الحل الصعبقصة رومانسيه

الجزء الثالث
مرّت ثلاث أسابيع بسرعة عجيبة....حتى ريم نفسها مو مستوعبة ان آخر اختبار لها كان أمس...كانت مرهقة وتعبانة واللي مخوّفها زواجها اللي قرّب يجي
طوال الثلاث أسابيع اللي فاتت كان بدر يدق ويسأل عن طلباتها وهي رفضت تملّك قبل الاختبارات عشان ما تتشتت في تفكيرها بين الملكة والاختبارات
والحين زواجها بعد أسبوع واحد بالضبط!
بدأ العدّ التنازلي وهي خايفة...اليوم بعد صلاة العشا راح تكون ملكتها وراح تشوف بدر بنفس اليوم !! شي يخوّف...من بعد ذيك الشوفة كل واحد فيهم ما شاف الثاني ...جلست تفكّر كيف ممكن يكون اللقاء الثاني ...وكيف ان هذا اللقاء راح يكون غير...لأنها راح تقدر تشوفه زين وتدقق فيه وتطبع الصورة تمام في خيالها.

الساعة 8:45 دقيقة بالضبط دخل عليها أبوها في الصالة ومعه الكتاب
كان قلبها يخفق بطريقة غريبة ..خوف, توتّر, ترقّب..لأول مرة راح تشوف كيف راح تكون ورقة الزواج
جلست على الكرسي وهي تناظر الورقة بتأمل كان اسمها واسم بدر موجودين
وأسماء الشهود وكان المكان اللي تحت اسمها فاضي ينتظر توقيعها
مسكت القلم بتردد وحاولت توقع بدون ماتخلي يدّها ترتجف ووقّعَت...!

دخلت ريم المجلس ولاحظت ان بدر قام من مكانه وكان يطالعها بعيونه
وفجأة لقت ابتسامة على فمه وهو يقول ...أهلييييييييين ريـــــــــــم
استغربت لمّا قرّب منها ومسك يدّها وكأنه ناوي يسلّم عليها وحاولت تسحب نفسها وهي مو مستوعبه وهو ضحك وقال: ههههههه وش فيك؟ تراي زوجك
بس كنت أبي اسلّم عليك....هاه كيفك اليوم؟؟
- الحمدلله تمام
وجلست على كنبه وهو جلس في طرف الكنبة وقال: ما طلعت النتايج؟؟
- لأ ...لسه ما طلعت
- طيب كيف حلّيتي؟؟ ان شاء الله تمام؟
- الحمدلله
- وين حابّة نروح شهر العسل؟؟
- ........
- ايش فيك ماتتكلمين؟؟
- اعذرني يا ...بدر..لكن أحس انك تضغط علي
(اعتدل في جلسته وقال : وكيف أَضغط عليك؟؟أنا ببساطة إنسان عملي يعني أحب أعرف كل حاجة قبل أخطط لـ شي)
- مدري بس ان شاء الله أتعوّد
- طيب ايش أكثر بلد تحبينه؟؟
- أسبانيـــــا يمكن
- تبين نروح أسبانيا؟؟
- انت ايش رايك؟؟
- أنا عادي ...اللي تبينه يحصل
- مو على كذا...قد رحت لها؟؟
- إيه...بس ماقد رحت للسياحة يعني عمل وفعلاً مرة حلوة
- خلاص اللي تشوفه.
- ايش كمان؟؟...ايش تحبين كلميني عن نفسك
- مدري وش أقول لك؟؟ ايش تبي تعرف؟
- كل شي ...يعني مثلاً ايش تسوين وقت فراغك, تحبين تقرين؟ تشوفين أفلام؟
- اممممم...أنا أحب أقرى , وبرضو أحب أشوف أفلام ,
- حلوووو ...أجل بيننا أشياء مشتركة طيب إيش تقرين؟
- قصص...شعر... وأنت؟؟
- غالباً شعر...
- اهممممم
- طيب أنا ماودّي أضغط عليك عشان كذا راح أتركك ألحين وان شاء الله أكلمك عشان أخبّرك بأي جديد...( مدّ يده داخل جيبه وطلّع جوّال وقال...أعذريني ما أعرف ذوقك لكن جبت لك شي على ذوقي المرة هذي وخلّيه معاك, بعدين تقدرين تغيّرينه إذا تبين)
- ....طيّب...
قرّب منها بدر وهي حاولت تكون هادية وانحنى وباسها على جبهتها وقال: تصبحين على خير.
- وأنت من أهل الخير( كان الكلام بصوت واطي )
وطلع من المجلس....وريحة عطره في المكان..يالله شعور غريب ,لأول مرة تجلس مع شخص غريب ...يوووه خلاص مو غريب,صار زوجها اللي لسه ماتعرفه زين..حسّت إنها تبي تبكي..يمكن لأنها توقعت شي ثاني , يمكن لأنها خايفة من العيون السود وكيف نظراته تدخل جوى أعماقها, ويمكن لأن الزواج هذا كان غلطة...هي من زمان تتمنى تاخذ عن حب لكنها المرة هذي ما أخذت عن حب
رفعت يدّها لجبهتها وحسّت إنها حارة...معقولة تكون مريضة؟؟ولا الحرارة جت من العدم! ما تدري.

