وصف شوارع التفحيط ارجو التثبيت

هولاكو الحكايم

السلا م عليكم شباب كيفكم
اليوم جايبلكم موضوع جديد

توصيف الشوارع واللي يعرف اي شارع يقوله

بالنسبه لشوارع الدخل مايحتاج اكتبها معروفه لكن ابذكر الل غير مشهوره


شارع البركسات
امسك الدايري الشمالي يجيك مخرج رقم 5 طريق الملك عبدالعزيز خذ المخرج باتجاه الشمال تلقى نفسك طبيت الشارع
ـــــــــــــــــ
شارع الفروسيه والبعارين والبعارين عكس
امسك الدايري الشمالي ورح سيييييييده باتجاه الشرق كأنك رايح للدمام
ثاني مخرج بعد مخرج الفحص هذا هو مخرج البعارين خذ المخرج وامش شوي يجيك البعارين وامش شوي يجيك البعارين عكس
وامش شويتين وارق فوق الكوبري وانزل وامش الين تجيك اشاره هذي اشاره الفروسيه
ــــــــ
شارع لعيونك بالروضة
امسك الدايري الشرقي باتجاه الجنوب يجيك مخرج 11 خذا المخرج باتجاه الشرق رح الى آخرالشارع بعدين لف يمين باتجاه الجنوب ورح سيده تجيك اشارة شارع الأمير بندر رح يسار هذا الشارع
__
السلي نادك
مخرج16 واتجه شرق بعد الاشاره الثانيه هذا نادك
اما مع الاشاره الاولى يمين هذا ابراج السلي
__
شارع ساسكو سلمك الله امسك الدايري الشمالي متوجه غرب
ابتل سيده لين يجيك مخرج 2 قبل مخرج 2 اصفط يمين وابشر باللي يسرك
_
.دريم سلمك امسك الدايري الشرقي متوجه شمال للمطار
تعد سابك ومخرج 8 يجيك مخرج مكتوب طريق الثمامه خش يمين
ابتل سيده متوجه شرق يجيك اول دوار يبناء تعده امش لين يجيك
الدوار الثاني خش مع الدوار الثاني يمين عاد هذاك دريم


رشوش
تعد دوار دريم لين يجيك اول دوار خش يسار كانك رايح لطعوس الخزام
تجيك لوحه مكتوبه قاعة رشوش خش يمين وابتل سيده
ذاك الشارع اسمه رشوش

شارع البعارين امسك طريق الدماااام .. وامششش الين يجيك مخرج الثمامة اطلع معه وامش سييييدة لين تشوف محطة خضرا ..عب فل .. وروق مع الكل ..
____
شارع الغدير في الدخل
وأنتو جايين سلمكم الله من الجسر المعلق من الشمال إلى الجنوب يجيك مخرج 28 ديور مع الإشارة يسار وارجع على الخدمة وامسك الخدمه إلين تجيك أول إشارة خذ يمين بس لا أحد يتهور وياخذ شوط بصراحة الشارع يعطيك هجولة وبتل إلى آخره وهذا هو الشارع
____
البحري الجديد,, والقديم
امسك الدائري الشمالي واذا جاك مخرج 7 خش معه وتجيك اشاره لف قبلها يمين واذا لفيت ادخل الشارع العام سيييييييييد تجيك اشاره
تعدها واذا تعديتها وانت مسيد هذا اول شارع البحري القديم ابتل تجيك اشاره تعدها وتجيك اشاره ثانيه تعدها بتشوووووف مسجد كبير على يدك اليمين ابتدل وهذا الشارع قداااااامك عسى الوصف واااااااضح
____________________________________
شارع العماريه امسك الدايري الشمالي متوجه غرب ... إلاااان يجيك مخرج 4 الي هو طريق القصيم خذ المخرج باتجاه الشمال
ورووووح سيده اذا صار يمينك نادي الشباب خش مع الخدمه وتجيك اشاره لف يمين وبعدين تجيك اشاره لف يسار هذا هو شارع العماريه الدولي
شارع العماريه امسك الدايري الشمالي متوجه غرب ... إلاااان يجيك مخرج 4 الي هو طريق القصيم خذ المخرج باتجاه الشمال
ورووووح سيده اذا صار يمينك نادي الشباب خش مع الخدمه وتجيك اشاره لف يمين وبعدين تجيك اشاره لف يسار هذا هو شارع العماريه الدولي
_______
الفريان
وانت جاي مع الجسر المعلق متوجه جنوب يجيك مخرج 27 الي هو دايري الدخل خذ فوق تحت مع المخرج وأول شارع يجيك بعد ما تديور خش معه بتصير علي يسارك محطه
روح سيده هذا الشارع
وشارع الملاعب هو الشارع الموازي للفريان
________
شارع الدفاااااااااااااع (( المطافي غير ))
امسك الدايري الشمالي باتجاه الغرب يجيك مخرج 4 خذ المخرج باتجاه الشمال يعني طريق القصيم .... وروووح سيده بيجيك كبري ارق من فوقه وانزل بعدين امسك الخدمه وبيصير علي يمينك السليّم للعقارات ... روووح سيده تجيك اشارع وعلى يمينك مركز تدريب الدفاع المدني رح يمين تجيك اشارع رح سيده(( وتلقى نفسك بشارع الدفاع ))
______
وصــف دائري الدخل :

