( الجزء الرابع)
في استراحة الرجال ( الديوانيه)
بوسعد:- السلام عليكم
الكل:- وعليكم السلام
بوعبدالله:- شخبارك يابوسعد وش اخبار سعد والعيال
بوسعد:- الحمد لله , الا وش اخبارك انت وش اخبار الشركه
بوعبدالله:- الحمد لله كل شي تمام
بوسلمان:- الا سمعنا يابو عبدالله انكم بتفتتحون فرع جديد في الامارات
بوعبدالله:- ايه الحمد لله , وانشالله بنفتتح فرع قطر على الشهر الجاي
بوحمد:- ماشالله شركاتكم في توسع
بوعبدالله:- ايه , الحمد لله
بوعبدالعزيز:- الله يوفقكم ويرزقك بالولد الصالح اللي تقر به عينك
بوعبدالله:- آمين , وثانيا أي ولد الله يهداك بس , انا راضي باللي الله كاتبه لي
بوتركي:- لا والله وانا اخوك , الولد سند لك في كبرك , ناظر انا ولد تركي شايل عني كل الحمل
بوعبدالله:- اذا ربي كاتب لي ولد من ام العيال خير ونعمه
بومتعب:- ورى ماتعرس بثانيه وتجيب الولد اللي يفرح قلبك
بوعبدالله:- يالله شباب انا استاذن
بومتعب:- رواك زعلت يااخوي ترى كثير عرسوا على ثانيه وجابوا الولد ومازالوا يعيشون حياة سعيده
بوعبدالله:- انت ماقلت شي غلط عشان اتضايق ,وثانيا انت ماقلت الا الشي اللي حلله الشرع , يالله شباب انا استاذن
في الفيصليه( في الالعاب)
متعب يلعب رند ويبوسها ويقول لها:- بابا خلصتي من الالعاب
رند بابتسامه بريئه تاشر على الالعاب:- اعب هذا
يرن جوال متعب في هذه اللحظه
متعب:- هلا انتهيتي من السوق
العنود:- ايه خلصت , بس عسا رنودي ماازعجتك
متعب:- حبيبت ابوها , تبي تلعب كل الالعاب
العنود:- وش رايك نطلع فوق نتعشى
متعب بينه وبين حاله( والله انك دانه يالعنود على كل اللي سويته فيك يوم الجمعه مازعلتي)
متعب:- الا وش رايك اعزمك انا على أي مطعم برى المجمع
العنود:- حد يرفض عزومه , انا موافقه
متعب:- انا انتظرك مع رنوده في السياره
العنود:- انشالله
جود:- يمه بكره راح تجي طيف خويتي
ام عبدالله:- ومن هي طيف هذي؟
جود:- خويتي معي بالمدرسه
نوف- عسا اللي مطيحه معها هاليومين , اربع وعشرين ساعه مكالمات
جود:- ايه وابيغاكم تكشخون عشان تدخلون عليها , تبغى تشوف مشاعل , تمدحها لاتفشلونا وتنصدم فيكم
نوف:- احلى منك حتى اذا ماكشخنا
مشاعل:- اصلا ماراح نكشخ علشان مانخرب عليك
متعب:- وين ودك نتعشى فيه
العنود:- بصراحه لي كم يوم مشتهيه اكل حالي
متعب بابتسامة خبث:- يعني.........
العنود:- لااااا وين راح بالك ماني حامل بس ودي بمطعم صيني فيه مطعم ورى الفيصليه يمدحونه
متعب:- ايوه عرفته , خلاص ولايهمك نتعشى فيه
بيت بو فيصل
منصور:- السلام عليكم
فهد:- وعليكم السلام
منصور:- اخوي بو فيصل جا من الشركه
فهد:- اخوك الله يعلم وينه , ماله ارض من سما
منصور:- الله يكون في عونه
فهد:- وليه؟
منصور:- مع هذي المناقصه خايف منها , وثانيا انت ولا انت بمهتم , اصلا ماتداوم
فهد:- ومن قالك اني مو مهتم او مااداوم , مداوم اليوم من الساعه 11 الى 12
منصور:- ماشالله عليك , بالله عليك هذا دوام , راضي عنه
فهد:- ايه راضي , اهم شي اني انا راضي
منصور:- الا وش اخبار العيال؟
فهد:- كلهم بخير , الا انت اللي ماتنشاف دايم يسالون عنك
يقاطعهم صوت بكى كادي من الدرج
منصور:- استعد بالسباحات , جت الفياضانات
فهد:- اكيد مع دحوم , مجننها مع ان دحوم بيت خالته من العصر وش سالفتها هالمره!
