي بعد يا الدبه ... خلج هني و اضحكي و دوريلج حد يتوسطلج عند الدكاتره مره ثانيه.
العنود: لالالا بس خلاص توبه الشيخه نوره ماعيدها مره ثانيه.
ميره: اسميكم حركات ... يالله جلبن ويوهكن.
نوره + العنود: جب.

و تمن ميره و خوله يضحكن على نوره اللي صدق غيضت من الخاطر و روحت عنهم هي و العنودعلى كلاسهن ... و من عقب ما سارو نوره و العنود ... قامو ميره و خوله يتمشن خاري في ساحة الجامعه و كان الجو معتدل فهن استانسن عالجو و تمن يحوطن في الساحه ...

و هن يتمشن جافن وحده من البنات اللي كانن وياهن في المدرسه ...

/// هالبنت اسمها ساره و كانت تدرس ويا خوله و ميره في نفس الصف ... و هالبنت مغروره و شايفه نفسها زياده عن اللزوم ... و هذا اللي امخلي ميره و خوله ما يدانونها ... و طبعا شعور متبادل بس هي اتحب اتنرفزهن هن الثنتين ///

ساره: السلام عليكم.
ميره + خوله: و عليكم السلام و الرحمه.
ساره: هلا بالقاطعات ... وينكن انت لا حس ولا خبر..
ميره: والله نحن موجودين اللي يبينا ايينا نحن ما نسير لحد.
ساره: شويشوي عن يطيح نصج.
خوله: حضرتج يايتنا عشان اتغلطين علينا.
ساره: سوري الشيخه خوله ما كنت اقصد.
ميره: سوري ولا لبناني ... اسمحيلنا ما نرمس خمه شراتج ... ورانا اشغال ... يالله خوله كلاسنا بيبدا عقب ربع ساعه.

و راحن ميره و خوله عن ساره و هالشي خلاها تغيض و هي تهدد و تتوعد لهم ان تردلهم الحركه باقرب فرصه .

ساره في خاطرها: ماعليه انتن الثنتين انما راويتكم الويل ماكون بنت ابويه.

و عقب سارت ساره عند ربيعاتها و طنشت السالفه.

************************************************** **********[/align]

AsHLeY · 25-08-2005, 02:44 PM

هذا الجزء الفاني نفس ما وعدتكم .. طويل شوي .. عشان تستمتعون

%% الساعه 2:15 الظهر %%

((( في الاتصالات )))

عبدالله و سعيد كانو توهم ظاهرين من الدوام رباعه و عقب كل واحد ركب سيارته و راحو بيت بو عبدالله بما انه عبدالله عازمنه ع الغدا اليوم.

((( في بيت بو عبدالله )))

ام عبدالله اتزهب الغدا حق بوعبدالله و عبدالله و ربيعه في الميلس و وحده من البشاكير اتساعدها و الثانيه سايره اتييب لميا من المدرسه ويا الدريول ... لان لميا تسير الصبح ويا نوره و ميره بس اترد ويا الدريول لانه نوره و ميره يتأخرن في الجامعه ...

ام عبدالله: حوووه انتي ... حطي حرارة العيش في النص وين لازتنها هناك.
سونيا: جين ماماه جين.
ام عبدالله: يا ربي عيزت من كثر ما فهمج متى باتعلمين انتي.
سونيا و تطالعها و هي مب فاهمه شي لانها توها يديده و ما تعرف تصرف ... على كثر ما علموها بعدها ما تفهم...

وصلت لميا البيت حصلت امها مرتبشه في الميلس و اتزاعج ع البشكاره و تتحرطم ...

لميا: السلام عليكم.
ام عبدالله: و عليكم السلام و الرحمه ... هاه لميا وصلتي.
لميا: هيه امي توني واصله ... منو ياينكم اليوم.
ام عبدالله: عبدالله اخوج عازم سعيد ولد يرانا ع الغدا.
لميا: اها ... انا باسير ابدل و باصلي و بييج.
ام عبدالله: تسوين فيه خير يا بنتي ... عيزت من هالسونيا اللي ما تفهم.
لميا: ههههههههههه انشالله امايه بابدل و بييج.

و سارت لميا غرفتها بدلت و اتيددت و صلت و عقب سارت تعاون امها في المطبخ و اتودي غدا الرياييل للميلس ... و عقب ما رتبو كل شي دخنو الميلس و عطروه ... و عقب وصلو عبدالله و سعيد و دشو الميلس و حصلو بو عبدالله يترياهم هناك...