طال عمرك وأنت متجه شمال يجيك مخرج ( 27 ) .. هذه هو دائري الدخل
______
وصــف شارع الـشركة:

أدخل مع مخــرج ( 30 ) تجيك أشارة رح يسار بعدين تجيك أشارة رح على طول ، الأشارة الثانيه لـف يمين بعدين تجيك كبينه الجويعد من بعدها على طول رح يسار وبعدين أطلع على طول لين تجيك شركة الكهرباء على يمينك راح تلقى أنوارهاصفرا وهذه هو الشارع .
شارع الوشاااااااااح
اللي هو امتداد طريق الامير عبدالله وانت متجه للجامعه ويكون بين شارع التخصصي وشارع الامير تركي بن عبدالعزيز الاول
يحب المشاوير
____
شارع2000خنشليله والاصفر
الله يسلمك وانت جااي من الدايري الغربي بيجيك ثلاث مخااارج قدامك خذا الي في الووسط الي يودي على الدايري الجنوبي
بعدين بيجيك كوبري اطلع فووقه ويجيك الثااني اطلع معه وبعدين يجيلك الثالث ادخل من تحته تجيك اشاره خذ يسااار معها بكذا انت دخلت خنشليله سيييد سييد شوي بيجيك شاارع الصفر على يمينك وعلى يساارك الي على يمينك هذا شاارع 2000والي على يساارك هذا الشاارع الاصفر بخنشليله وبكذا ينتهي الوصف
على فكره شاارع 2000 شااارع قدييم على اياااام غرمان وبوبو وبدر الكنق
وشكرااااااا
___________________________
شارع الأربعين بالربوة
امسك الدايري الشرقي مخرج 15 ادخل معه يصير اسواق المجد يمينك رح مع الاشارة يمين امش سيدا لين تجيك اشارة رح يمين هذا هو الشارع
_____
شارع (( الهــيـــئـــة ))
وانت فوق الجسر المعلق باتجاه الجنوب خذ اوّل مخرج تجيك اشاره رح سيده تجيك اشاره ( بلال بن رباح ) ... رح يسار ..... تجيك محطه على يدك اليمين ... بعد المحطه فيه شارع سيدين لف مع الشارع يجيك شعول على يسارك ادخل مع شعول ورح سيده اول اشاره تعدها ثاني اشاره تعدها ثالث اشاره ادخل يمين بعدين رح سيده ... وخذ فوق تحت قبل الإشاره وأول شارع يجيك على اليمين منوّر إدخل معه ورح سيييييده تجيك اشاره تعدها ووقف على اليمين (( وتفرج على النطل والإبداع


شارع المواصيربالشفا
سلمك الله وانت ماسك طريق الحجاز كنك تبي تروح مكهتبي تجيك اشاره تعدها
وتجيك ثانيه تعدها والثالثه خش يسار بتصير المعارض على يمينك
امش لين تجيك اشاره تعده والثانيه تعدها والثالثه بينتهي الشارع ديور علطول تبي تصير على يمينك لفه خش معها هذا المواصير
غروب الشفا
وانت طاالع من شاارع المواصير خذ يمين مع الاشاااره وسيييد لين تجي اشاره سيييد سيييد لين يجيك تقاااطع سيييد وتصير الصناعيه على يسارك امش امش امش ليين يصير الشارع ضيق يوقف الشااارع تلقى الشااارع على يمينك شااارع كبير وسيييع ويقع عند بعض الورش والمستودعات الي في الشفاا
نها وند باله
سلمك الله وانت وانت جاي من الدايري الغربي طالع عالدايري الشرقي اذا جاك مخرج الحراج خش يمين سيد ارق الكبري بعد الكبري تجيك اشاره خش يسار سيد تبي تجيك الاشاره الولى تعدها والثانيه خش يسار سيد لين تجيك اشارهديور وامسك الخدمه سيد لين تجي على يمينك حديقه هو بعد الحديقه على طول والشارع اللي قدامه اسمه غرمان