كادي بصوت عالي وصراخ متجهه لهم
كادي:- ابغى ادخل غرفة فيصل هناك دحوم , هم مايفتحون لي
فهد:- دحوم بيت خالته والله ماجا
كادي:- لا , جا وعنده العاب داخل , وجالس يلعب اسمع صوتهم بس هم مايفتحون لي الباب يقول لي فيصل طيب طيب مده ولايفتح لي
منصور يناظر فهد بنظرات خبث ويضحكون
منصور:- اقول لاينزل عليك الان فيصل ويعلمك شمعنى الدموع , كل شي الا انك تقاطعينه
فهد:- هههههههههه
في هالاثناء تدخل ام فيصل
ام فيصل:- شعلامكم , وش هالضحك , وليه كادي تبكي صوتها موصل آخر البيت
منصور:- هههه طلعت لبنتك هوايه جديده , التخريب
ام فيصل:- أي تخريب بعد
فهد:- ابد , سلامتك بنتك مدلله وتبكي على اتفه الاسباب
نوره:- هلاااا والله, هلا وغلا وينك
منصور :- انا
نوره:- لا اجل فهد, ايه انت
فهد:- انا واثق ان الكلام داخل قلبك لي بس تستحين تقولينه وقلتي منصور , يالله مااكسر بخاطره
منصور:- ياشين الثقه يافهيدان
يدق جوال نوره
نوره:- هلا وغلا ببنت العم
مشاعل:- هلا فيك حبيبتي , كيف الحال
نوره:- الحمد لله , وانتي كيفك؟
مشاعل:- بخير دامك بخير
مشاعل:- الا اقول نوره انتي بالجامعه كنت تقولين ان عندك فيلم جديد مرعب
نوره:- ايه تقصدين house of wax
مشاعل:- ايوه, حلو؟
نوره:- يجنن , بس تراه مرعب ماينفع تشوفينه الا بالليل
مشاعل:- اوكي , ممكن تجهزينه اجي امره
نوره:- اوكي , انا بجهزه , بس مدامك جايه انزلي عندنا هذا عمي منصور هنا
مشاعل:- اوكي , مع السلامه
نوره:- مع السلامه
منصور:- من هذي , مشاعل ولا نوف
فهد:- مستحيل جود
نوره:- ليه مستحيل
فهد:- ذي بنت معقده هذي يبي لها القناه الاولى تجلس عليها بس واذا تطورت القناه الثانيه
ام فيصل:- ماذميتها انت مدحتها
نوره:- هههههه
منصور:- هههه لا جود اخر همها التلفزيون , بنت تموت بالكتب
ام فيصل:- ياحبني لهالبنت
فهد:- ماورثت ولد عمها شوي من حب الدراسه
نوره:- اريحكم , لاتحشون في هالجود تراها مشاعل وهذا هي جايه بالطريق
ام فيصل:- حياها الله
فهد:- وانشالله ناويه تشوفون الفيلم الان
نوره:- لا بس بتمره وبتجلس شوي معنا
منصور:- وهذي مشاعل ماتثبت في البيت ماعمري كلمتها الا وقالت انا طالعه
فهد:- ههههههههه تصريفه ياحظي ماتبيك
ام فيصل:- وانتم من تطرون اسم بنت تجلسون تحشون فيها
نوره:- ويقولون البنات صاحبات القال والقيل
فهد:- اشاعه اشاعه ولا حنا يالرجال اصحاب القال والقيل
نوره يدق جوالها:- اكيد هذي مشاعل وصلت يالله انا بطلع لها
ام فيصل:- قولي لها تدخل هنا
فهد:- اكيد بتدخل هنا , ولا انشالله ثلاثتهم ناوين يتركوني
منصور بصوت عالي :- مشاعل تعالي ادخلي مافي حد الا فهد تغطي وادخلي
مشاعل:- السلام عليكم
الكل:- وعليكم السلام
ام فيصل:- حيا الله شيخة البنات
مشاعل:- الله يخليك خالتي
منصور:- أي والله صدقتي
نوره:- الله واكبر عليك, الحين شيخة البنات ومن شوي كلام ثاني
مشاعل بنظرة غرور:- وش قايل عني
فهد يناظر في مشاعل ويبتسم
