وها هو مرتني الدنيا الغثيث يعود إليكم من جديد بعد أن أجرا عملية قيصرية في خشمه فهل من مرحب 
<< يسهل ربك عطنا اللي عندك
سالخير على الجميع
أولا وقبل أن أبدأ في الموضوع حبيت أوضح للسادة القراء أن اللي كاتب الموضوع أنا 
فاعلموا يارعاكم الله ان ما اصابكم ما كان ليخطئكم وما اخطئكم ماكان ليصيبكم وسلف ما عندنا سلف 
نبذه مختصره عن الكاتب
الأسم كما هو موضوح أعلاه أحمد 
<< يالله حيه والله أن تقلط
خريج جامعة المصاله تخصص لكاعة 
أعزب يا ويلي ويلاه وما عندي عيال
من هواياتي أشرب تتن وأناظر صور الحريم اللي بالمجلات وأرسم لهن شوارب إلا إذا صرت صايم ما أسويها 
ما أدري يالربع يخالجني إحساس متعوب عليه أني أبصير خطابه يوم من الأيام << وجه يقول لايقه عليك
مقدمة
اللهم أغثنا , اللهم أغثنا , اللهم أغثنا
انتم ماتدرون وش سبب القحط اللي حنا فيه , البسبب يا جماعة والعلم عند الله هالمهور الغاليه يالله أنك لا تعاقبنا
أعنبو بليسهم هالشيبان عندهم من البنات إلى بكره 
ولو يجيهم واحد يخطب صمخوه بهاك المهر مع جبهته يطلع الولد مع الباب دايخ 
ومرتفع عنده الضغط ومنهار ..
يتسذب اللي يقول أن الحوداث سبب رئيسي للوفاة !!
ما قضى على شباب السعودية إلا مثل هالشيبان ومنهم على شاكلتهم عليهم من الله ما يستحقون
ما أقول إلا الله أوكبر عليك يا هالشايب , مير خله كود يجي يوم نلقاك باسط بـ بناتك على الرصيف يا أنا أبضحك عليك وأدق على مكافحة التسول
وش رايكم بالمقدمة ولا مقدمة أبن خلدون
على العموم مهوب هذا موضوعنا << تقوله صادز
الحين ياللي مهوب فيك جعله فيك قل أمين , الشباب شوي وإلا يسون أنتفاضه على الشيبان وأنت تقول مهوب موضوعنا
طيب ما راح أبعد عنه
الحديث هنا عن مرحلة ما بعد المهر
لو فرضنا أن الولد طمس الله على قلبه ووافق على مهر واحد من هالشيبان قاتلهم الله أينما ذهبوا
وهي مرحلة طلبات الأم وبنتها اللي ما تنتهي نسأل الله السلامة والعافية
عاد تحسبهم معطين الولد حقه الشرعي ( النظرة الشرعية ) وشايف البنت قبل يجازف بحياته !!
أبدن ما شافها ولا شم ريحتها , مغير يمشي على عماها أن صابت صابت وإلا يبتل طول عمره في شك أنه متزوج أخوها 
<< سمعنا وسلمنا
**********
الولد خطب البنت وتملك عليها وعمره 26 سنه يعني في عمر الزهور ورده مفتحه وفي عز شبابه
تم تحديد موعد الزواج بعد ثلاث شهور 
لكم الله ماتجي ليلة زواجه إلا وعمره يناهز الستين ربيعا
وش السبب !!
