*¤ô§ô¤* ارحم حبيبي قلب في هواك مطعون *¤ô§ô¤*,

~~~~~~ الـــجــزء الــثــانــي عــشــــر ~~~~~~

~~~ الــفــصــل الاول ~~~


%% الاربعا 7:25 فليل %%

((( بيت بو راشد )))

ام حارب و موزه وصلن بيت بو راشد و دشن داخل عقب ما سلمت ام حارب على سعيد و هو ظاهر ... موزه طول الوقت و هي مبهته و سرحانه ...

موزه في خاطرها: انا في حلم ولا علم؟؟ معقوله يكون هو؟؟ شو علاقته بقوم خالتي؟؟ لالا ماصدق اشكرج يا امايه انج يبتيني لهالمكان ... يا سلاااام وناسه ماتخيل انه يقربلنا ... زين ع الاقل افتك من نذالة ساروه الخايسه ... بنجوف يا انا يا هي تحلم اخليلها اياه ...

دشت ام حارب و موزه الصاله و سلمن على ام راشد اللي كانت تترياهن و يلسن يتقهوين و يسولفن و موزه في عالم ثاني تحس الدنيا هب شالتنها من الوناسه ...


((( في حجرة العنود و خوله )))

خوله كانت متلبسه و خالصه عكس العنود اللي بعدها ما خلصت ...

خوله: يالله خلصي فكينا ... العرب يو و انتي بعدج ميلسه ...
العنود: انزين اظهريلهم اشحقه اترييني؟؟
خوله: مابا ... تعالي انتي ويايه ...
العنود: عيل اتريي ولا تيلسين تحشريني ...
خوله: افففففف انزين ...

و عقب ربع ساعه بالضبط خلصت العنود و ظهرت هي و خوله من الحجره و سارن الصاله عشان يسلمن على خالتهن و بنتها ... اول ما دشن العنود و خوله الصاله اتفاجأن بموزه يالسه و موزه نفس الشي كانت متفاجأه و ابتسمتلهن ابتسامة خبث ... اول وايهن خالتهن و عقب وايهن موزه ... خوله وايهتها بدون نفس لانها ما تستلطفها لا هي ولا ربيعاتها ... و عقب ما ويهن ام حارب و موزه يلسن عدال بعض بحيث انهن موايهات خالتهن و موزه ...

ام حارب: حيالله البنات ... شحالكن؟؟
العنود + خوله: الحمدلله بخير و سهاله ...
ام حارب للعنود: يا حيكن ...
ام راشد و هي تأشر ع العنود: هاي العنود بنتي العوده ... و الثانيه خوله تعرفينها ...
ام حارب: هيه حريم ماشالله عليهن ... انتو الثنتين تدرسن ويا بعض؟؟
العنود: هيه في نفس الكليه بعد ...
ام حارب: في جامعة الشارجه؟؟
العنود: هيه ...
ام حارب: موزه تدرس هناك ما تجوفنها؟؟
خوله بدون نفس: هيه نعرفها ... كانت ويانا في المدرسه بعد ...
ام حارب: هييييه زين يوم تعرفن بعض ...

و في هاللحظه دشت ام عبدالله و نوره و ميره بس لميا ماكانت وياهن ... لانه ام راشد قايله حق ام عبدالله انه اختها بتيها اليوم و مره وحده عزمت ام عبدالله و بناتها ... ميره او ما جافت موزه انصدمت هي الثانيه على عكس موزه اللي استانست من الخاطر ... و وايهن ام عبدالله و بناتها ام حارب و موزه و يلسن ...

موزه ف خاطرها: شو هالمفاجآت اللي هلت عليه في هاليوم؟؟ اول بجوفة الغالي و الحين بجوفة خواته ... يالله يا عبدالله لهالدرجه صرت قريبه منك؟؟ لالا هاليوم لازم يتسجل في التاريخ ... شو بيرقدني الليل انا اليوم؟؟ يالله ونااااسه ...

ام راشد للبنات: سيرن يلسن في الميلس جان تبن تاخذن راحتكن ... نشي عنود وديهن الميلس ...
العنود: انشالله ...
ام حارب لموزه: سيري وياهن ...
موزه بوناسه: انزين ...

و نشن البنات و سارن الميلس و يلسن و ولا وحده رمست ...

موزه بخبث: بلاكن ساكتات لهالدرجه وجودي هب عايبنكن ...
خوله بدون نفس: اسمحيلنا الشيخه ماعندنا سوالف ...
موزه باستهبال: يبيعوهن ف السوق ببلاش سيري خذيلج ...
خوله: ههههه ما يضحك ...
ميره: بس عاد خوله ...
موزه: اوه ... الشيخه ميره رمست ... الا ساروه شخبارها وياكن؟؟ ماحيدكن سهلات لهالدرجه عشان تقص عليكن؟؟
خوله: ليش؟؟ شو تجوفينا يهال تقص علينا ساروه و غيرها؟؟ و يكون في علمج نحن هب مرتاحين الها و اذا ببالج تلعبين علينا انتي و هي اقولج من الحين انه لا انتو ولا عشره من امثالكن تقدرن علينا ...
العنود: انتو بتفكونا من هالضرايب ولا شو؟؟ يلسو ساكتين احسن ...
موزه: اقول ميره ... عبدالله اشحاله؟؟ الظاهر ساروه قردنته و قردنتكن في نفس الوقت ... على قولت المثل ضربت عصفورين بحجر ...

و هني انصدمت العنود يوم سمعت طاري عبدالله ...

العنود ف خاطرها: هاي اشعرفها بعبدالله؟؟ و ساره شو يخصها في الموضوع؟؟ يا الله احس الدنيا تدور من حواليه ... بموت اذا بينهم علاقه لا يا ربي ماقدر استحمل ...