منصور:- يااحبك للفضااايح , سكتي , الحين انا اخوك وعمك بنفس الوقت وتقولين عني هالكلام
مشاعل:- ماعليك منها , وش قلت عني
ام فيصل وهي بتقوم:- ماقال عنك شي بس هي تحب تفتن , بروح ااكل لطوفه بنت فيصل واسوي العشا
منصور:- انا ماقلت الا الجد طول عمري اكلمك وتقولين انك طالعه
مشاعل:- ههه ليه مقهور اطلع
نوره:- مشاعل ليه ماجو نوف وجود معك
مشاعل:- نوف يقال انها في ثالث ثانوي بس ماتذاكر المهم انها ماتطلع وجود تذاكر
نوره:- هههههههه عاد نوف غير فله
منصور:- مشاعل بقولك ان الكاسيت اللي في سيارة السواق اخذته
مشاعل:- أي كاسيت
منصور:- المنوعات
مشاعل:- اهااااااا
فهد:- الا مازلتي يامشاعل روتانا متنقله
منصور:- واخيرا تكلمت
مشاعل:- هههههه اللي يشوفك ماتشتري اشرطه
نوره:- أي والله صدقتي من كثرهم انا اخذ وهو مايحس فيهم
فهد وهو واقف مستعد يطلع من الصاله:- ياحليلك يامشاعل والله كبرتي
في المطعم
يدخلون متعب والعنود ورنوده من باب المطعم
متعب تلفت نظره بنت معطيته ظهرها لابسه عبايه شفافه وريحة عطر شانيل فايحه منها
متعب في باله:- الله يذكرك بالخيريا ريم
يدخلون كبينة في المطعم ومتعب لازال سرحان ويقطعه صوت الجرسون
الجرسون:- YES SIR
متعب:- just minutes please
متعب:- هاه ريم حبيبتي وش حابه تاكلين
متعب احمر وجهه وحس ان الكلمه غلط ويقول في باله اكملها عادي يمكن انها ماحست
العنود حست بالكلمه وقالت ماله داعي اسوي فضايح في المطعم بخليها في البيت
العنود:- أي شي براحتك
في الكليه
جواهر:- يالله ياطول هالمحاضره
ساره:- لاطويله ولا شي بس يوم الاربعاء وآخر محاضره تحسين انها طويله
عبير:- تعرفون وش احلى شي اليوم؟
جواهر+ساره:- اكيد ان اليوم الاربعاء
عبير:- لا , لان اليوم نجلاء غايبه
ساره:- لاحرام عليك
مشاعل:- السلام عليكم
الكل:- وعليكم السلام
مشاعل:- الصبايا مجتمعات , غريبه مازلتوا مجتمعين ماطلعتوا
ساره:- وين كنتي فيه؟
مشاعل:- في القاعه , انشغلت الدكتوره ووقعت حضور لنجلاء
جواهر:- وليه موقعه لها انشالله
مشاعل:- مسكينه امس تعبانه, اكيد فيها شي
عبير:- لكن ولو ماكان حضرتيها
مشاعل:- حتى انا مااتقبلها , بس ولو لازم
ساره:- حرام عليكم ذالينها على هالتحضير
في هالاثناء يدق جوال جواهر (لسواق)
جواهر:- اطلع انا ازين لاتنقلب الان قضيه معكم , يالله عبير قومي جا السواق
عبير+جواهر:- مع السلامه
ساره+مشاعل:- مع السلامه
ساره:- مشاعل وش رايك نروح اليوم بيت امي ساره
مشاعل:- متى؟
ساره:- اليوم الظهر
مشاعل:- طيب , اكيد ماحسبتنا في الغدا
ساره:- ماعليك حنا نطلب غدا من برى وانا اوصلك معي مع السواق
مشاعل:- اوكي راح اكلم امي اني راح انزل بيت امي ساره ولاترسل لي السواق
ساره:- وحتى انا بكلم امي واعطيها خبر
في الشركه
منصور مستعجل وداخل
منصور:- هاه بو فيصل وش صار على المناقصه عندك خبر عنها
بو فيصل:- لا, انا يدي على قلبي , ويقولون ان الساعه عشر الصبح تطلع