مرّ الأسبوع بسرعة غريبة...وريم كل يوم عن يوم تخاف أكثر
يمكن لأنها حسّت إنها راح تترك بيت أهلها وتعيش حياة جديدة فيها مسؤوليّة
أو يمكن لأنها حتى الآن ما ارتاحت من نظرات بدر لكن حاولت تكون هادية قد ماتقدر ...يالله هي مع بدر الآن في السيارة متجهين للفندق وبرضو كان مرة هادي يطريقة عجيبة ,,, تذكرت الحفلة اللي سوّوها أهلها للاحتفال بنجاحها وحسّت بالتناقض...كأنها صغيرة وكأنها كبرت فجأة لأنها راح تتزوّج!
تذكّرت كيف أرسل لها بدر ورود في يوم تخرّجها مع بطاقة كان مكتوب عليها بس " ألف مبروووووك...أتمنى لك التقدم في كل مجال في حياتك" وكان مع الباقة علبه صغيرة..كانت خاتم مرة حلووو وفخم...ما كانت مستوعبة وجود شخص جديد في حياتها راح يتدخّل بكل صغيرة وكبيرة في حياتها. طردت الأفكار هذي من راسها وحاولت تسرق نظرات على وجهه لكنها انصدمت لمّا لقته يطالع فيها وعلى طول شالت عيونها منه وابتسم وقال...تدرين؟؟ نفسي اعرف ايش تفكرين الحين؟؟
حسّت قلبها راح يطلع من محلّه وقالت : ولا شي
ضحك بدر ضحكة حسّت معها بالخوف لأنه قرّب منها ومسك يدها بين يدينه
وناظر في عيونها مباشرة وقال...لايا عزيزتي...انت كنت تفكرين في قد ايش انت خايفة مني ههههه مو مشكلة شي طبيعي تخافين بس أحب أطمنك ...كل الأمور راح تمشي تمام
- ايش؟؟
- أقولك ياحلوة إن الأمور تمام يعني تراي قاعد أطمّنك ارتاحي وريحي أعصابك
- .........
- ريــــم....لا تناظرين فيني كذا ...ترى شكلك من جد خايفة وأنا مو خاطفك!!
وضحك وهي تحترق من داخل...مقهورة من عجرفته مقهورة من ضحكته اللي على وجهه مقهورة من برودة أعصابه!!
كيف فيه ناس بهذا البرود؟؟ آآآآآآآآآآآآآه من جد شكلي تزوّجت واحد مايحسّ

