[all1=FFCC99]تشكي وانا اشكي من جروح الليالي
تبكي وانا ابكي من صواديف الاقدار
ان كان تبكي فقْد حبٍ وغالي
قبلك فقدت احباب من عز الاخيار
هذا ولد عمي وهذا ولد خالي
وهذا صديق وهذا رفيق وهذا جار
واقسى الفراق اللي يهزّ الجبالي
لا من تفرّق حب عن حب باجبار
يبقى خياله يتبعه كالظلالي
ما يقدر النسيان لو كان جبّار
ليه يا زمن حكمك علينا ضلالي
حوّلت سعدي وسعدها حزن وامرار
واضعفتني من بعد قوّ احتمالي
ومن عقب ماني رابط الجاش صبّار
غديت هشّ القلب مما جرى لي
ما اقدر على الصدمات لو كانت صْغار
لا من تذكّرت السنين الخوالي
طيرين بجْناح الهوى دوم سمّار
واليوم راحت ما بقى إلا الخيالي
وراحت معاها امال واحلامٍ كبار
واصبحت كنّي من رقى فوق عالي
وفي لحظة زلت به الرجل وانهار
ويومه تفكّر واثره بقاع خالي
ما حوله إلا الجرح في القلب تذكار
ان جرّ صوته جاوبته الجبالي
بين الرجا والياس ماشي بالاخطار
مكتوب يا قلبي عليك الوبالي
مكتوب اعيش بليل مايعرف اقمار
يا صعب تعويضه على كل حالي
ما ظنتي في البيض مثله ولا صار
الزين له وحده وطيب الخصالي
كامل مكمّل من مناعيرٍ احرار
وقف الزمن ضدي ولا رحم حالي
باسباب من لايفتهم حب الاطهار
الحب ما يعرف حدود المحالي
بركان يتفجر بلحظه بلا انذار
وش ذنب حبّي ينحرم من دلالي
وش ذنب قلبي يصطلي لاهب النار
يالله ولا غيرك عليه اتكالي
تجمع قلوب تشتكي ضيم الاقدار[/all1]