بوعبدالله:- الله يصبرنا الى الساعه عشر
متعب:- اللي علينا سويناه والباقي على رب العالمين والمدير التنفيذي ومدير التسويق سوو اللي عليهم واذا ربي كاتب انها بترسي علينا بترسي والله يقدم اللي فيه خير
الكل:- آمين
جوال ساره يدق
ساره:- هلا
نايف :- هلا يالله اطلعي على الباب انا انتظرك
ساره:- انت! ليه وين السواق
نايف:- السواق سوى حادث وموقوف في المرور وانا جيت اخذك
ساره:- بس انا معي مشاعل بنت خالتي ونبي ناخذ غدا من برى ونروح بيت امي ساره
نايف بفرح:- حياها الله بس لاتتاخرون
ساره:- انشالله
ساره في بالها الله يعين على مشاعل اذا عرفت ان نايف هو اللي بيودينا بس بحطها قدام الامر الواقع
ساره:- مشاعل يالله السياره برى
طلعوا مشاعل وساره
مشاعل:- وين سيارة السواق مااشوفها
ساره تاشر على سيارة نايف:- هذي سيارة نايف يالله اركبي
مشاعل:- وليه ماقلتي انه نايف
ساره:- بعدين اقولك السالفه تراه مايحب ينتظر
مشاعل:- امري لله يالله
مشاعل :- السلام عليكم
نايف:- وعليكم السلام , كيف الحال مشاعل
مشاعل التقت عيونها بعيون نايف في المرايه ونزلت راسها بسرعه:- الحمد لله
وطوال فترة السياره كانت مشاعل مرتبكه نظرات نايف في المرايه ماوقفت مو قادره تاخذ راحتها
نايف:- أي مطعم تبون تاخذون غداكم
ساره :- ها مشاعل وش بغيتي أي مطعم
مشاعل:- أي شي
ساره:- شيليز
نايف:- اوكي
ساره:- نبي بطاطس مهروسه وجوانح دجاج واللي يعجبك من الطلبات مانردك والحساب عليك
نايف:- هههه تامرين امر, غريبه بتروحون بيت امي ساره , وش عندكم
ساره:- حنا واصلين مو مثلك يالقاطع
نايف:- الا انبسطتي مع خوياتك ياساره يوم الجمعه
ساره وهي مستغربه من سؤال اخوها:- اكيد وخاصه ان بعضهم من ايام الثانوي ماشفتهم
مشاعل مقهوره من سؤال نايف وتقول في بالها وش عليك من خوياتها
نايف وهو يناظر المرايه:- تعرفين وش اكثر شي عجبني في بيتنا يوم الجمعه
مشاعل في بالها الله وش هالجراه يانايف , اكيد يقصدني انا , بس عساه مايقول قدام ساره, يالله متى بنوصل والله انحرجت , احس ان المسافه طالت ليتنا ماطلبنا غدا
ساره:- وشو؟
نايف:- المرايه العاكسه اللي بمجلس الرجال اللي تطل على الحوش عرفتيها
مشاعل وعيونها بتطلع من مكانها , وش يقصد , لايكون شافني,
ساره:- عاديه من زمان عندنا ماحسيت انها حلوه الا يوم الجمعه
نايف :- عاديه ؟ ! الا حلوه( تلتقي نظرات نايف ومشاعل بالمرايه ونايف يبتسم) , الا وش رايك فيها يامشاعل؟
مشاعل منحرجه:- ها, مدري, ايه حلوه , يمكن , يمكن
نايف:- هههههههههه
ساره:- فيك شي انت اليوم , بالله عليك شفاطر انت اليوم داق علي معصب ,ركبنا السياره رايق
نايف:- هههههههه
ساره:- يالله يامشاعل ننزل شكل اخوي اليوم فيه بلا
نايف:- والله ودي انزل معكم , من زمان ماشفت امي ساره, ودي ازورها
تتوقعون ان نايف بينزل معهم بيت جدتهم , واذا نزل وش راح يصير؟
وفهد بدا يحب مشاعل او لا؟
وش قصة متعب ومن هي ريم؟