أم البنت , صحون المطبخ مهيب عاجبتها 
تقول : أنهن موب صين يتكسرن بسرعه
( والله على حسب بنتس ورفالتها )
البنت تكلم المجني عليه الولد تقول له : حبيبي 
كنبات الصاله لونها يجيب الكتمه وهو بنفسه يقول : والله ما ندري منهو اللي يجي الكتمه 
أم البنت تكلم أم الولد وتقول لها : شبكت بنتي ذهب أبيض مرصع بألماس , وأنا أجزم لو تحرج على البنت وأمها ما جابو قيمته
وصباحيتها طقم ما يقل قيمته عن خمس ألاف ريال << وجه ماسك راسه من الصدمه
والبنت مغير تناقز من مشغل إلا مشغل 
هذا صبغة شعر وهذاحمام زيت وهذا تقشير << برتقاله مهيب بنت
والمشكله شكلها ما تغير نفس الشهابه << من جاب طاري ركب سود
وكل هالمصاريف على ظهر هالضعيف الولد وهو حايس بسوق الغنم يدور على ذبايح
يعني الولد ما تجي ليلة زواجه إلا وصحته في الحظيظ يدخل الصاله ومعه كيسه فيها علاجات
حق الضغط والسكر و المراره والرمتيزم , هذا غير اللزقات اللي بظهره << هذا وهو ما بعد دخل
وصباحية زواجهم تنهي البنت مستقبل الولد بكلمه وحده تقول له : قم أفتح الباب وإلا هذي بعد ما تعرف لها << الله يلوم اللي لومه
والله أن اللي مثل هالولد أنهم مجاهدين في سبيل الله ومناظلين ولهم الجنه بأذن الله تعالى
أما اللي مثل الشايب وبنته وأمها وفـ هؤلا ما إلهم إلا أن نرفع أيدينا تالي الليل ونرسل عليهم أسهم بدعواتنا عليهم علها تصيبهم بحول من الله وقوة ..
وأخرتها هالمسكين يا يراجع في مستشفى الصحة النفسية أو في السجن
مره جاني واحدن من هاللي يحومون بالشوارع والأسواق ويعطونك ورقه يشحذون فيها قال لي :
أنا قدر الله علي وأقدمت على فعل الزواج وحالتي تصعب على الكافر تكفى ساعدني و عطني الله يجازك خير << يتسذب
قلت له : والله أنا ياخوك مالك مني إلا الدعوات في ظهر الغيب مابيدي شي أسويه لك
غير أن الله يشيلهم عنا ويهدي وزارة الداخلية وتوافق على الزواج من الخارج
يا عنك لو توافق وزارة الداخليه على زواج السعوديين من أجانب ,, أنفكت أزمات كثيره
أولها أزمة الشيين اللي بعيالنا خلونا نحسن نسلنا يا ناس ونطلع بـ ورعان نكشخ فيهم بالمحافل الدولية
ورعنا حده بالزين عمر خمس سنوات أو ست بالكثير وإذا هو أطخم أطخم ثمان سنوات بعدها الله يخلف ما تعرف هذا وجه وإلا ركبه ..
وثانيا تنفك أزمة غلا المهور لأن النظرية الإقتصادية تقول : كلما زاد العرض أنخفض السعر<< أقعد يا ولد
أما أنا عني يا واحد , أخذ لي سوادنيه أصرف لي , على الأقل ما تبين أن ركبها سود
المهم وشلكم بكثر الحتسي
نخرج من الموضوع بالتوصيات التاليه :
1 - تقنين المهر ووضعه ضمن لوائح وأنظمة حماية المستهلك بمعنى أخر جدولة البنات ..
المزيونه الطخمه لها سعر واللي وسط لها سعر واللي شينه تصرف عمرها ما أطرف واحد
عشان ما يتوهقون الشباب ويدفع اللي وراه واللي قدامه وأخرتها يطلع متزوج رجال
2 - مصاريف الزواج تقسم بالتساوي بين الزوجين بمعنى أنتي يالبنت الله لا يهنك تطمرين لسوق الغنم وتشترين نص الذبايح
يعني عشان العصمة بيد الرجال ياكل تبن لحاله
3- أما أم البنت يحجز لها تذكرة سفر وإقامة في نيجيريا خلال المدة من تاريخ الخطوبه وحتى بعد ليلة الدخله بثلاث شهور .
تخبرون الأم ما تترك بنتها حتى من بعد ما ياخذها زوجها وتسأل عن أدق التفاصيل أهب يا وجهها .
هذا والله أعلم
كتبه الفقير إلى ربه العزوبي أحـمـد