عبدالله + سعيد: السلام عليكم.
بو عبدالله: و عليكم السلام و الرحمه ... يا هلا قربو.
عبدالله + سعيد: قريبين طال عمرك.
بو عبدالله: حيالله بو عسكور ... زارتنا البركه.
سعيد: الله يحييك و يبجيك عمي.
بو عبدالله: وينك هالايام ما نشوفك.
سعيد: تبي الصدق عمي اشغالنا ما تخلص ... و انا امبوني ادور فرصه ازوركم بس مو محصل.
بو عبدالله: يعطيك العافيه يا ولدي.
سعيد: الله يعافيك عمي.
عبدالله: يالله ابويه يالله بو عسكور الغدا طايح.
بو عبدلله: يالله قمنا.

و سارو بو عبدالله و عبدالله و سعيد يتغدون و عقب ما خلصو غدا يلسو يتقهويون شويه و عقب خلاهم بو عبدالله سار يرقد الين اذان العصر و تمو عبدالله و سعيد في الميلس يسولفون و يطالعون التلفزيون.

%% الساعه 3:15 الظهر %%

((( جامعة الشارجه )))

نوره يالسه تتريا ميره في السياره و تتصل فيها بس ما ترد عليها و هالشي خلاها تعصب عليها ... عقب خمس دقايق ميره ركبت السياره باستهبال لانها تدري ان نوره محرجه عليها.

ميره: هاااااااااي.
نوره: و عليكم السلام و الرحمه.
ميره: ههههههههههه بلاه الغيض واصل الطبلون.
نوره: يرايس في الفورمولا 1 هيهيهيهي.
ميره: اوووووف اختي خطيره اتعرف الفورمولا 1 من وارانا.

و حركت نوره السياره و ما ردت عليها لانها معصبه و ماتداني ميره يوم اتسويبها هالحركه ... نوره و هي طالعه من البوابه الرئيسيه مال الجامعه ... مرت جدامهم بورش كايين كحليه عليها رقم دبي ثنائي و فيها اثنينه اللي يسوق و واحد يالس حذاله ...

ميره ... و هي مبحلقه عيونها عالموتر : يااااااااا عذابي كايين كحلي ... لاه و رقم مميز بعد ... يا ويلييي.
نوره: ميروه عن الحركات ... المخفي شفاف و اللي في الموتر يجوفونج اثقلي.
ميره: اسمحيلي نواري شفت الكايين اتخبلت ... مادري شو صار بي.
نوره: الله يعيني عليج ... شكلهم لاحظو انج اجوفينهم غربلات ابليسج فضحتينا.
ميره: اويه ... هيه والله يضحكون عليه ... وافضيحتاه .
نوره: هاي مب اول مره اتسوينها ... الله يعطيج العقل.
ميره: هههههههههههههههههههه.

((( في الكايين " سيارة حميد " )))

/// اللي كانو في السياره هم حميد و ربيعه علي ... اثنيناتهم من نفس العمر عمرهم 24 سنه ... هاذيل الاثنين صايعين وايد ماهمهم الا المغازل و الترقيم و الحواطه في كل مكان ... اهلهم ماشالله عندهم الخير وايد و امدلعينهم زياده عن اللزوم و هالشي خلاهم يتبطرون ... و هم معتمدين على اهلهم في كل شي ///

حميد: هههههههههههههه جوف المينونه كيف امبحلقه عيونها جنها هب جايفه خير.
علي: من حقها ... جوف الفرق بين هالموتر و الموتر اللي هي راكبتنه ... اكيد باتخبل مسكينه.
حميد: ههههههه الله يقطع سوالفك.
علي: بس بس الله يخليك ... زيغت البنت ... زاغت من جافتك فاج لغبك و تضحك ... هههههههههه اتأدبت و يلست عدل.
حميد: تستاهل محد قالها اتبحلق عيونها و اتسوي حركات.
علي: يتني فكره جهنميه ... اشرايك نسويها.
حميد: خير يا بو الافكار الجهنميه ... اتحفنا بافكارك.
علي: ههههههههههه سير وراهم بانشوفهن شو بيسون.
حميد: عليهم...

و سارو حميد و منصور وراهم و ايسوولهم حركات عشان ايخوفونهن ... و مره يجدمونهن و مره وراهن <<<<<< حركات شباب.

((( في سيارة نوره )))

ميره: نواري جوفي هاذو راعي البورش ورانا يسوي حراكات.
نوره: هذا كله من حركاتج حسبي الله على بليسج ... بليتينا الحين شو بيفكنا منهم.
ميره: ما عليج منهم ... هاذيل حركات بس يبون يتفننون.
نوره صخت و لا قالت شي على بالها انها حركات شباب و اخرتها بيروحون في طريجهم و بيبتعدون ... و توهم نوره و ميره بيوصلن البيت ... جافت نوره ان راعي الكايين بعده وراهم بس مخلي كم سياره جدامه عشان ما ايحسن انه يلحقهن ...

