السلام عليكم ورحمة الله وبركاته
ها انا نكست اليكم مجدداً ( نكست = رجعت بس بطريقة الكر والفر <--- الاخ داخل معركه :mashftshi

العنوان باين من كتابه يعني السالفه عن الحب وما ادراك مالحب <-- اي عنوان اي بطيخه يايابا

اول شي احب ان أمسي عليكم واحد واحد بدون اي تجاهل لاي اسم ينطلق عبر القارات متجهاً نحو الدينمو ومشغلاً راديتر السياره التي ينبثق منها الانترنت واتواجد معكم عبر هذه المعزوفه الموسيقيه معزوفة الخبال الغير مباشر

والسالفه بالتفصيل هو ياطويلين العمر والسلامه كنز لا يفنى

اني تنيلت على مخي وحبيت لي انثى :rolleyes:

وياعيني على هالحب يقطر رومنسيه يتأجأج باالسعاده

بدأية الحب كانت قطرة عيون عطانيها الطبيب ( الطبيب = الدكتور )

وقالي لاتحط على عيونك غير ثلاث مرأت باليوم الظاهر بندول ماهي قطره

المهم سمعت كلام الدكتور وصرت احط من هالقطره لين الله يفرجها

خلصت القطره وهنا انا دجيت قلت بقلبي لازم اشتري قطره ثانيه بحكم الذكاء الي بمخي بدون لا اجي للدكتور

رحت وانا كلي رجوله ( الرجوله = عكس الانوثه وهو يمتاز بالدفاشه المطلقه التي تنبعث عن انبريالات لوجستيه ربما تجعل اليد تمتد بخشونه نحو الهدف ومن اهم الاهداف انذاك كانت القطره )

رحت للصيدليه وبكل فن وذق عطيت القطره الفاضيه للصيدلي وقلت له عب لي القطره حق خمس ريالات <--- مفلس بنص الشهر

تقول غاز ماهي قطره ابيه يعبيها المهم سمعت كهكهة انثى وبحكم ان عيوني ماهن جيدات بالقز انذاك توكلت على الله وصرت اعتمد على الأذن ومن هذا المنطلق أستنتجت ان الصيدلي المذكور = انثى


هنا عاد تخبرون الشباب لازم يجي وقت التميلح الصيدلي طلع بنت هلا والله قعدت الولش ( اي ازقرط وهذي الترجمه خاصه لسوزان المصريه الي معنا )

المهم قالت هي سم اخوي شبغيت ما سمعتك قلت الحمدلله انك ماسمعتي قالت امر قلت مايامر عليك عدو بغيت ثلاث سيارات شبح وثنتين كوريلا يلعبون فيهم العيال <--- يبي يبين انه من عيال الهاي هاي

قالت اخوي هذا مو معرض سيارات هذي صيدليه قلت اووه اسف تصدقين ظنيت نفسي بمعرض السيارات صحيح مشاغلنا كثيره وصرنا مانقدر حتى نركز قالت عادي اخوي امر قلت القطره الي عطيتك اياها كم بقى عندكم مثلها قالت كثير
قلت طيب عطيني درزن قطرات ابي وحده والباقي ابي ارميه للمستشفى يمكن ينفعهم

هي سمعت كلامي قالت ابشر وياليتها ماقالت ابشر وهقتني وعطتني الدرزن وانا احط ايدي بجيبي واشوف شي احمر بجيبي عرفت من ذلك الاحمرار انها خمسة ريالات فقط لاغير قلت لها ماعليش شكلي نسيت دفتر الشيكات بروح شوي وارجع لك قالت هي لا شدعوه خوذ الدرزن وفي اي وقت تعال عطني القيمه وثقت البنت فيني ياعيني صدقت الخبله

قلت لا شدعوه اخاف يجي المسؤل ويعرف ان فيه نقص قالت ماعليك ادفع انا القيمه لين تجي تبي تضبطني البنت ماتدري اني افة دوليه حذر منها بوش قبل لايحذر من الارهاب

قلت اوكي ماشي واذا تبين عطيني ورقه اكتب لك فيها وصل بقيمة سبعين الف لين اجي

قالت مايحتاج الثقه موجوده
هي قالت الثقه موجوده قعدت اناظر للجوال واقول اه بس لو تنترس ارقام بنات وتونسني ايها الدلخ

رد علي الجوال طبعاً من نوع نوكياً العنيد وقالي انت وجهك وجه ارقام بنات انت يخب عليك رقم حمد ابو راسين طبعاً هذا واحد من الشله الله يكفيكم شره

المهم قلت بقلبي البنت اوثقت فيني خلني بطريقه منحرفه من قلب اضبطها واللللعن ابو الفقر ياشيخ