أقلعت الطيّارة في الصباح وكانت تجلس جنب بدر واللي كان قاعد بكل هدوء يشرب قهوة ...وهي متنحة ما تدري ايش تسوّي
وبحركة لا إرادية طلّعت من شنطتها كتاب وحاولت تشغل نفسها فيه
وبنفس الوقت حاسّة ان عيون بدر تناظر فيها باستغراب وقال...الحين انت ماتكلّمت طول البارح والحين بعد ناوية تسحبين علي؟؟
- انت شكلك مشغول...
- أنا مشغول؟؟ ترى الكلمتين الوحيدتين اللي حكينا فيهم اليوم صباح الخير وأنت جاهزة ...والحين تبين تقرين كتاب وأنا أعرف انك طول أمس مانمتي شكلك كنت خايفة مني مع إني قلت لك تطمّني
- بدر....
- هممممم
- اعذرني ترى ما أعرف وش ممكن اسولف فيه
- طيّب...ماودّك تخططين لمستقبلنا ؟؟ ( كانت نظراته مليئة بالخبث)
- كيف يعني؟؟
- ريم...تراي بديت اشك إني ماخذ طفلة مو وحدة عمرها 18
- طيب 18 لسه صغيرة ..ايش تتوقع؟؟
- يعني انت متزوجة غصب عليك مني؟؟
- لأ...أنا ما قلت كذا
- طيب؟؟
- أنا كنت أقصد انو لازم أتعوّد عليك ترى الوضع جديد علي
- طيب وش تتوقعين ان الوضع مو جديد علي أنا بعد؟؟ لكن الفرق بيني وبينك إني أنظر للأمور ببساطة واطمئنان مو زيّك تخافين في كل مرّة أمرّ جنبك
احمر وجهها وحاولت تتكلّم لكن ما قدرت تنطق وهو بكل برود أعصاب قام يضحك وقال: طيب مو مشكلة ...ماودّك نخطط لمستقبلنا؟؟
- يعني ايش تقصد؟؟
- اووووف ياريم..طيّب راح أوضّح أكثر اقصد البيت, المسؤولية, العائلة كم تبين أطفال؟؟
- انت من جدّك؟؟
- إيه ليش أمزح؟؟
- اقصد انك تحكي عن الأشياء هذي وكأنها شي عادي يجي في يوم وليلة وكل شي بالبساطة هذي
- صدقيني يا عزيزتي كل شي يجي بالبساطة هذي ...وكل شي يجي لرغباتي!!
- ما تلاحظ انك من جد ماكل في نفسك مقلب؟؟
- ههههههه وليش؟؟ أنا مو مغرور أنا أعرف قدر نفسي بس!
- لااااا انت من جد مغرور...(كان شكلها من جد مقهورة ومعصبة)
وفجأة قرّب منها بسرعة ومسح بإصبعه على انفها وقال :يا عزيزتي...راح تعرفيني زين وراح تعرفين إني ماتزوّجت ألعب لكن أخاف أكون من جد أخذت طفلة
قامت من الكرسي وهي تحاول تبعّد عنه لأنها حسّت إنها في أي لحظة ممكن تصفقه بـ كفّ وهو مسك يدها بقوة وقال: على وين؟؟
- دورة المياه
- طيب استنّي اروح معاك أخاف تضيعين
- تراي مو طفلة تلاحقها لا تخاف أدل طريقي واعرف اسأل عن أي شي لو ضيّعت.
ودارت ظهرها وهي تحاول تخلّي خطواتها ثابتة واللي حرق قلبها ضحكته العالية . وقفت قدام المراية وفجأة رحمت نفسها...كان وضعها من جد تعيس
ونزلت الدموع على خدّها وبعدين مسحتها وقررت إنها تورّيه ...لأنه خرّب عليها صباحها, ولأنها عزّمت تحطم غروره هذا...
رجعت بكل هدوء وجلست وكان فيه ابتسامة ملتوية على فمّه وقال: كيفك اليوم؟؟
حاولت ترسم ابتسامة على فمها وقالت: الحمدلله...انت كيف نمت؟؟
- الحمدلله (استغراب على وجهه من طريقتها)
- بدر...
- نعم
- قلت لي تبي عائلة وأولاد؟؟
- إيه..ليش أنتي ماتبين؟؟
- إلا بس مو الحين ...اقصد خلينا ناخذ وقتنا ونعرف بعض أكثر
- أنا من رايك ياحلوة....التأخير دايماً أفضل
واللي صدمها انه مسك جريدته وقام يناظر في آخر العناوين
قالت بهدوء: بدر....المفروض يكون هذا شهر عسل
- يعني؟؟
- مدري اقصد خلّينا نسولف
- قبل شوي كنت أكلمك ولاكان لك خلق أو كنتي خايفة ...والحين تغيّرتي ورجعتي مختلفة
- ودّي أعرفك أكثر
- يعني أفهم من كذا انك تبين شهر عسل؟؟ (ناظرها بنظرات خوّفتها)
- اقصد ان شهر العسل المفروض نكون فيه مبسوطين
- لا تخافين ...أوعدك راح تنبسطين ...بس انت شكلك مانمتي حاولي تريّحين شوي لمّا نوصل أصحّيك

ريم....كانت تحلم ...كانت في مكان حلوووو ورايق وكان الجو مرة خطير وكان فيه شخص ماسك يدّها ويشدّها لبيت كبييييير...كان البيت مرة حلو وفجأة انتبهت إنها حتى الآن ماتعرّفت على مرافقها اللي في الحلم ولمّا التفتت تشوف مين ,كانت صاحية من النوم وعيونها التقت بعيون بدر اللي كان يراقبها بشكل غريب
وتفاجأت لما لقت انه ماسك يدّها وكان يهزّها بهدوء ورقّة ويقول: ريم...يالله وصلنا

في هذي اللحظة ...حسّت ريم بشي غريب مزيج من الحنان مزيج من المفاجأة
وسحبها بدر بطريقة ناعمة عشان يساعدها توقف وابتسم وقال:
- welcome to Spain
ابتسمت بهدوء وشالت شنطتها وانطلقوا لبداية شهر العسل
.............

كان الأسبوعين هذولي من أجمل الأيام اللي عاشتهم ريم في حياتها
كان بدر مرافق ممتاز في السفر مرح وحنون و ومرشد سياحي نوعاً ما
وقدرت تاخذ عليه نوعاً ما ....وشوي شوي بدت تحس بالارتياح لكنها كانت لسه تخاف منه
يمكن لأنها ماتعوّدت تلاقي شخص يبحلق فيها كذا ...وبطريقة مافيها أي تعابير
أحياناً يكون هادي وأحياناً يكون شخص ثاني
شخص كأنها لأول مرة تقابله....أحياناً كانت تحس انه ينظر لها فعلاً على إنها طفله ...يمكن بطريقة معاملته لها أو بأسلوبه في إشعارها انو مالها مسؤولية في أي شي أو دور معيّن
شالت هذي الأفكار من راسها وجلست ترتب شنطتها لأن بدر قال لها انو مضطر يرجع للشغل بعد أسبوعين ...بسرعة مرّوا هالأسبوعين.