خوله لموزه: يكون ف علمج ... ترى عبدالله ما يلتفت للبنات اللي من اشكالكن ... و اذا انتي و ربيعتج ناويات على نيه شينه انصحكم تنسحبون من الحين لانكم مستحيل تحصلون شي منا ...
موزه و هي تطالع ساره من طرف عينها: واضح ... و الدليل انه ساره موزعه ايميل وحده تعرف عمرها عدل بين الشباب اللي تعرفهم ...
ميره انتبهت لموزه: شو قصدج؟؟ و بعدين ساره ماتعرف ايميلي لاني ماعطيتها اياه و اصلا مافكر اعطيها اياه ...
موزه: ما يحتاي تعطينها اياه ... دوري في دفترها و بتتأكدين من كلامي ...
ميره: ....................... <<<<<< من الصدمه ما عرفت بشو ترد ...
موزه بخبث: هاه؟؟ اجوفج صخيتي؟؟ و ازيدج من الشعر بيت ترى ساره ترمس اخوج عبدالله و تقدر تهددج باي لحظه انها تفضحج جدامه ...

هني العنود خلاص وصلت حدها ...

العنود و هي تصارخ ع موزه: بس انتي ... اياني و اياج اسمع طاريه على لسانج ... ان فكرتي تنطقين بحرف واحد من اسمه والله لا اراويج ...

و مره وحده عم الهدوء ... الكل متفاجأ خصوصا موزه اللي هب عارفه ليش انهدت عليها العنود مره وحده ...

العنود و هي تصيح: بس حرام عليكم لا تعذبوني اكثر من جي ... <<<<< و يايه بتكمل رمستها سكتتها نوره و ظهرت هي وياها و ودتها لحجرتها ...

و في الميلس مازال الصمت هو سيد الموقف ... و الصدمه على ويوه الكل ... و عقب شويه دشت عليهن البشكاره تقولهن انه العشا جاهز نشن غسلن اياديهن و سارن يتعشن ...

و في غرفة الطعام ... الكل كان موجود الا العنود و نوره ...

ام راشد لخوله: عيل العنود و نوره وين؟؟
خوله ماعرفت بشو ترد: في الحجره ...
ام راشد: ليش ما زقرتوهم؟؟
خوله: .......................<<<<<< ماعرفت بشو ترد ...
ام راشد: نشي سيري ازقريهن ...
خوله: انشالله ...

و نشت خوله تزقر العنود و نوره و هي خايفه لا تكون حالة العنود حاله ... و عقب ما زقرتهن ردت لغرفة الطعام ...

ام راشد: وينهن ما ين وياج؟؟
خوله: الحين بين ...

و شويه الا بدخلت العنود و نوره ... العنود طول الوقت كانت تصيح و نوره تحاول تهديها ... و يوم زقرتهن خوله يتعشن العنود ما بغت تسير عشان ما تجابل موزه بس نوره ما خلتها بحالها و اصرت عليها انها تتعشى ... فقامت العنود غسلت ويهها و هدت شويه و سارن يتعشن هي و نوره ...

كل اللي في الصاله لاحظن انه العنود كانت تصيح ... ام راشد كان قلبها قارصنها على العنود و كانت خايفه لا تكون صايحه بسبة نفس السالفه ... هذا اللي كانت تحسه ... و عقب ما خلصن من العشا يلسو في الصاله يسولفون شويه و يتقهويون ...

ام راشد لخوله: خوله امايه قومي صبي قهوه حق خالاتج ...
موزه: لا خالتي برايها خوله الدلال عدالي و انا بصب ...
ام راشد: لا يا بنتي ماله داعي ... انتي ضيفه عندنا ما يصير ...
موزه و هي ناشه تصب القهوه: برايه خالتي ...

و قامت موزه تصب قهوه حق الحريم ...

موزه و هي تمد فنيان القهوه حق ام عبدالله و هي مبتسمه: اتفضلي خالتي ...
ام عبدالله و هي مبتسمه لموزه: مشكوره فديتج ...
موزه: العفو ...

و ردت موزه يلست مكانها و رازه ويهها ويا قوم امها و خالتها بالسوالف ...

خوله و هي تصاصر ميره: وين تبا هاي؟؟
ميره: اشدراني عنها؟؟ اموت و اعرف هاي شو سالفتها؟؟
خوله: اونها تبا امايه و امج ياخذون فكره زينه عنها ...
ميره: اخخخخ يا مكرها ...
خوله: انزين بس اكيه امايه تطالعنا و نحن نتصاصر ...

و ع الساعه 10 ظهرت ام حارب و بنتها عن قوم ام راشد و عقبها ظهرت ام عبدالله و بناتها ... اما هل البيت كل واحد دش حجرته ...



%% الخميس 10:30 الصبح %%

((( بيت بو سيف)))

كانت مهره توها ظاهره من الحمام و انتو بكرامه عقب ما اسبحت يت بتنشف شعرها رن تلفونها الريم كانت متصله فيها ...