نوره: ميروه ... جوفي هذا لاحقنا الين هنه.
ميره "باستغراب": منو هذا؟؟؟؟؟!!!!
نوره: شو رقدتي؟؟ ولا نسيتي حضرتج؟؟ راعي البورش اللي متي عليه
ميره: يالله ... ماحصل غيرج يلحقها ... يمكن طريجه ع طريجنا.
نوره: مادري والله يمكن ... بس مادري قلبي منقبض هب مرتاحه لهالسالفه.

و طنشن السالفه ...

%% الساعه 3:35 %%

كان توه مأذن الظهر ... عبدالله و سعيد كانو توهم ظاهرين من الميلس بيسيرون المسيد يصلون ... و في نفس الوقت نوره و ميره كانن توهن واصلات البيت و راعي الكايين بعده وراهن و دق لهن هرن من شافهن دشن قراج البيت ... سعيد انتبه للموتر اللي كان وراهن و دقلهن هرن ... بس طنش السالفه لانه يبا يلحق ع الصلاه في المسيد ...

((( في بيت بو عبدالله )))

نزلن نوره و ميره من السياره زايغات ... خافن لا يكون عبدالله انتبه لهذا اللي كان وراهم ...

نوره: حسبي الله على ابليسج يا ميروه ... زين جي ورطينا؟؟
ميره و هي زايغه: والله ما كنت ادري انهم ايجوفوني ... يالله يا رب يكون عبدالله ما انتبهله يا رب.
نوره: انشالله يعدي هاليوم على خير والله مافينا ع الحشره.
ميره: انشالله ... يالله امشي داخل عن يرد مره ثانيه.

و دخلن نوره و ميره البيت و هن زايغات ... حصلن ام عبدالله و لميا يالسات في الصاله يطالعن التلفزيون و بو عبدالله توه طالع من البيت يبا يلحق ع الصلاه سلمن عليه و خطف عنهن.

نوره + ميره: السلام عليكم.
ام عبدالله + لميا: و عليكم السلام و الرحمه.
لميا: اشبلاكن جي داخلات و كأن على رؤوسكن الطير.
ميره: طير ع راسج يا الدبه ... شو اتجوفينا خبايل؟؟
لميا: ماشي اشكالكن تقول امسويات جريمه و شاردات.
ميره: الحمدلله انا ما سويت شي ... جان نوروه مسويه يمكن.
لميا: هاااااااااه كشفتكن ... يعني مسويات شي ... يالله اعترفن بسرعه.
ميره: امايه سكتي بنتج ترى والله ادق راسها باليدار.
ام عبدالله: بسكن انتن الثنتين ... ما تشبعن من المناقر 24 ساعه اتلعلعن جنكن عدايل.
ميره: انا ولا بنتج اللي دوم حاطه دوبي و دوبها.
نوره: بس عاد حشرتونا انتن الثنتين اكرمونا بسكوتكن.
ام عبدالله: شو اسويبهن يا بنتي ... هاذيل خاواتج ما يشبعن مناقر ... الله يهديكن انشالله.
ميره: جميعا انشالله.
نوره: الحمدلله و الشكر ... يالله امايه انا باسير حجرتي بابدل و باصلي العصر.
ميره: و انا بعد باسير ... يالله يالدبه قومي صلي.
لميا: ما يحتاي تقولين بروحي بانش.
ميره: يالله اجوف جدامي.
لميا: جب انتي.

هني اتغايضت منها ميره و يت باتفرها بالمخده الصغيره ... بس لميا اتلاحقت عمرها و شردت عنها و هي امطلعتلها لسنها و اتغايضها ...

ميره "في خاطرها": ماعليه يا لميوه وين باتسيرين عني والله لا اراويج.

و سارن البنات حجرهن يصلن و ام عبدالله بعد سارت حجرتها و صلت العصر و ردت تيلس في الصاله.

%% الساعه 4:30 العصر %%

((( في دبي )))

مهره توها راده من الكليه ... حدرت الصاله حصلت العايله الكريمه كلها في الصاله ...

مهره: السلام عليكم و الرحمه.
الكل: و عليكم السلام و الرحمه.
ام سيف: هلا امايه شو الدوام وياج؟؟؟
مهره: الحمدلله فديتج بس تعبانه شوي باسير ابدل و باييكم.
ام سيف: سلامتج فديتج فيج شي مهاري؟؟
مهره: الله يسلمج اميه مافيه شي بس تعبانه من الدوام.
ام سيف: برايج امايه ... صليتي العصر؟؟
مهره: هيه قبل ما اظهر من الكليه صليت.
ام سيف: بارك الله فيج الغاليه ... خلاص برايج سيري ارتاحي.
مهره: انشالله.