بعد ما خلّصت, راحت للمطبخ وأخذت لها كرسي وجلست عليه تشرب القهوة وتفكّر...ولأول مرة طرى على بالها فكرة غريبة!
بدر ماقد قال لها انو يحبّها؟؟ وهذا الشي خوّفها
يمكن لأنها هي كان عندها فكرة عن ان الزواج التزام واحد لمدى الحياة وان الشخص لازم يكون يحب الشخص الثاني لاجل تستمر العلاقة...لكن فجأة حسّت بارتباك غريب. حتى هي ماقد قالت له إنها تحبّه...لحظة! هل هي تحبّه؟؟
حتى الآن هي مو متأكدة...اللي هي متأكدة منه انه طيّب وشخص تستلطفه وبس وبرضو تخاف منه وحتى الآن مالقت سبب لهذا الخوف.
طيّب يمكن هو بعد نفس شعورها...يعني مو شرط يحبّها عشان كذا ماقال لها شي
تنهّدت بهدوء وحاولت تشيل الأفكار هذي من راسها ولمّا رفعت راسها لقت بدر عند الباب وارتاعت: بسم الله ....كم صار لك واقف؟؟
- ههههههه مو مدة طويلة ...بس ليش خفتي ؟؟ والله لو إني وحش
- لا بس فاجأتني....
- ريم...كنت حـ سألك انت معجبك المكان هنا؟؟
- امممم إيه حلووو ليش؟؟
- كنت أفكر....إذا انت حابّة المكان نجلس كمان أسبوع زيادة
- ليش؟؟
- حلوة ليش؟؟ أنا أسألك...إذا كنتي تبين نجلس زيادة وإلا خايفة مني تبين تروحين لحضن ماما
- بدر....انت قلت لي نرجع بعد أسبوعين
- هو سؤال بس جاوبي عليه تبين ولا لأ؟؟
- مو المسألة كذا بس مو انت تقول ان عندك شغل وهذا الشي انت وضّحت لي إياه قبل ما نروح شهر العسل
- طيّب...غيّرت رايي ودك نجلس ولا لأ؟؟
- بعدين ليش تتريق؟؟ الظاهر انك من جد تبي تفتعل مشكلة
- أنا؟؟؟!! حرام عليك ....أنا ملاك بريء
- ههههههه ضحّكتني والله ...ودّي أصدقك
وفجأة بخطوات كبيرة كان جنبها ومسك ذقنها بيدّه ورفع وجهها وناظر في عيونها مباشرة وكان باين على ريم إنها ارتاعت من أسلوبه وارتسمت ابتسامته الملتوية على فمّه وقال بهدوء يخوّف: ريم لا تلعبين بالنار دامك منتي قدّها.
وحاولت ريم تبعد عنّه لكنه سحبها بقوة ورجع يناظر في عيونها وقال: فاهمة ياحلوة؟؟ تراك تضيّعين وقتك معي إذا كنتي راح تستمرين بمجادلات مالها داعي وتدورين علي الزلّة
وتركها وهي رجعت خطوتين ورفعت راسها بعصبية وقالت: الظاهر انت اللي تدوّر علي الزلّة...أنا ما أفهم انت وش تبي بالضبط؟؟ ساعات تكون طيّب وساعات تكون سخيف بتصرّفاتك ...تراها كلمة وقلتها سألتك عندك شغل وإلا لأ بس الظاهر فيه ناس فعلاً تفهم على هواها ...وبالنسبة لإجابتي...إيه أبي أرجع
لأنو صدقني مقدر استحمل جلستي معك هنا الحين بالذات.
- ههههههههههههه ريم....أعصابك يا بعد عمري, مو مشكلة راح نرجع لأنك ما تحبين تكونين معاي بنفس المكان صح؟؟
- صح
- طيب إذا كان هذا كلامك فأنا بعد ما أبي أكون معك...اللي مايبيني ما أبيه!!
كانت هذي الكلمات زي الكف على وجهها ووقفت مو مستوعبة الكلمات اللي قالها وقالت بهدوء: طيب ليش متعب نفسك ومتزوجني على كذا؟؟
- توقعتك أكبر من كذا وأنضج لكن شكلي فعلاً أخذت طفلة ...عالعموم راح تتعودين على .....
- على ايش؟؟
- خلاص ياعمري...انسي الموضوع بكرى رحلتنا إذا كنت مصرّه
- إيه أبي ارجع
- خلاص 9 الصباح خلّك جاهزة
وسكّر الباب وراه ...وعلى طول جلست على اقرب كرسي ...وفجأة لقت دموعها على ثوبها كانت مقهورة كانت تبكي ...شكل حلمها بأن الزواج راح يكون شي حلو لتأسيس عائلة وحياة سعيدة انتهى...لأنها فعلا ما تقدر تعيش مع إنسان بمثل عجرفته وقساوة قلبه!