مهره: هلا والله بالطش و الرش ...
الريم: اهلين و سهلين و بوستين على احلى خدين ... شحالج مهاري؟؟
مهره: الحمدلله بخير و سهاله ... انتي شحالج و شخبارج؟؟
الريم: دامني سمعت هالصوت اكيد بكون بخير ...
مهره: عساج دوم يا رب ... شكلج مستانسه ونسينا وياج ...
الريم: فديت اللي يقرون افكاري انا ربي لا خلاني منهم ...
مهره: ههههههه آمين يا رب ... هاه شو بشري؟؟
الريم: عندي لج خبرين ... واحد حلو و واحد شين بشو تبيني ابدا ...
مهره: ابدي بالخبر الشين عشان انساه عقب ما تقوليلي الخبر الزين ...
الريم: هههههههههههه ... انزين الخبر الشين يقولج اني ما بكمل الكورس الياي ... <<<<<< و يايه بتكمل رمستها قاطعتها مهره ...
مهره: بس بس بس عرفت الخبر الزين ما يحتاي تقولين ...
الريم: هههههههه فديت مهاري اليوم صايره وايد ذكيه شو ياج وحي؟؟
مهره: قل اعوذ برب الفلق ... لا تنظليني ...
الريم: ماشالله ماشالله عيني عليج بارده ... انزين قولي يا شاطره شو الخبر الزين؟؟
مهره: احم احم ... الخبر يقولج انه زفاف الآنسه الريم الـ(.......) و السيد أحمد الـ(......) قرب ... و مبروك مقدما لاحلى عروسين ...
الريم: الله يبارك فيج غناتي ... و الفال لج انشالله ...
مهره: انشالله ...
الريم: ترى العرس بيكون عقب العيد على طول 27\1 انشالله ...
مهره: بالبركه و الله يوفجكم انشالله ...
الريم: الله يبارك فيج ...

و تمن يسولفن شويه و عقب بندت الريم عن مهره ... مهره قبل ما تظهر من الحجره سمعت موبايلها يرن جافت رقم فاطمه حطت الموبايل ع الصامت و ظهرت عنه ...

%% الساعه 4:30 العصر %%

((( بيت بو عبدالله )))

في حجرة ميره بالتحديد ... ميره كانت فاتحه المسنجر ومتملله لانه محد كان عندها اون لاين ...

ميره: افففففف هاي خولوه الحماره وين سارت؟؟ حتى هي اوف لاين بتجوفين يا خولوه ...

و فجأه ... اتبطل الباب بالقو ...

...... : بوووووووووو ...
ميره: بسم الله الرحمن الرحيم ... من وين ظهرتي انتي؟؟
خوله: ههههههههه ... ظاهره من بيتنا ...
ميره: زيغتيني غربلات ابليسج ...
خوله: هههههههه ... كنت متعمده ...
ميره: سباله ...
خوله: احسن تستاهلين ...

و هني قامت ميره من مكانها سايره بتضرب خوله و خوله تحاول تشرد منها بس ميره زختها و تمت تكفخها بالمخده و خوله ميته من الضحك ...

خوله: بس غربلات ابليسج ذبحتيني ...
ميره: تستاهلين ما ياج ...

و دشت عليهم لميا و جافتهم و هم ع هالحال ...

لميا: الحمدلله و الشكر ... شو ياكن؟؟
خوله و هي ميته من الضحك: لميوه تعالي وخري اختج عني بتذبحني ...
لميا: ما يخصني فيكن ... تذابحن رواحكن ...
خوله لميره: سيري حد دش عندج ع المسنجر ...
ميره: خلهم ينقعون ... انا اليوم هب هادتنج ...
خوله: هههههههههه ... بس انزين ...

و هدتها ميره و سارت تطالع منو دش ع المسنجر ...

خوله و هي تعدل شعرها: غربلات ابليسج لعوزتيني ...
ميره: تعالي جوفي منو اللي دش ...

و ترابعن خوله و لميا صوب ميره ...

ميره للميا: خير؟؟ انا زقرتج؟؟
لميا: ليش شو عندج؟؟
خوله و هي تغايض ميره: خوزي عنها تبا ترمس ربيعها ع راحتها ...
ميره: ربع بج يني انتي و هو ... ربيعج هذا ...
لميا و هي منصدمه: ميروه يا اللي ما تستحين ... تكلمين واحد ع المسنجر؟؟
ميره: ما يخصني هاي خولوه اللي تباه ...
لميا: لا والله ... و مستانسات بعد؟؟
ميره: لميوه ظهري ... بعدين بنفهمج السالفه ...
لميا و هو يايه بتظهر من الحجره: انا ظاهره بس انصحج ابتعدي عن طريج هذا اللي ترمسينه ولا بتجوفين شي ما جفتيه بحياتج ...
ميره: قلنا بعدين بنفهمج السالفه ...

و ظهرت عنهن لميا و يت ميره ترمس حميد ع المسنجر ...

|| ع المسنجر ||

حميد: السلام عليكم ...
ميره: و عليكم السلام و الرحمه ... خير اخوي شو بغيت؟؟
حميد: تعرفين بالموضوع اللي ابا ارمسج فيه ... عن ساره بالتحديد ... انصحج تبتعدين عنها ...
ميره: ليش؟؟
حميد: هي عاطتني ايميلج عشان اخسس فيج ... بس انا ما رضيت بهالشي و خذت عنها ايميلج و اوهمتها اني بسوي اللي هي تباه ... و كل اللي اباه منج الحين انج تبتعدين عنها ... ترى هاي لعبه هي لاعبتنها ويا ربيعاتها ... و اذا تبين تتأكدين تقدرين تسئلين أي وحده فيهن لانهن مضاربات وياها ...
ميره: ................... <<<<< لا تعليق ...
حميد: على العموم انا قلتلج كل اللي عندي و الباقي عليج ...
ميره: مشكور اخوي ...
و هني غير حميد الصوره اللي كانت ع المسنجر و انصدمت ميره من اللي جافته ...
حميد: المهم بخليج الحين ...
ميره: بحفظ الرحمن ...

و ظهر حميد من المسنجر ... و ميره بعد بندت النت و ردت تسولف ويا خوله ...

ميره: اتخيلي ... هذا هو راعي الكايين اللي لحقنا الين البيت هاك اليوم ...
خوله: منو؟؟ و متى صارت هالسالفه؟؟
ميره: جيه انا ما قلتلج؟؟
خوله: لاء ...
ميره: انزين سمعي ... <<<<<< و قالتلها السالفه بالتفصيل ...
خوله: اويه خوفتيني ... بنقول لو محد جافه زين ... بس المشكله عبدالله و سعيد جافوه ... اشوى انهم ما قالو شي ...
ميره: افففف هاييج الايام كنت اخاف ايلس ويا عبدالله رواحنا ... بس زين انه طوف السالفه ...
خوله: قومي انزين نظهر من الحجره ...
ميره: يالله ...