قلت شوفي اختي <--- يعني مؤدب

خوذي رقم تلفوني ودقي علي اذا حسيتي باحراج من احد والا اذا سألوك عن قيمة القطرات

قالت فكره حلوه سجل رق تلفونك وانا قاعد اسجل اناظر يمين ويسار خايف من الهيئه

المهم قلت لها تفضلي والرقم مبين انه رقم واحد ذابحه الدين
كل الارقام موجوده من صفر لين التسعه مافيه رقم ماهو موجود حتى شركة الاتصالات يوم شافو رقمي كسرت خاطرهم قالولي شرايك نضيف برقمك النجمه والمربع مره وحده :no:

الحمدلله ماكشفت السالفه والا الرقم فضيحه

المهم بعد ربع ساعه وانا بالطريق متجه لبيتنا الكائن بحي تكسير الشبابيك وكثرت النبابيط جتني رساله مضمونها

امنتك الله لاتسرع وانتبه من الطريق

ماتدري اني لو اسرعت دواير السياره يروحون وطي

بعد نص ساعه وانا جالس بالبيت اتعشاء جتني رساله مضمونها لاتنسى العشاء وكل زين ولاتنسى القطره لعيونك

بعد يوم وانا جالس الصبح افطر جتني رساله مكتوب فيها انتهاء استلامي ولاشفت فلوس القطرات

جاء الظهر وجتني رساله مكتوب فيها فضلا اتصل بي على PLEASE CALL ME وحاطه رقمها شكلها فقرت البنت

المهم دقيت عليها دقه وسكرت علشان تدق هي وهي ترسل لي رساله مثلها وانا ادق دقه واسكر وهي ترسل رساله مثلها وانا ادق واسكر ادري ان الرساله ثلاث مرات بس تنرسل ابي اوهقها

والساعه 12.1 جتني نفس الرساله يعني يوم جديد

وانا ادق وهي ترد وتقول وين الفلوس قلت لها اووف تصدقين نسيت من كثر مشاغلي خلاص وين القاك الحين قالت انا بالصيدليه تعال وانا اجيها واقولها اسف من جد تأخرت عليك قالت لا عادي

قلت اوكي تفضلي الفلوس وفوقها كلمة اسف طبعاً القيمه 296 ريال متسلفها للراتب

قالت تصدق احس انك انسان غير الجميع

هنا قلبي بداء يرفرف ويقول دربق دربق


قلت لها تصدقين نفس الشعور احس فيه <--- احلى صاير يعرف يسولف { 2}

قالت ممكن اتعرف عليك اكثر قلت لها اسمي عبدالعزيز اعمال حره

قالت ممكن اكلمك كل يوم قلت لها كلي سرور <--- والله صاير مو سهل هالولد

وظلت تدق علي من ثلاث شهور لحد امس جتني رساله منها تقول الاخ عبدالعزيز الا ليت القطره تعود يوماً لكي لو تموت ما عطيتك اياها


دقيت عليها وقلت لها شمعنى الرساله هذي

قالت ياداشر انت تضحك علي انا قلت لها ليش قالت تعرف فلان ( فلان الي قلت اسمه يطلبني فلوس ومشتكي عند الحقوق علي الي سلفني حق القطرات )

قلت ايه اعرفه قالت هذا رقم جواله عطانياه وصارت بيننا معرفه وقالي عن سالفتك كلها ياداشر يالله رقمي امسحه من جوالك ولا عاد تتصل ماتدري ان جوالي يستقبل له سنه


ومن هذا المنطلق ومن هذه القصه المؤثره

نستنتج الاتي :-
1- ان الكشخه اذا جاك منها ريح سدها واستريح
2- ان البنت الصيدلانيه هدفها بالحياه الفلوس والفلوس ان زادت عن حدها انقلب على فرتها
3- ان شركة الاتصالات اضافت خدمة التوريط وهي فضلاً اتصل بي
4- يجب سماع نصائح الدكتور وعدم الذهاب للصيدليه بدون علمه الا اذا كنت رابط حزام الامان
5- تصليح دواير السيارات كي تسرع على كيفك
6- الحب ليس الهوى والهوى ليس ماء
7- لاتكثر من شراء القطرات وحده وتخب عليك
8- يجب من اصحاب الصيدليات وضع الفتياة بدلاً من الشباب يشوفون شلون تروح البضاعه
9- الحب كالسيف ان لم تقطعه لاتلحسه كله
10- لاتلوح للمسافر المسافر راح ( هذي مالها شغل بس علشان اقول قدرت اوصلها لعشر استنتاجات )


والسلام عليكم ورحمة الله وبركاته

اخوكم ( ذكــ،،،،،ـــريـــ،،،،ــات بــ،،،،ـــكــ،،،ـــره )