وصلوا لمطار الملك خالد الدولي وبدون أي كلمة من يوم ركبوا الطيّارة
كان جالس يشتغل عالـ اللاب توب وهي جالسة تقرى أو تحاول تسوّي نفسها تقرى بالأصح!
كانت مقهورة من طريقة بدر في معاملتها ...أولا جالس يقول عنها طفلة من يوم ماراحوا هناك والحين ولا كلمة. وفجأة سمعته يقول: ترى أمك كلمتني وقالت إنهم مجهزين العشاء لنا وقلت لها إننا راح نكون عندهم إن شاء الله عالساعه 9 بس نروح البيت أول.
- طيّب.
- بس طيّب؟؟ تحيريني يا ريم....
- بدر لو سمحت ...ما أبي أقول أي كلمة تقلبها علي وتقول لي فيها إني افتعل مشكلة
- براحتك ....
انقهرت من ردّه ...كانت تتمنى لو انه يراضيها أو يقول لها كلام يطيّب فيه خاطرها لكن الظاهر فعلاً زي ما قالوا لها صاحباتها...إن الزواج مو زي الأحلام
هي ما كانت تتوقع انه حب وغرام وبس لكن كانت تتوقع يكون فيه انسجام احترام شويّة حنيّة واعجاب من الطرفين...أحياناً تحس من نظرات بدر لها إنها تعجبه وأحياناً تكون هي والجدار واحد
لكن هي مشاعرها تجاهه غريبة...مرة يعجبها مرّة ومرة تكرهه مرّة! يعني مافيه وسط...يمكن لثقته بنفسه الزايدة عن الحد دور كبيييير في الشي هذا
انقطعت أفكارها لمّا وصلوا للبيت لكنها طلعت بفكرة أخيرة...إنها راح تحاول المستحيل عشان تخلّي زواجها ينجح وراح تحاول تعطي بدر فرصة بدل ماهي تصدّه طول الوقت
لبست ملابسها وصارت جاهزة بعد ساعة ...وطلعت للصالة وكان بدر ينتظرها ولمّا دخلت رفع راسه وقال : جاهزة؟؟
ابتسمت ريم بالرغم من جمود وجهه وقالت : إيه...كيفك الحين؟؟ إن شاء الله ارتحت بعد الرحلة؟؟
سكت بدر....وبعدين لانت ملامح وجهه وقال بهدوء: الحمدلله أحسن ....
ورفع عيونه يتفحّص ملامحها وقال : شكلك حلو لمّا تتركين شعرك على أكتافك
فجأة ....قلبها بدى يدق بسرعة ...لأول مرة بدر يمدحها وبعدين وقف ومشى باتجاهها بخطوات هادية ووقف قبالها وقال : جاهزة؟؟
- إيه جاهزة
- يالله خليّنا نروح ( مدّ لها يدّه وأخذتها بهدوء وطلعوا من البيت)

يتبع ...

يسلمو على هذه القصه
وننتضر التكمله على احر من الجور




ومن هذا واكثر انشاء الله يا باسمه

هلا وغلا بسومه:p
القصه رووووووووووعه وبإنتظار الباقي يالغاليه:qlbe19:
مشكوووووووره على القصه

أثير:qlbe23:

[align=center]
اسمحي لي خيتو باسمهــ

علىى نقلي للقصهــ للمكان المناسب لها وهو
قسم القصص الطوويلهــ ..

ولي عوده لقراءءة القصهــ

لاعدمنـــاك

:

سهـــــاد[/align]

هلا وغلا بأعضاء منتدى قلبي
وأشكر من كل قلبي من دخل القصه وقراها
وأخص بالشكر atheerوسمسم السعودية على مروركم وردودكم الحلوة
ومن قلبي أشكر المشرفه سهاد على مرورها
ولخاطر عيونكم بأنزل الجزء ماقبل الأخير
الجزء الرابع
كان جو العشاء جميل ....الأهل واللمّة وكيف أمها رحّبت فيهم وأبوها انسبط كثير
كان جو حميم اشتاقت لوجودها فيه....جلست تسرق النظرات لـ بدر اللي كان من جد
آآآآآآه وش تقول بس...كلمة وسيم قليلة عليه وحتى طريقة معاملته لأمها حرّكت فيها شي غريب وكيف كان يسولف مع أبوها كأنهم أعز الأصدقاء
كانت تحس بوجوده جنبها وكان هو بين فترة وفترة يطالع فيها ويعطيها ابتسامة تخلّي كل اللي في الغرفة يلتفتون عليها وهي لا شعورياً وجهها ينقلب أحمر
هي ماتحب أحد ينظر لها كذا...لكن بدر كان فنّان بالنظرات هذي
كان يقدر يخلّيها تحس إنها شي ثاني وكان يقدر بنظراته يحسسها بأنها مجرّد طفلة أو وحده ما تعرف شي عن الحياة
أحيانا تشوف فيه حنان غير طبيعي وأحياناً ينقلب لإنسان صارم وغريب ولا كأنها تعرفه , كان في كل مرة ينادي اسمها قلبها يطيح وكانت تحاول تبتسم وتقول : سم
- يالله يا عمري...تأخر الوقت وأنت ماارتحتي...إذا تبين نقدر نجي بكرى
- طيب مو مشكلة....(ودّعت أمها وأبوه وقبل لاتطلع سحبتها أمها على جهة وقالت: هاه...كيف الوضع؟ كيف بدر معاك ...أنت مرتاحة؟؟ مبسوطة؟؟)
- الحمدلله يمّة مرة مبسوطة
- أشوى الحمدلله لأني أقدر أشوف انه ما شاء الله حاطك بعيونه...
- هههههههه ليش كيف حكمتي؟؟
- مارفع عيونه عنك من يوم دخلتي وبس يداريك
- هههههه ياحبي لك يا يمّة...(باست راس أمها وقالت: تصبحين على خير)
- وأنت من أهله
ولمّا رجعوا للبيت ....راح تغيّر ملابسها ورجعت لقت بدر جالس على كنبة في الصالة وحاولت تكون هادية وحاولت تكون زي ما قررت وتعطيه فرصة.