و لبسن شيلهن و ظهرن و سارن ييلسن في الحديقه ...



((( بيت ام حارب )))

موزه كانت في حجرتها ترمس حصه بالتلفون و تقولها عن اللي صار امس في بيت خالتها ...

موزه: تصدقين انه خوله بنت خالتي؟؟
حصه: خوله ربيعت ميره؟؟
موزه: منو غيرها يعني ... و ازيدج من الشعر بيت ... و نحن داشين البيت جفت عبدالله و ظهر وياه واحد من عيال خالتي و بعد امه و خواته يو هناك ... ما تتخيلين اشكثر استانست يوم جفتهن ... حسيت اني قربت اكثر من عبدالله ...
حصه: يا حظج ... و الحين شو بتسوين؟؟
موزه: مادري ... بس انا متفاءله خير ...
حصه اتنهدت ...
موزه: شو فيج؟؟
حصه: ماشي بس اذكرت ناس ...
موزه: تقصدين خـلـّود ...
حصه: منو غيره معذبني و مبهدلني ...
موزه: ههههههههه ليش شو سوابج؟؟
حصه: من يوم اقوله هاييج السالفه ما سمعت حسه ...
موزه: شو قلتيله؟؟
حصه: قلتله اني انخطبت ... و سويتله فلم هندي اونه مابا اللي يايني و اباه هو بس ما سوالي سالفه ... جنه كان يتريا هالفرصه من زمان ...
موزه: ههههههههه الله يعينج ...



((( بيت المرحوم بو سالم )))

كان الوضع متأزم بين سعاد مرت سالم و منيره مرت عبدالله الرحمن و صوت صريخهن واصل الين برع ... ظهرت ساره من حجرتها عشان تجوف شو صاير بينهن ...

منيره لسعاد بعصبيه: حبيبتي ... تبينا نعاملج باحترام عاملينا باحترام ... مب كل كلمه و الثانيه تعقينها علينا شرات السم ...
سعاد: اذا انتي ماتعرفين ... ترى البيت بيتي و اخبرج من الحين ... انا حره باللي اسويه و اذا هب عايبنج الوضع دوريلج بيت ثاني يضمج انتي و ريلج ...
منيره: تحلمين ... ترى مثل ما ريلج له نصيب من البيت ريلي له نفس الشي من غير اخوانه الباقين ولا تبين تاكلين حقهم كلهم ...
سعاد: و انتي باي حق تقوليلي هالكلام ... انتي منو عشان ترمسين؟؟
منيره: اقول ... ترى الكلام وياج ضايع ... اسير قسمي احسلي من مجابلة ويهج ...
سعاد: فكه من شيفتج ...

و سارت منيره لقسمها و تمت ساره متصنمه ف مكانها مستغربه من اللي صار جدمها ...

سعاد: حشى ما يخلون الواحد يرتاح ببيته ... و انتي شو تسوين هني ... فارجي اجوف ...
ساره: ......................... <<<<< كانت بترد عليها بس ما بغت تكبر السالفه ...

و سارت ساره صوب قسم اخوها و حرمته عشان تسأل منيره عن اللي صار بينها و بين سعاد ... دشت ساره القسم حصلت منيره يالسه في الصاله و كانت توها مبنده التلفون ... يت ساره و يلست حذالها ...

ساره: بلاها هاي تصارخ جي؟؟
منيره: مادري عنها ... من كمن يوم و هي جي عصبيه ... و قابضتلنا بيتي و بيتي جنه البيت باسمها ولا باسم ابوها ...
ساره: الله يستر منها ... شكلها ناويه نيه شينه ...
منيره: اكيد ...
ساره انصدمت: ليش؟؟
منيره: هي محرضه سالم عليكم ... كل يوم ايي عند عبدالرحمن الرحمن يباه يبيعله نصيبه من البيت ...
ساره: ليش عاد؟؟
منيره: مادري والله علمي علمج ...
ساره: و عبدالرحمن شو قاله؟؟
منيره: ما رد عليه خبر ... و هو اصلا ما يبا يبيع نصيبه ... وين بنروح بعدين؟؟ اكيد تبا تاخذ راحتها ف البيت و تبانا نطلع منه ...
ساره: لالا انشالله عبدالرحمن ما يوافق ... اذا طلعتكم من البيت مب غريبه عليها تتولاني انا و مايد ...
منيره: والله ماعرف شو اقولج ...
ساره: الله يستر ...



%% الساعه 8:00 فليل %%

((( بيت بو عبدالله )))

عبدالله كان في حجرته و يرمس البنت اللي ضافته يوم كان في الدوام ...

عبدالله: يعني ما بتقولين انتي منو؟؟
...... : قلتلك اخاف اقولك ...
عبدالله: عيل اشحقه ترمسيني من الاساس؟؟
...... : عبدالله انا احبك تعرف شو يعني احبك؟؟
عبدالله: (طرش ويه مصدوم) انتي منو؟؟ و من وين تعرفين اسمي؟؟ و منو مطرشنج؟؟
...... : محد مطرشني ... قلتلك انا اعرفك و خلاص ...
عبدالله: سعووووود ترى مب وقته ... لا تيلس تحرقلي اعصابي ويا سوالفك السخيفه ...
...... : انا وحده ... و اقدر اثبتلك هالشي ...
عبدالله: كيف؟؟
...... : رد ع المكالمه اللي بتيك الحين و انته بتعرف ...

و شويه و رن التلفون ... بس كان الرقم غريب ... رد عبدالله ع التلفون ...