سـكوبي:
ونت رايح يسار مع مخرج 29 الي هو حق الغرروب اول إشااره رح يســار ســـيد وخلك مناضر على يسار بتجي محطه بـعد المحطه شاارع فيه جزيره بالوسط هذا هو شارع سكوبي.

الشركه:
ونت رايح مع مخرج الغرروب الي هو 29 رح كنك متج لله غروب بتجيك الاشاره الاولى الي يصير على يسارك سكوبي انت رح يمين وسيد قداام يجيك على يسار القرريه الشعبيه رح قدااام وبتلقا اخر شي شركة كهررب هاذ هوو الشاارع.


الــفريــان:
مخررج 27 متجه انت للجسر المعلق اطلع مع مخرج 27 بتجيك اشاره رح قدام واول شارع بيجيك لف يميمن هذا الفريان وبتلقا بالزاوبه محطه.





الـوعلان:
مخررج 27 وانت موقف عند الاشره رح يسار هذا انت بالوعلان بتلقاا لووحه كبيرره فووق مكتوب الوعلان.


الرسـاله:مخررج 28 مع الاشاره يسار بتكون في الرساله وعلى يسار مداري الرساله.


الاحزان:
مخررج 28 وانت بالرساله الشارع الموازي للرساله على يسار هذا الاحزاان.


الجــيل:
اضاهر مخررج 25 الي يطلعك على شارع الابراج الي فيه مطعم ماما نوره المهم انت طالع مع المخرج بيجيك على يسار قصرر القلعه انت رح يمين بتصير في شارع الابراج سيد قداام لين تجيك بندة البديعه بعدين اول شارع بيجيك لف يمين هذا شارع الجيل وبتلقاا الشارع كله مقااهي وفيه مدااارس الجيل.

ليـالينـا:
وانت بالجيل ونت داخله مع الابراج سيد اول إشاره بتجيك رح يمين بتصير في شاارع اصفرر سيدد لين يضلم بك الشاارع بعدين بتجي قابلك محطه الشارع الي عليه المحطه هذا ليالينـا.

البـجادي:
وانت في ليالينا خل المحطه على يمينك وررح قداام بيجيك إجباري يمين رح وبتجيك لإشاره رح يمين هذا البــجادي.

التنــامي:
وانت عند إشارة البـجاادي رح قـدام بـعدين اول شارع منور يجي على يدك اليمين هذا التنامي وهو موازي للبجادي.

الباصات طال عمرك

انت وجاي على الدايري الشمالي موجه لطريق الملك فهد ومخلي مخرج 6 وراك

اطلع مخرج 5 ولف يسار وعلى طول امسك الخدمه تجيك الأشاره ويكون برقر كنق على يمينك

لف يمين وسيد لين يجيك حرف T لف يمين على طول تبي تجي في وجهك الأشاره ديور ( فوق تحت )

وشد العزم يبي يجي على يسارك وانت شاد العزم المخازن الكبرى ابد عقب المخازن ب 50 متر يجيك شارع الباصات

آخر زياره

هههههههههههههههههههههه

مشكور اخوي

مملوح الرياض

على العقل
ايه والله اهل العقول في نعمه ...

هولاكو الحكايم

الموضوع عادي ولاينبغي ان الواحد يتنرفز وليه الزعل
وللكاتب حرية الكتابه مالم تصل به الى منعطف ضيق وبعدين يطيح على وجهه
هههههههههههههههه
الموضوع لايعد كونه موضوعا
وانتهت السالفه

نوافـــــــــي

شارع لعيونك ...

ههههههههههههههه

اعجبني اسم ذا الشارع

نواف

بايووووووووو
ماريوووووووو

هزيم الرعـــد

مشكور علي الموضوي ويعطيك العافيه