جلست جنبه على الكنبة وهو فجأة التفت لها وعطاها ابتسامة ذوّبت قلبها وكان قلبها يخفق بقوة وقالت: إيش تسوّي؟؟
- أفكّر...
- في ايش؟؟
- في قد ايش شكلك كان حلو اليوم....
- .......( كان وجهها أحمر لأن مدحه جاء في وقت ما توقعته وهو لمّا شاف شكلها قام يضحك وفجأة سحبها وخلاّها تستند على كتفه ) وقال:
- تراي ما أجاملك...أنت حلوة يا ريم...عالأقل في عيوني
- بدر خلاص...
- ههههههههه ليش مستحية كذا وربي ما كذبت أنت حلوة
- ترى إذا ما سكـّت راح أروح للغرفة
- أنت حلوة ياريم...(لمّا حاولت تشيل نفسها من الكنبة رجع سحبها وهو يضحك وقال: خلاص أوعدك راح أسكت لكن بس اليوم)
- طيّب...تبي أجيب لك شي أو اسوّي لك شي؟؟ قهوة, شاي؟؟
- أبيك تكونين جنبي بس...(كانت كلمته هذي هي اللي خلّت قلبها يطيح بين ضلوعها)
- احم....طيّب....أنا اكتشفت عنّك شي
- ايش؟؟( اعتدل في جلسته)
- لاحظت انك تحب الشعر الفصيح أكثر من النبطي
- كيف عرفتي؟(كانت دهشته على وجهه)
- هههههه سرّ
- ريـــم....اعذريني لكن أبي أقول شي
- ايش؟؟
- ضحكتك حلوووة...تدرين أوّل مرة أسمعك تضحكين كذا من قلب , كنت خايف أكون لهالدرجة وحش بالنسبة لك ولا أخلّيك تضحكين من خوفك مني
- مو للدرجة هذي....بس
- بس ايش؟؟
- ما أدري...أحيانا ..,لا أقولك ..خلاص ولاشي
- لأ قولي ايش فيه؟؟
- مو شي مهم والله خلاص
- طيّب راح أخلّيك براحتك....إيش تبين نسوّي الحين؟؟
- أنت ايش في بالك؟؟
- أنا عندي كم فلم إذا حابّة نشوف شي أو إذا فيك النوم ممكن نأجله لـ بكرى
- لا عادي...ايش عندك؟؟
- تعالي شوفي اللي تبين...

كانت أحلى سهرة لـريم مع بدر لأول مرة من زواجهم...يمكن لأنها بدت تعرفه أكثر
المضحك إن بدر نام في نص الفلم ولمّا حاولت تصحّيه كان باين عليه الإرهاق وراحت للغرفة وأخذت واحد من الأغطية وغطّته فيه بدون مايحسّ
الجو اللي بينها وبين بدر الحين حلووو...لكن فيه شي خلاّها تحسّ إنها لازم تكون أكثر هدوء وتعطي نفسها كل الوقت لاجل ترتاح له أكثر من دون ما تجبر نفسها عليه
شعورها غريب...لأنها هذا الصباح قررت تكون معاه باردة شوي
ولمّا دخلت المطبخ لقت بدر جالس وكان الفطور وجاهز وابتسم وقال: صباح الخير يا عسل
- صباح النور( ببرود غريب استغربته من نفسها)
- كيف نمتي؟؟ ( بدت لهجة بدر تتغيّر لمّا لاحظ مزاجها وصار أقل حماس)
- الحمدلله ..وأنت؟؟
- كنت مسوّي لك الفطور...وشكراً لأنك تركتيني أنام لأني فعلا كنت تعبان
- أصلا ما قدرت أصحّيك...شكراً عالفطور.
بعد ماخلّصوا فطور قررت قرار غريب وجنوني وقالت: بدر...
- نعم
- أبي أروح لأمي اليوم
- طيّب مو مشكلة ..ومتى ترجعين؟؟عشان أرتّب جدولي
- ما أبي أرجع اليوم
- أجل متى ناوية ترجعين؟؟( كان في نظراته برود يقتلها , وهذا اللي خلاّها تحس إنها فقدت كل شي حلو كان بينهم أمس وقالت في نفسها : خلاص خربت ..مو مشكلة وإذا خربت؟!)
- ودي اقعد عندها أسبوع
- ماتحسّين أسبوع قليييل يا بعد عمري؟؟ ( كان في لهجته استهزاء واضح)
- بدر... أنا أبي أغيّر جو
- ليش؟؟ أنا سجنتك؟؟
- مدري ...أنا...أنا...
- أنت ايش؟؟ ليش ما تتكلمين؟؟
- أنا كل ما أكون جنبك ما أرتاح وأخاف أكثر
- تراني ماقد هجمت عليك عشان تخافين مني وبعدين فيه فرق بين عدم الارتياح والخوف وضحي أي واحد منهم تقصدين؟؟
- مدري مزيج من الاثنين ما أحب أكون جنبك طول الوقت! (حاولت تمسك هالكلمات قبل فوات الأوان لكن كانت الكلمات طالعه)
- اهمممممم ( جلس يناظر في الصحن اللي قدامه وقال بعد مارسم على وجهه نظرة تقهر: طيّب روحي لأهلك أسبوع ....حتى أنا بعد أغيّر جو)
- أنا أقصد..
- لا تقولين شي ياريم....روحي ماراح أمنعك ومتى ما بغيتي ترجعين تعالي
- بدر...
- أنا طالع للشركة...سلمي عالأهل
- بدر...
صفق الباب وراه وطلع ...وجلست تسترجع اللحظات اللي مرّت قبل شوي
ليش دايماً تحس بشعور غير مريح لمّا تكون جنبه وليش خافت من كلماته وليش خافت لمّا فكرت ايش ممكن يحصل؟؟ جلست تبكي وهي مقهورة من نفسها على غباءها اللي خلاها تفقد الرابط الوحيد اللي كان بينهم أمس وعرفت إنها فعلا هي الغلطانة لأنها افتعلت مشكلة من لاشيء لكن خلاص ماراح ينفع لأنه طلع الحين ولا راح تقدر تواجهه هو وأسلوبه الساخر بنفس اليوم لأنها ماتبي تبكي قدامه