عبدالله: الوو ...
...... : ..............................<<<<<ساكته ...
عبدالله: بترمسون ولا شو؟؟
...... بصوت مبحوح: عبدالله ... <<<<<< و بندت الخط بويهه ...

عقب ما بندت التلفون ظهرت من المسنجر و عبدالله انقهر من حركتها و ظهر هو بعد من المسنجر ...

عبدالله و هو يرمس روحه: ماعليه وين بتسيرين مني ... انا وراج وراج و بنجوف شو آخرتها معاج ... لهالدرجه وصلت فيج الجرأه بس جوفي انتي ويا منو تلعبين ...

و فجأه ...

...... : شو ترمس روحك انته؟؟
عبدالله: و انته ماتعرف ادق الباب قبل ما تدخل؟؟
خالد: اسمحلي نسيت ...
عبدالله: خير شو تبا؟؟
خالد: عبدالله بغيتك بسالفه ...
عبدالله: ايلس انزين ...
خالد: شو صار بينك و بين العنود هاك اليوم يوم يو يحددون موعد الملجه ...
عبدالله و علامات الدهشه على ويهه: و يهمك تعرف؟؟
خالد: اكيد ...
عبدالله: خالد ... انا اعرف بشو تفكر ... و انصحك تبعد العنود عن تفكيرك لانها ما تصلح لك ...
خالد انصدم: ليش يعني؟؟
عبدالله: ماعتقد كرامتك تسمحلك ترتبط بوحده تركض ورا اخوك ... صح ولا لاء؟؟
خالد: ......................<<<<< لا تعليق ...
عبدالله: ادري انه هالموضوع شاغل بالك ... بس احسلك لا تعطي هالموضوع كل هالاهميه ... و اعتبرها نصيحه من اخوك العود ...
خالد و هو ينش من مكانه: مشكور و ما تقصر ...
عبدالله: العفو ...

و ظهر خالد عن عبدالله و هو مضايج ... عبدالله حس بضيجته بس هو فضل انه يقوله هالكلام ولا يتم على عماه ...

%% السبت الساعه 12:00 الظهر %%

((( كلية التقنيه )))

مهره و ربيعاتها الثلاث كانن توهن ظاهرات من الكلاس و يبن يسيرن اللاب يكمل شغلهن ع البروجكت ... و هن ظاهرات فاطمه ظهرت من الكلاس اللي عدالهم و جافتهن و هن ظاهرات و يت صوبهن ... مهره حاولت تجنبها بس ما قدرت ...

فاطمه: السلام عليكم ...
الكل: وعليكم السلام و الرحمه ...
فاطمه: شحالكن؟؟
الكل: الحمدلله ...
فاطمه: ممكن مهره بغيتج ف موضوع؟؟
مهره بدون نفس: اسمحيلي ماقدر عندنا بروجكت لازم يتسلم اليوم مافينا نضيع وقت ...

و سارت عنهن مهره و خلتهن في حالة ذهول من تصرفها ويا فاطمه و سارن لحقنها ...

الريم: مهروه صبري بلاج تركضين؟؟
خلود: حرام عليج مهره ليش تعاملينها بجفاف؟؟
مهره: احسن تستاهل ... و لو سمحتو طبو هالسالفه ...

و عقب ما روحن قوم مهره عن فاطمه ردت على موبايلها اللي كان يرن و حرقه بطي من كثر ما يتصل بها ...

فاطمه: هلا بطي ...
بطي: اهلين ... وينج انتي من الصبح اتصلبج ما تردين؟؟
فاطمه: كان عندي كلاس توني ظاهره ...
بطي: جفتيها؟؟
فاطمه بيأس: هيه ... بس ما عطتني فرصه ارمسها ...
بطي: يا الله ... انزين ماعليه برايج ... مع السلامه ...
فاطمه: مع السلامه ...

و بندت فاطمه عن بطي اللي حس بخيبة امل عقب ما رمس فاطمه ...



((( جامعة الشارجه )))

في هالوقت ميره و خوله كانن مخلصات من وقت و توهن ظاهرات من الكلاس و وياهن ساره ... و هن ظاهرات لحقتهن موزه ...

موزه بدلع: هلا ببنات خالاتي شحالكن؟؟
خوله: من جفناج و نحن هب بخير ...
موزه و هي تطالع ساره من طرف عينها: افا ... هذا و نحن اهل جي تقولين ... و هاي المكاره العوده تعاملونها جنها ربيعتكن الروح بالروح؟؟
ميره: و انتي شو يخصج؟؟
موزه: يخصني انها قاصه عليكن و انتو مصدقات ...
و مطت موزه الدفتر من ايد ساره و فتحت ع الصفحه اللي كانت كاتبه فيها ايميل ميره ...
موزه: انزين قولي لي ايميل منو هذا؟؟
ميره: ايميلي ...
موزه: زين يوم عرفتي ... و احمدي ربج انها ما تعرف رقمج جان وزعته مثل ما وزعت ايميلج ... باي ...

و راحت عنهن موزه و خلتهن هن في حالة ذهول ...

ميره لساره: ممكن اعرف ايميلي ليش عندج؟؟
ساره: ميره انتي فاهمه الموضوع غلط؟؟
ميره: انزين فهميني انتي الصح ...
ساره: ......................................... <<<<< لا تعليق ...
ميره: على العموم هاي آخر مره اجوف فيها رقعة ويهج ولا تجبلين صوبنا مره ثانيه ... يالله خوله ...

و راحن ميره و خوله عن ساره و خلوها محتاره في امرها ...



%% الساعه 5:00 العصر %%

((( بيت بو عبدالله )))

ميره كانت في حجرتها ترمس خوله بالمسنجر ...