و سارت عنهم مهره غرفتها اتسبحت و بدلت و ردت الصاله تيلس وياهم و حصلتهم قاعدين مثل ما كانو و يسولفون و اليهال يلعبون حواليهم ... و سارت مهره يلست حذال ابوها.

بو سيف: هلا مهاري ... شكلج تبين تقولين شي.
مهره: هيه ابويه والله في خاطري شي بس يا ريت ما تردني.
بو سيف: خير يا بنتي شو فيج.
مهره: ابويه ترى ملجة ربيعتي الريم هالخميس ... و ابا اسير السوق اشتري فستان حق ملجتها ... شو قلت ابويه.
بو سيف: و انتي اشلج في هالسوالف ... انا قايلج من الاول اني طلعات اعراس و حفلات ماحبها ... لازم تعانديني؟؟
مهره: انزين ابويه هاي ربيعتي الريم ... من متى و انا وياهن دقيقه ما كنت افارجها ... كيف تباني اخليها في هاليوم.
بو سيف: انتي بعدج صغيره و مالج في هالسوالف.
مهره: ابويه عاد.
بو سيف: ماشي.

و هم يسولفون سمعت أسما من مهره ان اسم ربيعتها الريم و سألتها ...

أسما: اقول مهره.
مهره: امري يا ام حمد.
أسما: ما يامر عليج عدو ... ربيعتج الريم بياخذها واحد من هل بوظبي؟؟
مهره: هيه ... اشعرفج انتي؟؟
أسما: اسمه احمد ال(.....) ؟
مهره: هيه هذا هو ... اتعرفينهم؟؟؟
أسما: الله يسلمج هذا يصير ولد عمي بو سلطان.
مهره "بفرح": حلفي؟؟؟؟
أسما: والله.
مهره: زين زين ... و ليش ساكته من الصبح حضرتج ليش ما ترمسين؟؟
أسما: ماشي والله سمعتج اتقولين ملجة ربيعتج الريم يوم الخميس .... قلت يمكن هي نفسه الريم اللي في بالي.
مهره: زين أسما طلبتج لا ترديني.
أسما: هههههههههههه أدريبج شو تبين ... افا عليج ما بردج امري تدللي.
مهره: ما يامر عليج عدو فديتج ... هذي مرت الاخو ولا بلاش.
أسما: ههههههههههه تبيني ارمس عمي عنج.
مهره: يا ريت والله.
أسما: انزين ما عليه فالج طيب .
مهره "و هي مستانسه" : فالج ما يخيب يا ام حمد .

افترت أسما صوب عمها بو سيف...

أسما: عمي.
بو سيف: امري يا ام حمد.
أسما: ما يامر عليك عدو عمي ... ترى ملجة الريم ربيعة مهره و ولد عمي يوم الخميس و انا باسير ليش ما تخلي مهره تخاويني؟
بو سيف: والله مادري شو اقولج يا بنتي.
مهره: الله يخليك ابويه ابا اروح.
بو سيف: لا اله الا الله ... برايج دام ام حمد وياج ما عليج خوف.
مهره: انزين ابا اروح السوق اشتري فستان.
بو سيف: ليش ابويه؟؟ ما عندج فساتين؟؟
مهره: يالله اللي يسمعك يقول انا كل يوم في عرس ولا حفله ... والله ماعندي شي يديد.
أسما: عمي خلها تسير ويانا ... انا عقب المغرب باسير ويا سيف السوق اشتريلي فستان بعد.
بو سيف: خلاص عيل برايكم ... شلوها وياكم خلها تشتري اللي تباه.
مهره قامت مستانسه: هيه هيه يحيى العدل.
ام سيف: يالله بالعقل ... بلاج اتخبلتي؟؟
مهره: هههههههههههه لا امايه مستانسه اعبر عن شعوري.

الكل ضحك على مهره و خبالها ... و ردو عقب ايسولفون الين اذن المغرب و سارو بو سيف و سيف المسيد يصلون و الحريم دشن حجرهن يصلن.
************************************************** ************

يالله انا انتظر ردودكم

~*¤ô§ô¤*~ ارحم حبيبي قلب في هواك مطعون ~*¤ô§ô¤*~,

~¤ô§ô¤~ ارحم حبيبي قلب في هواك مطعون ~¤ô§ô¤~,