...............
استغربت أمها جيّتها المبكرة وقالت: أهلييييين ياعمري كيف حالك؟؟
ووين زوجك؟؟ وليش جاية مبكرة
- يمّة كل هالأسئلة ههههههه تبين أجاوبك عليهم عند الباب ؟
- طيب يالله هذاك دخلتي ...
- أبد طلبت من بدر يخليني أجي عندكم وترجيته يخليني عندكم كم يوم لأني مشتاقة لكم
- مجنونة أنتي؟؟ أنت عروس وجاية للبيت؟؟
- إيه عادي...ولاّ تبين تطرديني ويقول زوجي أهلك ما استقبلوك
- أنت تعرفين إن البيت مفتوح لك على طول ...بس البنت السنعه اللي تجلس عند زوجها
- خلاص يمّة ذا أيام أوّل
- والله بدر معطيك وجه.....
- يمّة..وش الكلام ذا ترى أنا اللي بزعل الحين خلاص جيت وانتهى الموضوع
- طيب ليش شكلك كذا؟؟شكلك زعلانه؟
- لا ماني زعلانه
- لاتكوني متخاصمة مع زوجك؟؟
- لا يمّة مافينا إلا العافية أنت هدّي أعصابك
- مدري قلبي ناغزني....أكيد؟؟
- أكيييييد
كانت تتمنى لو جوّالها يدق وتلقى رقمه ...كانت تتمنى لو تملك شويّة جرأة وتكلمه لكنها خافت من عجرفته وخافت من أسلوبه معها...قررت تؤجل المواجهة لـ بكرى أو بعده بعد ماتخفّ حدة غضبه وفجأة سمعت أحد يناديها ولمّا نزلت لقت باقة ورد كبييييرة...وأمها مبسوطة وتقول: زوجك هذا ماشاء الله عليه ...للدرجة هذي يحبّك؟؟
مرسل لك كرت مع الباقة
- مين اللي جابها؟؟
- السوّاق
- .....(حسّت بخيبة أمل لكنها راحت بسرعة ومسكت الباقة الكبيرة بين يدينها ولمحت الكرت ولمّا فتحته كان مكتوب عليه" إلى حبّي" )
قلبها كان يخفق بقوووة....معقولة تكون هذي عربون سلام بينهم؟؟ يمكن يبغى يبدى هُدنة...راحت لغرفتها واستجمعت شجاعتها ومسكت الجوّال وطلبت رقمه كانت حابسة أنفاسها تستنـّى تسمع صوته لكن محد ردّ
دقّت عليه كم مرة ولا ردّ.....غريبة !! السوّاق توّه جايب الباقة مو معقولة يكون بدر نايم
لكنها قررت إنها ماتدق مرة ثانية لأنو أكيد راح يشوف رقمها ويعرف إنها اتصلت عليه...حاولت تنام بصعوبة بين زحمة الأفكار وفارقت العالم!