خوله: وينه ربيعج ما دش؟؟
ميره: ربعبج يني انتي و هو ... الف مره قايلتلج لا تقولين ربيعج ...
خوله: هههههههههههه انزين خلاص توبه ما بقول مره ثانيه ...
ميره: هيه جي اباج ...
خوله: اخيرا انكشفت ساروه على حقيقتها ... يوم اقولج هب مرتاحتلها ما تصدقين ...
ميره: شسوي يعني ... كسرت خاطري بالسالفه اللي قالتها ...
خوله: توني اكتشف انج مال المقصه ...
ميره: تخسين يا السباله ... بس انا طيبه شسوي يعني ...
خوله: الله يعينج ...
ميره: و يعين الجميع ... هاذوه دش ربيعج ...
خوله: شو اتريين ما حذفتيه الين الحين ...
ميره: بس جي ...
خوله: قبل اخاف و مسوتلنا فلم هندي و الحين اجوف قلبج ما طاوعج تحذفينه ...
ميره: قلتلج قلبي ما يطاوعني؟؟ بس انا ما تفيجت احذفه ...
خوله: هيه علينا هالرمسه (طرشتلها ويه يغمز) ...
ميره: هاذوه يسلم ...
خوله: ردي عليه شو اتريين؟؟
ميره: اترياج ... قلبي ما يطاوعني اودرج ...
خوله: هههههههههه ادري ما يحتاي تقوليلي ...
ميره: ويا ويهج ...
خوله: سيري نقعتي الريال ...
ميره: ههههههه ... سي يووو ...

و خلت ميره خوله و يلست ترمس حميد ...

ميره: و عليكم السلام و الرحمه ...
حميد: شحالج؟؟
ميره: الحمدلله بخير و سهاله .. انته شحالك؟؟
حميد: دامج بخير انا بخير ...
ميره: انشالله دوم ...
حميد: وياج ...
و بعد فترة صمت ...
ميره: عجيب الموتر اللي في الصوره ...
حميد: عيبج؟؟
ميره: اكيد ... احلى السيايير عندي الكايين ...
حميد: بس اكيد هب احلى عنج ...
ميره: مشكور ع المجامله ...
حميد: افا لا مجامله ولا شي ... انا واثق 100% انج حلوه شرات اسمج ...
ميره: هههههه مشكور ...
حميد: العفو ...
و عقب فترة صمت ...
حميد: انتي وين تدرسين؟؟
ميره: ف جامعة الشارجه ...
حميد: اها ... شو تخصصج؟؟
ميره: ادارة اعمال ...
حميد: حلو ... خلاص عيل بنتشارك وياج في مشروع صغير شو رايج؟؟
ميره: خلها عقب التخرج انشالله ...
حميد: موفقه انشالله ...
ميره: جميعا انشالله ...
حميد: انا دوم امر صوب جامعتكم يوم ايي الشارجه ...
ميره: ادري ...
حميد: اشدراج؟؟
ميره: جفت سيارتك مره و انا ظاهره من الجامعه ... و اتخبلت عليها ...
حميد: ههههه ... مع انه عندي بدالها ثنتين بس هاي المفضله عندي ...
ميره: حلو ...
حميد: المهم الغاليه بخليج انا الحين ... اجوفج مره ثانيه انشالله ...
ميره: انشالله ...
حميد: مع السلامه ...
ميره: في حفظ الرحمن ...


********************************

و بعد مرور اسبوعين على هالاحداث ... خلصن البنات من الامتحانات و بدت اجازة نص السنه ... و ما كان باقي ع ملجة سعيد و نوره غير ثلاث ايام ... كانو مخططين يسوون الملجه ع يومين ... بالاربعا بيملجون و بيسوون عشا ف بيت بو عبدالله و بالخميس بيسوون الحفله في قاعه ...



%% الاحد 5:00 العصر %%

((( بيت ام حارب )))

ام حارب على غير العاده كانت يالسه في البيت ... موزه كانت وياها تجلب ف قنوات التلفزيون ... رن تلفون البيت نشت موزه و شلته ...

ام راشد: السلام عليكم ...
موزه: و عليكم السلام و الرحمه ... هلا خالتي ...
ام راشد: شحالج موزه؟؟
موزه: الحمدلله بخير و سهاله ... انتو شحالكم عساكم بخير ...
ام راشد: الله يسلمج غناتي ... ويتها امج؟؟
موزه: هاذي عدالي بناولها التلفون ...

و وصلت موزه لامها و سمعت امها تبارك لخالتها و رمستها شويه و سكرت ...

موزه: ع الشو تباركيلهم؟؟
ام حارب: ولد خالتج بيملج يوم الاربعا و هي متصله تخبرنا ...
موزه: اها ... كم ولد عندها خالتي؟؟
ام حارب: ثلاثه ... واحد معرس و هذا الثاني بيملج هالاسبوع ... يالله شدي حيلج و خلي الثالث يخطبج ...
موزه بلهجة استنكار: شوووووه؟؟ الله لا يقول ... ماباه ...
ام حارب: ويديه ... بلاهم عيال خالتج؟؟ ماشالله عليهم الف وحده تتمناهم ...
موزه: انا هب وحده منهن ...
ام حارب: بس جب ...
موزه: انزين ما قلتيلي منو بياخذ؟؟
ام حارب: وحده من البنتين اللي ين بيت خالتج هاك اليوم ... اظني اسمها نوره ...
موزه: هيييه ... نوره ...

و نشت موزه من مكانها تركض سايره صوب حجرتها ...

ام حارب: تعالي وين سايره؟؟
موزه: بسير ارمس حصووووه ...

فجت موزه باب الحجره بالقو و سكرته بنفس الطريقه ... و قبضت موبايلها و اتصلت بحصه ...

