على ذاك الطريق اللي يسمونه غرام أحــباب
وطت رجلي على دربه ولا أدري وش سوا فــيني
تبعته لأخر دروبه ليمن القمر قد غـــــاب
تعب قلبي ولا تعبت مسافات توديـــــــــني
لقيت الليلة الجردا هدب ظل وسما وأعــشاب
بعد ذاك الظلام اللي يتوهني عـــــــــناويني
صدفتش معجبة فيني وياليت الغرام أعــجاب
وتراش أنتي الهنوف اللي هجـــــيتش تستحقيني
عطيتش عشق من قلبي وسلمت لـغلاش رقاب
وغيرش يحترق قلبه ولا يقدر يحـــــــاشيني
أنا قبلش صدفت عيون لكن ويش جاب لـجاب
ترا كل العيون اللي لجتني ما تكـــــــــفيني
رماني حظي العاثر عليش وجيتلش طـــلاب
ولا أنتي اللي عشقتيني ولا أنتـــــي اللي عتقتيني
تعالي وأرحمي ذاك الخفوق المولع المــرتاب
مهوب لجلي عشان الله يجازيش ويـــــــجازيني
تعدي في سما عشقي ولو عشقي خــــراب
أصحاب وصوني في الهوا نفسش قبل لا أنتي تصونيني
وشيليني على متنش خفوق باري مـــنصاب
ومن فوق الغرام العذب شيليني وحــــــــطيني
ولا منش هجيتيني شجاع وما يطيق يـــهاب
أنا لش بالهوا والله مثل منتي هجيـــــــــتيني
أنا ممشي ورا غيرش ولو أنه يطق الـــباب
وترا عيب علي أطعن ولو كثرت ســـــــكاكيني
زهود ما يطيق الدم لا دايم ولا طـــــلاب
شجاع وعارف نفسي وأظن أنش تــــــــعرفيني
غيور ما عرفت أضحك مع الغدر ببرود أعصاب
أبيع عيوني الثنتين قبل أنش تخــــــــــونيني
ومن اشد الغرام أحط قلبي بين نار ونـــاب
بفرقة تكسر ضلوعي ولا عشق يوطيــني
أنا رجل ولي غيره وإذا شفت الهوا كـــذاب
تثور بقلبي الفزعة ولا تهدا شياطـــيني
سؤالش لو يزعزع بي كياني ما قبلت عــتاب
اجيلش وأسألش نفس السؤال اللي سألتيني
عن العشق القديم أبواب وطق فيها كثير أبـواب
بعد ذاك الحبيب اللي خدعني وأنتي خدعتيني
أبي عشق تحسبله كل نظرات العيون حســـاب
وأبي قلب على قلبي وأبي دين على ديـني
وأبي كلمة عهد توفي ولا تخلف بدون أســباب
وأبي منش قبل لا أنتي تصديني تودينــي
وأبي درب على العذال صعب ومتعب وغــلاب
وأبي نفس الطريق الصعب يبعدهم ويدنيني
ترى لولا القلوب عيون ودموع العيون أهـداب
حشى ما تنزل الدمعة لغيرش لو تركـتيني
أنا أول من عرف قدرش وأنا توني صغير وشاب
أبي منش مدام أنش عرفتيني تحبـــيني
مدام أني لقيتش في طريق أسمه غرام أحــباب
دخيل الله وبعد الله دخيلش لا تخلـــيني
مدام كل من يحيا على وجه التراب تــــراب
عسى تنساني الدنيا مدام أنتي نكرتيــني