استغربت إن اليوم الثاني والثالث لها في بيت أهلها تكررت فيه نفس الحركة ولا اتصال واحد من بدر....حسّت إن فيه شي غريب وقررت إنها خلاص لازم ترجع للبيت
دخلت البيت اللي كان هادي وحاولت تلقى له أثر وراحت لغرفة النوم وشدّتها ريحة عطر بدر...اللي كانت لسه في الهوى...شكله توّه طالع
راحت وقفت عند الطاولة واللي كان عليها العطر وبحركة لا إراديّة شالت العطر وحاولت تشمّ ريحته! معقولة تكون اشتاقت له؟؟ والاّ ايش اللي رجّعها بدري للبيت وهي قالت له إنها راح تقعد أسبوع...أصلاً تفكيرها طول الثلاثة أيام كان محصور فيه...يعني ممكن تكون هذي بداية لحب في قلبها له؟
قاطع تساؤلاتها صوت الباب ينفتح وراحت بسرعة للصالة عشان تشوف مين
كان قلبها يخفق بقوووة من الترقّب...وفجأة لقته واقف عند باب الصالة وعلامات الاستغراب على وجهه وقال: من متى أنت هنا؟؟
- توني جايّة...
- ليش نسيتي شي؟؟
- لأ....
- غريبة...كنت أحسبها أسبوع إذا ما خانتني الذاكرة( كانت نبرته تنرفزها لكنها حاولت تكون قمّة الهدوء وتتجاهل نبرته)
- طيّب قررت أرجع قبل أسبوع فيها شي؟؟
- لا ...البيت بيتك محد يقدر يقول لك شي ( وسكت للحظات)
- شكراً على الورد
- الورد؟؟ أهااااااا....كان واجب لا أكثر
- كيف واجب؟؟ ممكن تفهّمني؟؟ ما أظن إن أحد يمسك ساطور فوق راسك يقول أرسل ورد
- هههههه يعجبني التشبيه...لكن كان هذا هو الشي الوحيد اللي طرى في بالي عشان أمّك ما تحسبنا متهاوشين
- ايش؟؟ (آمالها تحطّمت قطعه قطعه...كانت متوقعه إنها ممكن تكون نيّة صافية,كيف نية صافية وهو مبيّن عليه مجروح أو مقهور ويمكن حاقد بعد!)
- زي ماقلت لك...كان واجب
- طيّب...شكرا انك تذكّرت الواجب...شكلي معطّلتك عن موعد؟؟
- إيه كانت ناسي مفاتيحي وجاي آخذهم لأن عندي موعد عشاء مع كم عميل عندي
- يعني بتروحون للمطعم؟؟
- هو فيه غير كذا خيار؟...أكدّت حجزي قبل شوي في المطعم
- طيب ليش ماقلت لي عشان أجي ونسوّي العشاء هنا في البيت لأنه راح يكون ودّي أكثر
- ماكان ودّي أقطعك عن إجازتك في بيت أهلك( قالها بتهكّم يرفع الضغط)
- صح يمكن كان عندي إجازة في بيت أهلي لكن ترى أنا زوجتك وربّة المنزل بنظر عملائك إلا إن كانك لسّه تناظرني بنظرات إني طفله فأنا أقولك إن الطفلة هذي موجودة في ذهنك أنت بس
- واللي اثبت لي الشي هذا تصرّفاتها قبل ثلاث أيّام!
- نحكي في الموضوع هذا بعدين
- يعني؟؟
- يعني دق عالمطعم وكنسل معهم الحجز وارجع دق عالعملاء وقلّ لهم إن بيت مفتوح
- طيّب والأكل؟؟
- الوقت لسّه مبكّر أقدر أسوّي شي
- تعرفين تطبخين؟؟؟
- فيه أشياء كثيرة ما تعرفها عني يا بدر ولاتضيّع الوقت بالكلام لأن الوقت قصير
- طيّب....(لانت ملامح وجهه وطلع من الغرفة ودخل مكتبه يسوّي اتصالاته)

كانت مشغولة طول فترة العصر والمغرب وقدرت تسوّي سفرة ترفع الراس
حتى هي كانت مبسوطة من نفسها وكانت متأكدة إن بدر راح ينصدم صدمة حياته لأن الصغيرة اللي في باله قدرت تسوّي هذا كله

جوا الضيوف حوالي الساعة 9 بالضبط وكان كل شي مجهّز تمام ولمّا جاء وقت العشاء وراح بدر يتفقّد المكان ناظر نظرة ذهول للسفرة والتفت ناظر في عيونها وابتسم ابتسامته الحلوة وطلع

بعد ما راحوا الضيوف , جلس بدر على كنبة الصالة ولمّا جت جلست قباله
التفت عليها وناظرها بنفس طريقة نظراته الغريبة واللي ماتعرف ايش تصنّفها وبعد لحظات سكوت من كل الاثنين قال: العشاء كان مرّة حلو...تسلم يدينك
- أعجبهم؟؟
- كثييييييير حتى واحد قال من أي مطعم لكن أنا قلت له انه شغل "مدامتي"
- مدامتك؟؟ ( قلبها تغيّر من محله يوم قال الكلمة هذي )
- فيه بندول؟؟
- بندول؟؟
- ايه راسي مصدّع....
- ما شربت قهوة اليوم؟؟
- لا مو على كذا ...مدري وش فيني ...يمكن من التعب
- طيب ليش تتعب نفسك ارتاح شوي
- صار لي ثلاث أياّم مانمت زي الناس!
- .....( عقلها راح لاستنتاج يقول: معقولة يكون هو ما قدر ينام مشتاق لك بعد؟ لكن هذا الاستنتاج تبخـّر لمّا قال بدر بسهولة للتبرير)
- من كثر الشغل!
- الله يعينك ....
- شكرا ياريم......على العشاء
- العفو

قام من مكانه وراح لمكتبه...وخاب أملها ...لأنها ماملكت فرصة تستجمع فيها شجاعتها وتقول آسفة لكن ما قدرت.

يتبع ....
ومنتظرة ردودكم الرائعه