حصه: هلا والله ... عنبوه توني مسكره عنج مداج تتولهين عليه؟؟
موزه: هب عشانج ... بس عشان ابلغج باللي عرفته اليوم ...
حصه: و شو عرفتي؟؟
موزه: تعرفين منو خطيبة ولد خالتي؟؟
حصه: لاء ما حصلي الشرف ... و ما يهمني اعرف ...
موزه: يا هبله ... خطيبته هي نوره اخت ميره ...
حصه: و يعني؟؟
موزه: انتي بلاج جي ما تفهمين؟؟ نوره هي اخت ميره يعني اخت عبدالله و ملجتها يوم الاربعا في البيت و نحن معزومين ... ركزي معاي يا ماما ...
حصه: حشى بالعه رادو ... قولي جي من الصبح ...
موزه: يعني شو اسويبج اذا انتي بطيئة الفهم ...
حصه: طالعه عليج ...
موزه: ههههههههه لا انتي حاله فريده من نوعها ...
حصه: ههههههه... سخيفه ما يضحك ... انزين انا بيي وياكم ... عادي؟؟
موزه: عادي ليش لاء؟؟ بقول حق امايه انج بتين ويانا ...
حصه: اوكي ...



((( بيت بو سيف )))

مهره و العنود كانن يالسات في الصاله متمللات ...

مهره: اففففف شو هالملل؟؟
العنود: تعالي نسير بيت عموه ...
مهره: والله فكره ... امايه وينها؟؟
العنود: في المطبخ اظني ...

و شويه الا بدشة ام سيف ...

مهره: هلا بطويلة العمر ... تونا نطريج ...
ام سيف: هاه شو عندكن؟؟
العنود: نبا نسير بيت قوم عموه ...
ام سيف: هيه والله صدقكن من زمان ما مرينا صوبهم ... اتصلوبهم و قولولهم انه بنيهم عقب المغرب ...
مهره: انا باتصل بنوره بخبرها ...
ام سيف: برايج ...

و سارت مهره حجرتها و اتصلت ع موبايل نوره ...

مهره: هلا بالعروس ... مرحبا ملايين ...
نوره: اهلين مهره شحالج؟؟
مهره: الحمدلله بخير و سهاله ... العروس شحالها؟؟
نوره: الحمدلله بخير ... ما بغيتو تتولهون علينا ...
مهره: ههههههههه شو نسوي بعد ... ناس مشغولين ما يمدينا نتوله ...
نوره: هههههه حلوه هاي ...
مهره: انزين خلي السوالف حق بعدين ... نحن بنيكم عقب المغرب ...
نوره: يا مرحبابكم ...
مهره: المرحب باجي ... يالله بخليج الحين ...
نوره: برايج ...
مهره: مع السلامه ...
نوره: مع السلامه ...


~~~~~~ نـهـايـة الفـصل الاول من الـجـزء الـثـاني عــشر ~~~~~~

~~~~~~ الــجــزء الـثـاني عـشـر ~~~~~~

~~~ الفـصل الثانـي ~~~


%% الاحد 7:00 المغرب %%

((( بيت بو عبدالله )))

ام سيف و بناتها كانن توهن يايات ... عقب ما سلمن ع اللي في البيت يلست ام سيف ويا ام عبدالله في الصاله ... مهره سارت ويا نوره لحجرتها و العنود عند ميره و لميا ...


(( في حجرة ميره و لميا ))

ميره و العنود و لميا كانن يالسات يسولفن ...

العنود: شو بتلبسن حق الملجه؟؟
ميره: شرينا فساتين من كمن يوم بس ما يبناهن يبالهن تعديل تعالي باجر بنراويج ...
العنود: جيه؟؟ كل يوم العيد ...
ميره: هههههههه عيل تريي الين يوم الملجه بتعرفين ...
لميا: ماصدق بيستوي عندنا عرس ...
العنود: هههههههه بعد انتقلت العدوى من ميروه ...
لميا: من الوناسه شو نسوي ...
سمعن صوت موبايل يرن و محطوط ع الهزاز ..
العنود لميره: هذا تلفونج؟؟
ميره: جنه ... باطالع ...
قامت ميره تطالع منو المتصل بها بس ما ردت و الارتباك كان مبين ع ويهها ...
لميا و هي حاسه ان تصرف ميره هب طبيعي: ليش ما رديتي؟؟
ميره: هاي ساروه هب متفيجتلها ...
العنود: ما كنتو حلوين؟؟ شو اللي غيركم؟؟
ميره: هاي وحده ما تستاهل حد يعطيها ويه ...
العنود: ليش شو سوت؟؟
ميره: ................. <<<<<< قالتلهم اللي صار بينها و بين ساره عقب الكلام اللي سمعته من موزه و حميد ...


(( في حجرة نوره ))

نوره و مهره كانن يسولفن يوم رن تلفون مهره و ما ردت عليه ...

نوره: ليش ما تردين؟؟ خايفه افضح اسرارج؟؟
مهره: ههههههه ... لا بس هاي وحده مضايجتني و مالي بارض ارد عليها ...

و عقب ما بندت رن موبايل مهره مره ثانيه ...

نوره: انزين ردي ... بس فكينا من حشرتها ...
مهره: اقولج احسن شي ابند الموبايل و افتك ... <<<<<<و بندت الموبايل ...
نوره: ليش شو تبا هاي؟؟
مهره: وحده ماعندها سالفه ...
نوره: انزين انا ابا اسمع سالفتها ...
مهره: شو بتسمعين الله يخليج ... وحده حظنا العاثر عرفنا عليها ... جايفتنها في ملجة الريم و اتعرفت عليها و قامت تتصلبي و اتصلبها و آخر شو تتوقعين كانت تبا؟؟
نوره: شو؟؟
مهره: اونه تباني اتعرف على اخوها ... لا و المصيبه العوده انها قبل كانت معرفه ربيعتي عليه و هدها و سوالها سالفه و المسكينه طاحت في المستشفى ايام و هو ولا جنه سوى شي ... بس همه يلعب ع بنات الناس ... و المصيبه العوده انها بعد معرسه ...
نوره آثار الصدمه مبينه عليها: هي قالتلج جي؟؟
مهره: لاء ... <<<<<< و قالتلها عن السالفه اللي صار بينها و بين فاطمه هاك اليوم ...


###########

مهره: يا السباله ليش ما قلتيلي انج ناسيه تلفونج ف بيت ابوج؟؟
فاطمه مستغربه: شو؟؟ أي تلفون؟؟
مهره: تلفون يدي ... أي تلفون يعني؟؟
فاطمه بارتباك و هي توها تستوعب السالفه: هييييه ... اسمحيلي والله نسيت اخبرج ... على العموم انتي اتصليبي على هالرقم ####### هاييج البطاقه هب دوم استخدمها ...
مهره: اوكي ...
فاطمه و هي متردده: انزين مهره بسألج سؤال ممكن تردين عليه بدون زعل؟؟
مهره: افا عليج ممكن و نص ...
فاطمه: انزين ... شو رايج في اخويه؟؟
مهره انصدمت من السؤال: أي اخو؟؟
فاطمه: اخويه ماغيره ... اللي جفتيه هاك اليوم يوم كنتي ف بيتنا ...
مهره: مادري ...
فاطمه: ليش ما تدرين قولي رايج بصراحه ... الصراحه بطي اول ما جافج دخلتي خاطره و وده يرتبط فيج ...

############

مهره: هذا اللي صار ...
نوره: انزين يمكن ما كانت تقصد اللي في بالج؟؟
مهره: شو قصدج؟؟
نوره: يمكن فهمتيها غلط ... يرتبط فيج مب معناتها انج تكونين ربيعته و بس ... يمكن تقصد شي ثاني؟؟
مهره استحت: ......................... <<<<< لا تعليق ...
نوره: ليش سكتي؟؟
مهره و هي بعدها مستحيه: لا ماشي ...
نوره: انتي وين جفتي اخوها؟؟
مهره: ف كل مكان ... كل ماسير مكان اجوفه جدامي ... و هو بعد ربيع سيف ...
نوره: ههههههههههه ... القلوب عند بعضها ...
مهره كفخت نوره ع ظهرها بالخفيف: يا حماره شو تقصدين ...
نوره: ولا شي ... انزين انا بسألج نفس السؤال ... انتي شو رايج فيه؟؟
مهره: ............................. <<<<< لا تعليق ...
نوره: انزين ماعلينا منهم ... غيري الموضوع ...



%% الساعه 11:00 فليل %%

((( في سيارة حميد )))

حميد و علي كانو توهم ظاهرين من الكوفي و سايرين بيوتهم ...

حميد و هو يبند الموبايل: وينها هاي؟؟
علي: منو بعد؟؟ حدد أي وحده فيهن ...
حميد: بعد ... جنك تعرفهن؟؟
علي: ههههههههه كم بحفظ ... من كثرهن ماقدر ...
حميد: احسن ...
عقب لحظات من الصمت ...
علي: حميد انته لين متى بتم جي؟؟
حميد: شو تقصد؟؟
علي: انته عارف انا شو اقصد ... ما يحتاي اعيد الرمسه ...
حميد: بس بس الله يخليك لا تعيد الاسطوانه المشروخه نفسها ...
علي عقب ما تنهد: كيفك ... انته حر باللي تسوي بس اتمنى انك تراجع نفسك ...
حميد: يصير خير ...

%% الاربعا 10:00 الصبح %%

((( بيت بو راشد )))

الكل كانو موجودين في غرفة الطعام يتريقون و سعيد كان توه ناش و ياي يتريق ...

راشد: حيالله المعرس ... هاه شو هباتك؟؟
سعيد: امممم ترتوب ...
راشد: مبروك مبروك تستاهل ...
سعيد: الله يبارك فيك ...
بو راشد: و شو ترتيباتكم خلصتوهن ولا بعدكم؟؟
سعيد: الحمدلله كل شي جاهز ... و بنملج عقب صلاة العشا انشالله ...
ام راشد: وافديت ولديه ... و يا حظها نوير فيك الله يهنيكم انشالله ... و يفرحني فيكم كلكم انشالله ...
سعيد: الله يسمع منج ...

نشت العنود عنهم و سارت صوب حجرتها ... خوله لاحظت عليها انها مضايجه نشت و لحقتها ...

((( في حجرة العنود و خوله )))

العنود: نعم؟؟ قلتلج الحقيني؟؟
خوله: لا بس اجوفج مضايجه شو فيج؟؟
العنود: مافيه شي انتي تتوهمين ...
خوله: انتي الين متى بتمين جي؟؟
العنود بضيج: اوووووه ... انتي ما بتفكيني من هالسالفه؟؟ بس خلاص <<<<< و غطت ويهها بايديها و تمت تصيح ...
خوله عورها قلبها على اختها و سارت لوت عليها: عنود بس خلاص لا تعذبين عمرج اكثر من جي ... صدقيني انا اتعذب وياج ... قولي اللي في خاطرج يمكن ترتاحين شويه و انا واثقه اني بقدر اخفف عنج ...
العنود و هي بعدها تصيح: آآآآ÷ لو اقولج باللي صار؟؟
خوله بقلق: عنود لا تخوفيني قولي شو فيج؟؟ و شو استوى؟؟
العنود: ................................. <<<<<< هب قادره ترمس من الخوف ...
خوله: خلاص انتي اهدي الحين و بعدين بنرمس ...
العنود: لا بقولج الحين عشان افتك ...
خوله: قولي و انا بسمعج ...
العنود: .................................

***********